Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Ayen Vwẹ Oma Rayen Kpahotọ​—Vwẹ Myanmar

Ayen Vwẹ Oma Rayen Kpahotọ​—Vwẹ Myanmar

“ORHỌ na pha buebu, ẹkẹvuọvo otu rẹ iruo na gbi bu-u; a gba rẹ Ọrovwohwo ro vwo orhọ na ro ji otu rẹ iruo re vun orhọ rọye.” (Luk 10:2) Eta nana rẹ Jesu tare omarẹ ẹgbukpe 2,000 re wanre na, nabọ fo obo re se vwo dje ẹdia rẹ Myanmar nonẹna. Diesorọ? Omarẹ ighwoghwota 4,200 ri ghwoghwo iyẹnrẹn esiri vwọ kẹ ihwo ri te omarẹ oduduru 55 yehẹ Myanmar.

Ẹkẹvuọvo, Jihova rọ dia Onini “ro vwo orhọ na” phi oruru phiyọ oma rẹ iniọvo ujorin buebun ri nẹ ẹkuotọ efa rhe, ayen da rhe Southeast Asia ri vwobọ vwẹ orhọ-evuon na. Die yen nẹrhẹ ayen vrẹn nẹ ẹkuotọ rayen? Ukẹcha vọ yen ayen mrẹre? Ebruphiyọ vọ yen ayen riavwerhen rọyen asaọkiephana? Jẹ, a guọnọ ẹkpahọnphiyọ rẹ enọ nana.

“OVWAN YANRHE, AVWANRE GUỌNỌ EKOBARO!”

Vwẹ ikpe evo re wanre, Kazuhiro rọ dia ọkobaro vwẹ Japan de rhi she enwẹnwẹ, rọ nẹrhẹ o she ro, e de muo kpo họspito. Idọktọ na da vuẹ nẹ ọ hẹrhẹ te ẹgbukpe ivẹ tavwen ọ ke djẹ imoto. Iyẹnrẹn nana gbe re unu mamọ. Kazuhiro da nọ oma rọyen, ‘Mavọ kọyen mi se vwo ruiruo ọkobaro rọ kẹ vwẹ omavwerhovwẹn na?’ Ọ da nẹrhovwo rhe Jihova nẹ o rhie idjerhe kẹ ọyen ro se vwo ruiruo rẹ ọkobaro rọyen na.

Kazuhiro vẹ Mari

Kazuhiro da ta: “Emeranvwe ọvo vwọ wan nu, ugbeyan mẹ rọ ga vwẹ Myanmar de nyo kpahen obo re phia kẹ vwẹ. O se vwe, ọ da ta: ‘Imoto ri djẹ ofa yen ihwo buebun rua vwẹ Myanmar. Wọ da rhe obonẹ, wọ rha cha guọnọ imoto wo ki se ru iruo rẹ aghwoghwo wẹ-ẹn!’ Me da nọ idọktọ mẹ sẹ oma mẹ na che juvwe se kpo Myanmar. O gbe vwe unu mamọ rọ vwọ ta: ‘Idọktọ ọvo rọ tẹn ona rẹ obo re sivwin afọrhe, nẹ obo Myanmar rhe Japan enẹna. Me cha vuẹ kpahen owẹ. Wọ da rhoma she ro, ọ cha vwẹrote we.’ Vwọ kẹ vwẹ, ọnana ghwa ẹkpahọnphiyọ ro nẹ obọ rẹ Jihova rhe.”

Kpakpata, Kazuhiro de si ọbe kpo oghọn ukoko rọ vwọ vuẹ ayen nẹ ọyen vẹ aye rọyen guọnọ ra ga kerẹ ekobaro vwẹ Myanmar. Ẹdẹ iyorin vwọ wan nu, oghọn ukoko na da kpahen kẹ ayen nẹ, “ovwan yanrhe, avwanre guọnọ ekobaro!” Kazuhiro vẹ aye rọyen Mari da shẹ imoto rayen, ayen de ru ẹbe rayen ji hwosa phiyọ aropleni rẹ ayen cha ro. Enẹna, ayen ga sasasa vẹ ẹko ọvo rọ jẹ ephẹrẹ idin vwẹ Mandalay. Kazuhiro da ta: “Oborẹ avwanre rhiẹromrẹ na, nẹrhẹ esegbuyota rẹ avwanre ganphiyọ kpahen ive  rọhẹ Une Rẹ Ejiro 37:5: ‘Phi idjerhe wẹn phihọ obọ rẹ Ọrovwohwo; vwẹ ẹro vwọ suọ, ko ruo kẹ wẹ.’ ”

JIHOVA RHIE IDJERHE PHIYỌ

Oma vwerhen Iseri rẹ Jihova rehẹ Myanmar mamọ ọke rẹ ayen vwo ru ọghwẹkoko oghẹresan vwẹ 2014. Ihwo buebun nẹ ẹkuotọ efa rhe ọghwẹkoko na. Ọvo usun rayen yehẹ oniọvo aye ọvo re se Monique rọhẹ ẹgbukpe 34. Oniọvo Monique ro nẹ United States rhe da ta: “Mi vwo rhivwin nẹ ọghwẹkoko na, me da nẹrhovwo kẹ Jihova kpahen emu ọfa ri mi che ru. Me da je vuẹ ọsẹ vẹ oni mẹ kpahen obo mi tẹnrovi vwẹ ẹga rẹ Jihova. Avwanre eje da rhọnvwe nẹ mi kpo Myanmar. Ẹkẹvuọvo, me ghwọrọ ọke ji nẹrhovwo mamọ tavwen mi ki brorhiẹn na.” Monique da ta oboresorọ.

Monique vẹ Li

“Jesu bru idibo rọyen uche nẹ ayen ‘roro unu ro muru.’ Ọtiọyena, me da nọ oma mẹ: ‘Mi vwo igho me cha vwọ fa oma kpo oboyin? Iruo mi che ru vwẹ oboyin na che te vwe vwọ vwẹrote oma?’ ” Ọ da ta: “Me da rhe mrẹvughe nẹ igho ro rhe vwe che te vwe vwo kpo oboyi-in.” Ọtiọyena, mavọ ọ sa vwọ yanran?​—Luk 14:28.

Monique da ta: “Ẹdẹ ọvo, ọga me de bru vwe rhe. Oshọ ko mu vwe nẹ ọ cha djẹ vwẹ nẹ iruo. Jẹ, ukperẹ ọtiọyen, ọ da nabọ kpẹvwẹ ovwẹ fikirẹ iruo mẹ. Ọ da je vuẹ vwẹ nẹ a cha vwẹ igho ba osa mẹ rẹ emeranvwe na. Igho me ghwa guọnọ dẹn, kọyen a vwọ ba osa mẹ!”

Rhanvwe December 2014 yen Monique vwọ ga vwẹ Myanmar. Ẹro vọ yen o vwo ni aghwoghwo rọyen vwẹ asan ra da ma guọnọ ukẹcha? “Oma vwerhen ovwẹ mamọ nẹ me sa rhe etinẹ. Mi vwo ihwo erha me vwẹ Baibol vwo yono. Ọvo rayen te omarẹ ẹgbukpe 67 re. Kọke kọke mi de bro ra, ọ nabọ hwẹ kẹ vwẹ je gbane ovwẹ. Ọke rọ rhe vwọ riẹn nẹ Jihova yen odẹ rẹ Ọghẹnẹ, oviẹ da vabọ. Ọ da ta: ‘Ọnana yen obọ rẹsosuọ mi vwo nyo nẹ Jihova yen odẹ rẹ Ọghẹnẹ. Wẹwẹ rọ dia ọmọtete kẹ vwẹ kọyen rhoma rhe yono uvwe obo re ma ghanre kparobọ.’ Mẹvwẹ komobọ da je viẹ. Ọnana ghwa ọvo usun rẹ obo re nẹrhẹ oma vwerhen ovwẹ nẹ me ga vwẹ asan ra da ma guọnọ ukẹcha.” O kri nọ-ọ na, Monique de ji kpo Isikuru rẹ Ihwo ri Ghwoghwo Uvie Na.

Ikuegbe rẹ Myanmar ra vwọphia vwẹ 2013 Yearbook of Jehovah’s Witnesses, ọyen emu ọfa rọ nẹrhẹ ihwo evo rhe ẹkuotọ nana. Li ọyen oniọvo aye rọ vrẹ ẹgbukpe 30 rọ dia Southeast Asia. Iruo rẹ ọkieje yen o ruẹ. Ẹkẹvuọvo, ikuegbe ra vwọphia vwẹ Yearbook na da nẹrhẹ ọ kua rhe Myanmar rhe ga. “Vwẹ ọghwẹkoko oghẹresan re ruru vwẹ 2014 vwẹ Yangon, me da mrẹ oniọvo ọvo vẹ aye rọyen re ga vwẹ asan ra da ma guọnọ ukẹcha vwẹ ẹbẹre ra da jẹ Chinese vwẹ ẹkuotọ rẹ Myanmar. Kidie nẹ me riẹn Chinese jẹ, mi de brorhiẹn nẹ me cha kua kpo oboyin ra vwẹ ukẹcha kẹ ẹko rẹ Chinese rọhẹ etiyin. Me da vwomaba Monique, avwanre de kpo Mandalay. Jihova bruba kẹ avwanre, avwanre da mrẹ iruo rẹ ubrọke vwẹ isikuru ọvo. Avwanre da je mrẹ uwevwin vwẹ asan rọ kẹrẹ isikuru na. Dede nẹ me rioja rẹ erọnvwọn evo, aruọke na je tuabọ, me nabọ riavwerhen rẹ ẹga mẹ vwẹ obonẹ. Ihwo rẹ Myanmar yeren akpọ ọlọlọhọ, ayen vwo ọghọ, ayen je nabọ kerhọ kẹ iyẹnrẹn esiri na. Ọ vwerhoma nẹ iruo na yan obaro kpakpata womarẹ ukẹcha rẹ Jihova. O mu vwe ẹro dẹn nẹ ọhọre Ọghẹnẹ yen me sa vwọ rhe ga vwẹ Mandalay.”

JIHOVA NYO ẸRHOVWO

Buebun rẹ iniọvo re ga vwẹ asan ra da ma guọnọ ukẹcha, riẹn oborẹ ẹrhovwo vwo ẹgba te. Kerẹ udje, roro kpahen Jumpei vẹ aye rọyen Nao re vrẹ ẹgbukpe 30 re. Ayen ga vwẹ ukoko ọvo ra da jẹ ephẹrẹ rẹ idin vwẹ Japan. Die yen mu ayen vwọ kua rhe Myanmar? Jumpei da ta: “O krire mẹ vẹ aye mẹ vwo vwo  ẹwẹn rẹ avwanre vwọ ga vwẹ asan ra da ma guọnọ ukẹcha vwẹ ẹkuotọ ọfa. O rhi vwo te ọke ọvo, oniọvo ọshare ọvo rọ vẹ avwanre gba ga vwẹ ukoko ra da jẹ ephẹrẹ rẹ idin vwẹ Japan da kua kpo Myanmar. Vwẹ May 2010 avwanre da je kua kpo Myanmar, dede nẹ igho rẹ avwanre kokori ghwe bu-un. Iniọvo na nabọ dede avwanre sasasa!” Ẹro vọ yen o vwo ni aghwoghwo rayen vwẹ ubrotọ ra da jẹ ephẹrẹ rẹ idin vwẹ Myanmar? “Ihwo buebun guọnọ nyo ovuẹ na. Avwanre de dje ividio rẹ idin kẹ ayen vwẹ anurhoro, oma kọ nabọ vwerhen ayen. Oma vwerhen avwanre mamọ nẹ avwanre rhe etinẹ rhe ga Jihova!”

Nao vẹ Jumpei

Mavọ yen Jumpei vẹ Nao vwo yerin ghene ẹdia rẹ ọkanrovwẹ rẹ igho? “Ẹgbukpe erha vwọ wan nu, igho rẹ avwanre kokori jovwo na joma re re. Igho ro chekọ che te vwọ hwosa rẹ uwevwin rẹ ukpe rẹne na-a. Mẹ vẹ aye mẹ nẹrhovwo mamọ vwẹ uvwre ọke yena. Kpregede na, oghọn ukoko de si ọbe rhe avwanre nẹ a vwẹ avwanre vwo mu ekobaro oghẹresan rẹ ubrọke! Jihova rẹ avwanre vwẹroso na, chukoku avwanre kakaka-a. Ọkieje yen ọ vwọ vwẹrote avwanre.” O kri nọ-ọ na, e de durhie Jumpei vẹ Nao kpo Isikuru rẹ Ihwo ri Ghwoghwo Uvie Na.

JIHOVA KỌN ORURU NA PHIYỌ IHWO BUEBUN

Simone rọhẹ ẹgbukpe 43, vrẹn nẹ Italy kpo Myanmar, aye rọyen Anna rọhẹ ẹgbukpe 37 de rhe nẹ New Zealand kpo oboyin. Diesorọ ayen vwọ kua kpo Myanmar? Anna tare nẹ, “Ikuegbe rẹ Myanmar rọ vwomaphia vwẹ Yearbook rẹ 2013 yen sorọ.” Simone da ta: “Ọyen okpuphẹn mamọ me vwọ ga vwẹ Myanmar. Akpeyeren pha lọlọhọ vwẹ obonẹ. Ọ nẹrhẹ me sa mrẹ ọke buebun vwo ruiruo rẹ ẹga na. Ọ vwerhoma ra vwọ mrẹ oborẹ Jihova nabọ vwẹrote ihwo re ga vwẹ asan ra da ma guọnọ ukẹcha.” (Une 121:5) Anna da ta: “Oma vwerhen ovwẹ asaọkiephana vrẹ ọke ri jovwo. Avwanre yeren akpọ ọlọlọhọ. Kidie nẹ mẹ vẹ ọshare mẹ nabọ ghwọrọ ọke kuẹgbe, oyerinkugbe rẹ avwanre da rhe kpẹkpẹ phiyọ. Avwanre rhi vwo igbeyan buebun.Ihwo rẹ avwanre ghwoghwo ota kẹ na vwo utuoma kpahen Iseri rẹ Jihova-a. Ayen vwo urhurusivwe ọgangan kpahen ovuẹ na!” Vwẹ idjerhe vọ?

Simone vẹ Anna

Anna da ta: “Ẹdẹ ọvo, mi ghwoghwo ota kẹ ọmọtẹ ọvo ro kpo univasiti vwẹ asan eki, me da vuẹ nẹ mi che rhivwin bro rhe. Mi vwo rhivwin, me da vwa vẹ ugbeyan rọyen ọvo ro se boma. Ọke ọfa me vwọ ra, o de se ihwo efa boma. Ẹdẹ ọfa, ọ da rhoma se ihwo efa. Mi yono ayen ejobi enẹna.” Simone da ta: “Ihwo na dede avwanre phiyọ oma kerẹ igbeyan, ayen guọnọ nyo oborẹ avwanre cha ta. Buebun rayen vwo urhurusivwe kpahen ovuẹ na. Ọke tobọ herọ re vwo yono ayen eje-e.”

Sachio vẹ Mizuho

Owọẹjẹ sansan vọ yen ayen jẹre tavwen ayen ke kua kpo Myanmar? Mizuho ro nẹ Japan rhe da ta: “Me vẹ ọshare mẹ Sachio guọnọ ga vwẹ ẹkuotọ ra da  ma guọnọ ukẹcha. Jẹ, asan avwanre cha ra kọyen ota na. Avwanre vwo se ikuegbe rẹ Myanmar ra vwọphia vwẹ Yearbook rẹ 2013 nu, oborerhiẹromrẹ rẹ avwanre seri te ubiudu rẹ avwanre mamọ. Kẹ avwanre roro sẹ avwanre se kpo Myanmar ra ga.”Sachio da ta: “Avwanre de brorhiẹn nẹ avwanre cha vwẹ udughwrẹn ọvo vwo kin Yangon rọ dia otorere rẹ Myanmar. Kirobo re se dje, avwanre da ghwa vwẹ uphẹn yena vwọ bẹbẹ ni ẹkuotọ na. Oyan yena kẹ avwanre imuẹro nẹ avwanre sa kua kpo oboyin.”

WỌ SA KPAHEN PHIYỌ USE NA?

Jane, Danica, Rodney, vẹ Jordan

Rodney vẹ aye rọyen Jane vrẹ ẹgbukpe 50 re. Rhanvwe 2010 yen ayen vẹ ọmọshare rayen Jordan kugbe ọmọtẹ rayen Danica vwo vrẹn nẹ Australia rhe Myanmar rhe ga vwẹ asan ra da ma guọnọ ukẹcha. Rodney da ta: “Oma vwerhen avwanre mamọ ra vwọ mrẹ urhurusivwe ọgangan rẹ ihwo na vwori rẹ ayen vwo nyo Ota rẹ Ọghẹnẹ. Mi jiriro kẹ erua efa nẹ ayen kua kpo asan ra da ma guọnọ ukẹcha rọ họhọ Myanmar.” Diesorọ? Ẹga rẹ avwanre vwẹ obonẹ na, si orua rẹ avwanre kẹrẹ Jihova! Ighene buebun vwọ djẹ nene ifonu, imoto, iruo vẹ erọnvwọn efa tiọyen na, jẹ emọ rẹ avwanre yono eta kpokpọ rẹ ayen che vwo ruiruo vwẹ aghwoghwo. Ayen yono oborẹ ayen se vwo nene ihwo re ghwa riẹn kpahen Baibol na-a roro kugbe, vẹ oborẹ ayen sa vwọ kpahenphiyọ onọ vwẹ uyono, je yan obaro vwẹ ukoko na.

Oliver vẹ Anna

Oliver rọ dia oniọvo ọshare rọhẹ ẹgbukpe 37 ro nẹ United States rhe da ta oboresorọ o vwo jiri iruo nana kẹ ihwo: “Erere buebun te vwe obọ vwẹ etinẹ me rhere na. O toro ẹdia me hepha-a, etinẹ mi rhere na nẹrhẹ uduefiogbere vẹ ẹroẹvwọsuọ mẹ kpahen Jihova ganphiyọ. Me vwọ ga vẹ ihwo ri mi vugheri jovwo-o, ri ji vwo ọkpọ rẹ esegbuyota ri mi vwori, chọn vwẹ uko vwọ mrẹvughe nẹ o vwo emuvuọvo vwẹ akpọ na re se vwo dje Uvie rẹ Ọghẹnẹ-ẹ.” Enẹna, Oliver vẹ aye rọyen Anna ga vẹ oruru vwẹ ubrotọ ra da jẹ Chinese.

Trazel

Rhanvwe 2004 yen Trazel rọ dia oniọvo aye rọhẹ ẹgbukpe 52 vwo nẹ Australia rhe Myanmar rhe ga. Ọ da ta: “Mi jiriro kẹ kohwo kohwo ro se ruo, nẹ o kpo asan ra da ma guọnọ ukẹcha. Me rhe mrẹvughe nẹ Jihova choma ro vwo ku ebruphiyọ ku ẹgbaẹdavwọn rẹ kohwo kohwo ro vwo owenvwe ro vwo ru ọtiọyen. Me riẹnre jovwo nẹ akpọ mẹ cha dia enẹ-ẹ. Ọnana yen akpọ ro me yovwin kparobọ.”

E jẹ eta evwevwerhen nana re nyo mie iniọvo re ga vwẹ Myanmar na, mu we vwo roro kpahen oborẹ wọ sa vwọ vwẹ ukẹcha kẹ ihwo ri vwo ẹwẹn esiri, rehẹ ẹkuotọ ra fobọ wia-an. Use na je herọ te ọke na, “Biko, yanrhe obẹ Myanmar rhe chọn avwanre uko!”