Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Diesorọ Avwanre Vwọ Ghwa ji Ghwẹ?

Diesorọ Avwanre Vwọ Ghwa ji Ghwẹ?

ỌGHẸNẸ guọnọre nẹ ihworakpọ ghwu-u. A ma ọsẹ vẹ oni avwanre rẹsosuọ, Adam vẹ Ivi gbagba; manẹ ayen rhe ghwu-u. A mrẹ ọnana vughe womarẹ oborẹ Jihova vuẹ Adam kpahen urhe ọvo rọ kọn phiyọ ogba rẹ Idẹn.

Ọghẹnẹ da vuẹ Adam: “Ẹdẹ re wọ rerọ ku wo ghwu.” (Jẹnẹsis 2:17) Ọ da dianẹ Ọghẹnẹ ma Adam ayen vwọ ghwo ji ghwu, kọyen iji yena rhe vwo otọ-ọ. Adam riẹnre nẹ ọyen rha re emamọ re urhe na-a, ọyen che ghwu-u.

ỌGHẸNẸ GUỌNỌRE NẸ IHWORAKPỌ GHWU-U.

Emamọ buebun vọn evunrẹ ogba na rẹ Adam vẹ Ivi sa re, ọ ghwa dia ọyena ọvo-o. (Jẹnẹsis 2:9) Ọshare vẹ aye rẹsosuọ na se djephia nẹ ayen nyupho rẹ Ọghẹnẹ siẹrẹ ayen rha re omamọ rẹ urhe yena-a. Ọyena ji che djephia nẹ ayen mrẹvughe nẹ Ọghẹnẹ ọvo yen sa vuẹ ayen oborẹ ayen che ru.

OBORESORỌ ADAM VẸ IVI VWO GHWU

A sa vwọ riẹn oboresorọ Adam vẹ Ivi vwo ghwu, e jẹ avwanre fuẹrẹn oborẹ ọtakugbe ọvo vwo djobọte avwanre eje. Eshu da womarẹ ọrọdekọ vwọ gun efian ọbrabra ọvo. Baibol na da ta: “Asakiephana ọrọdekọ kọye me vwo aghwanre nọ eranvwe ri chekọ vwẹ aghwa rẹ Ọrovwohwo Ọghẹnẹ mare na. Ọ da ta kẹ aye na, Ọ dianẹ Ọghẹnẹ tare nẹ, Wo re emamọ rẹ irhe rẹ udju na vuọvo-o?”—Jẹnẹsis 3:1.

Ọtiọyena, Ivi da kpahen kẹ: “Avwanre sa re emamọ rẹ irhe rẹ udju na; ẹkẹvuọvo Ọghẹnẹ tare nẹ, Wa ria emamọ rẹ urhe rọ uherevie rẹ udju na-a, eyẹ wa vwẹ obọ te-e, we de rhe ghwu. Ẹkẹvuọvọ ọrọdekọ na da ta kẹ aye na, We che ghwu-u. Kidie Ọghẹnẹ riẹnre nẹ ọke wa da riọ ẹro rẹ ovwan ko rhie, ku wa họhọ Ọghẹnẹ, rọ riẹn erhuvwu vẹ umiovwo.” Ọtiọyena, Idẹbono de dje Jihova phiyọ ọvwọrefian ro si emu esiri nu vwọ kẹ Adam vẹ Ivi.—Jẹnẹsis 3:2-5.

Ivi de rhi vwo esegbuyota kpahen obo ro nyori na. Kọ tẹnrovi urhe na. Urhe na de je mamọ! Ọtiọyena, ọ da kọrọ evo usun rẹ emamọ na, ọ da riọ. Baibol na da ta: “Ọ da je vwẹ evo kẹ ọshare rọye ọ da je re.”—Jẹnẹsis 3:6.

Ọghẹnẹ da ta kẹ Adam: “Ẹdẹ re wọ rerọ ku wo ghwu.”—JẸNẸSIS 2:17

Mavọ wo rorori nẹ ọ cha da Ọghẹnẹ te, rọ vwọ mrẹ emọ ro vwo ẹguọnọ kpahen ri vwẹ arogba vwọ churhi rọyen! Die kọyen o ruru? Jihova da ta kẹ Adam: “Wo che . . . rhivwi kpo otọ ri wo nurhe, ekpẹn wo ji che hirhe ra.” (Jẹnẹsis 3:17-19) Fikirẹ ọnana, “akpọ rẹ Adam ejobi da dia ikpe uri ẹnẹ gbe ujosa gbe ihwe; o ki rhi ghwu.” (Jẹnẹsis 5:5) Adam kpo odjuvwu yẹrẹ asan ọfa ra dia-a. Ọ hẹ asan vuọvo tavwen Jihova ki vwẹ ekpẹn vwọ ma-a. Ọtiọyena, ro vwo ghwu nu, ọ da rhe dia kerẹ ekpẹn ro jẹ arhọ evwo. Ọ rha herọ ọfa-a. Ọ da ohwo dẹn!

OBORESORỌ AVWANRE VWỌ DIA IHWO RI JẸGBA

Adam vẹ Ivi de ku uphẹn rẹ ayen vwọ dia bẹdẹ vẹ ugboma ọgbagba rayen kufia kidie ayen vwẹ arogba  vwọ churhi rẹ Ọghẹnẹ. Ugboma rayen de rhi wene; ayen da dia irumwemwu, ihwo ri jẹgba. Jẹ, ọ dia ayen ọvo yen umwemwu rẹ ayen ruru na djobọte-e. Emọ rayen eje da riuku rẹ umwemwu rayen. Rom 5:12 da ta: “Umwemwu wan oma rẹ ohwo ọvo [Adam] rhe akpọ rẹ ughwu da wan oma rẹ umwemwu rhe na, ọtiọye na ughwu da hrabọ ro ihwo ejobi fikiridie ihwo ejobi ru umwemwu.”

Vwẹ Baibol na, a vwẹ umwemwu vẹ ughwu vwo dje “ukpo re vwo rhurhu ihwo nana, ogan ra riẹn rhurhu irere nana.” (Aizaya 25:7) Ukpo nana rhurhu ihworakpọ kerẹ evwru rode ro muru ra cha sa djẹ vabọ rọye-en. Vwọrẹ uyota, “ihwo ejobi wan oma rẹ Adamu ghwu.” (1 Kọrẹnt 15:22) Kirobọ rẹ ọyinkọn Pọl tare, onọ ọvo da vwomaphia, “Kono che sivwi uvwe nẹ oma rẹ ughwu nana?” O vwo ohwo ro se ruo?—Rom 7:24.