Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Uwevwin Orhẹrẹ  |  May 2017

Wo Jẹ Ẹguọnọ Wẹn Djiro-o

Wo Jẹ Ẹguọnọ Wẹn Djiro-o

“Fiki rẹ imwemwu buebu re cha rhe akpọ na, ẹguọnọ rẹ ihwo buebu ki che djiro.”​—MAT. 24:12.

UNE: 60, 135

1, 2. (a) Amono yen eta rẹ Jesu rọhẹ Matiu 24:12 shekpahen ẹsosuọ? (b) Mavọ yen ọbe rẹ Iruo Rẹ Iyinkọn Na vwo djephia nẹ Inenikristi buebun ji dje ẹguọnọ phia vwẹ ọke yena? (Ni uhoho rẹsosuọ na.)

JESU tare nẹ “ẹguọnọ rẹ ihwo buebu ki che djiro,” ọnana ẹbẹre ọvo rẹ oka ro djerephia nẹ “oba rẹ akpọ na” sikẹre re. (Mat. 24:​3, 12) Vwẹ ẹgbukpe ujorin ẹsosuọ, ẹguọnọ rẹ ihwo rẹ Ju vwo kpahen Ọghẹnẹ de djiro dede nẹ ayen se oma rayen ihwo rẹ Ọghẹnẹ.

2 Ẹkẹvuọvo, Inenikristi buebun vwẹ ọke yena vọnre vẹ oruru rẹ ayen “vwo ghwoghwo nẹ Jesu ọye hẹ Kristi na,” ayen de ji dje ẹguọnọ kẹ Ọghẹnẹ, iniọvo na kugbe ihwo efa. (Iruo 2:​44-47; 5:42) Dedena, idibo rẹ Jesu evo vwẹ uphẹn kẹ ẹguọnọ rayen nẹ o djiro.

3. Die yen sa nẹrhẹ ẹguọnọ rẹ Inenikristi evo djiro?

3 Ọke rẹ Jesu vwọ ta ota kẹ Inenikristi rẹ ẹgbukpe ujorin ẹsosuọ re dia Ẹfesọs, ọ da ta: “Me mrẹ ọnana ta kpahe owẹ nẹ, wo siobọ nẹ ẹguọnọ wẹn rẹsosuọ.” (Ẹvwọ. 2:4) Die yen sa suọ? Ọ sa dianẹ iniọvo nana vwọ tua ọdavwẹ romobọ  rayen. (Ẹfe. 2:​2, 3) Vwẹ ọke yena, orere rẹ Ẹfesọs vọnre vẹ ọfanrhiẹn kugbe ozighi kirobo ra mrẹ vwẹ irere buebun nonẹna. Ọnana jẹ orere rẹ edafe rẹ ihwo buebun de titi efe kugbe akpọẹriọ. Omuẹro nẹ ọnana yen nẹrhẹ ẹguọnọ rayen djiro.

4. (a) Idjerhe vọ yen ẹguọnọ vwo djiro nonẹna? (b) Ẹdia erha vọ yen e de se ru ẹguọnọ avwanre gan?

4 Aroẹmrẹ rẹ Jesu ro shekpahen ẹguọnọ ro che djiro na, ji djobọte avwanre. Ẹguọnọ rẹ ihwo vwo kpahen Ọghẹnẹ shekpotọ mamọ nonẹna. Iduduru rẹ ihwo chukoku Ọghẹnẹ, kẹ ayen roro nẹ ikoko rẹ ihworakpọ se si ebẹnbẹn rayen no. Kọyensorọ, ẹguọnọ rẹ ihwo buebun re ga Jihova Ọghẹnẹ-ẹ vwo djiro. Dedena, kirobo rọ hepha vwẹ ukoko rọhẹ Ẹfesọs, Inenikristi nonẹna se roro nẹ ayen vwo erọnvwọn eje rẹ ayen guọnọre, ọ me nẹrhẹ ẹguọnọ rayen shekpotọ. Avwanre cha fuẹrẹn ẹdia erha re se vwo ru ẹguọnọ avwanre gan: (1) Ẹguọnọ re vwo kpahen Jihova, (2) ẹguọnọ re vwo kpahen Baibol na, (3) kugbe ẹguọnọ re vwo kpahen iniọvo avwanre.

ẸGUỌNỌ RE VWO KPAHEN JIHOVA

5. Diesorọ o vwo fo nẹ e vwo ẹguọnọ kpahen Ọghẹnẹ?

5 Tavwen Jesu ke vwẹ orhọ-esio phia kpahen ẹguọnọ ro che djiro, ọ karunumu ẹguọnọ rọ ma ghanre. Ọ da ta: “Guọnọ Ọrovwohwo Ọghẹnẹ wẹn vwẹ udu wẹn ejobi, vwẹ ẹnwẹn wẹn ejobi, kugbe iroro wẹn ejobi. Ọnana hẹ urhi rẹsosuọ kugbe ọ rọ marho.” (Mat. 22:​37, 38) E de vwo ẹguọnọ okokodo kpahen Ọghẹnẹ, ọ cha nẹrhẹ a yọnrọn irhi rọyen, e chirakon, ji vwo utuoma kpahen obo re brare. (Se Une Rẹ Ejiro 97:10.) Ẹkẹvuọvo, Eshu vẹ akpọ ọbrabra rọyen na guọnọre nẹ ẹguọnọ rẹ avwanre vwo kpahen Ọghẹnẹ djiro.

6. Die yen jẹ ẹguọnọ rẹ Ọghẹnẹ evwo ghwa rhe?

6 Ihwo buebun re riariẹ avwanre phiyọ na vwẹ ẹro ọchọchọ vwo nẹ ẹguọnọ. Ayen “guọnọ omaobọ” rayen, ukperẹ rẹ Ọghẹnẹ. (2 Tim. 3:2) Akpọ nana rẹ Eshu suẹn na titi “urhuru si vwe rẹ ugboma, ojevwe rẹ ẹro kugbe eheri rẹ akpọ na.” (1 Jọn 2:16) Ọyinkọn Pọl vwo orhọ-esio kẹ Inenikristi kpahen urhurusivwe rẹ ugboma, rọ vwọ tanẹ, a da “vwẹ iroro kpahe ugboma kẹ ughwu . . . kidie iroro ra vwọ kpahe ugboma vẹ Ọghẹnẹ ọvweghrẹ.” (Rom 8:​6, 7) Ihwo re ghwọrọ ọke rayen eje vwọ tua ekuakua rẹ akpeyeren yẹrẹ urhurhusivwe rẹ ọfanrhiẹn cha rioja rẹ ofudjevwe.​—1 Kọr. 6:18; 1 Tim. 6:​9, 10.

7. Erhọ yen imuoshọ rẹ Inenikristi hirharokuẹ nonẹna?

7 Vwẹ ẹkuotọ evo, ihwo evo vwo imuẹro kpahen Ọghẹnẹ-ẹ, efa vwo ẹwẹn ivivẹ kpahọn, o ji vwo ihwo evo ri yono nẹ erọnvwọn mamarhe. Ihwo nana eje titi iroro re nẹrhẹ esegbuyota vẹ ẹguọnọ rẹ ihwo vwo kpahen Ọghẹnẹ djiro. Ayen riẹriẹ ihwo buebun vwo roro nẹ igbori ọvo yen se vwo imuẹro nẹ Ọmemama herọ. Ọghọ okamuka re muẹ vwọ kẹ egbaerianriẹn rẹ akpọ na, nẹrhẹ ihwo buebun kpairoro vrẹ Ọmemama na. (Rom 1:25) E de nenesi rẹ iyono rẹ ayen titẹ na, ọ sa nẹrhẹ e bo ghwru nẹ ẹbẹre rẹ Jihova, ẹguọnọ avwanre mi rhi djiro.​—Hib. 3:12.

8. (a) Ẹdia rẹ ofudjevwe vọ yen idibo rẹ Jihova buebun hirharokuẹ? (b) Imuẹro vọ yehẹ evunrẹ Une Rẹ Ejiro 136?

8 Ofudjevwe je sa nẹrhẹ esegbuyota avwanre shekpotọ, ẹguọnọ rẹ avwanre  vwo kpahen Ọghẹnẹ mi ji djiro. Vwẹ akpọ rẹ Eshu nana, avwanre eje hirharokuẹ ẹdia re sa sua ofudjevwe. (1 Jọn 5:19) Ọ sa dia ebẹnbẹn kerẹ ọghwo, ọga, yẹrẹ uweren ọgangan. Yẹrẹ ọ sa dia re vwo nẹ oma ohwo saka, obo ra rhẹro rọyen ro jẹ ohwo obọ ete, yẹrẹ ovwiẹrẹ romobọ. E jẹ erọnvwọn nana nẹrhẹ e roro nẹ Jihova yanjẹ avwanre vwo-o. Ukperẹ ọtiọyen, e jẹ avwanre mu ẹwẹn avwanre kpahen eta rẹ ọbọngan ro shekpahen ẹguọnọ rẹ Jihova vwo kpahen avwanre. A sa mrẹ eta tiọyena vwẹ Une Rẹ Ejiro 136:​23, rọ tare nẹ, “Ọye ohwo ro karohọ obo rẹ avwanre kpotọ te, kidie ẹguọnọ rọye ro jẹ rhẹriẹ na dia rhiri bẹdẹ.” Vwọrẹ uyota, ẹguọnọ rẹ Jihova vwoba-a. Ọtiọyena, e se vwo imuẹro nẹ Jihova nyo “orẹ” avwanre, ọ je cha chọn avwanre uko.​—Une 116:1; 136:​24-26.

9. Die yen chọn Pọl uko vwọ sẹro rẹ ẹguọnọ ro vwo kpahen Jihova?

9 Kerẹ ọbuine na, Pọl mrẹ ọbọngan ro vwo roro kpahen ukẹcha rẹ Jihova vwọphia ọkeneje. O de si: “Ọrovwohwo hẹ ọchuko mẹ, oshọ gbi mu uvwe-e; kidie ohwo se ru kẹ vwẹ?” (Hib. 13:6) Imuẹro ọgangan ro vwo kpahen ukẹcha rẹ Jihova, chọn Pọl uko vwo yerin ghene ebẹnbẹn rọyen. Ẹdia rọyen na kuọrọn ẹwẹn rọye-en. Pọl tobọ si ileta buebun ro vwo phiuduphiyọ ihwo awọ, ọke rọ vwọ hẹ uwodi. (Ẹfe. 4:1; Fil. 1:7; Filim. 1) Ọke ro vwo hirharoku ọdavwini ọgangan, Pọl nabọ sẹro rẹ ẹguọnọ ro vwo kpahen Ọghẹnẹ. Die yen chọn rọ uko? Ọ vwẹroso “Ọghẹnẹ rẹ uchebro, ro bru avwanre uche vwẹ evun rẹ ukpokpogho ejobi.” (2 Kọr. 1:​3, 4) Mavọ yen avwanre sa vwọ vwẹrokere Pọl vwọ sẹro rẹ ẹguọnọ re vwo kpahen Jihova?

Vwo ẹguọnọ rẹ Jihova (Ni ẹkorota 10)

10. Mavọ yen avwanre sa vwọ sẹro rẹ ẹguọnọ re vwo kpahen Jihova?

10 Pọl vuẹ avwanre idjerhe ọvo ra sa vwọ sẹro rẹ ẹguọnọ avwanre vwo kpahen Jihova. O si vwo rhe iniọvo na nẹ ayen “nẹ ẹrhovwo kẹdẹ kẹdẹ.” O de ji si: “Wo gbe ẹdẹ rẹ ẹrhovwo-o.” (1 Tẹsa. 5:17; Rom 12:12) Ẹrhovwo ẹnẹ yen sa nẹrhẹ e vwo omamọ oyerinkugbe vẹ Jihova. (Une 86:3) Avwanre da nabọ ghwọrọ ọke vwọ vuẹ Jihova obo rehẹ ubiudu avwanre, ọyena cha nẹrhẹ e sikẹrẹ Ọsẹ avwanre “ro nyo ẹrhovwo na.” (Une 65:2) Vwọba, e de vwo imuẹro nẹ Jihova kpahan phiyọ ẹrhovwo avwanre, ẹguọnọ re vwo kpahọn kọ cha ganphiyọ. Avwanre ke cha riẹn nẹ “Ọrovwohwo si kẹrẹ otu ri sere ejobi.” (Une 145:18) Imuẹro ọgangan yena re vwo kpahen Jihova cha nẹrhẹ e se hirharoku edavwini efa re cha obaro.

ẸGUỌNỌ RE VWO KPAHEN BAIBOL NA

11, 12. Mavọ yen e se vwo vwo ẹguọnọ okokodo kpahen eta rehẹ Baibol na?

11 Kerẹ Inenikristi, avwanre titi uyota na. Ota rẹ Ọghẹnẹ yen esiri rẹ uyota na. Vwẹ ẹrhovwo rẹ Jesu nẹre, ọ da vuẹ Ọsẹ rọyen: “Ota wẹn hẹ uyota.” (Jọn 17:17) Ọtiọyena, erianriẹn rẹ Ota rẹ Ọghẹnẹ yen orọnvwọn ẹsosuọ rọ sa nẹrhẹ e vwo ẹguọnọ kpahen uyota na. (Kọl. 1:10) Ẹkẹvuọvo, erianriẹn ọvo teri-i. Jokaphiyọ oborẹ ohwo ro si Une Rẹ Ejiro 119 chọn avwanre uko vwọ riẹn obo ro mudiaphiyọ re vwo vwo ẹguọnọ rẹ eta rẹ Baibol na. (Se Une Rẹ Ejiro 119:​97-100.) Avwanre ghwọrọ ọke vwo roro kpahen ẹkpo rẹ Baibol sansan kẹdẹ kẹdẹ? Ọdavwaro re vwo kpahen eta rẹ Baibol na che kodophiyọ siẹrẹ a da reyọ ayen vwo ruiruo.

12 Ọbuine na da je ta: “Mavọ ota wẹn  vwerhe kẹ vwẹ te, ọ vwerhe nọ ọnyọn kẹ unu mẹ!” (Une 119:103) Avwanre je sa riemu evwevwerhe rehẹ ẹbe ukoko na. Avwanre sa riọ krekri rere a sa vwọ karophiyọ “eta rẹ avwerhe” rẹ uyota na, a me je reyọ ayen vwọ chọn ihwo efa uko.​—Aghwo. 12:10.

13. Die yen chọn Jerimaya uko vwo vwo ẹguọnọ rẹ eta rẹ Baibol na, kẹ mavọ yen i tere ubiudu wan?

13 Ọmraro Jerimaya vwo ẹguọnọ rẹ Isiesi Ọfuanfon na. Jokaphiyọ oborẹ eta rẹ Ọghẹnẹ te ubiudu rọyen wan: “A mrẹ eta wẹn, me da riẹn ayen, eta wẹn da dia aghọghọ kẹ vwẹ kugbe omavwerhovwẹ kẹ ubiudu mẹ; kidie a vwẹ odẹ wẹn se vwe nure, E Ọrovwohwo, Ọghẹnẹ rẹ ofovwi.” (Jer. 15:16) Jerimaya roro kpahen eta rẹ Ọghẹnẹ kọ ghwa họhọ nẹ ọ re ayen. Ọnana nẹrhẹ o dje ọdavwaro phia kpahen uphẹn rọ vwọ dia odibo rẹ Jihova. Ẹguọnọ re vwo kpahen eta rẹ Baibol na ji mu avwanre vwo vwo ọdavwaro kpahen uphẹn ra vwọ dia idibo rẹ Jihova ji ghwoghwo Uvie na vwẹ ọke oba nana?

Vwo ẹguọnọ rẹ Baibol na (Ni ẹkorota 14)

14. Mavọ yen e se vwo ru ẹguọnọ re vwo kpahen Ota rẹ Ọghenẹ ganphiyọ?

14 Vwọba isese rẹ Baibol vẹ ẹbe ukoko na, die yen je sa chọn avwanre uko vwo vwo ẹguọnọ rẹ Ota rẹ Ọghẹnẹ? Uyono ẹra rẹ ọkeneje sa chọn avwanre uko. Uyono rẹ Uwevwin Orhẹrẹ re ruẹ kudughwrẹn kudughwrẹn, ọyen idjerhe ọvo kiriguo re vwo yono avwanre. E se vwo vwo ẹruọ rẹ uyono na, ofori nẹ a nabọ muegbe rọyen. Idjerhe ọvo re se vwo ru ọnana, ọyen re vwo nẹ ẹkpo rẹ Baibol eje ra rionbọ ra. Nonẹna, a sa danlodu rẹ Uwevwin Orhẹrẹ na vwẹ jw.org yẹrẹ e se se vwẹ JW Library vwẹ ejajẹ buebun. A sa tobọ djobọte ẹkpo rẹ Baibol rehẹ asan re yono na vwẹ ifonu yẹrẹ itablẹti avwanre, i mi rhie siẹvuọvo. Ẹkẹvuọvo, otoro ọ rẹ wo vwo muegbe-e, a da frẹkotọ se ẹkpo rẹ Baibol ji roro kpahen ayen, ọ cha nẹrhẹ ẹguọnọ re vwo kpahen Ota rẹ Ọghẹnẹ kodophiyọ.​—Se Une Rẹ Ejiro 1:2.

 ẸGUỌNỌ RE VWO KPAHEN INIỌVO AVWANRE

15, 16. (a) Kirobo rẹ Jọn 13:​34, 35 djere, oghwa vọ yen te avwanre? (b) Mavọ yen ẹguọnọ re vwo kpahen iniọvo avwanre vwo churobọ si ẹguọnọ re vwo kpahen Jihova vẹ Baibol na?

15 Vwẹ ason rọ koba rọyen vwẹ otọrakpọ na, Jesu da vuẹ idibo rọyen: “Urhi ọkpokpọ mi ji kẹ ovwan nẹ, ovwan guọnọ ohwohwo; kirobo re me guọnọ ovwan na rere ovwan je guọnọ ohwohwo rhe. Vwẹ oma rẹ ọnana kọye ihwo ejobi vwọ riẹn nẹ ovwan ghine idibo mẹ, ọ da dianẹ ovwan guọnọ ohwohwo.”​—Jọn 13:​34, 35.

16 Ẹguọnọ re vwo kpahen iniọvo avwanre vẹ ọ re vwo kpahen Jihova churobọ si ohwohwo. E che se ru ọvo yanjẹ ọ ro chekọ vwo-o. Ọyinkọn Jọn de si: “Ohwo rọ sa guọnọ oniọvo rọye ro rhiẹ ẹro mrẹ-ẹ, komavọ o ru sa guọnọ Ọghẹnẹ re jẹ sa mrẹ.” (1 Jọn 4:20) Vwọba, ẹguọnọ re vwo kpahen Jihova vẹ iniọvo avwanre ji churobọ si ẹguọnọ re vwo kpahen Baibol na. Diesorọ? Kidie ẹguọnọ re vwo kpahen Baibol na yen muẹ avwanre vwọ yọnrọn urhi rẹ Ọghẹnẹ rọ tare nẹ e vwo ẹguọnọ kpahen Ọghẹnẹ kugbe iniọvo avwanre.​—1 Pita 1:22; 1 Jọn 4:21.

Vwo ẹguọnọ rẹ iniọvo na (Ni ẹkorota 17)

17. Erhọ yen idjerhe evo re se vwo dje ẹguọnọ phia?

17 Se 1 Tẹsalonaika 4:​9, 10. Erhọ yen idjerhe evo re se vwo dje ẹguọnọ phia vwẹ ukoko avwanre? Oniọvo rọ kpakore sa guọnọ ukẹcha re vwo muo kpo uyono. Ayeuku sa guọnọ ukẹcha rẹ ohwo rọ sa chọn uko vwọ rhuẹrẹ ekuakua ri miovwirin vwẹ uwevwin rọyen. (Jems 1:27) Kohwo kohwo rẹ ofu dje yẹrẹ ro hirharoku ebẹnbẹn guọnọ uchebro vẹ ukẹcha rẹ avwanre, owenẹ ọ dia eghene yẹrẹ ọmare, ọshare yẹrẹ aye. (Isẹ 12:25; Kọl. 4:11) E de djẹ ọdavwẹ okokodo kẹ “otu re hẹ evwruwevwi rẹ esegbuyota na” womarẹ eta vẹ uruemu, ọyena odjephia nẹ avwanre vwo uvi rẹ ẹguọnọ kpahen iniọvo avwanre.​—Gal. 6:10.

18. Die yen cha chọn avwanre uko vwọ rhuẹrẹ ẹghwọ rọ vwomaphia vwẹ uvwre rẹ iniọvo?

18 Baibol na mraro phiyotọ nẹ vwẹ “oba rẹ ẹdẹ na,” ihwo cha guọnọ ọdavwẹ romobọ rayen ọvo, ayen ji che vwo urhuru. (2 Tim. 3:​1, 2) Ofori nẹ avwanre davwẹngba vwo ru ẹguọnọ re vwo kpahen Ọghẹnẹ, Baibol na, kugbe iniọvo avwanre ganphiyọ. Vwọrẹ uyota, ọkiọvo ẹghwọ sa vwomaphia vwẹ uvwre rẹ iniọvo. Ẹkẹvuọvo, ebruphiyọ che te avwanre obọ siẹrẹ ẹguọnọ de mu avwanre vwọ rhuẹrẹ ẹghwọ na phiyọ! (Ẹfe. 4:32; Kọl. 3:14) Ọtiọyena, e jẹ ẹguọnọ avwanre djiro kakaka-a! Ukperẹ ọtiọyen, e jẹ avwanre vwẹ ọkieje vwo vwo ẹguọnọ ọgangan kpahen Jihova, Ota rọyen, kugbe iniọvo avwanre.