Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Mane Ọ Mrẹ Ẹroesiri rẹ Ọghẹnẹ

Mane Ọ Mrẹ Ẹroesiri rẹ Ọghẹnẹ

AVWANRE ga Jihova vẹ ẹwẹn ra vwọ mrẹ ẹroesiri rọyen, gbanẹ ọ dia ọtiọyen? Jẹ, amono yen cha mrẹ ẹroesiri vẹ ebruphiyọ rẹ Ọghẹnẹ? Ihwo evo ri ru umwemwu egangan vwẹ ọke awanre, mrẹ ẹroesiri rẹ Ọghẹnẹ ukuko na. Jẹ, ihwo efa ri vwo omamọ uruemu sa mrẹ ẹroesiri rọye-en. Ọtiọyena a sa nọ, “Die yen Jihova nẹ vwẹ oma rẹ avwanre ohwo ọvuọvo?” A sa mrẹ ẹkpahọnphiyọ rẹ onọ nana vwo nẹ udje rẹ Rehoboam rọ dia ovie rẹ Juda.

EBẸNBẸN RO RHIẸROMRẸ VWẸ ỌTONPHIYỌ

Solomọn ro sunru vwẹ Izrẹl vwẹ ẹgbukpe 40, yen ọsẹ rẹ Rehoboam. (1 Ivie 11:42) Solomọn ghwuru vwẹ 997 B.C.E. Rehoboam de nẹ Jerusalẹm kpo asan ra da cha reyọ vwo mu ovie vwẹ Shikẹm. (2 Ikun 10:1) Wo rorori nẹ oshọ muo nẹ o che se nene udje rẹ ọsẹ rọyen ra riẹn phiyọ ọgba aghwanre na-a? Mavọ yen Rehoboam sa vwọ riẹn nẹ a cha davwen aghwanre rọyen ni kẹrẹkpẹ?

Rehoboam niroso nẹ oshọ vọn asan eje. O kriri-i, e de ji ihwo evo bro ra, ra ta ọdavwẹ rayen kẹ nẹ, “Ọsẹ wẹn kru oghwa ọhọhọhọ nyẹ avwanre. Asaọkiephana gbe ru oghwa na pharhe kugbe urhekpe ọhọhọ ro mu nyẹ avwanre na, avwanre ke ga wẹ.”​—2 Ikun 10:3, 4.

Ọnana ọdavwini rode vwọ kẹ, kidie o de ru oborẹ ihwo na ta na, ọ cha nẹrhẹ erọnvwọn evo rọ vẹ orua rọyen kugbe idiaguare na riavwerhen rọyen na va ayen abọ. Jẹ, ọ da rha sen, ihwo na sa vwọsuọ. Kẹ, die yen o che ru enẹna? Ẹsosuọ, Rehoboam ka vwẹ iroro rọyen nẹ ekpako re dia ibruche rẹ ọsẹ rọyen. Ukuko na, ihwo re vẹ ọyen gba hẹ edje kọyen o bru ra vwọ kẹ uchebro. Vwo nene uchebro rayen, Rehoboam da ta: “Ọsẹ mẹ ru urhekpe rẹ ovwan họhọ, ẹkẹvuọvo me cha vwọ ba; uphiaphiẹ ọsẹ mẹ vwọ fa ovwan, ẹkẹvuọvo akpakpasimagha kọye me vwọ fa ovwan.”​—2 Ikun 10:6-14.

Die yen avwanre yono no rhe? Aghwanre herọ siẹrẹ a da kerhọ kẹ uchebro rẹ iniọvo ri tedje vwevunrẹ ukoko na. Fikirẹ oborẹ ayen rhiẹromrẹ vwẹ akpeyeren re, ayen sa riẹn obo ri che nẹ obuko rẹ orhiẹn rẹ avwanre rhe, ayen me kẹ avwanre uchebro ro fori.​—Job 12:12.

“AYEN DE NYO OTA RẸ ỌROVWOHWO”

Fikirẹ ẹvwọsuọ na, Rehoboam de koko isodje rọyen. Ẹkẹvuọvo, womarẹ ọmraro Shemaya Jihova da vuẹ Rehoboam: “Wọ yanra-an eyẹ wọ ra  họnre imoni wẹn ihwo rẹ Izrẹli-i. Rhivwi kpo dohwo duwevwi rọye kidie emu nana obọ mẹ o nurhe.”​—1 Ivie 12:21-24. *

Vwẹro roro oborẹ oma ru Rehoboam ọke rẹ Ọghẹnẹ vwọ vuẹ nẹ ọ họnra-a! Die yen ihwo cha ta kpahen ovie nana ro guegue ihwo na nẹ ọ cha vwẹ “akpakpasimagha” fa ayen, rọ da rhoma wene ẹwẹn nẹ o rhe che nene ihwo na họnre ọfa-a? (Ni 2 Ikun Rivie 13:7.) Dedena, ovie na vẹ ituofovwin rọyen “de nyo ota rẹ Ọrovwohwo, ayen da yanran kpo, kirobo rẹ ota rẹ Ọrovwohwo epha.”

Die yen ikuegbe nana yono avwanre? Aghwanre herọ siẹrẹ e de nyupho rẹ Ọghẹnẹ, ọ da tobọ dianẹ ọyena cha nẹrhẹ ihwo vwẹ avwanre jehwẹ. Ẹmienyo cha nẹrhẹ e vwo ebruphiyọ vẹ ẹroesiri rẹ Ọghẹnẹ.​—Urhi 28:2.

Die yen nẹ obuko rẹ orhiẹn-ebro rẹ Rehoboam na rhe? Rọ vwọ kpairoro vrẹ ofovwin ro che nene ẹgborho kpokpọ na phi nu, ọ da tẹnrovi ebabọn rẹ irere sansan vwẹ ibrotọ rẹ Juda vẹ Bẹnjamin ro ji suẹn. Ọ nabọ ru irere na “gangan.” (2 Ikun 11:5-12) Ma rho, o nene irhi rẹ Jihova vwẹ ọke evo. Buebun rẹ ihwo bicha Rehoboam ọke rẹ uvwie ihwe rẹ Jeroboam suẹn na vwo muomaphiyọ edjọẹgọ, kidie ayen rhe Jerusalẹm rhi vwomaba ẹga rẹ uyota. Ọnana da nẹrhẹ “oma fu Rehoboam.” (2 Ikun 11:16, 17) Ọtiọyena, ẹmienyo rẹ Rehoboam da nẹrhẹ usuon rọyen gan.

UMWEMWU VẸ OKURHẸRIẸ

Uvie rọyen vwọ vwẹ owọ muotọ kokoroko re, Rehoboam de ru obo ra rhẹro rọye-en. O de chukoku ẹga rẹ Jihova ra ga ẹdjọ! Diesorọ? Oni rọyen rọ dia ohwo rẹ Amọn yen riẹrierẹ vwo ru ọtiọyen? (1 Ivie 14:21) Obo rọ wanre eje, ẹgborho na eje da vwẹrokere. Ọtiọyena, Jihova da nẹrhẹ Ovie Shishak ro sun Ijipt phi irere rẹ Juda buebun kparobọ, dede nẹ Rehoboam nabọ ru irere na gan!​—1 Ivie 14:22-24; 2 Ikun 12:1-4.

Okpetu na da rhe gan mamọ ọke rẹ Shishak vwo te Jerusalẹm rọ dia asan rẹ Rehoboam de suẹn. Kpakpata, ọmraro Shemaya da vwẹ ovuẹ rẹ Ọghẹnẹ phia kẹ Rehoboam vẹ isun na, rọ vwọ ta: “Wa mrẹ vwẹ djẹ, ke me je djẹ jẹ ovwan vwo ki Shishak.” Die yen Rehoboam che ru kpahen ovuẹ rẹ ọghwọku yena? Baibol na da ta: “Etiyin isun rẹ Izrẹl kugbe ovie na da vwẹ oma kpotọ ta, Ọrovwohwo na ọvwata.” Ọtiọyena, Jihova de sivwin Rehoboam vẹ Jerusalẹm.​—2 Ikun 12:5-7, 12.

Usuon rẹ Rehoboam dobọji vwẹ etiyi-in. Tavwen o ki ghwu, Rehoboam da ghare okẹ vwọ kẹ emọ rọyen eje, rere ayen vwo jẹ oniọvo rayen Abijah rọ cha reyọ ẹdia rọyen ekpokpo. (2 Ikun 11:21-23) Ọtiọyen, Rehoboam de dje aghwanre phia ukuko na.

ERHUVWU GBANẸ UMIOVWO?

Dede nẹ Rehoboam ru obo ri yovwirin vwẹ ẹdia evo, jẹ ọ mrẹ ẹroesiri rẹ Ọghẹnẹ-ẹ. Vwọ kpahen usuon rọyen, Baibol na da ta: “O de ru emu umwemwu.” Diesorọ? Kidie “ọ vwẹ udu rọye ejobi vwọ guọnọ Ọrovwohwo-o.”​—2 Ikun 12:14.

Rehoboam se vwo uvi rẹ oyerinkugbe vẹ Jihova kerẹ Ovie Devidi-i

O vwo ọke evo rẹ Rehoboam vwọ kerhọ rẹ Ọghẹnẹ. O ru erọnvwọn iyoyovwin evo kẹ ihwo rẹ Jihova. Ẹkẹvuọvo, o vwo omamọ oyerinkugbe vẹ Jihova yẹrẹ owenvwe ro vwo ru obo re vwerhọ-ọn. Kọyensorọ, o vwo muomaphiyọ umwemwu vẹ ẹdjọẹgọ. Wọ sa nọ: ‘Oborẹ ihwo efa vuẹ Rehoboam yen nẹrhẹ o nene odjekẹ rẹ Jihova, gbanẹ owenvwe ro vwo kurhẹriẹ ji ru obo re vwerhen Ọghẹnẹ ivun yen muro vwo ruo?’ (2 Ikun 11:3, 4; 12:6) Vwẹ okuphiyọ rẹ akpeyeren rọyen, ọ da rhoma muomaphiyọ umwemwu eruo. Ọ sa vwẹrokere ọsẹ rode rọyen Ovie Devidi-i. Vwọrẹ uyota, Devid ru umwemwu evo, jẹ ikuegbe rẹ akpeyeren rọyen djerephia nẹ o vwo ẹguọnọ rẹ Jihova, o muomaphiyọ ẹga rẹ uyota, o ji dje uvi rẹ okurhẹriẹ phia.​—1 Ivie 14:8; Une 51:1, 17; 63:1.

 O ghini vwo oborẹ avwanre se yono nẹ udje rẹ Rehoboam rhe. Oma vwerhen avwanre siẹrẹ a da mrẹ ihwo re vwẹ ukẹcha vwọ kẹ erua rayen, ji ru obo ri che fierere kẹ ayen. Jẹ obo re ma ghanre, ọyen re vwo muomaphiyọ ẹga rẹ uyota ji tinka muo, rere a sa vwọ mrẹ ẹroesiri rẹ Ọghẹnẹ.

E se ru ọtiọyen siẹrẹ a da sẹro rẹ uvi rẹ ẹguọnọ rẹ avwanre vwo kpahen Jihova. Kirobo re phiẹ irhe phiyọ erharhe rere ọ vwọ la phiyọ ye, ọtiọyen avwanre je sa sẹro rẹ ẹguọnọ re vwo kpahen Ọghẹnẹ womarẹ uyono rẹ Baibol rẹ ọkieje, eroro kpahọn, vẹ ẹrhovwo ẹnẹ. (Une 1:2; Rom 12:12) Ẹguọnọ rẹ avwanre vwo kpahen Jihova yen che mu avwanre vwo ru obo re vwerhọn oma, ji kurhẹriẹ vwo nẹ otọ rẹ ẹwẹn rhe. Vwọ fẹnẹ Rehoboam, avwanre che mudia gan vwẹ ẹga rẹ uyota.​—Jude 20, 21.

^ e?ko. 9 Ọghẹnẹ tarọ phiyotọ jovwo nẹ a cha ghare uvie na kpo ẹkẹn ivẹ fikirẹ jẹ evun ẹfuọn rẹ Solomọn.​—1 Ivie 11:31.