Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Oboresorọ Akpọ Vwo Fo Eyeren

Oboresorọ Akpọ Vwo Fo Eyeren

Faizal guọnọ omaesivwon ra da cha bẹrẹ ubiudu rọyen, jẹ ọ ghwa vrẹ ẹgbukpe ọvo nu obọ rẹ aye rọyen ghwuru. Ọ da ta: “Mi vwo se ọbe rẹ Job, me da riẹn nẹ o vwo oboresorọ Jihova vwọ reyọ vwọba Baibol na. Ọke rẹ avwanre da hẹ ukpokpogho, e de se kpahen ohwo ro ji hirharoku ẹdia avwanre na vwẹ Baibol na, ọyena uvi rẹ uchebro vwọ kẹ avwanre.” Ọ da ta vwọba: “Akpọ ji fo obo re yerin.”

Tarsha jẹ eghene ọke rẹ oni rọyen vwo ghwu. Ọ da ta: “Kidie nẹ me riẹn Ọmemama mẹ, ọnana kọ nẹrhẹ me riẹn nẹ o vwo oboresorọ ọ vwọ ma avwanre, mi vwo iphiẹrophiyọ kugbe aghọghọ, dede nẹ mi vwo ebẹnbẹn buebun. Avwanre sa vwẹroso Jihova nẹ ọ cha sẹro avwanre, je chọn avwanre uko.”

IYOVWINRETA rehẹ obuko na dje kpahen erọnvwọn sansan re sa so ofudjevwe kẹ ohwo vwẹ akpeyeren. Wo vwo nene ebẹnbẹn wẹn muabọ na, wo se roro sẹ akpọ ghini fo eyeren yẹrẹ sẹ ohwo ọvo tobọ davwerhọn wẹn. Jẹ o muwẹro nẹ Ọghẹnẹ davwerhọn wẹn vẹ obo re phia kẹ wẹ. Wọ pha ghanghanre kẹ.

Ohwo ro si Une Rẹ Ejiro 86 djerephia nẹ ọ vwẹroso Ọghẹnẹ, rọ vwọ ta: “Vwẹ ẹdẹ rẹ ukpokpogho mẹ mi de se we, kidie wo ghine nyo vwe.” (Une Rẹ Ejiro 86:7) Wo se roro, ‘Mavọ yen Ọghẹnẹ che vwo nyo vwe “vwẹ ẹdẹ rẹ ukpokpogho mẹ”?

Dedena, ọkiọvo, Ọghẹnẹ che si ukpokpogho wẹn no ugege rọ vwọ vwomaphia-a, jẹ Baibol na rọ dia Ota rọyen kẹ wẹ imuẹro nẹ Ọghẹnẹ sa kẹ wẹ ufuoma rẹ ẹwẹn wo vwo yerin ghene ebẹnbẹn na: “Wa ro ẹnwan rẹ emuọvo-o, ẹkẹvuọvo vwi kemu kemu orẹ kugbe oyare kugbe ẹkpẹvwẹ ta ọdavwẹ wẹn kẹ Ọghẹnẹ. Ufuoma rẹ Ọghẹnẹ rọ nọ ẹruọ ejobi, kọ yọnrọn udu vẹ iroro rẹ ovwan.” (Filipae 4:6, 7) Biko roro kpahen ẹkpo rẹ Baibol nana ri ru imuẹro avwanre ganphiyọ nẹ Ọghẹnẹ ghene davwerhọn rẹ avwanre.

Ọghẹnẹ davwerhọn wẹn

“Ọvuọvo [rẹ igue] sa chọrọ Ọghẹnẹ ẹro-o. . . . Ovwan ghare nọ igue buebu.”Luk 12:6, 7.

RORO: Dede nẹ ọkiọvo, emephran itete fiemu kẹ ihworakpọ-ọ, jẹ Ọghẹnẹ davwerhọn rayen. Ugue ọvo dede sa chọrọ Ọghẹnẹ ẹro-o; ugue ọvuọvo ghanre kẹ. Ihworakpọ ghanre kẹ Ọghẹnẹ nọ igue shesheri. Ihworakpọ yen ma ghanre vwẹ usun rẹ erọnvwọn rẹ Ọghẹnẹ mare vwẹ otọrakpọ na. Ọ ma ohworakpọ vwẹ “oma” rọyen, ihworakpọ ji se dje iruemu rẹ Ọghẹnẹ phia.—Jẹnẹsis 1:26, 27.

“Ọrovwohwo, wọwẹ re hiẹn vwẹ wọ da riẹn vwẹ! . . . Wọwẹ ri vughe iroro mẹ . . . Daovwẹ ni re wọ riẹn iroro mẹ!”Une Rẹ Ejiro 139:1, 2, 23.

RORO: Ọghẹnẹ nabọ riẹn wẹn. Ọ riẹn ọdavwẹ wẹn rọ marho. Dede nẹ ihwo efa se jẹ ẹruọ rẹ ebẹnbẹn vẹ ẹwan wẹn e vwo, Ọghẹnẹ davwerhọn wẹn, ọ je guọnọ chọn wẹ uko. Ọtiọyena, akpọ fo obo re yerin.

 O vwo oboresorọ a vwọ ma wẹ

“Nyo ẹrhovwo mẹ, E Ọrovwohwo; jẹn oviẹ mẹ bru we rhe! . . . Rhie erhọn wẹn phihọ kẹ vwẹ; kpahe kẹ vwẹ phẹrẹkpẹ vwẹ ẹdẹ ri mi de se. . . . O che mu ọghọ kẹ ẹrhovwo rẹ ọvwuvwohwo.”Une Rẹ Ejiro 102:1, 2, 17.

RORO: Kọ ghwa họhọ nẹ, vwo nẹ ọtonphiyọ rẹ ojaẹriọ rẹ ihworakpọ rhe yen Jihova vwo vwo oniso rẹ ameoviẹ rayen. (Une Rẹ Ejiro 56:8) Ameoviẹ wẹn je vwọba ameoviẹ na. Ọghẹnẹ karophiyọ ebẹnbẹn vẹ ameoviẹ wẹn ejobi kidie wọ pha ghanghanre kẹ.

“Wo jẹ ofu dje we-e, kidie Mẹvwẹ Ọghẹnẹ wẹn; Me kẹ wẹ ogangan, Me cha wẹ uko . . . Mẹvwẹ, rẹ Ọrovwohwo Ọghẹnẹ wẹn . . . Mẹvwẹ re ta kẹ wẹ, Wọ djẹ oshọ-ọ Me sa cha wẹ uko.”Aizaya 41:10, 13.

RORO: Ọghẹnẹ choma rọ vwọ vwẹ ukẹcha kẹ wẹ. Wo de she, ọ cha kpare owẹ vrẹn.

Iphiẹrophiyọ rẹ omamọ akpọ hẹ obaro na

“Ọghẹnẹ guọnọ akpọ na ọ da vwẹ Ọmọ ọvuọvo rọye na kẹ, rere ohwo kohwo ro sere gbuyota vwo jẹ ghwọrọ ẹkẹvuọvo ko vwo arhọ ri bẹdẹ.”Jọn 3:16.

RORO: Wọ ghanre kẹ Ọghẹnẹ te ẹdia ro de ji Ọmọ rọyen Jesu ne o rhi ghwu kẹ wẹ. Izobo nana rhie idjerhe wo se vwo yerin akpọ rẹ bẹdẹ vẹ omavwerhovwẹn. *

Dede nẹ wọ sa mrẹ ukpokpogho vwẹ akpeyeren, rọ da họhọ nẹ wo che se chiro-o, biko nabọ se Ota rẹ Ọghẹnẹ rere wo ru esegbuyota wẹn kpahen ive rẹ iphiẹrophiyọ rẹ Ọghẹnẹ kẹ avwanre na ganphiyọ. Ọ cha nẹrhẹ wo vwo omavwerhovwẹn, je riẹn nẹ akpọ fo eyeren.

^ e?ko. 19 Wo vwo yono erọnvwọn efa kpahen obo wọ sa vwọ mrẹ erere vwo nẹ izobo rẹ Jesu, ni ividio rẹ Karophiyọ Ughwu rẹ Jesu vwẹ www.jw.org/urh. Kpo ẹbẹre rẹ ẸBE VẸ ERỌNVWỌN EFA > IVIDIO > EMẸVWA VẸ IRUO RUVIE NA.