Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Die Yen Ọghẹnẹ Rure?

Die Yen Ọghẹnẹ Rure?

Wọ da guọnọ riẹn ohwo kpobarophiyọ, o che yovwin wọ da ka riẹn obo ro rure vẹ ebẹnbẹn ro phikparobọ re. Vwẹ idjerhe vuọvo na, wọ da guọnọ riẹn Ọghẹnẹ kpobarophiyọ, ofori wọ vwọ riẹn obo ro rure. Wo vwo ru ọtiọyen ye, o se gbevwunu wọ vwọ riẹn obo ro ru wanre, rẹ avwanre mrẹ erere rọyen asaọkiephana, ro ji che djobọte akpeyeren avwanre obaro.

ỌGHẸNẸ MA ERỌNVWỌN EJE VWỌ KẸ ERHUVWU AVWANRE

Jihova yen Ọmemama rọ ma rho, “ugboma rọye re jẹmrẹ na, kọye hẹ, ogangan rẹ ọrho rọye ri bẹdẹ na, a mrẹrẹ vughe vwẹ oma rẹ emu rọ mare.” (Rom 1:20) “Ọye vwẹ ogangan rọye ma akpọ na ohwo rọ vwẹ aghwanre rọye mu akpọ vi, je vwẹ ọhọ rọye riẹn idjuvwu na phihọ.” (Jerimaya 10:12) Igbevwunu rẹ emama ji djephia nẹ Ọghẹnẹ davwerhọn rẹ avwanre.

Roro kpahọn, Jihova ma ihworakpọ vwẹ idjerhe rẹ oghẹresan, “vwẹ oma rọye.” (Jẹnẹsis 1:27) Kọyen ọ ma avwanre vwẹ idjerhe re de se dje iruemu rọyen phia. Ọ ma avwanre vwẹ idjerhe re de vwo ẹruọ rẹ ẹro ro vwo ni emu, obo ri je, vẹ obo ri tuoma. Avwanre de yeren nene iruemu rọyen na, kẹ avwanre yeren akpọ rẹ omavwerhovwẹn. Vwọ vrẹ ọyena, ọ kẹ avwanre uphẹn ra vẹ ekpuyovwin rọyen sa vwọ dia ugbeyan.

Avwanre de ni erọnvwọn rẹ Ọghẹnẹ mare vwẹ akpọ na, ka avwanre riẹn iroro ro vwo kpahen avwanre. Kirobo rẹ ọyinkọn Pọl tare, “o ji vwo ọkeọvo [Ọghẹnẹ] vwo jẹ iseri rẹ oma rọye ẹvwophia-a, kidie o ru emu esiri kẹ [avwanre] ọ da rhọ osio nẹ odjuvwu kugbe omamọ rẹ evwru vẹ ọke rẹ ivuevu rere [avwanre] vwo emuọre vẹ aghọghọ.” (Iruo Rẹ Iyinkọn Na 14:17) Ọ dia obo re sa nẹrhẹ arhọ avwanre dia ọvo yen Ọghẹnẹ vwọ kẹ avwanre-e. O ma erọnvwọn efa buebun re nẹrhẹ avwanre riavwerhen rẹ akpọ. Enana, ẹmẹbẹre ọvo rẹ oborẹ Ọghẹnẹ vwo vwẹ ẹwẹn ro che ru kẹ avwanre.

 Jihova ma ihworakpọ rere ayen vwọ dia akpọ na bẹdẹ. Baibol na da ta: “Otọ na kọye ọ vwọ kẹ emọ rẹ ihwo,” jẹ “ọ vwẹ ozighi ma-a, ọ marọ ra vwọ dia.” (Une Rẹ Ejiro 115:16; Aizaya 45:18) Amono yen cha dia, bro ọke yen a cha dia te? “Ọvwata cha re ughwẹ rẹ otọ na, kọ dia enu rọye bẹdẹ.”—Une Rẹ Ejiro 37:29.

Ẹwẹn yena yen Jihova vwọ ma ọshare kugbe aye rẹsosuọ, Adam vẹ Ivi, o de phi ayen phiyọ iparadaisi vwẹ otọrakpọ “rere ọ sẹro rọye.” (Jẹnẹsis 2:8, 15) Ọghẹnẹ kẹ ayen owian ivẹ re kẹ ohwo omavwerhovwẹn: “We vwiẹ re we bun phihọ, re wa vọn akpọ na, ru we phio kparobọ.” (Jẹnẹsis 1:28) Kọyen Adam vẹ Ivi vwo iphiẹrophiyọ rẹ ayen vwo yeren akpọ rẹ omavwerhovwẹn vwẹ otọrakpọ na rhiri bẹdẹ bẹdẹ jovwo. Jẹ ọ da ohwo mamọ nẹ ayen kerhọ rẹ Ọghẹnẹ-ẹ, ọtiọyena uphẹn rẹ ayen vwọ dia usun rẹ ‘evwata’ re “cha re ughwẹ rẹ otọ na” da va ayen abọ. Ẹkẹvuọvo, kirobo ra cha mrẹ, oborẹ ayen ruru na wene ọhọre rẹ Jihova vwọ kẹ avwanre vẹ otọrakpọ na-a. Jẹ tavwen a ke ta ota kpahen ọyena, je roro kaphen emu ọfa rẹ Ọghẹnẹ rure.

ỌGHẸNẸ KẸ AVWANRE OTA RỌYEN

A riẹn Baibol na phiyọ Ota rẹ Ọghẹnẹ. Diesorọ Jihova vwọ vwẹ Baibol na kẹ avwanre? Rere avwanre se vwo yono kpahọn. (Isẹ 2:1-5) Vwọrẹ uyota, Baibol na kpahenphiyọ enọ eje rẹ avwanre sa nọ kpahen Ọghẹnẹ-ẹ, ẹbe vuọvo je herọ ro se ru ọtiọye-en. (Aghwoghwo 3:11) Dedena, obo rehẹ evunrẹ Baibol na chọn avwanre uko vwọ riẹn Ọghẹnẹ. Avwanre riẹn oka rẹ ohwo rọ hepha womarẹ uruemu ro djephia kẹ ihworakpọ. Avwanre riẹn oka rẹ ihwo ri je vẹ i ro vwo utuoma kpahen. (Une Rẹ Ejiro 15:1-5) Avwanre riẹn ẹro ro vwo ni ẹga, ẹfuọn, kugbe ekuakua akpeyeren. Baibol na nabọ dje uruemu rẹ Jihova kẹ avwanre womarẹ ota vẹ uruemu rẹ Ọmọ rọyen, Jesu Kristi.—Jọn 14:9.

Iroro ọfa rọ nẹrhẹ Jihova kẹ avwanre Ota rọyen rọ dia Baibol na, ọyen avwanre vwọ riẹn obo re se vwo yeren akpọ rẹ omavwerhovwẹn. Vwevunrẹ Baibol na, Jihova vuẹ avwanre oborẹ omavwerhovwẹn sa vwọ dia akpeyeren rẹ orua, obo re se vwo vwo ẹwẹn rẹ otekẹvwẹ, kugbe obo re se vwo yerin ghene ẹnwan. Kirobo re che djefiotọ obọ vwẹ imagazini nana, Baibol na kpahenphiyọ enọ re ma ghanre kerẹ: Diesorọ ojaẹriọ vwọ vọn asan eje? Die yen cha phia obaro na? O ji djekpahen oborẹ Ọghẹnẹ rure, rere ọhọre rọyen rẹsosuọ na se vwo rugba.

O vwo erọnvwọn efa buebun ri djerephia nẹ Baibol na ghini ọbe rẹ oghẹresan, Ọghẹnẹ ọvo yen se vwo oka rẹ ọbe ọtiọyen. Ikpe re vrẹ 1,600 yen ọ reyọre tavwen e ki sio re, omarẹ eshare 40 yen siro, dedena, Baibol na vwo uyovwinrota ọvo, ọyena ghwa odjephia nẹ Ọghẹnẹ yen vworo. (2 Timoti 3:16) Vwọ fẹnẹ erọnvwọn awanre efa, a nabọ sẹro rẹ Baibol na gbagba rhi te ọke nana, kirobo rẹ uriorin buebun rẹ imanuskripti rẹ awanre djephia. Baibol na je herọ te ọke nana, dede nẹ a davwẹngba ra vwọ dobọ rẹ ẹfan, ẹgharọ, kugbe ese rọyen ji. Nonẹna, Baibol na yen ọbe ra tobọ ma ghare, je fan. Kidie nẹ a sa ghwọrọ Baibol na-a, ọyena odjephia nẹ “ota rẹ Ọghẹne rẹ avwanre mudia bẹdẹ.”—Aizaya 40:8.

ỌGHẸNẸ KẸ AVWANRE IMUẸRO NẸ ỌHỌRE RỌYEN CHE RUGBA

Emu ọfa rẹ Ọghẹnẹ ruru ọyen ọrhuẹrẹphiyotọ ro vwo djephia nẹ ọhọre rọyen vwọ kẹ ihworakpọ che rugba. Kirobo ra tare jovwo re, Ọghẹnẹ ma ihworakpọ rere ayen vwọ dia bẹdẹ. Ẹkẹvuọvo, ọke rẹ Adam vwo jẹ ẹme Ọghẹnẹ enyo, ro de ru umwemwu, uphẹn rẹ te ekpuyovwin rọyen vẹ emọ ro che vwiẹ vwọ dia bẹdẹ da va abọ. “Umwemwu wan oma rẹ ohwo ọvo rhe akpọ rẹ ughwu da wan oma rẹ umwemwu rhe na, ọtiọye na ughwu da hrabọ ro ihwo ejobi fikiridie ihwo ejobi ru umwemwu.” (Rom 5:12) Ijẹmienyo rẹ ohworakpọ da vwọso ọhọre rẹ Ọghẹnẹ. Die kọyen Jihova ruru?

Uruemu rẹ Jihova vẹ oka rẹ ohwo ra riẹnrẹ phiyọ shephiyọ ohwohwo. Ọ nọ Adam vẹ Ivi orhiẹn kpahen oborẹ ayen ruru, ẹkẹvuọvo o ru ọrhuẹrẹphiyotọ vwọ kẹ emọ rẹ ayen che vwiẹ vwẹ obaro. Jihova reyọ aghwanre rọyen vwo brorhiẹn rẹ obo ro che ru kpahen ẹdia na, ugege yena o de  ghwoghwo obo rọ cha vwọ rhuẹrẹ ẹdia na phiyọ. (Jẹnẹsis 3:15) Idjerhe rẹ avwanre sa vwọ vrabọ rẹ umwemwu vẹ ughwu ọyen womarẹ Ọmọ rẹ Ọghẹnẹ Jesu Kristi. Die yen ọyena churobọ si?

Rọ vwọ tan ihworakpọ nẹ umwemwu rẹ Adam vẹ Ivi, Jihova de ji Jesu rhe akpọ na ro vwo yono ihwo kpahen idjerhe rẹ arhọ “rere ọ vwẹ arhọ rọye tan ihwo buebu.” * (Matiu 20:28; Jọn 14:6) Jesu sa tan ihworakpọ hirhe, kidie ọyen ohwo ọgbagba kerẹ Adam. Ẹkẹvuọvo, vwọ fẹnẹ Adam, Jesu nyẹme re te ọke ughwu. Rọ vwọ dianẹ ofori rẹ Jesu vwo ghwu jovwo-o na, Jihova da rhọvwọn rhivwin kpo odjuvwu. Jesu ru oborẹ Adam se ru-u—ọ kẹ ihworakpọ iphiẹrophiyọ rẹ ayen vwọ dia bẹdẹ bẹdẹ. “Kidie obo ri ijọghọevwo rẹ ohwo ọvo ru ihwo buebu phihọ iruimwemwu na, ọtiọye na ọghọemuo rẹ ohwo ọvo rhe ru ihwo buebu phihọ ọvwata.” (Rom 5:19) Womarẹ izobo rẹ ọtanhirhe rẹ Jesu, Ọghẹnẹ che ru ive rọyen rẹ ihworakpọ vwọ dia otọrakpọ bẹdẹ gba.

Avwanre yono erọnvwọn buebun kpahen Jihova womarẹ obo rọ rhuẹrẹ ebẹnbẹn rẹ Adam vẹ Ivi soro phiyọ. A rhe mrẹre nẹ emu vuọvo cha sa dobọ rẹ Jihova ji ro vwo jẹ obo rọ guọnọre eruo-o; ota rọyen che ru obo ro “jiro no ru,” yẹrẹ rugba. (Aizaya 55:11) Ọnana nẹrhẹ avwanre rhe riẹn oborẹ ẹguọnọ rẹ Jihova vwo kpahen avwanre kodo te. “Vwẹ ọnana kọye ẹguọnọ rẹ Ọghẹnẹ vwọ phia vwẹ o hri rẹ avwanre, nẹ Ọghẹnẹ ji Ọmọ rọye Ọvuọvo na rhe akpọ na, rere avwanre vwọ wan oma rọye rhọ. Ọnana hẹ ẹguọnọ, ọ dianẹ kẹ avwanre re guọnọ Ọghẹnẹ-ẹ ẹkẹvuọvo ọye re guọnọ avwanre o de ji Ọmọ rọye rhe rhe rhuẹrẹ arhuẹrẹ fiki rẹ imwemwu rẹ avwanre.”—1 Jọn 4:9, 10.

Ọghẹnẹ tobọ “vwẹ Ọmọ rọye ọvuọvo jahwa-a ẹkẹvuọvo o de siobọ no kẹ avwanre ejobi,” ọtiọyena avwanre vwo imuẹro nẹ Ọghẹnẹ che ru “emu na ejobi” ro veri na. (Rom 8:32) Die yen Ọghẹnẹ veri nẹ o che ru kẹ avwanre? Se yan.

DIE YEN ỌGHẸNẸ RURE? Jihova ma ihworakpọ rere ayen vwọ dia akpọ na bẹdẹ. Ọ kẹ avwanre Baibol na rere e se vwo yono kpahọn. Womarẹ Jesu Kristi, Jihova da vwẹ ọtanhirhe phia, ọyena da vwẹ imuẹro phia nẹ o che ru ọhọre rọyen gba

^ e?ko. 16 Wọ da guọnọ evuẹ efa kpahen ọtanhirhe na, ni uyovwinrota 5 rẹ ọbe rẹ Die Yen Baibol na Se Yono Avwanre? rẹ Iseri rẹ Jihova teyenre, wọ sa mrẹ vwẹ www.jw.org/urh.