Wọ karophiyọ ọke wọ vwọ hẹ omotete, wo vwo she? Ọkiọvo wọ tobọ wan oma vwẹ obọ yẹrẹ ugbo wẹn. Wọ sa karophiyọ ọke rẹ oni wẹn vwọ nẹrhẹ owẹ? Ọ sa dianẹ ọ nabọ vwẹrote ora na. Dede nẹ wọ viẹre, jẹ eta re bọrọ bọrọ rọyen vẹ onẹrhẹvwe rọ kẹ wẹ nẹrhẹ ẹwẹn wẹn totọ. Ọke wọ vwọ hẹ omotete, wọ mrẹ onẹrhẹvwe ọkieje.

Ẹkẹvuọvo, ohwo vwo ghwanra na, jẹ akpọ ganphiyọ, ebẹnbẹn je rhuaphiyọ, onẹrhẹvwe yẹrẹ uchebro tiọyena kọ je bẹn ẹmrẹ. Onẹrhẹvwe rẹ oni rha sa rhuẹrẹ ebẹnbẹn rẹ imiragua-a. Roro kpahen udje evo.

  • A djẹ wẹ nẹ iruo jovwo re? Julian tare nẹ ọke ra vwọ djẹ nẹ iruo, ofu de dje hwe. Ko roro nẹ, ‘Mavọ me sa vwọ vwẹrote orua mẹ? Diesorọ ikọmpini na vwọ djẹ vwẹ jẹ me ghwọrọ ikpe buebun vwọ wian kẹ ayen re?’

  • Ọ sa dianẹ ivun miovwo uwe fikirẹ orọnvwe wẹn rọ fanre. Raquel djere fiotọ nẹ, “Ọke rẹ ọshare mẹ vwọ djẹ juvwe vwo kpregede omarẹ ẹgbukpe ọvo gbe ubro re wanre, mi de muomaphiyọ mamọ. Ẹwẹn mẹ kọ rhe hra totọ. Oma mẹ eje kọ miavwan ovwẹ, ẹwẹn ko mu vwe bẹn. Uguegue da rhe ro vwẹ oma.”

  • Ọ sa dianẹ ọga ro siotọ yen wọ rioja rọyen. Ọkiọvo eta rẹ Job nana sa ro wẹ ẹwẹn, rọ vwọ ta: “Arhọ mẹ ko tu vwe oma; me rha dia bẹdẹ-ẹ.” (Job 7:16) Yẹrẹ wo se ji vwo oka rẹ ẹwẹn ro rhe ọshare ọvo rọ vrẹ ẹgbukpe 80 re, rọ tare nẹ, “Ọkiọvo kọ ghwa họhọ nẹ ughwu yen me hẹrhẹ.”

  • Ọ sa je dianẹ wọ guọnọ uchebro fikirẹ ughwu rẹ ohwo wo vwo ẹguọnọ kpahen. Ọshare ọvo re se Robert da ta: “Ọmọ mẹ vwo ghwu vwẹ asidẹnti rẹ aropleni, o muvwẹro ẹsosuọ-ọ. Ọmiaovwẹ rọyen ghwa họhọ ọlọkọ ro duvwu ubiudu ohwo kirobo rẹ Baibol na djisẹ rọyen.”—Luk 2:35.

Robert, Luis, Raquel, vẹ Julian mrẹ uchebro tobọ vwẹ ọke rẹ ebẹnbẹn rayen. Ayen mrẹ Ohwo ro vwo uchebro ro me yovwin tiọyena, ọyehẹ Ọghẹnẹ, Ọromevwẹgba na. Idjerhe vọ yen ọ vwọ kẹ ayen uchebro? Ọ sa je kẹ wẹ uchebro wọ guọnọre?