Pho kpẹ obo revun rọyen

Odjekẹ Vwọ kẹ Uyono rẹ Akpeyeren rẹ Avwanre vẹ Iruo Ruvie Na

Odjekẹ Vwọ kẹ Uyono rẹ Akpeyeren rẹ Avwanre vẹ Iruo Ruvie Na

Iyovwinreta

 

Ẹkorota

Ọdjẹkoko rẹ Obo re Che Yono

 2

Efe Rọhẹ Ota rẹ Ọghẹnẹ

 3

Muomaphiyọ Iruo Aghwoghwo Na

 4

Akpeyeren rẹ Inenikristi

 5

Ọdjẹkoko

 6

Muomaphiyọ Isese vẹ Eyono

 7

Uchebro

 8

Ọke

 9

Ekion rẹ Oniruo rẹ Okinriariẹ

 10

Udughwrẹn rẹ Osikoko Yẹrẹ Ọghwẹkoko

 11

Udughwrẹn rẹ Ẹkarophiyọ

 12

Oniruo rẹ Uyono rẹ Akpeyeren vẹ Iruo Ruvie Na

 13

Ochidiagbara rẹ Uyono rẹ Akpeyeren vẹ Iruo Ruvie Na

 14

Ọrọvwẹrote Iruo rẹ Ekpako Na

 15

Obruche

 16

Iklasi Rivẹ

 17

Ividio

 18

1. E che ru Uyono rẹ Akpeyeren Avwanre vẹ Iruo Ruvie Na kirobo ra vwerọphia vwevunrẹ Ọbe Uyono Rẹ Akpeyeren Avwanre vẹ Iruo Ruvie Na vẹ odjekẹ rehẹ obotọ na. Uphẹn rhiephiyọ vwọ kẹ ighwoghwota ejobi rẹ ayen vwo vwobọ vwẹ ẹbẹre rẹ Isese rẹ Baibol kugbe Muomaphiyọ Iruo Aghwoghwo Na. Ihwo efa re nabọ cha uyono, re rhọnvwephiyọ iyono rẹ Baibol na, ri ji yeren akpọ nene oborẹ ayen yonori ji se vwobọ vwọ.—be p. 282.

 2. Ọdjẹkoko rẹ Obo re Che Yono: Ibrẹro 3 kpotọ. Kudughwrẹn kudughwrẹn, a da so une, je nẹrhovwo ra vwọ ton uyono na phiyọ nu, ochidiagbara rẹ Uyono na cha ta ota rọ cha kpare oruru rẹ iniọvo na kpahen obo re che yono, o ji che djunute onọ rẹ Ẹrhomafuẹrẹn rẹ Obo re yonori vwẹ Akpeyeren Avwanre vẹ Iruo Ruvie Na.

 3. Efe Rọhẹ Ota rẹ Ọghẹnẹ:

  • Ota: Ibrẹro 10. Uyovwinrota na vẹ ẹkpo ivẹ yẹrẹ erha hẹ evunrẹ Ọbe Uyono rẹ Akpeyeren vẹ Iruo Ruvie Na. Ọkpako yẹrẹ odibo rowian ro muwan yen cha ta ota nana. Siẹrẹ a da cha ton ọbe rẹ Baibol kpokpọ phiyọ vwẹ isese rẹ Baibol rẹ kudughwrẹn kudughwrẹn, e che hworo ividio vwọ tuọnphiyọ. Ọtota na se djunute oborẹ ividio na vẹ uyovwinrota na shephiyọ ohwohwo wan. Ẹkẹvuọvo, e jẹ ọtota na vwo imuẹro nẹ ọ ta ota kpahen ẹkpo re djunute vwẹ ọbe uyono na. Ọke da herọ, ọ me je reyọ ihoho vẹ ẹkpo rẹ Baibol rehẹ ọbe rẹ uyono na vwo ruiruo vọnvọn.

  • Hiẹ Guọnọ Efe Na: Ibrẹro 8. Enọ vẹ ẹkpahọnphiyọ, o vwo ọtonphiyọ yẹrẹ okuphiyọ-ọ. Ọkpako yẹrẹ odibo rowian ro muwan yen cha vwẹrote ẹbẹre nana. Ọ sa rhuẹrẹ ọke rọ  cha ghwọrọ phiyọ enọ ẹne na vwo nene ọdavwẹ rẹ ukoko na. Ẹkẹvuọvo, ọ nọ otu na enọ na eje. O se brorhiẹn sẹ e se ẹkpo rẹ Baibol ejobi ra rionbọra rehẹ enọ ivẹ rẹsosuọ na yẹrẹ e ru ọtiọye-en. Aroẹbrẹ 30 kpotọ yen ihwo vwọ kpahenphiyọ enọ na.

  • Isese rẹ Baibol: Ibrẹro 4 kpotọ. Oniọvo ọshare yen a cha ghare ẹbẹre nana kẹ. Oniọvo na se asan rẹ Baibol na ọvo, ọ ta ota vuọvo vwẹ ọtonphiyọ yẹrẹ okuphiyotọ rẹ isese na-a. Ofori nẹ Ochidiagbara rẹ uyono na vwẹ ukẹcha kẹ iniọvo na rere ayen se vwo se gbagba, ghwraghwraghwra, vẹ ẹruọ kugbe upho ro shephiyọ, ayen dunuji vwẹ asan ro fori, ji se vwo nene obo rẹ ayen ta ota wan rere ọhọ rẹ asan na vwọ vwomaphia.

  4. Muomaphiyọ Iruo Aghwoghwo Na: Ibrẹro 15 kpotọ. E ru ẹbẹre nana rere ihwo ejobi vwo vwo uphẹn rẹ ayen vwo yono ona re vwo ghwoghwota, ji ru yovwinphiyọ vwẹ aghwoghwo kugbe eyono rẹ ihwo. E jẹ iniọvo ri vwo Obọ Rẹsosuọ vẹ Orhivwinbrura mu ota rayen kpahen obo wọ sa ta rọhẹ aruọbe 1 rẹ Ọbe Uyono rẹ Akpeyeren vẹ Iruo Ruvie Na. Ohwo ro vwo ota na yen che brorhiẹn sẹ ọ cha vwẹ ẹbe yẹrẹ ividio rọhẹ Ekpeti rẹ Uyono avwanre vwo ruiruo. E dje ọke rẹ ohwo vuọvo che vwo ru ẹbẹre rọyen vwẹ Ọbe Uyono rẹ Akpeyeren vẹ Iruo Ruvie Na, vwọba, ọkievo ọbe na je sa vwẹ odjekẹ efa vwọphia. Ihwo ri che vwobọ vwẹ ẹbẹre sansan nana reyọ eta nẹ asan ọfa vwọba asan ra vwọ kẹ ayen na kidie nẹ ọke rayen ji chekọ-ọ. Idje evo herọ, siẹrẹ a da nabọ muegbe rayen, ibrẹro evo ji chekọ tavwen ọke ra rhuẹrẹ kẹ ayen ki te. Ọkievo, a sa ghare ẹbẹre nana kẹ ọkpako.

  • Ividio rẹ Obo Wọ Sa Ta: E che hworo ividio rẹ udje rẹ obo wọ sa ta vwẹ udughwrẹn re vwọ kpahen ohwohwo vwẹ emeranvwe vuọvo. Ividio nana che djekpahen obọ rẹsosuọ, orhivwinbrura rẹ obọ rẹsosuọ, vẹ orhivwinbrura rẹ obọ rivẹ. Ochidiagbara rẹ Uyono na yen cha vwẹrote ẹbẹre nana.

  • Obọ Rẹsosuọ: A sa ghare ẹbẹre nana kẹ oniọvo rẹ ọshare yẹrẹ aye. A da ghare ẹbẹre nana kẹ oniọvo ọshare, ọshare yen cha vwẹ ukẹcha kẹ yẹrẹ ohwo rẹ orua rọyen, ọtiọyen ọ je hepha vwọ kẹ aye. Ayen se chidia yẹrẹ mudia ruo. E jẹ oniọvo ro vwo ota na sane uyeren ro shephiyọ vwẹ ekogho na. E jẹ o mu ẹbẹre nana kpahen obo wọ sa ta.

  • Orhivwinbrura rẹ Obọ Rẹsosuọ: A sa ghare ẹbẹre nana kẹ oniọvo rẹ ọshare yẹrẹ aye. A da ghare ẹbẹre nana kẹ oniọvo ọshare, ọshare yen cha vwẹ ukẹcha kẹ, ọtiọyen ọ je hepha vwọ kẹ aye. (km 5/97 aruọbe 2) Ayen se chidia yẹrẹ mudia ruo. Ohwo ro vwo ota na ru udje rẹ obo rọ cha ta siẹrẹ o de rhivwin bru ohwo ro dje omavwerhovwẹn phia obọ rẹsosuọ. E jẹ o mu ẹbẹre nana kpahen obo wọ sa ta rọhẹ Ọbe Uyono rẹ Akpeyeren vẹ Iruo Ruvie Na.

  • Orhivwinbrura rẹ Obọ Rivẹ: A sa ghare ẹbẹre nana kẹ oniọvo rẹ ọshare yẹrẹ aye. A da ghare ẹbẹre nana kẹ oniọvo ọshare, ọshare yen cha vwẹ ukẹcha kẹ, ọtiọyen ọ je hepha vwọ kẹ aye. (km 5/97 aruọbe 2) Ayen se chidia yẹrẹ mudia ruo. Ohwo ro vwo ota na ru udje rẹ obo rọ cha ta siẹrẹ o de rhivwin bru ohwo ro dje omavwerhovwẹn phia vwẹ orhivwinbrura rẹ obọ rẹsosuọ. E jẹ o mu ẹbẹre nana kpahen obo wọ sa ta.

  • Uyono rẹ Baibol: A sa ghare ẹbẹre nana kẹ oniọvo ọshare yẹrẹ aye. A da ghare ẹbẹre nana kẹ oniọvo ọshare, ọshare yen cha vwẹ ukẹcha kẹ yẹrẹ ohwo rẹ orua rọyen, ọtiọyen ọ je hepha vwọ kẹ aye. (km 5/97 aruọbe 2) Ayen se chidia yẹrẹ mudia ruo. Vwẹ ẹbẹre nana, e jẹ e ru udje rẹ uyono rẹ Baibol rọ tonphiyọ jovwo re. Ẹbẹre nana ghwa guọnọ eta rẹ ọtonphiyọ yẹrẹ okuphiyọ-ọ, jokpanẹ ọyen ẹkpo rẹ ohwo na wian kpahan. Ọ dia urhi nẹ e se ẹkoreta na eje rehẹ asan re yono na phia-a, ọ da tobọ dianẹ e se se ayen eje. E jẹ udje na dje uvi rẹ ona re vwo ru uyono phia.

  •   Ota: Oniọvo ọshare yen a cha ghare ẹbẹre nana kẹ. Ọ me je ta rhe otu na.

  5. Akpeyeren rẹ Inenikristi: A da so une nu, ibrẹro 15 rọ vwọ kpahọn, vwo ẹbẹre ọvo yẹrẹ ivẹ ra rhuẹrẹphiyọ rere ọ vwẹ ukẹcha kẹ iniọvo na vwọ vwẹ Ota rẹ Ọghẹnẹ vwo ruiruo vwẹ akpeyeren rayen. Jokpanẹ ke djerephia, ọ rha dia ọtiọye-en, a sa ghare ẹbẹre nana kẹ ekpako yẹrẹ idibo rowian ri muwan, jokpa rẹ ẹbẹre rẹ ọdavwẹ rukoko rẹ ekpako ọvo cha vwọphia.

  • Uyono rẹ Baibol Rukoko: Ibrẹro 30. Ọkpako ro muwan yen a cha ghare ẹbẹre nana kẹ. (Odibo rowian ro muwan sa vwẹ ẹbẹre nana vwọphia ọ da dianẹ ekpako na ghwe bu-un.) Ekpako na yen che brorhiẹn rẹ ohwo ro muwan rọ vwọ reyọ ẹbẹre rẹ Uyono rẹ Baibol Rukoko na vwọphia. Ihwo ra rhọnvwe kẹ davwẹngba rẹ ayen vwọ vwẹ uyono na phia vwẹ idjerhe ro fiotọ rere ayen sa vwọ yan mu ọke, ayen kanrunumu ẹkpo rẹ Baibol ra guọnọre, je chọn iniọvo na uko vwọ riẹn oborẹ ayen sa vwẹ obo re yonori na vwo ruiruo. Ayen sa mrẹ ukẹcha siẹrẹ ayen da fuẹrẹn odjekẹ ra teyenphia kpahen obo re ru Uyono rẹ Uwevwin Orhẹrẹ. Ọ da dia obo re se ru, ofori e rhe wene iniọvo re cha vwẹrote uyono na vẹ iniọvo ri che se kẹ ayen kudughwrẹn kudughwrẹn. Ochidiagbara rẹ Uyono na da vwẹ odjekẹ phia nẹ e ru uyono na krẹn, oniọvo rọ vwẹrote ẹbẹre yena yen che brorhiẹn rẹ obo ro che ruo wan. Ọ sa tanẹ e se ẹkoreta evo-o.

  6. Ọdjẹkoko: Ibrẹro 3 kpotọ. Ochidiagbara rẹ Uyono na che ru ọdjẹkoko rẹ ẹkpo kiriguo rẹ uyono na, ọtiọyen ji te onọ vẹ ẹkpahọnphiyọ ro nẹ Ẹrhomafuẹrẹn rẹ Obo re Yonori Vwẹ Akpeyeren Avwanre vẹ Iruo Ruvie Na rhe. O ji djunute obo re che yono vwẹ udughwrẹn rọ vwọ kpahọn. O se djunute onọ ọvo ra cha kpahenphiyọ vwẹ uyono rọ cha na. Ọke da herọ, o se se odẹ rẹ ohwo ro vwo Isese rẹ Baibol vẹ iniọvo ri che vwobọ vwẹ ẹbẹre rẹ Muomaphiyọ Iruo Aghwoghwo Na vwẹ udughwrẹn rọ cha na. Jokpanẹ ke djerephia, ọ rha dia ọtiọye-en, e jẹ ochidiagbara na ghwoghwo aghwoghwo ri fori, ji se ileta ri fori kẹ ukoko na siẹrẹ o de ruẹ ọdjẹkoko na. Aghwoghwo re ruẹ ọkieje, kerẹ i ri shekpahen ọrhuẹrẹphiyotọ rẹ ada kugbe orufon, e ruẹ ayen vwẹ umukpe-e, ukperẹ ọtiọyen, a vwẹ ovuẹ na tamu ophapha rẹ ovuẹ na. Ọ da dianẹ ọke ra rhuẹrẹphiyọ kẹ ọdjẹkoko rẹ ochidiagbara na che te vwo ru aghwoghwo yẹrẹ se ileta-a, e gbe jẹ ọ vuẹ ihwo ri vwo ota vwẹ ẹbẹre rẹ Akpeyeren rẹ Inenikristi nẹ ayen bru eta rayen krẹ rere a sa mrẹ ọke vwo ru ọtiọyen. (Ni  ẹkoreta 5 vẹ  9.) A cha vwẹ une vẹ ẹrhovwo vwo ku uyono na phiyọ.

 7. Muomaphiyọ Isese vẹ Eyono: Vwo nẹ udughwrẹn rẹ January 7, 2019, e jẹ ochidiagbara rẹ Uyono na mu ujiri vẹ uchebro rọyen kpahen ibroshọ rẹ Isese vẹ Eyono na. E jẹ iniọvo ri vwo isese rẹ Baibol vẹ i ri vwo ẹbẹre vwẹ Muomaphiyọ Iruo Aghwoghwo na wian kpahen ẹkpo re si phiyọ ibrakẹti kẹre ota rayen vwẹvunrẹ Ọbe Uyono rẹ Akpeyeren vẹ Iruo Uvie Na. Vwẹ udughwrẹn rẹsosuọ rẹ kemeranvwe kemeranvwe, ochidiagbara rẹ Uyono na cha reyọ ẹkpo ọvuọvo vwevunrẹ ibroshọ rẹ Isese vẹ Eyono na vwo ru otaẹtakuẹgbe. Ibroshọ rẹ Isese vẹ Eyono na vwo ẹkpo re se “Si Ẹyan-obaro Wẹn Phiyotọ.” Ohwo ro vwo ota na yen che si ẹyan-obaro rọyen phiyọ ẹkpo nana, ọ dia ochidiagbara na-a.

  8. Uchebro: Ohwo ro vwo isese rẹ Baibol vẹ i ri vwo ẹbẹre vwẹ Muomaphiyọ Iruo Aghwoghwo na da ta ota ra ghare kẹ ayen nu, ochidiagbara rẹ Uyono na vwo omarẹ ibrẹro ọvo rọ vwọ vwẹ ujiri vẹ uchebro re mu kpahen ibroshọ rẹ Isese vẹ Eyono na vwọphia kẹ ohwo ọvuọvo. Ọke ochidiagbara rẹ uyono na de durhie oniọvo ro vwo ota, o che djunute ẹkpo ra guọnọre nẹ ọ wian kpahen na-a. Ẹkẹvuọvo, siẹrẹ oniọvo na da ta ota rọyen nu, ochidiagbara na da je nabọ jiro nu, ọ sa ta ota kpahen ẹkpo rẹ oniọvo na wian kpahen, ji djunute oborẹ oniọvo na ru yovwin te vwẹ ẹkpo yena yẹrẹ ọ ta kpahen oboresorọ rẹ oniọvo na vwọ rhoma wian kpahen ẹkpo yena. Ochidiagbara na je sa ta ota kpahen ẹbẹre ọfa rẹ udje na siẹrẹ o de no nẹ o che fierere kẹ ohwo ro vwo ota na yẹrẹ otu na. Ọ je sa vwẹ uchebro ro fori ro nẹ ibroshọ rẹ Isese vẹ Eyono yẹrẹ ọbe rẹ Ministry School na vwọphia, o mi ji ru ọtiọyen vwẹ ehoho ọke e de ru uyono na nu  yẹrẹ vwẹ ọke ọfa, uchebro na mi shekpahen asan ra tare nẹ ọ wian kpahen yẹrẹ ẹbẹre ọfa rẹ ota rọyen na.—Vwọ kẹ evuẹ efa ri shekpahen ẹdia ro te oniruo rẹ Uyono rẹ Akpeyeren vẹ Iruo Ruvie Na kugbe obruche na, ni  ẹkoreta 13 vẹ  16.

    9. Ọke: E jẹ eta rẹ iniọvo na yẹrẹ uchebro rẹ ochidiagbara rẹ Uyono na vrẹ ọke ra rhuẹrẹphiyọ na-a. Iniọvo ri vwo Isese rẹ Baibol vẹ i ri vwo ẹbẹre vwẹ Muomaphiyọ Iruo Aghwoghwo Na de ru ọke rayen gba nu, a vwẹ ona dobọ rayen ji. Siẹrẹ iniọvo ri vwo eta efa de ru ọke vrẹ, e jẹ obruche na vwẹ uchebro vwọ kẹ ayen vwẹ ehoho. E jẹ uyono na eje, te une vẹ ẹrhovwo dia unọke 1 gbe ibrẹro 45.

 10. Ekion rẹ Oniruo rẹ Okinriariẹ: Siẹrẹ oniruo rẹ okinriariẹ de rhi kin ukoko na, e jẹ e ru uyono na nene obo ra rhuẹrẹphiyọ vwẹ Ọbe Uyono rẹ Akpeyeren vẹ Iruo Ruvie Na, jokpa rẹ ewene nana: A cha vwẹ ota rẹga rẹ ibrẹro 30 rẹ oniruo okinriariẹ cha ta vwo wene Uyono rẹ Baibol Rukoko rọhẹ ẹbẹre rẹ Akpeyeren rẹ Inenikristi. Ochidiagbara rẹ Uyono na che ru ọdjẹkoko rẹ uyono na vẹ ọ rọ cha na, ru aghwoghwo, ji se ileta ri fori tavwen o ki durhie oniruo rẹ okinriariẹ na. Siẹrẹ oniruo rẹ okinriariẹ na da ta ota rẹga na nu, o che ku uyono na phiyọ vẹ une rọ jẹ re. E che ru iklasi rivẹ vwẹ ọke rẹ oniruo rẹ okinriariẹ da rhe-e. Ẹko rọ jẹ ejajẹ ọfa se ru uyono rayen ọke rẹ oniruo rẹ okinriariẹ de kiẹn ukoko na. Ẹkẹvuọvo, ẹko na vwomaba ukoko na ọke rẹ oniruo rẹ okinriariẹ na da cha ta ota rẹga na.

 11. Udughwrẹn rẹ Osikoko Yẹrẹ Ọghwẹkoko: E che ru uyono vuọvo vwẹ udughwrẹn rẹ osikoko yẹrẹ ọghwẹkoko-o. Ohwo ọvuọvo yẹrẹ orua fuẹrẹn ọrhuẹrẹphiyotọ rẹ uyono rẹ udughwrẹn yena.

 12. Udughwrẹn rẹ Ẹkarophiyọ: Ẹkarophiyọ na de she phiyọ uvwre rẹ udughwrẹn na, e che ru omẹvwa rẹ uvwrẹ rẹ udughwrẹn yena-a. Ẹkẹvuọvo e che ru omẹvwa rẹ aghwoghwo vwẹ ẹdẹ rẹ Ẹkarophiyọ na.

  13. Oniruo rẹ Uyono rẹ Akpeyeren vẹ Iruo Ruvie Na: Ọkpako rẹ ekpako na sanere yen cha dia oniruo rẹ Uyono rẹ Akpeyeren vẹ Iruo Ruvie Na. O vwo oghwa rọ vwọ mrẹvughe nẹ e ru uyono na abavo, ji nene odjekẹ nana. Ọyen vẹ obruche na ta ota kugbe ọkieje. Ugege rẹ Ọbe Uyono rẹ Akpeyeren vẹ Iruo Ruvie Na ghwa vwọ rhe ye, ọyen oniruo rẹ Uyono rẹ Akpeyeren vẹ Iruo Ruvie Na vwọ ghare ota kẹ ihwo vwẹ emeranvwe yena. (Ni  ẹkorota 4.) E jẹ a ghare eta rẹ iniọvo rehẹ isikuru na, ọ da havwen mamọ udughwrẹn erha tavwen ẹdẹ rẹ ayen cha vwọ ta ota na ki te womarẹ Ifọmu rẹ Uyono rẹ Akpeyeren rẹ Avwanre vẹ Iruo Ruvie Na (S-89).

 14. Ochidiagbara rẹ Uyono rẹ Akpeyeren vẹ Iruo Ruvie Na: Kudughwrẹn kudughwrẹn, ọkpako ọvo cha dia ochidiagbara rẹ Uyono na. (Odibo rowian ro muwan sa vwẹrote ẹbẹre nana siẹrẹ ekpako rehẹ ukoko na rhe bu-un.) O vwo oghwa ro vwo muegbe rẹ ọdjẹkoko ra cha vwọ ton uyono na phiyọ vẹ ọ re che vwo kuophiyọ, ta ota kpahen ividio rẹ obo wọ sa ta, eriyin ji te ividio re che vwo djekpahen ẹkpo rẹ ota vuọvo rehẹ ibroshọ rẹ Isese vẹ Eyono na. Ọyen ji che durhie ihwo ri vwo eta, siẹrẹ ekpako rehẹ ukoko na rhe bu-un, ọ je sa ta ota vwẹ uyono na. Jẹ eta rọ cha vwọ kpẹvwẹ, ji vwo durhie ọtota ọfa dia krẹn. Ekpako na eje yen che brorhiẹn rẹ ekpako ri muwan kẹ ẹdia nana. Nẹ ọke ra ruọke, a cha ghare iruo rẹ ochidiagbara na kẹ ekpako ri muwan. A sa ghare iruo rẹ ochidiagbara na kẹ oniruo rẹ Uyono rẹ Akpeyeren vẹ Iruo Ruvie Na abọ buebun vwọ vrẹ ekpako efa ri muwan. Ọkpako ro muwan rọ vwọ vwẹrote Uyono rẹ Baibol Rukoko, ji se muwan rọ vwọ dia ochidiagbara rẹ uyono na. Biko karophiyọ nẹ ọkpako rọ dia ochidiagbara na yen cha vwẹ uchebro vẹ ujiri phia vwọ kẹ iniọvo ri vwo Isese rẹ Baibol, Obọ  Rẹsosuọ, Orhivwinbrura vẹ Uyono rẹ Baibol, e jẹ o ru ọtiọyen vwọrẹ ẹguọnọ. Ochidiagbara na ji vwo oghwa rọ vwọ mrẹvughe nẹ uyono na kuphiyọ vwẹ ọke ra rhuẹrẹphiyọ na. (Ni  ẹkoreta 6 vẹ  9.) O de wen ochidiagbara na, asan da je herọ, e se mu maikrofon phiyọ enu rẹ umukpe na rere ọ vwẹ maikrofon na vwo ruiruo siẹrẹ o de durhie ihwo ri vwo eta, jẹ ihwo ri vwo eta hẹ asan rẹ ayen da cha ta ota na re. Ochidiagbara na ji se chidia enu rẹ umukpe na ọke rẹ ohwo ro vwo Isese rẹ Baibol vẹ e rẹ ẹbẹre rẹ Muomaphiyọ Iruo Aghwoghwo Na de ru ẹbẹre rayen. Ọnana sa nẹrhẹ a yan mu ọke.

 15. Ọrọvwẹrote Iruo rẹ Ekpako Na: Ọrọvwẹrote iruo rẹ ekpako na yen cha ghare eta kẹ iniọvo na eje, jokpa rẹ ihwo ri vwo Isese rẹ Baibol vẹ ẹbẹre vwẹ Muomaphiyọ Iruo Aghwoghwo na. Ọyen je cha ghare iruo rẹ ochidiagbara kẹ ekpako rẹ ẹko rẹ ekpako na rhọvwen kẹ nẹ i muwan. E jẹ ọrọvwẹrote iruo rẹ ekpako na vẹ oniruo rẹ Uyono rẹ Akpeyeren vẹ Iruo Ruvie Na vwo imuẹro nẹ a vwẹ ọrhuẹrẹphiyotọ rẹ ihwo ri vwo eta vwọ tamu ophapha rẹ ovuẹ na.

  16. Obruche: Ọ da dia obo re se ru, e jẹ obruche na dia ọkpako rọ tẹn ona rẹ ota ẹta. Owian rẹ obruche na, ọyen ọ vwọ vwẹ uchebro kẹ ekpako yẹrẹ idibo rowian vwẹ ehoho siẹrẹ a da guọnọ fikirẹ ota rayen vwẹ Uyono rẹ Akpeyeren vẹ Iruo Ruvie Na, ota rotu, ayen da vwẹrote yẹrẹ se vwẹ Uyono rẹ Uwevwin Orhẹrẹ vẹ Uyono rẹ Baibol Rukoko. (Ni  ẹkorota 9.) Siẹrẹ ukoko na de vwo ekpako buebun re tẹn ona rẹ ota ẹta, e se wene ọkpako rọ dia obruche na kukpe kukpe. A ghwa guọnọ nẹ obruche na vwẹ uchebro vwọ phia vwẹ kota kota rẹ ọkpako yẹrẹ odibo rẹ owian tare-e.

 17. Iklasi Rivẹ: Siẹrẹ ihwo ri vwo eta vwẹ isikuru na de bun mamọ, a sa ghare ayen phiyọ iklasi ivẹ. Vwẹ iklasi rivẹ na, ofori nẹ ọkpako ro muwan dia obruche. Ọkpako rọ cha vwẹrote ẹdia nana rha herọ-ọ, odibo rowian ro muwan je sa vwẹrote. Ekpako na yen che brorhiẹn rẹ ohwo ro muwan vwọ kẹ ẹdia nana kugbe sẹ e che rhe wene. Ofori nẹ obruche na nene odjekẹ rọhẹ  ẹkorota 8. Siẹrẹ iklasi rivẹ da herọ, e de ghwe ru ẹbẹre rẹ Hiẹ Guọnọ Efe Na rọhẹ obotọ rẹ Efe Rọhẹ Ota rẹ Ọghẹnẹ nu, iniọvo ra ghare phiyọ iklasi rivẹ na gbe vrẹ kpo iklasi na. Ayen vwomaba iniọvo ri chekọ siẹrẹ e de ru uyono rẹ Muomaphiyọ Iruo Aghwoghwo Na nu. Ọ da dia obo re se ru, ọke re de hworo ividio rẹ obo wọ sa ta, je ta ota kpahọn, e jẹ ihwo rehẹ iklasi rivẹ na ni yẹrẹ kerhọ rẹ ividio na vwevunrẹ iklasi rivẹ na. Ọ rha dia ọtiọye-en, e gbe jẹ obruche na reyọ ifonu vwo hworo ividio na je ta ota kpahọn kẹ iklasi rivẹ na.

 18. Ividio: Ividio ra rhuẹrẹphiyotọ yen e che vwo ru ẹbẹre nana. A cha mrẹ ividio re che vwo ruiruo vwẹ uyono rẹ uvwre rẹ udughwrẹn na vwẹ aplikeshọni rẹ JW Library ra sa vwẹ ifonu, itablẹti vẹ erọnvwọn efa vwo rhie. Ọkievo, e se hworo ividio rẹ obo wọ sa ta vwẹ omẹvwa rẹ aghwoghwo na, siẹrẹ e de hworo vwẹ Uyono rẹ Akpeyeren vẹ Iruo Ruvie Na nu.