Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYOVWINROTA RẸ ỌBE NA | WO CHE RHIABỌREYỌ OKẸ RẸ ỌGHẸNẸ RỌ MA RHO?

Okẹ A Mrẹ Vwo Dje-e

Okẹ A Mrẹ Vwo Dje-e

ISHAPINA ra vwọ kara ipẹnsoro rọhẹ obọ rẹ Jordan họhọ orọnvwọn ro fiemu-u. Dedena, ọyen orọnvwọn ọvo rọ ghanre kẹ mamọ. Jordan tare nẹ “Russell rọ dia ugbeyan rẹ orua rẹ avwanre yen vwerọ kẹ vwẹ ọke me vwọ hẹ omotete.” Ọke rẹ Russell vwo ghwu nu, Jordan da rhe riẹn nẹ Russell vwẹ ukẹcha kẹ ọsẹ rode kugbe ọsẹ vẹ oni rọyen mamọ ọke ayen vwọ hirharoku ebẹnbẹn. Jordan da ta: “Asaọkiephana me rhe vwọ riẹn kpahen Russell re na, omokẹ nana kọ rhoma rhe ghanre kẹ vwẹ vrẹ obo ri jovwo.”

Obo re phia kẹ Jordan na ghwe djephia nẹ vwẹ ẹro rẹ ihwo evo, okẹ se jẹ emuefio. Ẹkẹvuọvo, vwọ kẹ ohwo ra kẹre okẹ na, ọ sa ghanre vrẹ obo ra sa vwẹ igho dẹ. Baibol na vwẹ eta nana ra riẹnre mamọ na vwo dje okẹ ra mrẹ vwo dje-e: “Kidie ọtiọye Ọghẹnẹ guọnọ akpọ na ọ da vwẹ Ọmọ ọvuọvo rọye na kẹ, rere ohwo kohwo ro sere gbuyota vwo jẹ ghwọrọ ẹkẹvuọvo ko vwo arhọ ri bẹdẹ.”Jọn 3:16.

Okẹ rọ sa kẹ ohwo ra vwerọ kẹ arhọ rẹ bẹdẹ! A sa mrẹ okẹ rọ ghanre vrẹ ọyena? Dede nẹ Inenikristi evo cha sa riẹn ọghanrovwẹ rẹ okẹ yena-a, jẹ Inenikristi uyota vwẹ ẹro “ọghaghanre” vwo no. (Une Rẹ Ejiro 49:8; 1 Pita 1:18, 19) Die yen nẹrhẹ Ọghẹnẹ vwẹ arhọ rẹ Ọmọ rọyen vwọ kẹ akpọ na kerẹ okẹ?

Ọyinkọn Pọl vwẹ eta nana vwo dje oboresorọ: “Umwemwu wan oma rẹ ohwo ọvo rhe akpọ rẹ ughwu da wan oma rẹ umwemwu rhe na, ọtiọye na ughwu da hrabọ ro ihwo ejobi.” (Rom 5:12) Ọshare rẹsosuọ Adam ru umwemwu womarẹ ọ vwọ vwẹ arogba rọyen gbevwọso Ọghẹnẹ, ọtiọyena, o de ghwu. Fikirẹ Adam kọyen ihworakpọ ejobi vwo ghwẹ.

 “Osa rẹ umwemwu hẹ ughwu, ẹkẹvuọvo ẹserọphẹ rẹ Ọghẹnẹ na ọye hẹ arhọ ri bẹdẹ vwẹ evun ri Jesu Kristi Ọrovwavwanre.” (Rom 6:23) Rere e vwo sivwin ihworakpọ vwo nẹ ughwu, Ọghẹnẹ de ji Ọmọ rọyen Jesu Kristi rhe akpọ na re ọ vwẹ arhọ ọgbagba rọyen vwo ze vwọ kẹ ihworakpọ. Izobo nana ra riẹn phiyọ “ẹtanhirhe” na, cha nẹrhẹ kohwo kohwo ro se Jesu gbuyota vwo arhọ rẹ bẹdẹ.Rom 3:24.

Vwọ kpahen ebruphiyọ na ejobi rẹ Ọghẹnẹ cha vwọ kẹ ihwo re ga womarẹ Jesu Kristi na, Pọl da ta: “Ẹkpẹvwẹ kẹ Ọghẹnẹ fiki rẹ ẹse rọye rẹ unu se gbe-e.” (2 Kọrẹnt 9:15) Vwọrẹ uyota, ọtanhirhe na dia oborẹ unu se gbe-e. Yẹ, usun rẹ okẹ na ejobi rẹ Ọghẹnẹ vwọ kẹ ihworakpọ na, diesorọ ọ vwọ dianẹ ọtanhirhe na yen ma ghanre? Idjerhe vọ yen ọ vwọ fẹnẹ okẹ efa ri nẹ obọ rẹ Ọghẹnẹ rhe? * Die yen o fori nẹ o mu avwanre vwo ru? Avwanre jiriro kẹ wẹ nẹ wo se ẹkpahọnphiyọ rẹ Baibol vwọ kẹ enọ yena vwẹ iyovwinreta ivẹ re vwọ kpahen ọnana.

^ e?ko. 8 Jesu “vwẹ arhọ rọye kpahe otọ kẹ avwanre.” (1 Jọn 3:16) Ẹkẹvuọvo, rọ vwọ dianẹ izobo yena ọyen ẹbẹre ọvo rẹ ọhọre rẹ Ọghẹnẹ na, iyovwinreta nana re vwọ kpahen ohwohwo na cha tẹnrovi ẹdia rẹ Ọghẹnẹ rọ dia ohwo rọ kẹ avwanre ọtanhirhe na.