Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

E Jẹ O “Ru Iroro Wẹn Ejobi Gba Kẹ Wẹ”

E Jẹ O “Ru Iroro Wẹn Ejobi Gba Kẹ Wẹ”

“Jẹn oma rẹ Ọrovwohwo vwerhe owẹ kọ vwẹ obo rẹ udu wẹn guọnọre kẹ wẹ.”​—UNE 37:4.

UNE: 89, 140

1. Orhiẹn vọ ro shekpahen obaro na yen ighene che bru, kẹ diesorọ oshọ vwo jẹ ayen e muo? (Ni uhoho rẹsosuọ na.)

IGHENE, o muẹro nẹ ovwan cha rhọnvwe nẹ, aghwanre herọ siẹrẹ ohwo rọ guọnọ kpo asan da jiroro phiyotọ. Akpeyeren họhọ oyan rẹ awusheri, ọke rẹ ohwo vwọ hẹ eghene yen me vwo fo nẹ ọ jiroro rẹ obo rọ cha yan wan. Jẹ ọ ghwa lọhọ e vwo ru ọtiọye-en. Ọmọtẹ ọvo re se Heather da ta: “Ọ ghwa lọhọ re vwo brorhiẹn rẹ obo ra cha vwẹ akpeyeren ohwo ru-u.” Ẹkẹvuọvo, fiudugberi. Jihova vuẹ ihwo rọyen nẹ, “wo jẹ ofu dje we-e, kidie Mẹvwẹ Ọghẹnẹ wẹn; Me kẹ wẹ ogangan, Me cha wẹ uko.”​—Aiz. 41:10.

2. Mavọ wo ru riẹn nẹ Jihova guọnọre nẹ wo muegbe wo vwo yerin akpọ rẹ omavwerhovwẹn?

2 Jihova bru ovwan uche nẹ, ovwan vwẹ aghwanre vwo muegbe oka rẹ akpọ rẹ ovwan che yerin. (Aghwo. 12:1; Mat. 6:20) Ọ guọnọre nẹ oma vwerhen ovwan. Ekuakua iyoyovwin rọ mare, te avwerhen rẹ emu sansan, erọnvwọn ri vwo erhuvwu ra mrẹ, kugbe edo sansan re nyo, djerephia nẹ o vwo ọdavwẹ rẹ avwanre. Di roro, ọ nabọ vwẹrote avwanre, ji yono avwanre idjerhe rẹ akpeyeren ro me yovwin. Jihova da ta kẹ ihwo re sen uchebro rọyen: “Wọ . . . jẹ obo ri tu vwe oma. . . . Nighe, idibo  mẹ cha ghọghọ, ẹkẹvuọvo oma cha vo owẹ. . . . Nighere, idibo mẹ cha so ine fiki rẹ aghọghọ rọ hẹ udu rayen.” (Aiz. 65:12-14) Oma nabọ vwerhen Jihova siẹrẹ ihwo rọyen de bru omamọ orhiẹn.​—Isẹ. 27:11.

IROROẸJẸ RỌ CHA NẸRHẸ OMA VWERHEN OWẸ

3. Oka rẹ akpọ vọ yen Jihova guọnọre nẹ wo yerin?

3 Iroro vọ yen Jihova vwo kpahen owẹ? Ọghẹnẹ ma ihworakpọ rere ayen vwo yono, je fuevun kpahọn, rere oma sa vwọ vwerhen ayen. (Une 128:1; Mat. 5:3) Ọ ma avwanre fẹnẹ eranvwe, kidie oborẹ eranvwe ghwa riẹn, ọyen ayen vwọ re emu, da ame, ji vwiẹ. Ọ ghwa dia oka rẹ akpọ yena yen Ọghẹnẹ guọnọre nẹ wo yeri-in, ọ guọnọre nẹ wo ru erọnvwọn efa re cha nẹrhẹ oma vwerhen owẹ. Ọmemama wẹn, ọyen “Ọghẹnẹ rẹ ẹguọnọ” rẹ oma vwerhan, ọ ma ohworakpọ “vwẹ oma rọye.” (2 Kọr. 13:11; 1 Tim. 1:11; Jẹn. 1:27) Oma cha vwerhen owẹ siẹrẹ wọ da vwẹrokere Ọghẹnẹ rẹ ẹguọnọ na. Wọ mrẹ orugba rẹ eta rẹ Baibol nana vwẹ akpeyeren wẹn jovwo re? “[“Omavwerhovwẹn,” NW ] herọ kẹ ọkokẹ nọ ohwo ra kẹ.” (Iruo 20:35) Ọnana uyota ọvo kiriguo vwẹ akpeyeren. Kọyensorọ, Jihova vwọ guọnọ nẹ wọ tẹnrovi oborẹ wo se vwo dje ẹguọnọ kẹ ọyen kugbe ihwo efa.​—Se Matiu 22:36-39.

4, 5. Die yen kẹ Jesu omavwerhovwẹn?

4 Ighene, Jesu phi udje ọgbagba phiyotọ kẹ ovwan. Aphro herọ-ọ, Jesu nabọ heha ọke rọ vwọ omotete. Ota rẹ Ọghẹnẹ tare nẹ o vwo “ọke ra vwọ hwẹ . . . vẹ ọke ra vwọ heha.” (Aghwo. 3:4) Jesu ji sikẹrẹ Jihova womarẹ uyono rẹ Ọbe Ọfuanfon na. Ọke rọ vwọ hẹ ẹgbukpe 12, o gbe iyono rehẹ uwevwin ẹga na unu, rẹ ayen vwọ mrẹ “obo ro vwo ẹruọ” rẹ Isiesi Ọfuanfon na te, kugbe “ekpahọ rọye.”​—Luk 2:42, 46, 47.

5 Jesu da rhe dia omiragua rẹ oma vwerhan. Die nẹrhẹ ọ dia ọtiọyen? Ọ riẹnre nẹ Ọghẹnẹ guọnọre nẹ o “gbe ikun esiri na kẹ ivwiogbere. [Ọ me je vwẹ] Orẹmrẹ kẹ otu ri rhuẹro.” (Luk 4:18) Oma vwerhen Jesu ro vwo ru oborẹ Ọghẹnẹ guọnọ mie. Une Rẹ Ejiro 40:8 dje ẹwẹn ro rhe Jesu phia: “Me vwo omavwerhe ru ọhọre wẹn, E Ọghẹnẹ mẹ.” Jesu vwo omavwerhovwẹn ro vwo yono ihwo kpahen Ọsẹ rọyen. (Se Luk 10:21.) Ọke rẹ Jesu vwo yono aye ọvo kpahen ẹga rẹ uyota nu, ọ da ta kẹ idibo rọyen: “Emu mẹ vwenẹ hẹ eruo rẹ ọhọre rẹ ọ ro ji vwe rhe, re mi vwo ru iruo rọye re.” (Jọn 4:31-34) Ẹguọnọ rẹ Jesu dje kẹ Ọghẹnẹ kugbe ihwo efa yen nẹrhẹ oma vwerhọn. Ọ je sa nẹrhẹ oma vwerhen owẹ.

6. Diesorọ o vwo fo nẹ wọ vwẹ iroro wẹn vwọ nẹ Inenikristi ri tedje?

6 Inenikristi buebun mrẹ omavwerhovwẹn, kidie ayen vwẹ ọke eghene rayen vwọ ga kerẹ ekobaro. Wo se bru iniọvo tiọyena ra, rere wọ vuẹ ayen obo wọ guọnọ ru. Baibol na tare nẹ, “ọvwiroro rha hẹ asa-an emu ejobi ko she chọ, ẹkẹvuọvo ọvwiroro da herọ emu ko she phihọ.” (Isẹ 15:22) Iniọvo nana cha vuẹ wẹ erọnvwọn buebun rẹ ẹga rẹ ọkieje se yono uwe, re cha chọn wẹ uko vwẹ akpeyeren. Dede nẹ Jesu yono mie ọsẹ rọyen vwẹ obo odjuvwu, o ji yono erọnvwọn efa buebun vwẹ iruo aghwoghwo ro ruru vwẹ otọrakpọ na. Kerẹ udje, o yonori nẹ aghọghọ herọ siẹrẹ a da sa vwẹ ovuẹ na vwo te ubiudu rẹ ihwo re yono, je sẹro rẹ ọyọnregan vwẹ ọke rẹ ọdavwini. (Se Aizaya 50:4; Hib. 5:8; 12:2) E jẹ a fuẹrẹn oboresorọ ẹga ọkieje na vwọ dia iruo rọ sa kẹ wẹ omavwerhovwẹn.

OBORESORỌ IGHWOGHWOTA RẸ UVIE NA VWO PHIẸKPAROBỌ

7. Diesorọ ighene buebun vwo vwo omavwerhovwẹn kpahen iruo aghwoghwo na?

7 Jesu vuẹ idibo rọyen nẹ, “ovwan gba yanran re we re [“ru idibo rẹ ihwo,” NW ] . . . we yono ayen.” (Mat. 28:19, 20) Ọyena  omamọ rẹ ojẹ siẹrẹ wọ da guọnọ dia uvi rẹ oghwoghwota, kidie ọ cha nẹrhẹ oma vwerhen owẹ vẹ Jihova. Kirobo rọ je hepha vwẹ iruo efa, ọ guọnọ ọke tavwen wọ ke sa dia ọwena vwẹ iruo nana. O kri nọ na-a, oniọvo ọvo re se Timoti rọ ton iruo ọkobaro phiyọ vwẹ ọke eghene rọyen da ta: “Oma vwerhen ovwẹ nẹ me ga Jihova kerẹ ọkobaro, kidie ọnana idjerhe mi se vwo dje ẹguọnọ mẹ kẹ. Ọke ri jovwo, mi vwo ohwo ọvuọvo mi vwẹ Baibol yono-o, ẹkẹvuọvo vwẹ uvwre rẹ emeranvwe ọvo mi vwo kpo ẹkuotọ ọfa re ghwoghwo, ki mi rhi vwo ihwo buebun mi vwẹ Baibol yono. Ọvo usun rayen kọ tobọ cha uyono. Mi vwo wontọ nẹ Isikuru ri Baibol Vwọkẹ Iniọvo Eshare Re je Rọvwọ-ọn, * ke mu vwe kpo ẹkuotọ ofa. Enẹna, ihwo ẹne yen me vwẹ Baibol yono. Oma vwerhen ovwẹ mi de yono ihwo, kidie me mrẹ oborẹ ẹwẹn ọfuanfon na chọn ayen uko vwo ruẹ ewene vwẹ akpeyeren rayen.”​—1 Tẹsa. 2:19.

8. Idjerhe vọ yen ighene evo vwọ nabọ vwobọ vwẹ iruo rẹ odibo egbe na?

8 Ighene evo yono ephẹrẹ ọfa. Kerẹ udje, Jacob ro nẹ North America rhe da ta: “Me vwọ hẹ ẹgbukpe ighwrẹn, buebun rẹ emọ iklasi mẹ, ihwo rẹ Vietnam. Me guọnọ vuẹ ayen kpahen Jihova, ọtiọyena mi de yono ephẹrẹ rayen. Ọke yena, me reyọ Uwevwin Orhẹrẹ rẹ oyibo na vwo yono ọ ra fan kpo Vietnamese. Mi de ji mu ugbeyan rẹ iniọvo evo rehẹ ukoko rẹ Vietnamese rọ kẹrẹ ovwẹ. Mi vwo te ẹgbukpe 18, me da ton iruo ọkobaro phiyọ. Ọke vwọ yanran na, e de durhie uvwe kpo Isikuru ri Baibol Vwọkẹ Iniọvo Eshare Re je Rọvwọ-ọn. Isukuru nana yen chọn vwẹ uko vwẹ asan me da ga kerẹ ọkobaro enẹna. Mẹvwẹ ọvo yen ọkpako vwẹ ẹko ra da jẹ ephẹrẹ rẹ Vietnamese re me hepha na. O gbe ihwo rẹ Vietnam buebun unu nẹ mi se yono ephẹrẹ rayen. Buebun rayen nabọ durhie uvwe ro uwevwin, ke me vwẹ Baibol vwo yono ayen. Evo usun rayen yerin te ẹdia rẹ ebrophiyame re.”​—Ni Iruo 2:7, 8.

9. Die yen iruo aghwoghwo na se yono avwanre?

9 Iruo aghwoghwo na sa nẹrhẹ ohwo dia ọwena rẹ ota, ọ je sa nẹrhẹ a dia ọgbowian, ohwo ro se fiudugberẹ kugbe ohwo rọ je ta ota vẹ aghẹnghẹn. (Isẹ 21:5; 2 Tim. 2:24) Ma rho, iruo aghwoghwo na cha nẹrhẹ wọ riẹn ẹkpo rẹ Baibol sansan re sa bọn esegbuyota wẹn gan. Ọ je nẹrhẹ avwanre vẹ Jihova wian kuẹgbe.​—1 Kọr. 3:9.

10. Mavọ yen wọ sa vwọ mrẹ aghọghọ vwẹ iruo rẹ aghwoghwo na, ọ da tobọ dianẹ ihwo kerhọ vwẹ ẹkuotọ wo de ghwoghwo-o?

10 Wọ sa riavwerhen rẹ iruo rẹ aghwoghwo wẹn, ọ da tobọ dianẹ imihwo krẹn yen kerhọ vwẹ ekogho wọ da wian. Iruo odibo egbe na, dia iruo rẹ ohwo ọvo-o. Ukoko na eje yen cha guọnọ ihwo ri vwo ẹwẹn esiri. Dede nẹ oniọvo ọvo yen che yono ohwo tiọyena vwọ dia odibo rẹ Jesu, ihwo eje yen hiẹ guọnọ ohwo na, eriyina, aghọghọ na kẹ ọ rẹ ihwo eje. Kerẹ udje, Brandon ghwọrọ ẹgbukpe irhirin vwọ ga kerẹ ọkobaro vwẹ ẹkuotọ rẹ ihwo buebun rhọnvwan kerhọ-ọ. Ọ da ta: “Oma rẹ aghwoghwo na vwerhen ovwẹ, kidie ọyen owian rẹ Jihova vwọ kẹ vwẹ. Mi ghwe vwo wontọ nẹ isikuru, me da ton iruo ọkobaro phiyọ. Me nabọ vwẹ uchebro kẹ ighene eshare rehẹ ukoko na. Ẹyan-obaro rayen nẹrhẹ oma vwerhen ovwẹ. Mi vwo wontọ nẹ Isikuru ri Baibol Vwọkẹ Iniọvo Eshare Re je Rọvwọ-ọn, e de ji vwe kerẹ ọkobaro kpo asan ọfa re ghwoghwo. Dede nẹ mi ji rhi yono ohwo te ẹdia rẹ ebrophiyame-e, jẹ iniọvo efa ru ọtiọyen re. Oma vwerhen ovwẹ nẹ me brorhiẹn mi vwo vwobọ vwẹ iruo aghwoghwo na vọnvọn.”​—Aghwo. 11:6.

 OBORẸ ORHIẸN WẸN SA GHWA RHE

11. Iruo vọ vwevunrẹ ẹga na yen ighene buebun riavwerhen rọyen?

11 Uphẹn rẹ ẹga buebun rhiephiyọ vwẹ ukoko rẹ Jihova. Kerẹ udje, ighene buebun vwomakpahotọ vwọ kẹ iruo rẹ ebabọn vwevunrẹ ukoko na. A guọnọ Eguan Ruvie buebun asaọkiephana. Ebabọn tiọyena vwẹ urinrin kẹ Ọghẹnẹ, e je sa nẹrhẹ oma vwerhen owẹ. Aghọghọ herọ ra vẹ iniọvo efa da wian kuẹgbe. Iruo rẹ ebabọn rẹ ukoko na ji yono ohwo obo ra sa kẹnoma kẹ omaẹwan, obo ra sa vwọ dia ọgbowian, kugbe obo re se vwo nene odjekẹ rẹ iniruo re vwo mu.

Ebruphiyọ buebun herọ vwọ kẹ ihwo rehẹ ẹga ọkieje (Ni ẹkoreta 11-13)

12. Idjerhe vọ yen iruo ọkobaro na sa vwọ nẹrhẹ uphẹn efa te ohwo obọ vwẹ ẹga rẹ Jihova?

12 Oniọvo ọvo re se Kevin da ta: “Nẹ ọkiemọ rhe yen me vwọ guọnọ ro ẹga ọkieje. Mi vwo te ẹgbukpe 19, me da ton iruo ọkobaro phiyọ. Oniọvo ọvo ro ruiruo rẹ ebabọn, da kẹ vwẹ owian rẹ ubrọke. Iruo yena kọyen me vwọ ghẹrẹ oma mẹ. Etiyin kọyen mi de yono iruo rẹ uwevwin ẹkanrọ, kugbe obo ra ghwẹ ẹchẹ vẹ evakpo phiyọ uwevwin. Me ghwọrọ ẹgbukpe ivẹ vwo vwobọ vwẹ iruo rẹ ebabọn rẹ iwevwin rẹ iniọvo sansan vẹ Eguan Ruvie rẹ ogiribo rode guọghọre. Mi vwo nyo nẹ a guọnọ iniọvo re tẹn ona rẹ ebabọn vwẹ South Africa, me da vwomakpahotọ vwọ kẹ iruo na. Kọ ghwa họhọ nẹ me nẹ iruo rẹ ebabọn rẹ Ọguan Ruvie ọvo vwo kpo ọfa kudughwrẹn kudughwrẹn. Ẹko me da wian na họhọ orua kẹ vwẹ, kidie avwanre yerẹn kuẹgbe, ru uyono, je wian kuẹgbe. Oma je vwerhen ovwẹ me vẹ iniọvo rẹ ekogho na vwọ wian kuẹgbe vwẹ aghwoghwo kudughwrẹn kudughwrẹn. Orhiẹn mi bruru vwẹ ọkiemọ, rhe nẹrhẹ oma vwerhen ovwẹ vwẹ idjerhe me nama rhẹro rọye-en.”

13. Diesorọ ighene buebun vwo vwo omavwerhovwẹn kpahen ẹga rẹ Bẹtẹl?

 13 Iniọvo evo ri brorhiẹn rẹ ayen vwọ ro ẹga ọkieje, ga vwẹ Bẹtẹl asaọkiephana. Ẹga rẹ Bẹtẹl kẹ ohwo omavwerhovwẹn, kidie kemu kemu re ruẹ vwẹ Bẹtẹl, e ruo vwọ kẹ Jihova. Iruo rẹ iniọvo re ga vwẹ Bẹtẹl ruẹ, yen nẹrhẹ a sa mrẹ emu rẹ ewẹn. Oniọvo Dustin rọ ga vwẹ Bẹtẹl da ta: “Rhanvwẹ ọke me vwọ hẹ ẹgbukpe irhirin ọyen me vwọ brorhiẹn nẹ me cha ga vwẹ Bẹtẹl; mi ghwe vwo wontọ ne isikuru, me da ton iruo ọkobaro phiyọ. Ẹgbukpe ọvo gbubro vwọ wan nu, e de durhie uvwe kpo Bẹtẹl; oboyin kọyen e de yono uvwe ikọmputa kugbe obo ra vwẹ ijini ride vwọ teyen ẹbe. A vwẹ iyẹnrẹn rẹ ẹyan-obaro rẹ iruo akpọeje rẹ ukoko na phia kẹ orua rẹ Bẹtẹl, tavwen a ke teyọn phia. Kọke kọke mi de nyọ iyẹnrẹn tiọyena, oma kọ vwerhen ovwẹ. Ẹga rẹ Bẹtẹl je vwe mamọ, kidie avwanre chọn ihwo uko vwo siẹkẹrẹ Jihova.”

ORHIẸN VỌ YEN WO CHE BRU KPAHEN OBARO NA?

14. Mavọ wo se vwo muegbe vwọ kẹ iruo rẹ ẹga ọkieje?

14 Die yen ofori nẹ wo ru, wọ sa vwọ ro ẹga ọkieje? Vwọ vrẹ korọnvwọn korọnvwọn, iruemu re jiri kẹ Inenikrisi cha chọn wẹ uko vwọ ga Jihova vọnvọn. Eriyina, nabọ frẹkotọ yono Baibol na, roro kpahọn, rere wọ je kpahenphiyọ enọ vwẹ uyono. Wọ je vwọ hẹ isikuru, davwẹngba wo yono oborẹ wọ sa vwọ dia ọwena vwẹ iruo aghwoghwo na. Dje ọdavwẹ kẹ ihwo efa, nọ ayen enọ vwẹ idjerhe rẹ ona, wọ me je nabọ kerhọ rẹ oborẹ ayen cha ta. Vwọba, wọ je sa vwomakpahotọ vwọ kẹ iruo rẹ orufon kugbe ẹrhuẹrẹ rẹ Ọguan Ruvie. Ihwo re vwomakpotọ, ri ji vwo uruemu rẹ omaevwoze, yen Jihova vwọ wian. (Se Une Rẹ Ejiro 110:3; Iruo 6:1-3) Ọyinkọn Pọl durhie Timoti nẹ o nene ọyen ruiruo rẹ Imishọnare, kidie iniọvo na “gbe ikun rọye vwevwerhe.”​—Iruo 16:1-5.

15. Die wo se ru, vwọ ghẹrẹ oma wẹn?

15 Iniọvo rehẹ ẹga ọkieje wian vwọ ghẹrẹ oma rayen. (Iruo 18:2, 3) Wo se yono iruo obọ, rọ sa nẹrhẹ wọ mrẹ iruo ubrọke vwẹ ekogho wẹn. Wọ sa vwẹ iroroẹjẹ wẹn vwọ nẹ oniruo okinriariẹ vẹ ekobaro rehẹ okinriariẹ wẹn. Nọ ayen kpahen oka rẹ iruo wo se ru kerẹ ọkobaro. Kidie Baibol na tare nẹ, “phi iruo wẹn ejobi phihọ obọ rẹ Ọrovwohwo na, obo wo rori ejobi kọ mudia ga.”​—Isẹ 16:3; 20:18.

16. Wọ da nabọ ga Ọghẹnẹ vọnvọn vwẹ ọke eghene, mavọ yen ọyena se vwo muegbe wẹn kẹ eghwa efa vwẹ obaro na?

16 Vwo imuẹro nẹ Jihova guọnọre nẹ wọ “yọnrọn arhọ na,” rọ dia akpọ rẹ omavwerhovwẹn rọ cha na. (Se 1 Timoti 6:18, 19.) Ẹga ọkieje cha nẹrhẹ wo sikẹrẹ iniọvo na, ọ je cha nẹrhẹ wọ dia Onenikristi ro tedje. Iniọvo buebun rhe mrẹvughe nẹ, omavwerhovwẹn hẹ evunrẹ orọnvwe rayen asaọkiephana kidie ayen nabọ ga Jihova sasasa vwẹ ọke eghene. Buebun rẹ eya vẹ eshare rehẹ evunrẹ iruo ọkobaro na tavwen ayen ke rọvwọn, ji ruiruo na rhi te nonẹna.​—Rom 16:3, 4.

17, 18. Mavọ yen iroro rẹ ohwo vwo churobọ si ubiudu na?

17 Ubiudu yen iroro nẹ cha. Vwọ kpahen Jihova, Une Rẹ Ejiro 20:4 da ta: “E jọ vwẹ obo rẹ udu wẹn guọnọre kẹ wẹ, ro ru iroro wẹn ejobi gba kẹ we!” Ọtiọyena, gbe roro kpahen oborẹ wọ cha vwẹ akpeyeren wẹn ru. Roro kpahen oborẹ Jihova ruẹ vwẹ ọke avwanre nana, kugbe obo wo se ru vwẹ ẹga rọyen, rọ cha nẹrhẹ oma vwerhọn.

18 Wọ da ga Jihova vọnvọn, kẹ wọ cha mrẹ uvi rẹ omavwerhovwẹn. Akpeyeren tiọyena ghwa ujiri vwo rhe Ọghẹnẹ. Eriyina, gbe jẹ “oma rẹ Ọrovwohwo vwerhe owẹ, kọ vwẹ obo rẹ udu wẹn guọnọre kẹ wẹ.”​—Une 37:4.

^ e?ko. 7 A vwẹ Isikuru rẹ Ihwo ri Ghwoghwo Uvie Na vwo wene re.