Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Ọghẹnẹ Cha Vwẹ Ojaẹriọ Ejobi Te Oba Kẹrẹkpẹ

Ọghẹnẹ Cha Vwẹ Ojaẹriọ Ejobi Te Oba Kẹrẹkpẹ

“E Ọrovwohwo, mavọ o krite ri mi vwo kperi se ọchuko, yu wo nyo-o? Eyẹrẹ kperi se we nẹ Ozighi, yu wo se sivwẹ-ẹ?” (Habakọk 1:2, 3) Enana eta rẹ Habakọk rọ dia omamọ rẹ ohwo rọ mrẹ aroesiri rẹ Ọghẹnẹ. Oyarẹ rọyen na djerephia nẹ o vwo esegbuyota-a? Ẹjo, kakaka! Ọghẹnẹ vwẹ imuẹro vwọ kẹ Habakọk nẹ o bru ọke phiyọ nure ro che vwo si umwemwu no.—Habakọk 2:2, 3.

Siẹrẹ wẹ yẹrẹ ohwo rọ kẹre owẹ da rioja, ọ pha lọlọhọ ra vwọ tanẹ Ọghẹnẹ gbe eghẹrẹ ganọ, ofori nẹ o si ojaẹriọ na no re. Dedena, Baibol na kẹ avwanre imuẹro nana: “Ọrovwohwo sa phiẹn ohwo vwẹ oma rẹ ive ro veri kirobo rẹ otu evo ta na-a, ẹkẹvuọvo o chirako rẹ ovwan, ọ guọnọre nẹ ohwo ọvuọvo ghwru-u, ẹkẹvuọvo nẹ ihwo ejobi kurhẹriẹ.”—2 Pita 3:9.

ỌKE VỌ YEN ỌGHẸNẸ CHE VWO SI OJAẸRIỌ NO?

O rhe che kri-i! Jesu tare nẹ o vwo uvwiẹ ọvo rọ cha mrẹ erọnvwọn rẹ oghẹresan re cha phia, re cha nẹrhẹ a riẹn nẹ oba rẹ “akpọ na” yen avwanre hepha na. (Matiu 24:3-42) Orugba rẹ aroẹmrẹ rẹ Jesu vwẹ ọke rẹ avwanre na djerephia nẹ ọke rẹ Ọghẹnẹ cha vwọ rhuẹrẹ erọnvwọn phiyọ sikẹrire. *

Ẹkẹvuọvo, idjerhe vọ yen Ọghẹnẹ cha vwọ reyọ ojaẹriọ ejobi vwo te oba? Ọke rẹ Jesu vwọ hẹ akpọ na, o djerephia nẹ Ọghẹnẹ vwo ẹgba ro vwo si ojaẹriọ rẹ ihworakpo no. Roro kpahen idje evo.

Oghwọrọ: Ọke rẹ Jesu vẹ iyinkọn rọyen vwo bi okọ vwẹ Abadi ri Galili, aphopho rode ọvo kọ guọnọ okọ rayen shuẹ. Jesu de djephia nẹ ọyen vẹ Ọsẹ rọyen se sun odju na. (Kọlose 1:15, 16) Jesu da ta: “Fọ, wọ dia riei.” Die kọyen phiare? “Aphopho na da fọ, ẹfọ ri riei rode da rhe.”—Mak 4:35-39.

Ọga: A nabọ riẹn Jesu phiyọ ohwo ro vwo ẹgba ro vwo sivwin irhuẹro vẹ ikpono, erinyin ji te ehonvwoti, i ri she enwẹnwẹ, yẹrẹ koka koka rẹ emiavwen efa. O “sivwi” ihwo ejobi re rioja.—Matiu 4:23, 24; 8:16; 11:2-5.

Ọkanrovwẹ rẹ Emu: Jesu reyọ ẹgba rẹ Ọsẹ rọyen vwọ kẹ vwo ruo rere emuọre vwo bun phiyọ. Baibol na niyẹnrẹn rọyen nẹ abọ ivẹ yen Jesu ghẹrẹ ihwo uriorin buebun vwẹ iruo rẹ aghwoghwo rọyen.—Matiu 14:14-21; 15:32-38.

Ughwu: Evrẹnushi erha ra niyẹnrẹn rọyen nẹ Jesu ruru vwẹ Baibol na djerepia nẹ Jihova vwo ẹgba ro vwo si ughwu no. Ọvo tobọ ghwu ẹdẹ ẹne tavwen Jesu ke rhọvwọn nẹ ushi.—Mak 5:35-42; Luk 7:11-16; Jọn 11:3-44.

^ e?ko. 5 Wọ da guọnọ evuẹ efa kpahen oba rẹ ẹdẹ na, ni uyovwinrota 9 rẹ ọbe nana, Die Yen Baibol na Se Yono Avwanre? rẹ Iseri rẹ Jihova teyenren, wọ sa danlodu rọyen ọphẹ vwẹ www.jw.org/urh.