Ofori nẹ Onenikristi vwo ọhwunu rọ vwọ chochọn rẹ oma rọyen?

Dede nẹ Inenikristi cha sẹro rẹ oma rayen vwo nẹ abọ rẹ omaẹwan, jẹ ayen che se ru obo rọ cha nẹrhẹ ayen chukoku iji rẹ Baibo-ol. Baibol na vwọso uruemu ra vwọ vwẹ erọnvwọn kerẹ ọhwunu, te i ri itete yẹrẹ i ride vwọ chochọn rẹ oma rẹ ohwo vwọ nẹ abọ rẹ ihworakpọ. Roro kpahen ẹdia nana:

Arhọ pha ghanghanre kẹ Jihova, ma rho kẹ arhọ rẹ ohworakpọ. Ọbuine Devid riẹnre nẹ obọ rẹ Jihova yen “ogbugbu rẹ arhọ epha.” (Une 36:9) Ọtiọyena, Onenikristi rọ guọnọ sẹro rẹ arhọ rọyen vẹ ekuakua ro vwori, cha davwẹngba rere o se ru ọtiọyen vwọ vrabọ rẹ abe ọbaro.​—Urhi 22:8; Une 51:14.

Dede nẹ ekuakua buebun herọ re se vwo hwe ohwo, jẹ ọhwunu yen cha ma phẹre, owenẹ ọ chọ ohwo na obọ, yẹrẹ arogba yen o vwo ruo. * Vwọba, onogbozighi ro bru ohwo rhe da mrẹ nẹ ohwo na mu ọhwunu, ọ sa sa ohwo na. Ọvo usun rayen sa tobọ ghwu vwẹ ẹdia na.

Jesu vuẹ idibo rọyen nẹ ayen mu ọlọkọ vwọ choma vwẹ ason rọ koba tavwen o ki rhi ghwu, ẹkẹvuọvo ọ dia fikirẹ ochọnvwe-e. (Luk 22:36, 38) Ukperẹ ọtiọyen, ọ vuẹ ayen nẹ ayen mu ọlọkọ vwọ choma rere o se yono ayen oboresorọ o vwo fo nẹ ayen kẹnoma kẹ ozighi, ọ da tobọ dianẹ otu buebun ghwẹ rhe, rhi nene  ayen họnre. (Luk 22:52) Pita vwọ reyọ ọlọkọ vwọ nyavwe odibo rẹ orherẹn rode na nu, Jesu da ta kẹ: “Phi ọlọkọ wẹn vwọ hẹ ako.” Jesu da vwẹ iji ọvo phia, rẹ idibo rọyen ji nene rhi duvwun nonẹna: “Kidie ohwo rọ nyavwe ohwo hwe, ọlọkọ ọ je wa kpo.”​—Mat. 26:51, 52.

Vwo nene oborẹ Maika 4:3 tare, idibo rẹ Ọghẹnẹ “duvwu elọkọ rayen phihọ ighwro, ibiri rayen phihọ egbage re vwo fru odi.” Uruemu nana re vwo vughe Inenikristi ghwe shephiyọ vẹ uchebro rẹ ọyinkọn Pọl vwọphia, rọ vwọ ta: “Wọ vwẹ umwemwu hwa osa re umwemwu-u. . . . Udu wẹn da gba, wọ vẹ ohwo ọvuọvo ghwọ-ọ.” (Rom 12:17, 18) Dede nẹ Pọl rhiẹromrẹ ebẹnbẹn buebun, kerẹ “oshọ rẹ igbunegbu” vẹ efa, o ru nene ota rọyen, o chukoku iji rẹ Baibol na vwọ chochọn rẹ oma rọye-en. (2 Kọr. 11:26) Ukperẹ ọtiọyen, ọ vwẹroso Ọghẹnẹ, vẹ aghwanre rọhẹ evunrẹ Baibol na, kidie aghwanre yena “yovwi nọ ekuakua rẹ ofovwi.”​—Aghwo. 9:18.

Vwọ kẹ Inenikristi, arhọ ghanre vrẹ ekuakua rẹ akpeyeren. “Ọ dia efe buebu rẹ ohwo vwori ọye urhuarhọ rọye epha-a.” (Luk 12:15) Ọtiọyena, siẹrẹ eta re bọrọ bọrọ rha sa nẹrhẹ ẹwẹn rẹ oji totọ-ọ, Onenikristi ro vwo aghwanre, ko nene iji rẹ Jesu nana: “Wọ vẹ ohwo umwemwu sioma-a.” Avwanre sa tobọ vwẹ ikotu vẹ adagba avwanre vwọ kẹ, kirobo re se dje. (Mat. 5:39, 40; Luk 6:29) * Jẹ, omaẹkẹnẹ yen me yovwin. Avwanre da kẹnoma kẹ “eheri rẹ akpọ na” re vwo dje oma phia, rere a riẹn avwanre phiyọ Iseri rẹ Jihova re dia ihwo rẹ ufuoma, ọ cha bẹn rẹ inogbozighi se vwo ni avwanre so.​—1 Jọn 2:16; Isẹ 18:10.

Inenikristi muọghọ kẹ ẹwẹn obrorhiẹn rẹ ihwo efa. (Rom 14:21) Iniọvo evo da rhe riẹn nẹ oniọvo ọvo dẹ ọhwunu rọ vwọ chochọn rẹ oma rọyen vwo nẹ abọ rẹ ihworakpọ, o se gbe ayen nu, yẹrẹ ọ sa tobọ dia ikprowọ kẹ ayen. Ẹguọnọ cha nẹrhẹ avwanre vwẹ ọdavwẹ rẹ ihwo efa vwọ kobaro, ọ da tobọ dianẹ avwanre cha kpairoro vrẹ ojẹ romobọ.​—1 Kọr. 10:32, 33; 13:4, 5.

Inenikristi guọnọ dia omamọ rẹ udje kẹ ihwo efa. (2 Kọr. 4:2; 1 Pita 5:2, 3) Onenikristi ra vwẹ uchebro kẹ kpahen ọhwunu rọ vwọ chochọn rẹ oma rọyen, jẹ ọ davwenrhọ-ọ, cha sa dia omamọ rẹ udje-e. Ọtiọyena, e rhe che se vwo muẹdia vwevunrẹ ukoko na-a. Ọtiọyen jehẹ Onenikristi ro ruiruo re de muẹ ọhwunu. O che yovwin siẹrẹ ọ da guọnọ iruo ọfa! *

Onenikristi ọvuọvo yen che brorhiẹn rẹ obo rọ sa vwọ chochọn rẹ oma rọyen vẹ orua rọyen, je serọ rẹ ekuakua ro vwori; ọtiọyen jehẹ oka rẹ iruo ro che ru. Jihova kẹ avwanre iji sansan vwẹ Baibol na, ri dje aghwanre vẹ ẹguọnọ rọyen phia. Fikirẹ ọdavwaro rẹ ayen vwo kpahen iji yena, Inenikristi ri tedje cha sa vwẹ ọhwunu vwọ choma fikirẹ ihworakpọ-ọ. Ayen riẹnre nẹ ihwo re vwẹroso Ọghẹnẹ, ri ji yeren akpọ nene iji rẹ Baibol na, yen se vwo obọdẹn rẹ ofuvwegbe.​—Une 97:10; Isẹ 1:33; 2:6, 7.

Inenikristi cha vwẹroso Jihova vwẹ ukpokpogho rode na, ukperẹ ayen vwọ chochọn rẹ oma rayen

^ e?ko. 3 Onenikristi se vwo ohwunu ro vwo kpo ibefi, yẹrẹ ọ sa dẹ ọvo fikirẹ eranvwe re djoma. Ẹkẹvuọvo, ofori nẹ ọ hra, yẹrẹ si egbọlọ rehẹ evun rọyen no, tavwen ọ ke kanrọ phiyọ asan, ọke ro de vwo ruiruo nu. Inenikristi che muọghọ kẹ urhi rẹ ẹkuotọ na, siẹrẹ ayen da hẹ ẹkuotọ rẹ urhi na ghwa rhọnvwe nẹ ohwo vwo ọhwunu-u.​—Rom 13:1.

^ e?ko. 2 Vwọ kpahen obo ra sa vwọ chochọn rẹ oma rẹ ohwo vwo nẹ abọ rẹ ihwo re gba ohwo ẹgua, re ni uyovwinrota na, “How to Prevent Rape” vwẹ Awake! rẹ March 8, 1993.

^ e?ko. 4 Wọ sa mrẹ evuẹ efa ri shekpahen iruo re de muẹ ọhwunu, vwẹ Uwevwin Orhẹrẹ rẹ November 1, 2005, aruọbe 31; kugbe ọ rẹ July 15, 1983, aruẹbe 25-26. (Ọ rẹ oyibo)