Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Uwevwin Orhẹrẹ  |  Ukeri 2 2017

 UYOVWINROTA RẸ ỌBE NA | WO CHE RHIABỌREYỌ OKẸ RẸ ỌGHẸNẸ RỌ MA RHO?

Okẹ rẹ Ọghẹnẹ rọ Ma Rho—Diesorọ ọ Vwọ Ghanre?

Okẹ rẹ Ọghẹnẹ rọ Ma Rho—Diesorọ ọ Vwọ Ghanre?

Die yen sa nẹrhẹ okẹ ghanre kẹ wẹ? Ọ sa dia erọnvwọn ẹne nana: (1) ohwo rọ kẹ wẹ okẹ na, (2) oboresorọ ọ vwọ kẹ wẹ okẹ na, (3) oborẹ ohwo na vwo ze tavwen okẹ na ki te we obọ, kugbe (4) okẹ na yen obo wọ ghwa guọnọ. E de roro kpahen erọnvwọn yena, e sa chọn avwanre uko vwo ru ọdavwaro avwanre kodophiyọ kpahen ọtanhirhe na rọ dia okẹ rọ ma rho ro nẹ obọ rẹ Ọghẹnẹ rhe.

ONO YEN KẸ OKẸ NA?

Okẹ evo dia ghanghanre kidie ohwo ro vwo ogangan rẹ usuon yẹrẹ ohwo re muọghọ kẹ yen vwerọ kẹ avwanre. O vwo okẹ evo dede nẹ igho ra vwọ dẹ ayen ghwe bu-un, jẹ e ni ayen ghanghanre kidie ohwo rẹ orua yẹrẹ ugbeyan ra vwẹroso yen vwerọ kẹ avwanre. Ọna yen oka rẹ okẹ rẹ Russell vwọ kẹ Jordan ra ta ota kpahen vwẹ uyovwinrota rẹsosuọ na. Mavọ yen ọnana shekpahen okẹ rẹ ọtanhirhe na?

Ẹsosuọ, Baibol na tare nẹ “Ọghẹnẹ ji Ọmọ rọye ọvuọvo na rhe akpọ na, rere avwanre vwọ wan oma rọye rhọ.” (1 Jọn 4:9) Ọnana yen sorọ okẹ na vwọ ghanre. O vwo ohwo vuọvo rọ rho vrẹ Ọghẹnẹ-ẹ. Ọbuine rẹ Hibru ọvo da ta kpahen Ọghẹnẹ: “Jẹ ihwo riẹn nẹ wẹwẹ, rẹ odẹ wẹ dia Jihova na, Wẹ ọvo yen Me Kpenu vwẹ akpọ na ejobi.” (Une Rẹ Ejiro 83:18, NW ) O rhe vwo ohwo ọfa rọ rho vrẹ Ọghẹnẹ rọ sa kẹ avwanre okẹ-ẹ.

Ọrivẹ, Ọghẹnẹ yen “Ọsẹ rẹ avwanre.” (Aizaya 63:16) Vwẹ idjerhe vọ? Ọyen kẹ avwanre arhọ. Vwọba, ọ nabọ vwẹrote avwanre kirobo rẹ ọsẹ vwẹrote emọ rọyen. Vwẹ ọke rẹ awanre, Ọghẹnẹ vwọ ta ota kẹ ihwo rọyen evo, ọ da nọ: “Ifrem ọmọ ọghaghare mẹ na? Ọmọ ro je vwe o ruẹ? . . . Eriyin na udu mẹ viẹ kpahọ; omuẹro mi che ni aruẹdọ rọye.” (Jerimaya 31:20) Oka rẹ iroro tiọyena yen Ọghẹnẹ ji vwo kpahen ihwo re ga nonẹna. Ọyehẹ Ọmemama ro me vwo ẹgba, Ọsẹ kugbe Ugbeyan avwanre. Ọtiọyena okẹ ro nẹ obọ rọyen rhe eje pha ghanghanre.

 DIESORỌ A VWỌ KẸ OKẸ NA?

Okẹ evo ghanra kidie uvi rẹ ẹguọnọ yen mu ohwo vwo ruo, ọ dia a gba ohwo na-a. Ohwo ro vwo ẹwẹn ra vwọ kẹ okẹ rhẹro rẹ ẹse re che ru kẹ rhivwi-in.

Ọghẹnẹ siobọnu Ọmọ rọyen kidie o vwo ẹguọnọ rẹ avwanre. Baibol na da ta: “Vwẹ ọnana kọye ẹguọnọ rẹ Ọghẹnẹ vwọ phia vwẹ o hri rẹ avwanre, nẹ Ọghẹnẹ ji Ọmọ rọye ọvuọvo na rhe.” Diesorọ o vwo ru ọnana? “Rere avwanre vwọ wan oma rọye rhọ.” (1 Jọn 4:9) A gba Ọghẹnẹ ru ọnana? Kakaka! “Ẹtanhirhe rẹ . . . Jesu Kristi” na ọyen odjephia rẹ “ẹserọphẹ” rẹ Ọghẹnẹ.Rom 3:24.

Diesorọ okẹ rẹ Ọghẹnẹ na vwọ dia “ẹserọphẹ”? Baibol na da ta: “Ọghẹnẹ dje ẹguọnọ rọye kẹ avwanre nẹ ọke rẹ avwanre vwọ hẹ iruimwemwu Kristi de rhi ghwu kẹ avwanre.” (Rom 5:8) Uvi rẹ ẹguọnọ yen mu Ọghẹnẹ vwo ruo vwọ kẹ ihworakpọ re vwiẹrẹre, ri vwo ọchuko-o, re je dia irumwemwu. Avwanre wian vwọ kẹ ẹguọnọ na-a, a je cha sa hwosa rọye-en. Okẹ rọyen na ọyen odjephia rẹ ẹguọnọ rọ ma rho kparobọ.

DIE YEN E VWO ZE?

Okẹ evo ghanre fikirẹ oborẹ ohwo na vwo ze tavwen ọ ke sa kẹ okẹ na. Siẹrẹ ohwo da choma ro vwo siobọnu orọnvwọn rọ ghanre kẹ vwọ kẹ avwanre, ẹro ọghanghanre yen avwanre vwo no fikirẹ obo ro vwo ze na.

Ọghẹnẹ siobọnu “Ọmọ ọvuọvo rọye.” (Jọn 3:16) Jesu rẹ Ọghẹnẹ siobọnu kẹ avwanre na yen ohwo rẹ Ọghẹnẹ me vwo ẹguọnọ kpahen. Ọke rẹ Ọghẹnẹ vwọ ma idjuvwu vẹ akpọ na, Jesu vẹ Ọghẹnẹ wian kugbe vwẹ ikpe buebun re se keri-i, Jesu kọ rhe dia “omavwerhovwẹ rọye kẹdẹ kẹdẹ.” (Isẹ 8:30) Jesu yen “Ọmọ” rẹ Ọghẹnẹ kugbe “uhoho rẹ Ọghẹnẹ re jẹ mrẹ na.” (Kọlose 1:13-15) Oyerinkugbe rọhẹ uvwre rẹ Ọghẹnẹ vẹ Jesu ganre mamọ.

Dedena, Ọghẹnẹ “vwẹ Ọmọ rọye ọvuọvo jahwa-a.” (Rom 8:31, 32) Jihova kẹ avwanre obo re ma ghanre kẹ. O vwo okẹ vuọvo rọ ghanre te-e.

OKẸ NA YEN OBO RA GHWA GUỌNỌ

Okẹ evo pha ghanghanre kidie ọyen obo ra ghwa guọnọ dẹn. Kerẹ udje, mavọ oma cha vwerhen owẹ te siẹrẹ ohwo ọvo da hwosa re vwo sivwin ọga ro re hwe we jovwo! Okẹ yena cha da wẹ aro mamọ, gbanẹ ọ dia ọtiọye-en?

“Kidie kirobo rẹ ihwo ejobi wan oma rẹ Adamu ghwu, ọtiọye rhe vwẹ oma ri Kristi ihwo ejobi ke cha rhọ.” (1 Kọrẹnt 15:22) Ihwo ejobi wan oma rẹ Adam “ghwu” kidie avwanre emọ rẹ Adam. Avwanre rha sa vrabọ rẹ ọmiaọvwẹ rẹ ọga kugbe ughwu-u, yẹrẹ nene Ọghẹnẹ rhuẹrẹkugbe rere e vwo jẹ abe ẹriọ-ọ. Ihworakpọ che se vwo “arhọ” womarẹ ẹgbaẹdavwọn omobọ raye-en. Baibol na da ta: “O vwo ohwo ọvuọvo rọ sa tan oma rọye-e, eyẹ rọ sa vwẹ uchunu rẹ arhọ rọye kẹ Ọghẹnẹ-ẹ . . . O che se te bẹdẹ-ẹ.” (Une Rẹ Ejiro 49:7, 8) Avwanre ghene guọnọ ukẹcha mamọ kidie avwanre ọvo cha sa hwosa rẹ ọtanhirhe na-a. O vwo oborẹ avwanre se ru-u.

Fikirẹ ẹguọnọ rọyen, Jihova da hwosa “re vwo sivwin” arhọ rẹ avwanre, rere womarẹ Jesu “ihwo ejobi ke cha rhọ.” Mavọ yen ọtanhirhe na ru ọnana wan? “Ọbara ri Jesu Ọmọ rọye kọ hworhẹ avwanre nẹ umwemwu ejobi.” Vwọrẹ uyota, esegbuyota  kpahen ọbara rẹ Jesu rhie uphẹn phiyọ vwọ kẹ evwoghovwo rẹ umwemwu, ji te arhọ rẹ bẹdẹ. (1 Jọn 1:7; 5:13) Die yen ọtanhirhe na che ru kẹ ihwo rẹ avwanre vwo ẹguọnọ kpahen ri ghwuru? “Kirobo rẹ ughwu wan oma rẹ ohwo ọvo rhe, ọtiọye evrẹnushi rẹ otu ri ghwuru je wan oma rẹ ohwo ọvo [Jesu] rhe.”1 Kọrẹnt 15:21. *

Ohwo ọvuọvo che se ruẹse rọ rho te ọ rẹ Ọghẹnẹ ru kẹ avwanre na-a rọ dia izobo rẹ Jesu. O vwo ohwo vuọvo rọ kẹ avwanre okẹ rọ ghanre te ọ rẹ Jihova Ọghẹnẹ kẹ avwanre-e. O ji vwo okẹ vuọvo ro ru obo ra ghwa guọnọ vrẹ izobo ro si avwanre nẹ umwemwu kugbe ughwu-u. E, o vwo okẹ ọvuọvo re se vwo dje ọtanhirhe na-a.

 

^ e?ko. 19 Vwọ kẹ evuẹ efa kpahen ọhọre rẹ Ọghẹnẹ rọ vwọ rhọvwọn ihwo ri ghwuru nushi, ni uyovwinrota 7 rẹ ọbe na Die Yen Baibol na se Yono Avwanre? rẹ Iseri rẹ Jihova teyenphia, ọ jehẹ www.jw.org/urh.