Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Iseri ri Jihova

Sane ejajẹ Urhobo

Mrẹ Erere Vwo nẹ Uruemu ra Vwọ kẹ Okẹ

Mrẹ Erere Vwo nẹ Uruemu ra Vwọ kẹ Okẹ

“IBỌSU na sa djẹ yanran, ẹkẹvuọvo ọmọshare rẹ Chinese na mudia!” Ọyen oborẹ Alexandra nyori ọke ro vwo chidia ibọsu rọ guọnọ wan ughwru rẹ ẹkuotọ rẹ South America ọvo ro ọfa. O de wontọ re ni obo re phia, ọ da mrẹ ọmọshare rẹ Chinese ọvo rọ ghwa jẹ ejajẹ rẹ Spain fiotọ-ọ, rọ davwẹngba ro vwo djisẹ obo re phia kẹ vwọ kẹ ọlọkpa ro mudia ughwru na. Ọ vwọ dianẹ Alexandra kpo ukoko rẹ Iseri rẹ Jihova ra da jẹ Chinese na, ọ da vwẹ ukẹcha kẹ ọmọshare na vwọ fan obo rọ ta na.

Ọmọshare na da tanẹ ọyen ọmotọ rẹ ẹkuotọ na, ẹkẹvuọvo e cho ipaspọt vẹ igho rọyen. Ọlọkpa na ka rhọnvwephiyọ obo rọ ta na-a, kọ tobọ tanẹ Alexandra vwobọ vwẹ eki rẹ eviẹn. Ukuko na, ọ da rhọnvwephiyọ oborẹ ọmọshare rẹ Chinese na tare, ẹkẹvuọvo ọmọshare na cha hwa igho evo kidie ipaspọt rọyen rhe re-e. Kidie nẹ igho rhe re-e, Alexandra de momo $20. Oma da vwerhen ọmọshare na mamọ, ọ da tanẹ ọ cha hwa osa rọ vrẹn $20 rhivwin kẹ Alexandra. Alexandra da vuẹ nẹ ọyen guọnọ osa mie-e, nẹ ọyen de guọnọ vwẹ ukẹcha kẹ kidie ọyen obo ro fori nẹ o ru. Ọ da vwẹ ẹbe ra fan nẹ Baibol na rhe evo vwọ kẹ, ọ da vuẹ nẹ ọ vẹ Iseri rẹ Jihova yono Baibol na.

Ọ vwerhen oma siẹrẹ e de nyo ikuegbe rẹ uruemu esiri re dje kẹ erhorha, aphro herọ-ọ, ihwo ri kpo ẹga efa ji dje uruemu esiri tiọyena phia, eriyin ji te ihwo ri kpo ẹga-a. Ọ da dia owẹ, wo se ru oborẹ Alexandra ruru na? Ọyena omamọ rẹ onọ kidie Jesu tare nẹ, “ẹrhovwo herọ kẹ ọkokẹ nọ ohwo ra kẹ.” (Iruo Rẹ Iyinkọn Na 20:35) Ehiahiẹ ji djephia nẹ uruemu ra vwọ kẹ okẹ yovwirin vwọ kẹ oma kpokpọ rẹ ohwo. Vwẹ idjerhe vọ?

‘ỌKOKẸ RẸ IVUN AVWERHEN’

Obo re rhiẹromrẹ djerephia nẹ a vwọ kẹ okẹ nẹrhẹ oma vwerhen ohwo. Ọyinkọn Pọl siri nẹ “Ọghẹnẹ guọnọ okẹ rẹ ivun avwerhe.” Inenikristi ri ru itetoro ro won ayen vwọ chọn iniọvo rayen ri hirharoku ebẹnbẹn yen Pọl ta ota rhe. (2 Kọrẹnt 8:4; 9:7) Ọ dia Pọl tare nẹ omavwerhovwẹn yen mu ayen vwọ kẹ ọke na-a. Ukperẹ ọtiọyen, ọ tare nẹ oma vwerhen ayen kidie ayen kẹ okẹ.

Vwọrẹ uyota, ehiahiẹ ọvo tare nẹ a vwọ kẹ okẹ “rhariẹn ẹbẹre rẹ afọnrhe na rọ nẹrhẹ oma vwerhen ohwo, rọ nẹrhẹ a vẹ ihwo se ruẹ kuẹgbe, rọ je nẹrhẹ a sa vwẹroso ihwo.” Ehahiẹ ọfa tare nẹ “a vwọ kẹ ohwo ọfa igho nẹrhẹ ọ rọ kẹ okẹ na vẹ ọ ra kẹre mrẹ omavwerhovwẹn nọ a vwọ ghwọrọ igho na komobọ.”

O vwo ọke ọvo wo vwo roro nẹ wọ ka sa kẹ okẹ-ẹ, fikirẹ ẹdia wọ hepha? Vwọrẹ uyota ihwo eje sa mrẹ aghọghọ rọ herọ ra vwọ dia ọkokẹ “rẹ ivun avwerhe.” Ọ dia igho na che bun tavwen a ke kẹ okẹ-ẹ, ẹwẹn ra vwọ kẹ okẹ yen a guọnọre. Aye ọvo rọ dia Oseri rẹ Jihova si ovuẹ nana vẹ itetoro rọ vwọba vwo rhe ihwo re teyen imagazini  nana: “Rhabae na, imigho krẹn yen mi se toro vwẹ Ọguan Ruvie.” Dedena, ọ da ta kpobarophiyọ: “Oborẹ Jihova Ọghẹnẹ vwọ kẹ vwẹ bun nọ obo re me vwọ kẹ. . . . Ovwan kobiruo rẹ uphẹn nana rẹ mi se vwo ru itetoro nana, ọ kẹ vwẹ omavwerhovwẹn.”

Ọ dia igho ọvo yen a vwọ kẹ okẹ-ẹ. O vwo idjerhe efa ra sa vwọ kẹ okẹ.

RA VWỌ KẸ OKẸ YOVWIN KẸ OMA KPOKPỌ WẸN

vwọ kẹ okẹ yovwin kẹ oma kpokpọ wẹn kugbe ọ rẹ ihwo efa

Baibol na da ta: “Ohwo ro nẹ aruẹdọ che vwo erere kẹ oma rọye, ẹkẹvuọvo ohwo umwemwu oma rọye o hwe.” (Isẹ 11:17) Ihwo ri vwo uruemu esiri vwo ẹwẹn ra vwọ kẹ okẹ, ayen choma rẹ ayen vwọ vwẹ ọke, ẹgba, ọdavwẹ, kugbe erọnvwọn efa rẹ ayen vwori vwọ chọn ihwo efa uko. Uruemu nana vwẹ erere kẹ ayen vwẹ idjerhe sansan, eriyin ọ je nẹrhẹ ayen vwo oma kpokpọ.

Ehiahiẹ djerephia nẹ ihwo re chọn ihwo efa uko fobọ rioja rẹ emiavwe vẹ ofudjevwe-e. Kọyen ayen vwo oma kpokpọ. A vwọ kẹ okẹ tobọ nẹrhẹ oma rẹ ihwo evo re họnvwọga re bẹn esivwon yovwẹnphiyọ, ega kerẹ multiple sclerosis yẹrẹ HIV. A je rhe mrẹvughe re nẹ ihwo re davwẹngba rẹ ayen vwo siobọ nẹ udi-ẹda vroma se phikparobọ womarẹ ukẹcha rẹ ayen vwọ kẹ ihwo efa.

Diesorọ ọ vwọ dia ọtiọyen? Ihwo tanẹ “iroro rẹ esiri vẹ erorokẹ nẹrhẹ oma vwerhen ohwo.” Uruemu ra vwọ kẹ okẹ se siobọ rẹ ofudjevwe kpotọ. Ihwo rẹ irivẹ rẹ orọnvwe rayen ghwuru, je sa fobọ yerẹn ghene ẹdia na siẹrẹ ayen da vwẹ ukẹcha kẹ ihwo efa.

Aphro herọ-ọ. A vwọ kẹ okẹ yovwin kẹ oma kpokpọ wẹn.

IHWO VWẸROKERE URUEMU RA VWỌ KẸ OKẸ

Jesu vuẹ inene rọyen: “Kẹ, ka je kẹ wẹ; omamọ rẹ ovwanvwọn, ra nyẹre, re kpoghori, rọ mwavwi hwẹ, kọye e mu phihọ agada wẹn. Kidie ovwanvwọn wọ vwọ vwanvwe kẹ ihwo ọye a je vwọ vwanvwe kẹ wẹ.” (Luk 6:38) Siẹrẹ wọ da kẹ, ihwo cha vwẹrokere uruemu wẹn na, ayen me rhe dia ihwo re kẹ. Uruemu ra vwọ kẹ nẹrhẹ oyerinkugbe ganphiyọ.

Uruemu ra vwọ kẹ nẹrhẹ oyerinkugbe ganphiyọ

Ihwo ri ru ehiahiẹ kpahen oyerinkugbe rẹ ihworakpọ niroso nẹ “ihwo ri dje uruemu ra vwọ kẹ okẹ phia ọkieje, jiro kẹ ihwo efa nẹ ayen ji ru ọtiọyen.” Vwọrẹ uyota, “re vwo se kpahen uruemu rẹ esẹ rẹ ihwo djephia nẹrhẹ ihwo efa guọnọ ru ọtiọyen rhe.” Kirobo rẹ ehiahiẹ ọvo djephia, “ohwo ọvo se djobọte ihwo buebun, jẹ ọ sa dianẹ ọ tobọ vughe evo yẹrẹ rhiẹromrẹ aye-en.” Obo ra ta na kẹ ọna: Uruemu ra vwọ kẹ okẹ se nẹ oma rẹ ohwo ọvo ro ọfa rhi te asan rẹ ihwo rehẹ ekogho yena mi rhi vwo uruemu na. Wọ guọnọ dia oka rẹ asan tiọyen? Uvi rẹ erere yen cha dia siẹrẹ ihwo buebun de yono obo ra kẹ okẹ.

A mrẹ udje ọvo ro dje erhuvwu ro nẹ evun rọyen cha vwẹ Florida, U.S.A. Iseri rẹ Jihova  evo vwomakpahotọ vwọ kẹ iruo ra vwọ vwẹ ukẹcha kẹ ihwo rẹ oghwọrọ te oma. Ọke rẹ ayen vwọ hẹrhẹ ekuakua rẹ ayen cha vwọ wian, ayen da mrẹ igbẹhẹ rẹ ọshare ọvo rọ guọghọre, ayen da rhuẹrẹ. Vwẹ ileta rẹ ọshare na si rhe esiri rukoko rẹ Iseri rẹ Jihova, ọ da ta: “Oma vwerhen ovwẹ mamọ. Me rhe mrẹvughe nẹ ihwo nana yen evo usun rẹ ihwo ri me yovwin kparobọ re me mrẹ re.” Ẹwẹn rẹ akpẹvwẹ de muo vwo toro igho buebun re vwo ruiruo ro seri nẹ iruo rẹ oghẹresan rẹ Iseri na.

VWẸROKERE UDJE RA VWỌ KẸ OKẸ RỌ MA RHO

Ehiahiẹ rẹ oghẹresan ọvo re ruru djerephia nẹ “ọyen ẹkuruemu rẹ ihworakpọ rẹ ayen vwọ vwẹ ukẹcha kẹ ihwo efa.” Ihwo ri ru ehiahiẹ na tare nẹ emọ “dje uruemu nana phia bẹsiẹ ayen ke riẹn obo ra ta ota dede.” Diesorọ? Baibol na vwẹ ẹkpahọnphiyọ na vwọphia rọ vwọ tanẹ a ma ihworakpọ vwẹ “oma rẹ Ọghẹnẹ,” kọyen, avwanre vwo iruemu ri rhe Ọghẹnẹ.Jẹnẹsis 1:27.

Uruemu ra vwọ kẹ okẹ ọyen ọvo usun rẹ iruemu rẹ Ọmemama rẹ avwanre Jihova Ọghẹnẹ. Ọ kẹ avwanre arhọ kugbe kemu kemu rẹ avwanre guọnọre rere oma vwọ vwerhen avwanre. (Iruo Rẹ Iyinkọn Na 14:17; 17:26-28) Avwanre sa riẹn Ọsẹ rẹ avwanre rọhẹ odjuvwu kugbe ọhọre rọyen womarẹ uyono rẹ Baibol na. Baibol na ji djephia nẹ Ọghẹnẹ vwo ọrhuẹrẹphiyotọ rẹ akpọ rẹ omavwerhovwẹn vwọ kẹ avwanre ọke rọ cha vwẹ obaro na. * (1 Jọn 4:9, 10) Rọ vwọ dianẹ Jihova Ọghẹnẹ yen ohwo rẹsosuọ ro dje uruemu nana phia na, a je ma wẹ vwẹ oma rọyen na, o rhe gbe ohwo unu nẹ a da vwẹrokere Ọghẹnẹ kẹ okẹ, oyovwin kẹ oma kpokpọ rẹ avwanre, ọ je cha nẹrhẹ a mrẹ aroesiri rọyen.Hibru 13:16.

Wọ karophiyọ ọmọtẹ rẹ se Alexandra re djunute vwẹ ọtonphiyọ rẹ uyovwinrota nana? Die yen nẹ obuko rẹ ikuegbe na rhe? Dede nẹ ohwo ọvo rọhẹ ibọsu na tare nẹ igho rọyen che ghwru, Alexandra vẹ ọshare rọ vwẹ ukẹcha kẹ na de wontọ vwẹ orere rẹ Piura, etiyin yen ọshare na da mrẹ igbeyan rọyen re hwosa na vwọ kẹ Alexandra. Ọshare na de ghini ru oborẹ Alexandra vuẹ rẹ, ọ da ton uyono rẹ Baibol phiyọ. Emeranvwe erha vwọ wan nu Alexandra da mrẹ ọshare na vwẹ ọghwẹkoko rẹ Chinese rẹ Iseri rẹ Jihova ruru vwẹ Peru, oma vwerhen Alexandra mamọ. Ro vwo dje ọdavwaro phia vwọ kẹ oborẹ Alexandra ru vwọ kẹ, ọshare na de durhie Alexandra vẹ ihwo ri nenire kpo ọghwẹkoko na kpo asan rẹ ekpuyovwin rọyen vwori rọ da sa emu kẹ ihwo.

Ra vwọ kẹ, je vwẹ ukẹcha kẹ ihwo kẹ ohwo omavwerhovwẹn. Ma rho wọ da cha chọn ihwo efa uko vwọ riẹn ohwo rọ dia Esiri rẹ okẹ iyoyovwin eje, Jihova Ọghẹnẹ! (Jems 1:17) Wọ mrẹ erere vwo nẹ oka rẹ okẹ ẹkẹ yena?

^ e?ko. 21 Vwọ kẹ evuẹ efa, ni ọbe na Die Yen Baibol na se Yono Avwanre? rẹ Iseri rẹ Jihova teyenphia, ọ je herọ vwẹ intanẹti vwẹ www.jw.org/urh. Ni ẸBE VẸ ERỌNVWỌN EFA > ẸBE VẸ BROSHỌ.