Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Irhuon vẹ Osẹnvwe Wẹn Vwẹ Ujiri kẹ Ọghẹnẹ?

Irhuon vẹ Osẹnvwe Wẹn Vwẹ Ujiri kẹ Ọghẹnẹ?

“Kemu kemu wo ruru, ru ayen ejobi vwọ kẹ urinrin rẹ Ọghẹnẹ.”—1 KỌR. 10:31.

UNE: 34, 61

1, 2. Diesorọ Iseri rẹ Jihova vwọ sẹn omamọ osẹnvwe? (Ni uhoho rẹsosuọ na.)

ỌBE rọ ghwa iyẹnrẹn rẹ ejajẹ rẹ Dutch da ta eta nana kpahen omẹvwa ọvo rẹ ilori ẹga rare, ọ tare nẹ, “Wọ cha mrẹ erharhe iwun sansan, ma rho ọ da dianẹ aruọke na rhorha. Ẹkẹvuọvo, ọ dia ọtiọyen ọ hepha vwẹ ọghwẹkoko rẹ Iseri rẹ Jihova-a. . . . Eshare vẹ emeshare kuẹ ikotu phiyọ je nabọ gba itai, eya vẹ emetẹ rayen ki rhe kuẹ iskẹti re nabọ shetotọ phiyọ, . . . ri vwo erhuvwu ri ji nabọ faro.” Vwọrẹ uyota, ọkieje yen e vwo jiri Iseri rẹ Jihova kidie ayen sẹn omamọ “osẹvwe rẹ oma evwokpotọ . . . kirobo ri fori kẹ [ihwo] ri segbuyota.” (1 Tim. 2:9, 10) Ọyinkọn Pọl ta eta nana vwọ kẹ eya, ẹkẹvuọvo o ji shekpahen eshare.

2 Kerẹ ihwo rẹ Jihova, omamọ osẹnvwe pha ghanghanre kẹ avwanre, ọtiọyen ọ je hepha kẹ Ọghẹnẹ rẹ avwanre ga. (Jẹn. 3:21) Oborẹ Baibol na ta kpahen irhuon vẹ osẹnvwe kẹ avwanre imuẹro nẹ Ọromevwẹgba vwẹ akpọ vẹ odjuvwu na vwo iwan rẹ idibo rọyen nene. Ọtiọyena, ọ diẹ irhuon vẹ osẹnvwe ri je avwanre ọvo yen a cha tẹnrovi-i. E ji che roro kpahen obo ri je Osun avwanre, Jihova.

3. Die yen Urhi rẹ Ọghẹnẹ vwọ kẹ ihwo rẹ Izrẹl na yono avwanre kpahen irhuon?

 3 Kerẹ udje, vwevunrẹ Urhi rẹ Ọghẹnẹ vwọ kẹ ihwo rẹ Izrẹl, ọ kẹ ayen iji re sẹro rayen vwo nẹ uruemu rẹ ọfanrhiẹn rẹ irere re riariẹ ayen phiyọ ruẹ. Urhi na djerephia nẹ Jihova vwo utuoma kpahen oka rẹ iwun rẹ eya vẹ eshare kuẹphiyọ rọ nẹrhẹ a rha sa mrẹ ofẹnẹ rẹ ọshare vẹ aye-e; ọnana kọyen ihwo se nonẹna nẹ iwun re ru kẹ eya vẹ eshare. (Se Urhi Rivẹ 22:5.) Vwo nene oborẹ Ọghẹnẹ ta kpahen osẹnvwe, a mrẹrẹ phephẹn nẹ Ọghẹnẹ vwo utuoma kpahen irhuon vẹ osẹnvwe re nẹrhẹ eshare họhọ eya, e re nẹrhẹ eya họhọ eshare, yẹrẹ e re nẹrhẹ a rha sa riẹn sẹ ohwo na ọshare yẹrẹ aye-e.

4. Die yen sa chọn Inenikristi uko vwo bru omamọ orhiẹn kpahen osẹnvwe?

4 Baibol na vwo odjekẹ re sa chọn Inenikristi uko vwo bru omamọ orhiẹn kpahen oborẹ ayen sẹn osẹnvwe wan otoro asan rẹ ayen dia-a, ẹkuotọ rẹ ayen nurhe-e, yẹrẹ aruọke na-a. Ọ diẹ e che kere oka rẹ iwun ra kẹnoma kẹ yẹrẹ re kuphiyọ kẹ avwanre-e. Ukperẹ ọtiọyen, avwanre vwo iji vwẹ Baibol na rọ je vwẹ uphẹn kẹ ọdavwẹ avwanre. E jẹ a fuẹrẹn evo re sa chọn avwanre uko vwọ riẹn “obo ri yoma ro fo ẹreyọ kugbe obo re gbare” siẹrẹ e de brorhiẹn rẹ obo re kuphiyọ.—Rom 12:1, 2.

“AVWANRE DJE OMA RẸ AVWANRE PHIA KERẸ IDIBO RẸ ỌGHẸNẸ”

5, 6. Idjerhe vọ yen osẹnvwe avwanre vwo djobọte ihwo efa?

5 Ọyinkọn Pọl kanrunumu ọghanrovwẹ rẹ iji rọhẹ 2 Kọrẹnt 6:4. (Se.) Osẹnvwe avwanre dje oka rẹ ohwo avwanre hepha. Oborẹ ihwo “nẹ” yẹrẹ mrẹ vwẹ oma avwanre yen vuẹ ayen oka rẹ ohwo avwanre hepha. (1 Sam. 16:7) Kerẹ idibo rẹ Ọghẹnẹ, a riẹnre nẹ osẹnvwe avwanre vrẹ e di vwo ku iwun ri je avwanre phiyọ. Ofori nẹ irhi rẹ Ọghẹnẹ rehẹ Baibol na mu avwanre vwọ kẹnoma kẹ iwun re tamuẹ oma, ri rhie oma phiyọ, yẹrẹ re kpare urhurusivwe rẹ ọfanrhiẹn. Ọnana cha nẹrhẹ a kẹnoma kẹ iwun ri rhie ẹbẹre ro fori nẹ e sinu vwẹ oma avwanre phiyọ. Ofori nẹ ihwo ku opharo fia siẹrẹ ayen da mrẹ osẹnvwe avwanre-e.

6 Osẹnvwe avwanre da nabọ shephiyọ, dia ọ rọ fonro, eto avwanre da je dia abavo, ihwo ki che muogho kẹ avwanre kerẹ idibo rẹ Jihova rọ dia Osun avwanre. Kẹ ayen ji che vwo ẹwẹn ayen vwọ ga Jihova. Vwọba, irhuon avwanre de shephiyọ, ọ cha nẹrhẹ a vwẹ omamọ ẹro vwo ni ukoko na. Ukuotọ rọyen, ihwo ke cha kerhọ rẹ ovuẹ rẹ usivwin rẹ avwanre ghwoghwo.

7, 8. Ọke vọ yen ọ da ma ghanre nẹ a sẹn osẹnvwe rẹ abavo?

7 Irhuon vẹ osẹnvwe avwanre djobọte Ọghẹnẹ rọ pha ọfuanfon na, iniọvo avwanre vẹ ihwo re ghwoghwo kẹ. E jẹ avwanre sẹn osẹnvwe abavo rọ cha ghwa urinrin vwo rhe Jihova, ji brọghọ phiyọ iruo aghwoghwo na. (Rom 13:8-10) Ma rho, e de vwobọ vwẹ iruo rẹ ẹga na kerẹ uyono ẹra yẹrẹ iruo aghwoghwo na. E jẹ a sẹn osẹnvwe “kirobo ri fori kẹ [ihwo] ri segbuyota.” (1 Tim. 2:10) Vwọrẹ uyota, osẹnvwe ro shephiyọ vwẹ asan evo sa dia obo ri shephiyọ-ọ vwẹ asan efa. Ọtiọyena, ihwo rẹ Jihova vwẹ akpọneje roro kpahen obo ri shephiyọ vwẹ asan rayen.

Osẹnvwe wẹn cha nẹrhẹ ihwo efa muọghọ kẹ Ọghẹnẹ wẹn? (Ni ẹkoreta 7, 8)

 8 Se 1 Kọrẹnt 10:31. E de kpo isikoko vẹ eghwẹkoko, e jẹ osẹnvwe avwanre dia ọ rẹ abavo ukperẹ ọ vwọ họhọ ọ rẹ akpọ na. Ọ da dianẹ ihotẹl yen avwanre wonri yẹrẹ asan efa, e jẹ a kẹnoma kẹ osẹnvwe rọ pha rhaphiẹ rhaphiẹ vwẹ urhiọke yẹrẹ ovwọnvwọn rẹ ẹdẹ ọvuọvo. Ọ da dia ọtiọyen, ke se dje oma kẹ ihwo nẹ avwanre Iseri rẹ Jihova. Ke ji se vwo ọmuvwiẹ re vwo ghwoghwo ota siẹrẹ uphẹn na de rhiephiyọ.

9, 10. Diesorọ o vwo fo nẹ Filipae 2:4 djobọte osẹnvwe avwanre?

9 Se Filipae 2:4. Diesorọ Inenikristi vwo roro kpahen oborẹ osẹnvwe rayen djobọte iniọvo rayen wan? Iroro ọvo kẹ ọna: idibo rẹ Ọghẹnẹ davwẹngba ayen vwo nene uchebro rẹ Baibol nana: “Hwe urhuru sivwe ofefe rẹ akpọ na re o ghwu; igberadja, inuhu, avwerhe rẹ ugboma.” (Kọl. 3:2, 5) Ofori nẹ a dia ekprowọ kẹ iniọvo ri nene uchebro nana-a. Ọ sa dianẹ iniọvo ri ke yeren akpọ rẹ ọfanrhiẹn jovwo, ji nene ẹdia nana muabọ. (1 Kọr. 6:9, 10) Ofori nẹ a rhoma nẹrhẹ ohọnre na gan vwọ kẹ ayen?

10 Avwanre da hẹ ohri rẹ iniọvo na, e jẹ irhuon avwanre dia ọ ro toroba ẹfuọn rẹ ukoko na. Owenẹ avwanre hẹ uyono yẹrẹ e di siomakoko vwọ kẹ irueru efa. Avwanre vwo ọmuvwiẹ rẹ osẹnvwe. Dedena, e ji vwo oghwa ra vwọ sẹn osẹnvwe rọ cha nẹrhẹ ọ lọhọ  kẹ iniọvo na ayen vwọ sẹro rẹ ẹfuọn rayen je yanmu iwan rẹ Ọghẹnẹ vwọrẹ iroro, ota vẹ uruemu. (1 Pita 1:15, 16) Ẹguọnọ rẹ uyota “vwo udu-u. Ẹguọnọ ghwe churu obọ muẹ ọrọye ọvo-o.”—1 Kọr. 13:4, 5.

OSẸNVWE ABAVO VWẸ ỌKE VẸ ASAN RO FORI

11, 12. Die yen e roro kpahen siẹrẹ e de brorhiẹn rẹ obo re che kuphiyọ?

11 Idibo rẹ Ọghẹnẹ de che brorhiẹn rẹ oborẹ ayen kuphiyọ, ayen vwo ọmrẹvughe nẹ, “vwọ kẹ kemu kemu o vwo ẹghẹre, kugbe ọke.” (Aghwo. 3:1, 17) A riẹnre nẹ aruọke sansan na djobọte obo ra sẹn osẹnvwe wan. Ọtiọyen ji te ẹdia rẹ akpeyeren sansan. Ẹkẹvuọvo, irhi rẹ Jihova wene nene aruọke-e.—Mal. 3:6.

12 Vwẹ asan evo rẹ aruọke rayen rhorha, ọ sa bẹn ra vwọ sẹn osẹnvwe ro shephiyọ. Dedena, oma cha vwerhen iniọvo na siẹrẹ avwanre da kẹnoma kẹ iwun re tamuẹ oma yẹrẹ ri rhie oma phiyọ. (Job 31:1) Vwọba, e de rovwonma vwẹ okoko rẹ urhie, yẹrẹ a da hẹ asan ra da rhẹrhẹ, ofori nẹ iwun avwanre ji shephiyọ. (Isẹ 11:2, 20) Ọ da tobọ dianẹ iwun ra vwọ rhẹrhẹ ri rhie oma phiyọ yen ihwo buebun kuẹphiyọ vwẹ akpọ na, avwanre re ga Jihova roro kpahen oborẹ osẹnvwe avwanre sa vwọ ghwa ujiri rhe Ọghẹnẹ avwanre.

13. Diesorọ uchebro rọhẹ 1 Kọrẹnt 10:32, 33 vwo djobọte osẹnvwe avwanre?

13 O vwo orọnvwọn ọfa rọ sa chọn avwanre uko vwọ sane irhuon ro shephiyọ. Ọyehẹ re vwo roro kpahen ẹwẹn obrorhiẹn rẹ ihwo efa, te e dia iniọvo yẹrẹ e dia iniọvo-o. (Se 1 Kọrẹnt 10:32, 33.) E jẹ a nabọ jomaotọ kpahen iwun re sa dia ekprowọ kẹ ihwo efa. Pọl de si: “E jẹ avwanre ọvuọvo ru obo ri je ohwohwo fiki rẹ erhuvwu rọye, rere o vwo mudia gan.” Ọ da je ta oboresorọ: “Kidie Kristi guọnọ erhuvwu rẹ oma rọye-e.” (Rom 15:2, 3) Vwọrẹ imuẹro, ukẹcha ra vwọ kẹ ihwo efa yen Jesu phi phiyọ ẹdia ẹsosuọ vwọ vrẹ ojevwe romobọ rọyen, ọnana churobọ si eruo rẹ ọhọre rẹ Ọghẹnẹ. Ọtiọyena, e jẹ a kẹnoma kẹ erọnvwọn yẹrẹ osẹnvwe ri je avwanre ọ da dianẹ e sa nẹrhẹ ihwo jẹ erhọ rẹ iyẹnrẹn esiri na ẹka.

14. Mavọ yen emiọvwọn se vwo yono emọ rayen oborẹ ayen vwọ sen omamọ osẹnvwe rọ cha hwarhiẹ ujiri rhe Ọghẹnẹ?

14 Emiọvwọn vwo owian ayen vwo yono orua rayen obo ra vwẹ uchebro rẹ Baibol vwo ruiruo. E jẹ ayen vwo imuẹro nẹ ayen vẹ emọ rayen davwẹngba vwo ruẹ ubiudu rẹ Ọghẹnẹ ghọghọ womarẹ irhuon vẹ osẹnvwe rayen. (Isẹ 22:6; 27:11) Emiọvwọn sa kọn oshọẹdjẹ rẹ Ọghẹnẹ phiyọ ẹwẹn rẹ emọ rayen womarẹ omamọ udje rayen kugbe odjekẹ rọ vọnre vẹ ẹguọnọ. Mavọ yen o yovwin te emiọvwọn de yono emọ rayen asan rẹ ayen da sa mrẹ omamọ iwun vẹ oborẹ ayen se vwo vughe ayen! Ọnana mudiaphiyọ nẹ ọ diẹ iwun ri je ayen ọvo yen ayen cha dẹ-ẹ, ẹkẹvuọvo iwun rẹ ayen se vwo ruiruo rẹ ẹga na.

VWẸ ỌMUVWIẸ WẸN RUIRUO VWẸ IDJERHE AGHWANRE

15. Die yen che sun oka rẹ osẹnvwe avwanre sẹn?

15 Baibol na vwo uchebro rọ sa chọn avwanre uko vwo brorhiẹn aghwanre rọ cha ghwa urinrin vwo rhe Ọghẹnẹ. Dedena, obo ri je avwanre yen avwanre che kuphiyọ. Kirobo rẹ ojevwe  avwanre fẹnẹre, ọtiọyen uweren avwanre je fẹnẹ. Ẹkẹvuọvo, e jẹ iwun avwanre dia fuanfon, i ri shephiyọ, ri fo asan ra guọnọ ra, re ji rhiabọreyọ vwẹ asan avwanre dia.

16. Diesorọ a vwọ davwẹngba avwanre eje vwọ sẹn osẹnvwe abavo?

16 Vwọrẹ uyota, ọ ghwa lọhọ e vwo brorhiẹn rẹ aghwanre rọ nabọ guọnọ iroro okokodo-o. Iwun ri nene ojevwe rẹ akpọ na ọyen a shẹ vwẹ asan buebun, ọtiọyena, ọ guọnọ ọke vẹ ẹgbaẹdavwọn a ke sa mrẹ iwun, iskẹti, ikotu, itrọza re tamuẹ oma-a. Dedena, iniọvo na che noso nẹ osẹnvwe wẹn ọ rẹ abavo, oma je cha vwerhen ayen kpahọn. Aghọghọ ro rhe avwanre kidie nẹ a vwẹ urinrin kẹ Ọsẹ avwanre rọhẹ odjuvwu rho vrẹ ebẹnbẹn re rhiẹromrẹ a sa vwọ sẹn osẹnvwe abavo.

17. Erọnvwọn vọ yen sa nẹrhẹ oniọvo ọshare yanjẹ ẹtoegba rọyen vwo yẹrẹ wanrọ?

17 Kẹ iniọvo eshare ri vwo ẹtoegba vwo? Urhi rẹ Mosis na vwẹ uphẹn kẹ eshare nẹ ayen vwo ẹtoegba. Ẹkẹvuọvo, avwanre rha hẹ otọ rẹ Urhi rẹ Mosis na-a. (Liv. 19:27; 21:5; Gal. 3:24, 25) Vwẹ asan evo, iniọvo eshare vwo vwo ẹtoegba ra nabọ vwẹrote ghwa bra-a, o ji djobọte aghwoghwo Uvie na-a. Ekpako vẹ idibo rowian evo tobọ ghwa ẹtoegba vwẹ asan tiọyena. Dedena, iniọvo evo vwẹ asan vuọvo na, se brorhiẹn nẹ ayen cha ghwa-a. (1 Kọr. 8:9, 13; 10:32) Vwẹ asan efa, ọ ghwa dia ẹkuruemu rayen ra vwọ yanjẹ ẹtoegba vwo-o, ọtiọyena iniọvo eshare ke wanre ẹtoegba rayen. Vwọrẹ uyota, oniọvo rọ wanre ẹtoegba rọye-en se jẹ urinrin ẹvwọ kẹ Ọghẹnẹ fikirẹ irhuon vẹ osẹnvwe rọyen na, kọ je cha diẹ ohwo ro vwo ekan.—Rom 15:1-3; 1 Tim. 3:2, 7.

18, 19. Mavọ yen Maika 6:8 sa vwọ chọn avwanre uko vwọ sẹn osẹnvwe rọ cha nẹrhẹ oma vwerhen Ọghẹnẹ?

18 Mavọ ọ vwerhen oma te ra vwọ riẹn nẹ Jihova kẹ avwanre irhi egangan kpahen osẹnvwe vẹ irhuo-on! Ukperẹ ọtiọyen, ọ vwẹ uphẹn kẹ avwanre nẹ a vwẹ ọmuvwiẹ avwanre vwo brorhiẹn rẹ aghwanre re mu kpahen irhi rẹ Baibol na. Ọtiọyena, vwẹ osẹnvwe vẹ irhuon avwanre, ke se djephia nẹ avwanre guọnọ ‘vwomakpotọ yan nene Ọghẹnẹ avwanre.’—Maika 6:8.

19 Omaevwokpotọ churobọ si a vwọ vwẹ ofuanfon rẹ Jihova vwọ nabọ fuẹrẹn oma avwanre kidie avwanre vwẹroso odjekẹ rọyen kare kare. Vwọba, omaevwokpotọ ji churobọ si e vwo muọghọ kẹ iroro rẹ ihwo efa vẹ ẹro rẹ ayen vwo nẹ emu. Siẹrẹ e de wene akpeyeren avwanre vwo nene irhi rọyen ji muọghọ kẹ ẹro rẹ ihwo efa vwo nẹ emu, jẹ avwanre ‘vwomakpotọ yan nene Ọghẹnẹ.’

20. Idjerhe vọ yen ofori nẹ osẹnvwe vẹ irhuon avwanre djobọte ihwo efa wan?

20 E jẹ osẹnvwe avwanre dje avwanre phia kerẹ idibo rẹ Jihova. E jẹ iniọvo na vẹ ihwo efa mrẹvughe nẹ avwanre ghine ihwo re vwẹ odẹ rẹ Ọghẹnẹ vwọ yan. O vwo irhi, oma je vwerhen avwanre e de nene irhi na. E jiri iniọvo eshare vẹ eya re vwẹ omamọ osẹnvwe vẹ uruemu rayen vwọ nẹrhẹ ihwo kerhọ rẹ ovuẹ rẹ Baibol na, re je ghwa ujiri vẹ aghọghọ rhe Jihova. E de brorhiẹn rẹ aghwanre kpahen obo re kuphiyọ, ọ cha vwẹ urinrin rhe Ohwo rọ vwẹ “ọghọ kugbe orhuarho vwo rhuo.”—Une 104:1, 2.