Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Wẹ Yen Cha jẹ Ojẹ rẹ, Oborẹ Akpeyeren Wẹn Cha Dia Vwẹ Obaro!

Wẹ Yen Cha jẹ Ojẹ rẹ, Oborẹ Akpeyeren Wẹn Cha Dia Vwẹ Obaro!

WỌ GHENE SA JẸ OJẸ OBORẸ AKPEYEREN WẸN CHA DIA VWẸ OBARO? Ihwo evo vwo imuẹro nẹ atarhe yen dje oborẹ akpeyeren rayen cha dia, ọ dia ojẹ raye-en. Siẹrẹ ayen rha sa yan mu oborẹ ayen vwọtua-a, ayen ke tanẹ ọyen obo rọ ghwa guọnọ dia, ayen che se wene-e. Ayen ke ta “Ọyena dia ọ rẹ erhi mẹ-ẹ.”

Siẹrẹ efa de no nẹ ayen sa vrabọ rẹ oshenyẹ vẹ umwemwu ra mrẹ vwẹ akpọ na-a, ofu ko dje ayen. Siẹvo ayen davwẹngba rere ayen se vwo ru akpọ rayen yovwinphiyọ, ẹkẹvuọvo, fikirẹ ifovwin, ozighi, ega, oghwọrọ vẹ okpetu efa, ẹgbaẹdavwọn rayen ejobi mi shefia. Ayen ke nọ oma rayen ‘diesorọ me vwọ tobọ kpokpo oma mẹ?’

Uyota, erọnvwọn evo re phiare vwẹ akpeyeren ghini se djobọte oborẹ ohwo guọnọ yan mu. (Aghwoghwo 9:11) Ẹkẹvuọvo, a da ta ota kpahen akpeyeren wẹn vwẹ obaro na, wo vwo ojẹ rẹ wọ sa jẹ. Vwọrẹ uyota, Baibol na djerephia nẹ ojẹ rẹ wọ jẹre yen che dje oborẹ akpeyeren wẹn cha dia vwẹ obaro na. Roro kpahen obo rọ tare.

Mosis rọ dia osun rẹ Izrẹl rẹ awanre da vuẹ ihwo na ọke rẹ ayen cha vwọ ro Otọ rẹ Ive na: “Mi phi arhọ vẹ ughwu, ebruba vẹ ekan phihọ obaro rẹ ovwan, vwẹ ọtiọye na jẹn arhọ, rere ovwan vẹ uvwiẹ rẹ ovwan mrasan rhọ, vwọ guọnọ Ọrovwohwo Ọghẹnẹ, kerhọ rẹ urhuru rọye wọ je gba oma wẹn muo.”​Urhi Rivẹ 30:15, 19, 20.

“Mi phi arhọ vẹ ughwu, ebruba vẹ ekan phihọ obaro rẹ ovwan, vwẹ ọtiọye na jẹn arhọ, rere ovwan vẹ uvwiẹ rẹ ovwan mrasan rhọ.”​—Urhi Rivẹ 30:19

Ghini uyota! Ọghẹnẹ sivwin ihwo rẹ Izrẹl vwo nẹ eviẹn vwẹ Ijipt, ọ da kẹ ayen iphiẹrophiyọ rẹ akpeyeren rẹ omavwerhovwẹn vwẹ Otọ rẹ Ive na. Ẹkẹvuọvo, ayen che ghwe vwo ebruphiyọ yena odedede-e. Rere ayen se vwo vwo ebruphiyọ yena, ayen ke “jẹn arhọ.” Vwẹ idjerhe vọ? ‘Siẹrẹ ayen de vwo ẹguọnọ rẹ Ọghẹnẹ, kerhọ rẹ urhuru rọyen, ji churu muo.’

Nonẹna, avwanre ji vwo ojẹ rọ họhọ ọyena, obo wọ jẹre yen che dje oborẹ akpeyeren wẹn cha dia vwẹ obaro na. Siẹrẹ wọ da jẹ ojẹ wo vwo vwo ẹguọnọ rẹ Ọghẹnẹ, kerhọ kẹ, ji churu muo, kọyen wọ jẹ arhọ, arhọ rẹ bẹdẹ vwẹ iparadaisi vwẹ otọrakpọ. Ẹkẹvuọvo, die yen owọẹjẹ na ọvuọvo churobọ si?

JẸ OJẸ WO VWO VWO ẸGUỌNỌ RẸ ỌGHẸNẸ

Ẹguọnọ yen uruemu rẹ ẹsosuọ rẹ Ọghẹnẹ. Ẹwẹn ọfuanfon na de mu ọyinkọn Jọn vwo si nẹ “Ọghẹnẹ hẹ ẹguọnọ.” (1 Jọn 4:8) Kọyensorọ a vwọ nọ Jesu nẹ ọrhọ yen iji rọ ma rho, ọ da ta: “Guọnọ Ọrovwohwo Ọghẹnẹ wẹn vwẹ udu wẹn ejobi, vwẹ ẹnwẹn wẹn ejobi, kugbe iroro wẹn ejobi.” (Matiu 22:37) Ọ dia oshọ yen mu ohwo vwọ ga Jihova-a, ukpe rẹ ọtiọyen ẹguọnọ. Diesorọ avwanre vwọ jẹ ojẹ e vwo vwo ẹguọnọ rẹ Ọghẹnẹ?

Ẹguọnọ rẹ Jihova vwọ kẹ ihworakpọ họhọ ọ rẹ emiọvwọn vwo kẹ emọ rayen. Dede nẹ ayen gbare-e, emiọvwọn ri vwo ẹguọnọ rẹ emọ rayen yono, phiuduphiyawọ, biẹcha, je ghwọkuẹ emọ rayen kidie ayen guọnọ nẹ emọ na ru yovwin, oma je vwerhen ayen. Die kọyen emiọvwọn na guọnọ nẹ emọ na ru? Ayen guọnọre nẹ emọ na vwo ẹguọnọ rayen, je reyọ erọnvwọn rẹ ayen yono ayen na vwo ruiruo rere o yovwin kẹ ayen. O rhe fo nẹ Ọsẹ rẹ  avwanre rọhẹ odjuvwu rhẹro rọyen nẹ avwanre che dje nẹ erọnvwọn na ejobi ro ru kẹ avwanre na da avwanre ẹro?

KERHỌ RẸ URHURU RỌYEN

Vwẹ ejajẹ re vwo tu si Baibol na, ota na “kerhọ” churobọ si e vwo “muọghọ.” Ọ dia ọnana yen obo ro mudiaphiyọ a da vuẹ ọmọ nẹ “Kerhọ rẹ ọsẹ vẹ oni wẹn”? Ọtiọyena, a vwọ kerhọ rẹ urhuru rẹ Ọghẹnẹ mudiaphiyọ e vwo yono kpahen obo rọ tare, ji muọghọ kẹ. Ọ vwọ dianẹ Ọghẹnẹ cha ta ota nẹ odjuvwu rhe kẹ avwanre na-a, avwanre kerhọ rọyen siẹrẹ e de se Baibol na, je reyọ obo re seri vwo ruiruo.​—1 Jọn 5:3.

Rere Jesu vwo dje obo rọ ghanre te a vwọ kerhọ rẹ Ọghẹnẹ, ọ da ta: “Ohwo sa vwẹ emu ọvo rhọ-ọ, jokpa rẹ ota ro nẹ unu rẹ Ọghẹnẹ rhe.” (Matiu 4:4) Emuọre ghanre, ẹkẹvuọvo e vwo vwo erianriẹn rẹ Ọghẹnẹ kọyen ma ghanre. Diesorọ? Ovie Solomọn rọ dia ọgbaghwanre da ta: “Kidie ekpọfia rẹ aghwanre họhọ ekpọfia rẹ igho; erere rẹ erianriẹn na nẹ aghwanre sa serọ rẹ akpọ rẹ ohwo ro vworo.” (Aghwoghwo 7:12) Erianriẹn vẹ aghwanre ro nẹ obọ rẹ Ọghẹnẹ rhe sa chọn avwanre, je vwẹ ukẹcha kẹ avwanre vwo brorhiẹn rẹ aghwanre nonẹna ro se sun kpo arhọ rẹ bẹdẹ vwẹ obaro na.

CHURU MUO

Roro kpahen itẹ rẹ Jesu rọhẹ uyovwinrota ra wanvrẹ na, Jesu tare nẹ: “Idjerhe rẹ uyota na pha hwahwa phiọnphiọn, ọye ọ rẹ arhọ na; ihwo tutuno re sa guọnọ mrẹ.” (Matiu 7:13, 14) Ra vwọ yan vwẹ idjerhe yena, o che yovwin siẹrẹ e de vwo ohwo rọ riẹn idjerhe na, ji nene odjekẹ rọyen rere e se vwo te asan ra ra​—arhọ rẹ bẹdẹ. Ọtiọyena, ofori a vwọ dia kẹre Ọghẹnẹ. (Une Rẹ Ejiro 16:8) Ẹkẹvuọvo, mavọ yen avwanre se vwo ru ọtiọyen?

Kẹdẹ kẹdẹ o vwo erọnvwọn buebun rẹ avwanre che je ruo-o, vẹ efa ra guọnọ ru. Avwanre se mu ẹwẹn phiyọ erọnvwọn nana te ẹdia rẹ avwanre rha cha mrẹ ọke vwo roro kpahen oborẹ Ọghẹnẹ guọnọ mie avwanre-e. Kọyensorọ rẹ Baibol na vwọ karophiyọ avwanre nẹ: “Wa nabọ nite obo rẹ ovwan yan, we muẹ yan djidji-i ẹkẹvuọvo kerẹ evwaghwanre, we kuẹ ọke fia-a, fikiridie ọke na pha brabra.” (Ẹfesọs 5:15, 16) Siẹrẹ avwanre da vwẹ ẹga rẹ Ọghẹnẹ vwọ ka obaro vwẹ akpeyeren, avwanre ke sa dia kẹrẹ.​—Matiu 6:33.

WẸ YEN VWO OJẸ NA

Dede nẹ o vwo obo wo se ru vwo wene obo re phia wan re-e, wo se ru obo re cha nẹrhẹ wẹ vẹ ihwo ru wo vwo ẹguọnọ kpahen vwo arhọ rẹ bẹdẹ vwẹ obaro na. Baibol na djere nẹ Ọsẹ rẹ avwanre rọhẹ odjuvwu rọ dia Jihova vwo ẹguọnọ rẹ avwanre mamọ, nẹ ọ je guọnọ nẹ avwanre riẹn obo rọ guọnọ mie avwanre. Ni eta rẹ omraro Maika:

“O dje kẹ wẹ nure, E ohwo na, obo ri yoma; kidie Ọrovwohwo tobọ guọnọ vwẹ obọ wẹ ru emu rọ dia ọsoso, guọnọ aruẹdọn, kugbe rere wọ rha vwẹ oma kpotọ yan nene Ọghẹnẹ wẹn?”​Maika 6:8.

Wọ cha kerhọ rẹ edurhie rẹ Jihova wọ vwọ yan nene rere ebruphiyọ rẹ bẹdẹ rọ rhuẹrẹphiyotọ obaro na se vwo te we obọ? Wẹ yen vwo ojẹ na!