Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Uwevwin Orhẹrẹ  |  Ukeri 5 2017

 UYOVWINROTA RẸ ỌBE NA | DIE YEN BAIBOL NA TA KPAHEN EMEKASHE?

Idjerhe rẹ Emekashe Sa Vwọ Chọn Wẹ Uko

Idjerhe rẹ Emekashe Sa Vwọ Chọn Wẹ Uko

Emekashe re fuevun vwo ọdavwe kpahen ihworakpọ, ayen nabọ vwobọ vwẹ eruo rẹ ọhọre rẹ Jihova. Ọke rẹ Ọghẹnẹ vwọ ma akpọ na, emekashe na so une kugbe, ayen de kperi vẹ “aghọghọ.” (Job 38:4, 7) Ọkieje yen emekashe vwo vwo owenvwe rẹ ayen vwọ “mrẹ” eta rẹ aroẹmrẹ ri shekpahen obo re cha phia vwẹ obaro rẹ akpọ na.​—1 Pita 1:11, 12.

Baibol na djerephia nẹ rere ọhọre rẹ Ọghẹnẹ vwo rugba, emekashe vwẹ ukẹcha kẹ egọghẹnẹ rẹ uyota vwẹ ọke evo re wanre. (Une Rẹ Ejiro 34:7) Kerẹ udje:

  • Ọke rẹ Jihova vwọ ghwọrọ Sodọm vẹ Gomora fikirẹ umwemwu rayen, emekashe vwẹ ukẹcha kẹ Lọt rọ dia ọvwata vẹ orua rọyen vwọ djẹ vrabọ.​—Jẹnẹsis 19:1, 15-26.

  • Ọke re vwo brorhiẹn hwe ighene rẹ Hibru erha nẹ e do ayen phiyọ erhanre vwẹ Babilọn ọke awanre, Ọghẹnẹ de “ji amakashe rhe rhi sivwi idibo rọye.”​—Daniẹl 3:19-28.

  • Ọke rẹ Daniẹl vwọ dia unu rẹ ikpohrokpo ason hrọke nu, ọ da ta nẹ, “Ọghẹnẹ mẹ ji amakashe rọye rhi rhurhu inu rẹ ikpohrokpo na.”​—Daniẹl 6:16, 22.

Nẹ awanre rhe yen emekashe reyọ ukẹcha kẹ ihwo re fuevun

EMEKASHE VWẸ UKẸCHA KẸ UKOKO RẸ INENIKRISTI RẸ ẸGBUKPE UJORIN RẸSOSUỌ

Vwẹ ọke evo, Ọghẹnẹ ji emekashe rọyen rhe vwẹ ukẹcha kẹ ukoko rẹ Inenikristi rẹ ẹgbukpe ujorin rẹsosuọ vwẹ iruo rayen rere ọhọre rọyen se vwo rugba. Kerẹ udje:

  • Amakashe ọvo rhie ẹchẹ rẹ uwodi re mu iyinkọn na phiyọ, ọ da vuẹ ayen nẹ ayen re ghwoghwo vwẹ uwevwin rẹ ẹga na.​—Iruo Rẹ Iyinkọn Na 5:17-21.

  • Amakashe ọvo vuẹ Filip nẹ o kpo idjerhe rẹ aton ro nẹ Jerusalẹm kpo Gaza re ghwoghwota kẹ ohwo rẹ Etiopia ro kpo ẹga vwẹ Jerusalẹm jovwo.​—Iruo Rẹ Iyinkọn Na 8:26-33.

  • Ọke rẹ Ọghẹnẹ vwọ rhọnvwe kẹ otu rẹ igiye nẹ ayen sa dia Inenikristi, amakashe ọvo da vwomaphia kẹ onotu rẹ isodje rẹ Rom re se Kọniliọs vwevunrẹ emramrẹ, ọ da vuẹ nẹ o durhie ọyinkọn Pita rhe uwevwin rọyen.​—Iruo Rẹ Iyinkọn Na 10:3-5.

  • Ọke re vwo mu ọyinkọn Pita phiyọ uwodi, amakashe ọvo vwomaphia kẹ, ọ da reyọ vwo nẹ uwodi na.​—Iruo Rẹ Iyinkọn Na 12:1-11.

 IDJERHE RẸ EMEKASHE SA VWỌ CHỌN WẸ UKO

A mrẹ emu vuọvo ro djerephia nonẹna nẹ Ọghẹnẹ je reyọ emekashe vwọ vwẹ ukẹcha kẹ ihwo vwẹ idjerhe rẹ igbevwunu kirobo re djisẹ rọyen vwẹ Baibol na-a. Ẹkẹvuọvo vwọ kpahen ọke rẹ avwanre na, Jesu da ta: “Ka cha ta ota rẹ iyẹnrẹ esiri na wan akpọ na ejobi, rere ọ vwọ dia iseri kẹ ẹgborho na ejobi: tavwe rẹ oba na ki rhi te.” (Matiu 24:14) Wọ riẹnre nẹ emekashe na yen vwẹ odjekẹ vwọ kẹ idibo rẹ Kristi vwevunrẹ iruo nana?

Emekashe na vwẹ ukẹcha phia vwẹ aghwoghwo rẹ iyẹnrẹn esiri na vwẹ akpọ na ejobi

Ọbe rẹ Ẹvwọphia djerephia nẹ emekashe na cha nabọ vwẹ ukẹcha kẹ ihwo vwo yono uyota ro shekpahen Jihova Ọghẹnẹ kugbe ọhọre rọyen vwọ kẹ ihworakpọ. Ọyinkọn Jọn de si: “Me da mrẹ amakashe ọfa rọ rhan vwẹ uherevie rẹ odjuvwu, ọ vẹ iyẹnrẹ esiri ri bẹdẹ na ro ghwoghwo kẹ ayen otu re dia akpọ na, kẹgborho kẹgborho kugbe orua korua kugbe ephẹrẹ kephẹrẹ kugbe ohwo kohwo; ọ da van gangan ta, Djẹ oshọ rẹ Ọghẹnẹ re a vwẹ urinrin kẹ kidie ọke rẹ ẹdjọeguo rọye tere; gọ ohwo ro ma odjuvwu vẹ akpọ, abadi na kugbe igbugbu rẹ ame na.” (Ẹvwọphia 14:6, 7) Ikuegbe rẹ oborerhiẹromrẹ nonẹna ghwe djephia nẹ emekashe na ghene vwẹ ukẹcha phia vwẹ iruo rẹ aghwoghwo rẹ Uvie na re ruẹ vwẹ akpọeje. Vwọrẹ uyota, “aghọghọ herọ vwẹ obaro rẹ emakashe rẹ Ọghẹnẹ vwẹ enu rẹ oruimwemwu ọvo ro kurhẹriẹ.”​—Luk 15:10.

Die yen cha phia siẹrẹ e de ruiruo rẹ aghwoghwo na re nu? Emekashe re dia “otuofovwi rẹ odjuvwu” ki che bicha Jesu Kristi rọ dia Ovie rẹ Ivie vwo phi “ofovwi rẹ ẹdẹ rode rẹ Ọghẹnẹ Ọrovwoẹgba na” vwẹ Amagidọn. (Ẹvwọphia 16:14-16; 19:14-16) Ọke rẹ Ọrovwori Jesu da cha “vwẹ ayen otu . . . ri jẹ ọghọ emuo kẹ iyẹnrẹ esiri rẹ Ọrovwavwanre” na vwo guẹdjọ, emekashe na yen ọ cha vwọ ghwọrọ ihwo ọtiọyena.​—2 Tẹsalonaika 1:7, 8.

Ọtiọyena, vwo imuẹro nẹ emekashe na vwo ọdavwẹ wẹn. Ayen vwo ọdavwẹ okokodo kpahen akpeyeren rẹ ihwo ri vwo owenvwe rẹ ayen vwọ ga Ọghẹnẹ, Jihova reyọ ayen vwọ kpuriẹn phiyọ, je chochọn rẹ idibo rọyen vwẹ otọrakpọ na abọ buebun re.​—Hibru 1:14.

Ọtiọyena, avwanre ohwo ọvuọvo vwo orhiẹn ọghanghanre re che bru. Avwanre cha kerhọ, ji ru nene iyẹnrẹn esiri re ghwoghwo vwẹ akpọeje nonẹna? Oma cha vwerhen Iseri rẹ Jihova rehẹ ekogho wẹn ayen vwọ vwẹ ukẹcha kẹ wẹ vwọ mrẹ erere vwo nẹ ukẹcha rẹ emekashe rẹ Ọghẹnẹ vwọ phia.