Baibol na tare nẹ ẹwẹn rẹ Ọghẹnẹ yen e vwo si uchebro rehẹ evun rọyen, nẹ ọ “vọnre vẹ erere kẹ uyono, ẹghwọkuo, ẹrhuẹrẹ phiyọ.” (2 Timoti 3:16, NW ) Eta yena uyota? Roro kpahen oborẹ aghwanre rọhẹ Baibol na vwẹ ukẹcha kẹ ihwo vwọ kẹnoma kẹ ebẹnbẹn evo re ma gan vwẹ akpeyeren, ebẹnbẹn na rha sa vwẹ owọ muotọ-ọ.

A VWỌ DA UDI VROMA

Delphine, re djunute vwẹ uyovwinrota ra wan vrẹ na tare nẹ ẹnwan rọyen nẹrhẹ o rhi vwo uruemu ra vwọ da udi vroma. Ọ dia Baibol na tare nẹ e jẹ udi ẹda-a, ẹkẹvuọvo ọ tare nẹ “Wọ dia ọvo vwẹ usun rẹ ọgba-idi na-a.” (Isẹ 23:20) A tare nẹ udi ẹda vroma so ebẹnbẹn kẹ omakpokpọ rẹ ohwo, ọ nẹrhẹ orọnvwe fan, ọ je so ughwu kẹ ihwo buebun kukpe kukpe. A sa kẹnoma kẹ buebun rẹ ebẹnbẹn nana siẹrẹ ihwo de nene eta rẹ aghwanre rehẹ Baibol na.

Delphine ru ọtiọyen. Asaọkiephana, enẹ kọyen ọ tare: “Me rhe mrẹvughe nẹ udi si ẹnwan mẹ no-o. Me reyọ eta rehẹ Filipae 4:6, 7, vwo ruiruo, rọ tare: ‘Wa ro ẹnwan rẹ emuọvo-o . . . ta ọdavwẹ wẹn kẹ Ọghẹnẹ.’ Kason kason rẹ iroro na da kọn rhe, rẹ ẹnwan na da gan nọ, ke me ta ọdavwẹ mẹ kẹ Jihova vwẹ ẹrhovwo. Me vuẹ kemu kemu ro kpokpo uvwe ẹwẹn, ophu, ọmiaovwẹ, ofudjevwe, me je vuẹ nẹ ọ chọn vwẹ uko mi se vwo vwo iroro ro shephiyọ. Ọke de rhie, ke me davwẹngba me vwọ kpairoro vrẹn iroro yena eje. Uruemu rẹ ẹrhovwo ẹnẹ chọn vwẹ uko vwọ tẹnrovi oborẹ mi vwori ukperẹ me vwọ tẹnrovi oborẹ mi vwori-i. Mi brorhiẹn nẹ me rha cha da udi ọfa-a. Kidie ufuoma ro te vwe obọ na pha ghanghanre, me guọnọ kparọ kufia-a.”

 ỌFANRHIẸN

Ebẹnbẹn re so ofudjevwe vẹ jẹ omavwerhovwẹn evwo kẹ ohwo vrẹ ọfanrhiẹn, ghwe bu-un. Jẹ uchebro rẹ Baibol na sa chọn avwanre uko vwọ kẹnoma kẹ ebẹnbẹn tiọyena, kidie o djunute erọnvwọn evo ri suẹn kpo ọfanrhiẹn, kerẹ udje, a vwọ frẹfrẹ vẹ e vwo nughe rẹ ihwo re banphiyọ. Eghene ọvo re se Samuel tare nẹ “ọ pha lọlọhọ, e vwo vwo uruemu ra vwọ frẹfrẹ. Vwẹ ọke evo, ọ dianẹ kẹ mi vwo ẹwẹn kpahen ohwo na-a, jẹ me sa riẹn nẹ mi je ohwo na, ọyena kọ nẹrhẹ ọ lọhọ kẹ vwẹ mi vwo nene frẹfrẹ.” Samuel ko rhi noso nẹ ihwo tanẹ o vwo uruemu ra vwọ frẹfrẹ, tobọ vwẹ ọke ro vwo ẹwẹn ro vwo ru ọtiọye-en, te ẹdia rẹ o de brorhiẹn rọ vwọ vwẹ arogba frẹfrẹ. Ẹkẹvuọvo, uruemu yena kpokpiro ẹwẹn mamọ. Ọ da ta asaọkiephana nẹ, “ọyena orharhe rẹ uruemu kidie ọ nẹrhẹ ohwo vwẹ ọdavwẹ rọyen kobaro.”

Samuel se uyovwinrota ọvo ra rhuẹrẹ kẹ ighene vwẹ jw.org. O de roro kpahen Isẹ 20:11, rọ tare: “Uruemu rẹ omotete ọvo ri dje phia, sẹ obo ro ruẹ shephihọ eyẹ ọ chọre.” Mavọ yen ọyena sa vwọ vwẹ ukẹcha kẹ? Samuel kọ rhe mrẹvughe nẹ uruemu ẹfrẹfrẹ rọyen na chọre. Ọ da ta enẹna nẹ, “Me je mrẹvughe nẹ eghene ro vwo uruemu ra vwọ frẹfrẹ kọn iruemu re cha nẹrhẹ o vwo ebẹnbẹn vwẹ orọnvwe rọyen vwẹ obaro. Ki mi roro kpahan oborẹ aye re me cha reyọ che ru siẹrẹ ọ da mrẹ nẹ mi nene aye ọfa frẹfrẹ. Ọyena chọn vwẹ uko vwọ riẹn nẹ uruemu yena vẹ ebẹnbẹn usun. Kidie nẹ ọ pha lọlọhọ e vwo ruo, nẹrhẹ ọ dia uruemu ro shephiyọ-ọ.” Samuel de siobọ nẹ uruemu yena. Kidie nẹ ọ kẹnoma kẹ ẹfrẹfrẹ, kọ je sa kẹnoma kẹ ọfanrhiẹn.

Ẹdia rẹ Antonio tobọ bra vrẹ ọ re djunute na: O muomaphiyọ ughe eno rẹ ihwo re banphiyọ. Dede nẹ ọ rọnvwọn aye ro vwo ẹguọnọ kpahen mamọ, jẹ o ji shufi rẹ uruemu na nọke ra ruọke. Ọ tare nẹ eroro kpahen 1 Pita 5:8 ghene vwẹ ukẹcha kẹ mamọ. Ọ tare nẹ “Jẹn ẹro hiẹ wẹ, rhẹrẹ. Ukọn wẹn idẹbono na ọ rọ rhẹrẹ kerẹ okpohrokpo rọ guan, ro guọnọ obo rọ rọ.” Antonio da ta: “Ihoho rẹ ihwo re banphiyọ riariẹ avwanre phiyọ vwẹ akpọ na, ihoho tiọyena sa dia ẹwẹn ohwo krekri. Owọrota yena vwẹ ukẹcha kẹ vwẹ vwo roro kpahen esiri rẹ ọdavwini rẹ ihoho rẹ ihwo re banphiyọ na. Ofori me vwọ karophiyọ ugege me da ghwa mrẹ ihoho rẹ ihwo re banphiyọ nẹ obọ rẹ Idẹbono yen i nurhe. Asaọkiephana me rhe mrẹvughe re nẹ Jihova ọvo yen sa vwẹ ukẹcha kẹ vwẹ vwo ‘jẹ ẹro hiẹ vwẹ, je rhẹrẹ’ rere me sa vwọ họnre vwọso erharhe iroro yena rehẹ evunrẹ ubiudu mẹ, re je vwọso orọnvwe mẹ na.” Antonio mrẹ ukẹcha rọ guọnọre, o de ji phi uruemu yena kparobọ ukuotọ rọyen. Ọyena vwẹ ukẹcha kẹ vwọ kẹnoma kẹ ebẹnbẹn re tobọ gan vrẹ ọtiọyen.

Ophẹnre nẹ Baibol na vwo uchebro re sa vwẹ ukẹcha kẹ avwanre vwọ kẹnoma kẹ ebẹnbẹn. Kẹ ebẹnbẹn re rha vwẹ owọ muotọ re vwo? Je ni oborẹ Ota rẹ Ọghẹnẹ sa vwẹ ukẹcha kẹ avwanre vwọ rhuẹrẹ ebẹnbẹn tiọyena phiyọ.

Odjekẹ rẹ Baibol na sa chọn avwanre uko vwọ kẹnoma kẹ ebẹnbẹn evo