Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Yono Uyota Na

Yono Uyota Na

“E Ọrovwohwo, . . . ekuogbe rẹ ota wẹn ejobi uyota.”​—UNE 119:159, 160.

UNE: 29, 53

1, 2. (a) Iruo vọ yen Jesu phi phiyọ ẹdia rẹsosuọ vwẹ akpeyeren rọyen, kẹ diesorọ? (b) Die yen avwanre che ru rere avwanre sa vwọ dia uvi rẹ “iruiruo rẹ Ọghẹnẹ”?

JESU KRISTI wianre kerẹ ọkarirhe vẹ oghwoghwota. (Mak 6:3; Rom 15:8) Ọ nabọ tẹn ona rẹ iruo ivẹ na. Kerẹ ọkarirhe, Jesu tẹn ona rẹ obo ra vwẹ ekuakua sansan vwọ kara irhe, e mi ru ayen phiyọ obo ra vwọ rhuẹrẹ uwevwin. Kerẹ oyono, Jesu nabọ vwẹ erianriẹn rọyen vwọ chọn ihwo uko vwo vwo ẹruọ rẹ Ota rẹ Ọghẹnẹ. (Mat. 7:28; Luk 24:​32, 45) Jesu vwo te ẹgbukpe 30, o de chukoku iruo rẹ ọkarirhe, ko rhi muomaphiyọ iruo rẹ aghwoghwo na, rọ dia iruo rọ ma ghanre kẹ. Ọ tare nẹ aghwoghwo rẹ iyẹnrẹn esiri rẹ Uvie na, ọyen ọvo usun rẹ obo re nẹrhẹ Ọghẹnẹ jo rhe akpọ na. (Mat. 20:28; Luk 3:23; 4:43) Jesu phi iruo rẹ aghwoghwo na phiyọ ẹdia rẹsosuọ vwẹ akpeyeren rọyen, ọ je guọnọ nẹ ihwo efa ru ọtiọyen.​—Mat. 9:​35-38.

2 Dede nẹ buebun rẹ avwanre dia ekarirhe-e, jẹ avwanre eje ghwoghwo iyẹnrẹn esiri rẹ Uvie na. Ọghẹnẹ biẹcha iruo nana, kidie ọ pha ghanghanre kẹ; ọyensorọ e vwo se avwanre “iruiruo rẹ Ọghẹnẹ.” (1 Kọr. 3:9; 2 Kọr. 6:4) Avwanre vwo imuẹro dẹn nẹ “ekuogbe rẹ ota [rẹ Jihova] ejobi uyota.” (Une 119:​159, 160) Eriyina, avwanre guọnọ “nabọ yọnre ota rẹ uyota na” gbagba vwẹ aghwoghwo rẹ avwanre. (Se 2 Timoti 2:15.) Ọnana yen sorọ avwanre vwọ davwẹngba rere ona rẹ avwanre vwo yono ihwo Baibol na se vwo yovwinphiyọ, kidie Baibol na yen avwanre vwo yono ihwo uyota ro shekpahen Jihova, Jesu Kristi, kugbe Uvie  na. Vwọ vrẹ Baibol na, ukoko rẹ Jihova kẹ avwanre ekuakua sansan re sa chọn avwanre uko vwo ruiruo rẹ odibo egbe na fiotọ. Ekuakua nana hẹ evunrẹ Ekpeti rẹ Uyono rẹ avwanre. Ofori nẹ avwanre nabọ tẹn ona rẹ obo ra vwẹ ayen vwo ruiruo.

3. Die yen avwanre cha ma tẹnrovi vwẹ ọke ro chekọ kẹ eyeren nana, kẹ mavọ yen Iruo Rẹ Iyinkọn Na 13:48 sa vwọ chọn avwanre uko?

3 O se gbewunu oboresorọ e vwo se Ekpeti rẹ Uyono ukperẹ Ekpeti rẹ Aghwoghwo. “Aghwoghwo” churobọ si ovuẹ ra vwọ kẹ ihwo; “uyono” ke rha ona re vwo ruo rere ovuẹ na se vwo te ubiudu rẹ ihwo na, te ẹdia rẹ ayen da sa reyọ vwo ruiruo. E jẹ avwanre reyọ ọmọke krẹn ro chekọ kẹ eyeren nana, vwọ tẹnrovi obo ra sa vwọ ton uyono rẹ Baibol phiyọ vẹ ihwo, rere e yono ayen uyota na. Ọyena mudiaphiyọ nẹ avwanre cha nabọ frẹkotọ guọnọ ihwo ri vwo urhurusivwe rẹ ayen vwo vwo “arhọ ri bẹdẹ” na, rere a chọn ayen uko vwọ dia idibo rẹ Ọghẹnẹ.​—Se Iruo Rẹ Iyinkọn Na 13:​44-48.

4. Mavọ yen a sa vwọ guọnọ ihwo ri vwo urhurusivwe rẹ ayen vwo vwo “arhọ ri bẹdẹ na”?

4 Mavọ yen e se vwo vughe otu re guọnọ “arhọ ri bẹdẹ” na? A cha vwẹrokere Inenikristi rẹ ẹgbukpe ujorin ẹsosuọ ri womarẹ aghwoghwo vwo vughe ihwo nana. Eriyina, ofori nẹ e ru nene iji rẹ Jesu nana: “Korho korho rẹ ovwan teri, eyẹ orere, ovwan guọnọ ohwo ro fori vwọ.” (Mat. 10:11) Avwanre riẹnre dẹn nẹ ihwo re kparoma che se rhiabọreyọ ovuẹ na-a, eriyin ji te otu jẹ ẹwẹn esiri vẹ ẹguọnọ rẹ Ọghẹnẹ evwo. Avwanre guọnọ ihwo ri vwo urhurusivwe kpahen uyota na, ri vwo ẹwẹn esiri, ri ji vwomakpotọ. A sa vwẹ ẹgbaẹdavwọn rẹ avwanre vwọ vwanvwe oborẹ Jesu ruru kerẹ ọkarirhe. Ọkiọvo ọ nabọ frẹkoto guọnọ irhe sansan ri che yovwin kẹ ẹchẹ, egbara, urhekpe, vẹ erọnvwọn efa tiọyen. Ọ da mrẹ urhe ro shephiyọ kẹ obo rọ guọnọ ruẹ, o mi rhie ekpeti rọ ghwẹ vọn vẹ ekuakua ro vwo ruiruo. Womarẹ ekuakua rehẹ ekpeti na vẹ ona rọyen, ọ me nabọ kare urhe na shephiyọ obo rọ guọnọre nẹ ọ dia. Ọtiọyen avwanre je cha guọnọ ihwo ri fori, ji vwẹ ona rẹ avwanre vwo ru ayen phiyọ idibo rẹ Jesu.​—Mat. 28:​19, 20.

5. Die yen ofori nẹ a riẹn kpahen ekuakua rehẹ evunrẹ Ekpeti rẹ Uyono rẹ avwanre? Djudje rọyen. (Ni ihoho rẹsosuọ na.)

5 Kemu kemu rọhẹ ekpeti re vwo ruiruo, vwo obo re vwo ruẹ. Kerẹ udje, vwẹro roro ekuakua sansan rẹ Jesu vwo ruiruo rọyen kerẹ ọkarirhe. * Ọ guọnọ ekuakua rọ sa vwọ ma irhe na, ji jokaphiyọ asan rọ cha wan bẹrẹ ayen. Ọ je guọnọ ekuakua ro se vwo bru iphrophro phiyọ ayen, kara ayen, phiọn ayen, ji hwe ayen mu ohwohwo. Eriyin ekuakua sansan rehẹ evunrẹ Ekpeti rẹ Uyono rẹ avwanre ji vwo obo ra vwẹ ayen vwo ruẹ. E gbe jẹ a fuẹrẹn ekpeti rẹ uyono rẹ avwanre na, rere a riẹn obo ra sa vwọ reyọ ekuakua iyoyovwin rehẹ evun rọyen vwo ruiruo.

EKUAKUA RẸ AVWANRE VWO DJE OMA KẸ IHWO

6, 7. Mavọ yen wọ reyọ ikadi re se vwo kpo jw.org na vwo ruiruo wan? (b) Erọnvwọn ivẹ vọ yen a vwẹ Ọmọbe re Vwo Durhie Ihwo Kpo Uyono na vwo ruẹ?

6 Ikadi re se Vwo Kpo Jw.Org. Enana imikadi rẹ avwanre se vwo dje oma kẹ ihwo, ji dje wẹbsaiti rẹ avwanre kẹ ayen. Ayen se yono kpahen avwanre, ji nokpẹn rẹ uyono rẹ Baibol vwẹ wẹbsaiti na. Ihwo re vrẹ 400,000 yen nokpẹn rẹ uyono rẹ Baibol vwẹ wẹbsaiti rẹ jw.org na re, ujorin buebun je nokpẹn rẹ uyono rẹ Baibol vwọ kẹdẹ kẹdẹ! Wo se mu evo nene oma kpo kasan kasan, rere wo se vwo ghwoghwo siẹrẹ uphẹn na de rhiephiyọ.

7 Ẹmẹbe rẹ Edurhie. Erọnvwọn ivẹ yen a sa vwẹ ọmọbe re vwo durhie ihwo kpo  uyono na vwo ru. E si eta nana phiyọ evun rọyen: “E durhiuwe nẹ wo nene Iseri ri Jihova yono Baibol na.” E de ji si phiyọ nẹ wo se ru ọtiọyen siẹrẹ wọ da “rhiẹ emẹvwa avwanre” “yẹrẹ ohwo se rhi yonuwe.” Kọyen ọmọbe nana dje avwanre kẹ ihwo, o ji durhie “igbere vwẹ erhi” yẹrẹ otu ri vwo urhurusivwe rẹ ayen vwo nyo Ota rẹ Ọghẹnẹ, nẹ ayen rhi nene avwanre yono Baibol na. (Mat. 5:3) Vwọrẹ uyota, kohwo kohwo sa rhe emẹvwa rẹ avwanre, o torori sẹ ayen rhiabọreyọ uyono rẹ Baibo-ol. Ayen da rhe, kẹ ayen cha mrẹ oborẹ ayen se yono mie avwanre kpahen Baibol na.

8. Mavọ yen ọ ghanre te rẹ ihwo vwọ rhe omẹvwa rẹ avwanre, ọ da tobọ dia obọ ọvo? Djunute udje ọvo.

8 Ofori nẹ avwanre durhie ihwo nẹ ayen rhe omẹvwa rẹ avwanre obọ ọvo, siẹrẹ ọ da hanvwe. Diesorọ? Kidie ayen da rhe, kẹ ayen cha mrẹvughe nẹ avwanre nabọ riavwerhen rẹ uyota na vwẹ emẹvwa rẹ avwanre, jẹ ihwo rehẹ Babilọn Rode rioja rẹ owẹnvwe rẹ Ota rẹ Ọghẹnẹ. (Aiz. 65:13) Ray kugbe Linda re dia aye gbẹ ọshare vwẹ United States, vwo oniso rẹ ọnana ikpe evo re wanre. Fikirẹ esegbuyota rẹ ayen vwo kpahen Ọghẹnẹ, kugbe urhurusivwe rayen kpahen Baibol na, ayen de brorhiẹn nẹ ayen cha ton ishoshi ẹra phiyọ. Ayen je guọnọ fuẹrẹn ishọshi na eje rehẹ orere na, dede nẹ ayen pha buebun. O vwo iwan ivẹ rẹ ayen guọnọ mrẹ vwẹ ishọshi rẹ ayen cha vwomaba. Ọrẹsosuọ, ishọshi na mi yono ayen emuọvo kiriguo, ọrivẹ, ihwo rehẹ ishọshi na me je sẹn osẹnvwe kerẹ idibo rẹ Ọghẹnẹ. Ikpe evo vwọ wan nu, ofu de rhi dje ayen, kidie ayan kpo ishọshi na eje rehẹ orere na, jẹ ayen sa mrẹ ọ rọ yanmu iwan ro rhe ayen ẹwẹn na-a. Ayen se yono emu vuọvo-o, osẹnvwe rẹ ihwo na ji shephiyọ ọ rẹ idibo rẹ Ọghẹnẹ-ẹ. Ayen vwo vrẹn nẹ ishọshi rẹ ayen rare kuko, Linda de kpo iruo rọyen, Ray de rhivwin kpo obo uwevwin. Jẹ, ọke rọ vwọ hẹ imoto rọyen yanran, Ray da mrẹ Ọguan Ruvie ọvo. O de roro, ‘Ke me da rha ro evun rọyen ra mrẹ obo re ruẹ vwẹ etiyin vwo?’ Vwọrẹ uyota, obo rọ mrẹre vwẹ etiyin ẹdẹ yena cha sa chọrọ ẹro-o! Ihwo eje rehẹ Ọguan Ruvie na dedire sasasa, ayen je nabọ sẹn osẹnvwe rẹ abavo. Ray chidia ọvo usun rẹ egbara rehẹ urhiẹ rẹ obaro na, ọ da je riavwerhen rẹ obo ro yonori ẹdẹ yena! Ọ ghwa họhọ oborẹ ọyinkọn Pọl ta kpahen ohwo rọ rhe omẹvwa rẹ Inenikristi obọ rẹsosuọ, ọ da ta: “Ọghẹnẹ ghine hẹ ohri rẹ ovwan.” (1 Kọr. 14:​23-25) Kẹdidjana kẹdidjana kọyen Ray vwo kpo uyono. Ọke vwọ yanran, ọ da je vwẹ uyono rẹ uvwre rẹ udughwrẹn vwọba. Linda je ton uyono ẹra phiyọ; ayen ihwo ivẹ na de rhiabọreyọ uyono rẹ Baibol ji bromaphiyame, dede nẹ ayen vrẹ ẹgbukpe 70 re.

EKUAKUA RA VWỌ TON OTAẸTAKUẸGBE PHIYỌ

9, 10. (a) Diesorọ ọ vwọ lọhọ ra vwọ vwẹ itrati vwo ruiruo? (b) Djisẹ rẹ obo ra sa vwọ reyọ itrati rẹ Die yen Uvie rẹ Ọghẹnẹ? vwo ruiruo.

9 Itrati. Avwanre vwo itrati ẹrenren ra sa vwọ ton otaẹtakuẹgbe phiyọ phẹphẹre. Omarẹ oduduima iyorin rẹ itrati nana yen a teyen phia re, rhavwen ọke re vwo siobọnu ayen vwẹ 2013! Itrati na yovwirin mamọ, kidie ona ọvuọvo yen e vwo si ayen eje. Wọ da ghwa tẹn ona rẹ obo ra reyọ ọvo vwo ruiruo, ju wọ riẹn ayen eje re. Mavọ yen wọ sa vwọ vwẹ itrati vwọ ton otaẹtakuẹgbe phiyọ?

10 Reyọ phiyọ nẹ itrati rẹ Die yen Uvie rẹ Ọghẹnẹ? yen wọ guọnọ vwo ruiruo. Dje onọ rọhẹ opharo rẹ itrati na kẹ ohwo na, rere wọ nọ: “Wọ riẹn obo re se Uvie rẹ Ọghẹnẹ? Wọ ta nẹ. . . ?” Gba vuẹ nẹ ọ jẹ ọvo usun rẹ enọ erha na. Ukperẹ wọ vwọ vuẹ sẹ ẹkpahọnphiyọ rọyen gbare yẹrẹ ọ chọre, ghwe rhie kpo “Obo ri Baibol na Tare” rọhẹ obevun rẹ itrati na, wo se Daniẹl 2:44 kugbe Aizaya 9:6. Rere wọ ta ota  na kpobarophiyọ siẹrẹ uphẹn na da herọ. Ukuotọ rọyen, wọ me nọ onọ nana rọhẹ ẹbẹre rẹ “Obo re Roro Kpahen,” vwẹ obuko rẹ itrati na: “Mavọ yẹn akpeyeren cha dia vwẹ otọ rẹ usuon rẹ Uvie rẹ Ọghẹnẹ?” Onọ yena kọyen wọ cha kpahenphiyọ ọke ọfa wo de bro ra. Vwẹ orhivwinbrura na, wo se dje uyono 7 rẹ ibroshọ na, Iyẹnrẹn Esiri ro nẹ Obọ rẹ Ọghẹnẹ Rhe! kẹ ohwo na, rọ dia ọvo usun rẹ ekuakua rẹ avwanre vwọ ton uyono rẹ Baibo phiyọ.

EKUAKUA RE RHANRIẸN URHURUSIVWE

11. Die yen a vwẹ imagazini rẹ avwanre vwo ruẹ, kẹ die yen ofori nẹ avwanre riẹn kpahen ayen?

11 Imagazini. Uwevwin Orhẹrẹ vẹ Awake! na yen ẹbe ra ma fan je ghare vwẹ akpọ na enẹna! Iyovwinreta ri se si kohwo kohwo urhuru yen e phiẹ phiyọ ayen, kidie ihwo ri nẹ kasan kasan rhe yen se ayen. E jẹ avwanre vwẹ ayen vwọ rhanriẹn urhurusivwe rẹ ihwo kpahen obo re ma ghanre vwẹ akpeyeren rẹ ihworakpọ enẹna. A sa reyọ ayen kẹ ihwo re ghene guọnọ ayen dẹn, siẹrẹ a da riẹn oka rẹ ihwo ra vwẹ fiki rayen si imagazini na.

12. (a) Ọrhọ yen ọdavwẹ rẹ Awake! na, kẹ amono yen a vwẹ fiki rọyen sio? (b) Erhuvwu vọ yen wọ mrẹre uvwre nana, wọ vwọ reyọ Awake! na vwo ruiruo?

12 A teyen Awake! na fikirẹ ihwo ri ghwe vwo erianriẹn okokodo kpahen Baibol na-a. Ọ sa tobọ dianẹ ayen riẹn emuvuọvo kpahen iyono rẹ Inenikristi-i, ayen vwẹroso ẹga-a, yẹrẹ ayen tobọ riẹn ọghanrovwẹ rẹ Baibol na-a. Ọdavwẹ ra vwẹ fiki rọyen si Awake! na, ọyen a vwọ chọn ihwo uko vwo vwo imuẹro nẹ Ọghẹnẹ herọ. (Rom 1:20; Hib. 11:6) Ọ je nẹrhẹ ihwo vwo imuẹro nẹ Baibol na ghini “ota rẹ Ọghẹnẹ.” (1 Tẹsa. 2:13) Iyovwinreta rehẹ opharo rẹ Awake! erha ra teyenphia vwẹ 2018 yehẹ: “The Way of Happiness,” “12 Secrets of Successful Families,” kugbe “Help for Those Who Grieve.”

13. (a) Amono yen a vwẹ fiki rọyen teyen Uwevwin Orhẹrẹ re phiẹ phiyọ ada na? (b) Erhuvwu vọ yen wọ mrẹre uvwre nana, wọ vwọ reyọ Uwevwin Orhẹrẹ na vwo ruiruo?

13 E ru Uwevwin Orhẹrẹ re phiẹ phiyọ ada na, fikirẹ ihwo re muọghọ kẹ Ọghẹnẹ kugbe Ota rọyen. Dede nẹ ihwo tiọna vwo erianriẹn evo kpahen Baibol na, ayen ji rhi vwo ẹruọ rẹ iyono rọyen gbagba-a. (Rom 10:2; 1 Tim. 2:​3, 4) Iyovwinreta erha re tonphiyọ vwẹ opharo rẹ ẹbe Uwevwin Orhẹrẹ ra teyenphia vwẹ 2018 kpahenphiyo enọ nana: “Baibol na Kpo Awanre Re?,” “Mavọ Wọ sa Vwọ Riẹn Obaro Na?,” kugbe “Ọghẹnẹ Davwerhọn Wẹn?

EKUAKUA RE NẸRHẸ OHWO VWO ORURU

14. (a) Diesorọ a vwọ vwẹ ividio ẹne vwọba ẹkuakua rehẹ ẹkpeti rẹ uyono rẹ avwanre? (b) Erhuvwu vọ yen wọ mrẹre vwo nẹ ividio ru wo dje kẹ ihwo?

14 Ividio. Vwẹ ọke rẹ Jesu, ẹgba rẹ ugbobọ yen ekarirhe vwọ reyọ ekuakua rẹ ayen vwọ wian na vwo ruiruo. Enẹna, ekarirhe vwo ekuakua sansan ri vwẹ ẹlẹtriki vwo ruiruo; ekuakua kerẹ isara, imẹshini re vwo hwe upẹrẹn, i re vwo brẹ iphrophro, vẹ efa tiọyen. Vwọ vrẹ ẹbẹ vẹ imagazini, avwanre ji vwo ividio sansan re dje kẹ ihwo; ẹne rayen hẹ evunrẹ ekpeti rẹ uyono rẹ avwanre: Diesorọ E Vwo Yono Baibol Na?, Mavọ Yen E Ruẹ Uyono ri Baibol Wan?, Die Yen E Ruẹ Vwevunrẹ Ọguan Ruvie?, kugbe Amono Yen Iseri rẹ Jihova? Ividio ri te ibrẹro ivẹ na-a, yovwirin kẹ aghwoghwo rẹ obọrẹsosuọ. E se hworo i ri gron vrẹ ọtiọyen kẹ ihwo ri vwo ọke, yẹrẹ vwẹ ayen vwọba ru orivwinbrura. Ividio nana eje sa kọn oruru rẹ uyono rẹ Baibol vẹ omẹvwa ẹra phiyọ ihwo oma.

15. Djudje rẹ oborẹ ividio rẹ avwanre ruru oma rẹ ihwo ri niro vwẹ ephẹrẹ rayen?

15 Kerẹ udje, oniọvo aye ọvo vwọ mrẹ aye ọfa rọ kua nẹ Micronesia rhe rọ jẹ ephẹrẹ rẹ Yapese, o de dje ividio rẹ Diesorọ E Vwo Yono Baibol Na? kẹ, vwẹ ephẹrẹ  rọyen. Ividio na vwọ tonphiyọ, aye na da ta: “Ọnana ephẹrẹ mẹ. Ọghẹnẹ na! Asan ọvo yen mẹ vẹ ohwo rọ ta ota na nurhe. Ephẹrẹ mẹ yen ọ jẹ na!” O vwo ru nu, ọ da tanẹ ọyen che sẹ ẹbe ji ni ividio na eje ra vwọphia vwẹ wẹbsaiti rẹ jw.org vwẹ ephẹrẹ rọyen. (Ji ni Iruo 2:​8, 11.) Gbe ni udje ọfa. Ọniọvo aye ọvo rọhẹ United States sẹndi rẹ adrẹsi rẹ ividio vuọvo na vwẹ ephẹrẹ rọyen vwo rhe ọmọ rẹ oniọvo rọyen. Ọmọ rẹ oniọvo rọyen na vwo no nu, o de si eta nana vwo rhe: “Asan ra da tanẹ akpọ na ejobi hẹ obọ rẹ ogangan rẹ ohwo uwmemwu na, te vwe ẹwẹn dẹn. Me da tanẹ e rhi yono uvwe Baibol na.” Ẹkuotọ ra da dobọ rẹ iruo rẹ avwanre ji yen ọshare nana dia!

EKUAKUA RE VWO YONO UYOTA NA

16. Djisẹ rẹ oboresorọ e vwo ru ibroshọ nana: (a) Kerhọ rẹ Ọghẹnẹ Rere Wọ dia Bẹdẹ. (b) Iyẹnrẹn Esiri Ro Nẹ Obọ Rẹ Ọghẹnẹ Rhe! (c) Amono Yin Ruẹ Ọhọre ri Jihova Nonẹna?

16 Ibroshọ. Mavọ yen wọ sa vwọ vwẹ uyota na vwo yono ohwo rọ ghwa riẹn ẹbe se-e, yẹrẹ ra je rhe teyen ẹbe rẹ avwanre kpo ephẹrẹ rọye-en? Avwanre vwo ekuakua ra sa vwọ chọn uko​—ibroshọ rẹ Kerhọ rẹ Ọghẹnẹ Rere Wọ dia Bẹdẹ. * Wọ sa vwẹ ibroshọ rẹ Iyẹnrẹn Esiri Ro Nẹ Obọ Rẹ Ọghẹnẹ Rhe! vwọ ton uyono rẹ Baibol phiyọ. Wo se dje iyovwinreta 14 rehẹ obuko rẹ ibroshọ na kẹ, rere ọ vuẹ wẹ o ro me vwo omavwerhovwẹn kpahen. Gbe nene ton uyono rẹ Baibol phiyọ vwẹ uyovwinrota rọ jẹre na. Wọ davwen iroroẹje nana vwẹ orhivwinbrura obọ ọvo re? Amono Yin Ruẹ Ọhọre ri Jihova Nonẹna? ọyehẹ ibroshọ rerha vwẹ ekpeti rẹ uyono rẹ avwanre. E ruru rere a sa vwọ reyọ vwo dje ukoko na kẹ ihwo re yono. Re ni Ọbe Uyono rẹ Akpeyeren Avwanre vẹ Iruo Ruvie Na rẹ March 2017 rere wọ mrẹ oborẹ wọ sa vwọ reyọ vwo ruiruo.

17. (a) Djisẹ rẹ oboresorọ e vwo ru ẹbe ivẹ rẹ avwanre vwo yono ihwo. (b) Die yen ihwo re guọnọ bromaphiyame che ru, kẹ diesorọ?

17 Ẹbe. Wẹ vẹ ohwo da ton uyono rẹ Baibol phiyọ vẹ ibroshọ nure, wọ sa guọnọ ọke ro shephiyọ vwọ kpọ uyono na kpo ọbe re se Die Yen Baibol na Se Yono Avwanre? Ọbe nana cha nẹrhẹ erianriẹn rẹ ohwo na kodophiyọ kpahen iyono rẹ Baibol na. Ohwo de yono ọbe na nu, gbe nene yono ọbe re se Sẹro rẹ Oma rẹ Ovwan Vwẹ Evun rẹ Ẹguọnọ rẹ Ọghẹnẹ, * siẹrẹ wo de no nẹ ọ yan obaro. Ọbe nana cha chọn ohwo na uko vwọ riẹn obo rọ sa vwọ vwẹ irhi rẹ Baibol vwo ruiruo vwẹ akpeyeren re kẹdẹ kẹdẹ rọyen. Karophiyọ nẹ ofori ohwo na vwo yono ẹbe ivẹ nana re, ọ da tobọ dianẹ o bromaphiyame nure. Ọ cha nẹrhẹ awọ rọyen sa nabọ muotọ vwevunrẹ ukoko na.​—Se Kọlose 2:​6, 7.

18. (a) Kerẹ ihwo ri yono uyota na, die yen 1 Timoti 4:16 bru avwanre uche nẹ e ru, kẹ die yen che nẹ obuko rọyen rhe? (b) Die yen ofori nẹ ọ dia ọdavwẹ rẹ avwanre ọke rẹ avwanre da vwẹ Ekpeti rẹ Uyono rẹ avwanre vwo ruiruo?

18 Kerẹ Iseri rẹ Jihova, a kẹ avwanre iruo rẹ aghwoghwo rẹ “iyẹnrẹ esiri” rọ cha nẹrhẹ ihwo vwo arhọ rẹ bẹdẹ. (Kọl. 1:5; se 1 Timoti 4:16.) A je kẹ avwanre ekpeti rẹ uyono ra ghwẹ vọn vẹ ekuakua re sa chọn avwanre uko vwo ruiruo na fiotọ. (Ni “ Ekpeti rẹ Uyono.”) E gbe jẹ avwanre tẹn ona rẹ obo ra sa vwọ reyọ ayen vwo ruiruo yoyovwin. Oghwoghwota ọvuọvo se brorhiẹn rẹ obo rọ sa reyọ vwo nẹ ekpeti na vwọ ta ota kẹ ohwo ro dje omavwerhovwẹn phia, kugbe ọke ro che vwo ru ọtiọyen. Jẹ, ọdavwẹ avwanre dia ọ ra de vwọ ghare ẹbe-e; avwanre je guọnọ vwẹ ẹbe kẹ ohwo ro dje omavwerhovwẹn phia kakaka-a. Ọdavwẹ rẹ avwanre, ọyen ra vwọ vwẹ ukẹcha kẹ otu ri vwo urhurusivwe kpahen uyota na, ri vwo ẹwẹn esiri, ri ji vwomakpotọ yẹrẹ ihwo re guọnọ “arhọ ri bẹdẹ na,” rere ayen sa vwọ dia idibo rẹ Jesu.​—Iruo 13:48; Mat. 28:19, 20.

^ e?ko. 5 Ni uyovwinrota na “The Carpenter” vẹ ekpeti na “The Carpenter’s Toolbox” rehẹ Uwevwin Orhẹrẹ rẹ August 1, 2010, (ọ rẹ oyibo).

^ e?ko. 16 Ọ da dia ohwo rọ riẹn ẹbe se-e, wọ sa chọn uko vwo nene uwe vẹ ibroshọ rẹ Kerhọ rẹ Ọghẹnẹ rẹ eta rọyen ghwe bu-un.

^ e?ko. 17 A cha vwẹ ọbe re se How to Remain in God’s Love vwo wene, siẹrẹ ọ da herọ re vwẹ Urhobo.