Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 Uyono 2

Jiri Jihova Vwevunrẹ Ukoko Na

Jiri Jihova Vwevunrẹ Ukoko Na

Vwẹ uherevie rẹ ukoko rode mi de jiri uwe.” UNE 22:22.

UNE 59 Nene Uvwe Jiri Jihova

ỌDJẸKOKO *

1. Ẹwẹn vọ yen rhe Devid kpahen Jihova, kẹ die yen ọnana muro vwo ru?

OVIE DEVID da ta: “Orhuarho ọye Ọrovwohwo, o te ohwo re jiri rhuarho.” (Une 145:3) O jiri Jihova vwẹ “uherevie rẹ ukoko” na fikirẹ ẹguọnọ ro vwo kpahọn. (Une 22:22; 40:5) O muẹro nẹ wo vwo ẹguọnọ rẹ Jihova, wọ je rhọnvwephiyọ eta rẹ Devid nana: “Ebruphihọ kẹ wẹ, E Ọrovwohwo, Ọghẹnẹ rẹ Izrẹl Ọsẹ rẹ avwanre, rhirhi bẹdẹ.”— 1 Ikun 29:10-13.

2. (a) Idjerhe vọ yen avwanre se vwo jiri Jihova? (b) Egbabọse vọ yen avwanre se hirharoku, kẹ die yen a cha fuẹrẹn?

2 Idjerhe ọvo rẹ avwanre se vwo jiri Jihova ọyen ra vwọ kpahanphiyọ enọ vwẹ emẹvwa. Jẹ, iniọvo rẹ avwanre evo vwo obẹnbẹn ọvo. Ayen guọnọ kpahenphiyọ enọ, ẹkẹvuọvo oshọ mu ayen. Mavọ yen ayen se vwo phi ebẹnbẹn nana kparobọ? Owọẹjẹ vọ yen sa vwẹ ukẹcha kẹ ayen vwọ vwẹ uvi ẹkpahọnphiyọ phia? Tavwen a ke kpahenphiyọ enọ nana, jẹ a fuẹrẹn erọnvwọn ẹne ri mu avwanre vwọ kpahanphiyọ enọ vwẹ emẹvwa.

OBORESORỌ AVWANRE VWỌ KPAHANPHIYỌ ENỌ VWẸ EMẸVWA

3-5. (a) Vwo nene Hibru 13:15, diesorọ avwanre vwọ kpahanphiyọ enọ vwẹ emẹvwa? (b) Ofori nẹ avwanre eje vwẹ oka rẹ ẹkpahọnphiyọ ọvuọvo vwọphia? Djekpahọn.

3 Jihova kẹ avwanre eje uphẹn re vwo jiro. (Une 119:108) Ẹkpahọnphiyọ rẹ avwanre ọyen ẹbẹre ọvo rẹ izobo rẹ “ejiro” rẹ avwanre vwọ kẹ, jẹ o vwo ohwo vuọvo ro se ru ọnana kẹ avwanre-e. (Se Hibru 13:15.) Kẹ, oka rẹ ẹkpahọnphiyọ vuọvo yen Jihova guọnọ mie avwanre ejobi? Ẹjo, kakaka!

4 Jihova vwo ọdavwaro kpahen izobo rẹ avwanre, kidie ọ riẹnre nẹ ona rẹ avwanre vẹ ẹdia rẹ avwanre hepha fẹnẹ  ohwohwo. Di roro kpahen oka rẹ izobo rẹ Jihova rhiabọreyọ vwẹ ọke awanre. Ihwo rẹ Izrẹl evo sa vwẹ omogodẹ yẹrẹ ẹvwe vwo ze izobo kẹ. Ohwo rẹ Izrẹl rọ dia ovwiogbere me rha reyọ “inekuku ivẹ eyẹ erurẹ ivẹ” vwo ze. Ẹkẹvuọvo, ohwo na rhe vwo igho rọ vwọ dẹ emephran ivẹ na-a, Jihova je sa rhiabọreyọ “ẹko ihwe rẹ iputusẹ rẹ eka.” (Liv. 5:7, 11) Dede nẹ eka pha kueku vwẹ oke yena, Jihova je cha rhiabọreyọ siẹrẹ “eka” na da dia emamọ rọyen.

5 Oka rẹ ẹwẹn yena yen ji rhe Jihova te ọke na. Ọ dia a vwọ dia ọwena rẹ ota kerẹ Apolọs yẹrẹ vwo aghẹnghẹn kerẹ Pọl yen Jihova guọnọ mie avwanre siẹrẹ a da kpahanphiyọ enọ vwẹ emẹvwa-a. (Iruo 18:24; 26:28) Oborẹ Jihova guọnọ mie avwanre ọyen a vwọ kpahenphiyọ enọ te asan rẹ ẹgba rẹ avwanre teri. Karophiyọ ayeuku yena ro toro anini ivẹ. Jihova vwẹ ẹro ọghanghanre vwo no kidie o ru oborẹ ẹgba rọyen muru.—Luk 21:1-4.

Ẹkpahọnphiyọ bọn avwanre vẹ ihwo re kerhọ rẹ avwanregan (Ni ẹkoreta 6-7) *

6. (a) Vwo nene Hibru 10:24, 25, mavọ yen ẹkpahọnphiyọ rẹ ihwo efa se vwo djobọte avwanre? (b) Mavọ yen wo se vwo dje ọdavwaro phia kẹ ihwo rẹ ẹkpahọnphiyọ rayen bọn wẹ gan?

6 Avwanre bọn ohwohwo gan womarẹ ẹkpahọnphiyọ rẹ avwanre. (Se Hibru 10:24, 25.) Oma vwerhen avwanre siẹrẹ e de nyo ẹkpahọnphiyọ sansan vwevunrẹ emẹvwa. Avwanre eje riavwerhen rẹ ẹkpahọnphiyọ rẹ imitete re pha kprẹn. Ọ bọn avwanre gan siẹrẹ e de nyo upho rẹ ohwo rẹ oma vwerhan ro vwo djisẹ rẹ uyota ọvo rọ hiẹ mrẹ. Oma je vwerhen avwanre siẹrẹ a da mrẹ ihwo re kpahanphiyọ enọ vẹ “aroeyivwo” yẹrẹ uduefiogbere dede nẹ oma vo ayen yẹrẹ ayen yono ejajẹ rẹ avwanre obọ. (1 Tẹsa. 2:2.) Mavọ yen avwanre se vwo djephia nẹ ẹgbaẹdavwọn rayen da avwanre aro? Avwanre sa kpẹvwẹ ayen fikirẹ ẹkpahọnphiyọ rayen siẹrẹ uyono de kuphiyọ nu. Idjerhe ọfa re se vwo ru ọtiọyen ọyen avwanre komobọ je vwọ kpahenphiyọ enọ. E de ru ọtiọyen, kẹ avwanre sa mrẹ ọbọngan, avwanre me je bọn ihwo efa gan.—Rom 1:11, 12.

7. Ebruphiyọ vọ yen avwanre che vwo siẹrẹ a da kpahenphiyọ enọ?

7 Avwanre mrẹ ebruphiyọ siẹrẹ a da kpahanphiyọ enọ. (Aiz. 48:17) Vwẹ idjerhe vọ? Ẹsosuọ, avwanre de vwo ẹwẹn ra vwọ ẹkpahọnphiyọ enọ, ka cha nabọ muegbe hẹrhẹ uyono na. Ọyena cha nẹrhẹ erianriẹn rẹ avwanre kpahen Ota rẹ  Ọghẹnẹ kodophiyọ. Erianriẹn rẹ avwanre vwo kodophiyọ ye, jẹ avwanre mrẹ idjerhe ra sa vwọ reyọ obo re yonori na vwo ruiruo. Ọrivẹ, avwanre cha nabọ riavwerhen rẹ omẹvwa na kidie avwanre vwobọ vwọ. Ọrerha, Ẹkpahọnphiyọ rẹ avwanre yen avwanre cha ma karophiyọ, fikirẹ oborẹ avwanre davwẹngba te a ke sa reyọ vwọphia.

8-9. (a) Kirobo rẹ Malakae 3:16 tare, ẹro vọ yen Jihova vwo ni ẹkpahọnphiyọ rẹ avwanre? (b) Egbabọse vọ yen ihwo evo je rhiẹromrẹ?

8 Oma vwerhen Jihova siẹrẹ a da ta ota kpahen obo re segbuyota. O muẹro nẹ Jihova kerhọ rẹ avwanre ji vwo ọdavwẹ rẹ ẹgbaẹdavwọn rẹ avwanre vwọ kpahanphiyọ enọ vwẹ emẹvwa. (Se Malakae 3:16.) O dje ọdavwẹ rọyen phia womarẹ ebruphiyọ rọ vwọ kẹ avwanre siẹrẹ avwanre da davwẹngba vwo ruẹ obo ri je.—Mal. 3:10.

9 O phẹnre nẹ erere herọ siẹrẹ a da kpahenphiyọ enọ vwẹ emẹvwa. Ẹkẹvuọvo, oshọ ra vwọ rionbọ se mu ihwo evo. O de ru we ọtiọyen, wo jẹ udu bru we-e. E jẹ a fuẹrẹn ikuegbe vẹ uchebro rẹ Baibol evo, kugbe owọẹjẹ sansan re sa chọn avwanre eje uko vwọ davwẹngba vwọ kpahenphiyọ enọ.

YERIN GHENE OSHỌ

10. (a) Oshọ vọ yen muẹ buebun rẹ avwanre? (b) Omamọ rẹ uruemu vọ yen se rhe we ọ da dianẹ oshọ wọ vwọ kpahenphiyọ enọ mu we?

10 Udu wẹn teyan kpekpe siẹrẹ wọ da guọnọ rionbọ rere wọ kpahenphiyọ enọ? Ọ da dia ọtiọyen, gba riẹn nẹ ọ dia owẹ ọvo yen emu tiọyena phia kẹ-ẹ. Vwọrẹ uyota, udu bru buebun rẹ avwanre siẹrẹ a da kpahanphiyọ enọ. Jẹ, ofori nẹ wọ riẹn obo re nẹrhẹ oshọ mu we tavwen wo ki se yerin ghene oshọ na. Oshọ mu we nẹ obo wọ guọnọ ta na cha chọrọ owẹ ẹro yẹrẹ nẹ ọ gbare-e? Udu bru we nẹ ẹkpahonphiyọ wẹn che se yovwin te ọ rẹ iniọvo efa-a? Vwọrẹ uyota, oshọ tiọyena yovwirin. Ghwa odjephia nẹ wo vwo uruemu rẹ omaevwokpotọ,  wo ji no nẹ ihwo efa yovwin nọ wẹ. Jihova vwo ẹguọnọ rẹ ihwo re vwomakpotọ. (Une 138:6; Fil. 2:3) Ọ je guọnọ nẹ wo jiri ọyen, je bọn iniọvo wẹn gan vwẹ emẹvwa. (1 Tẹsa. 5:11) O vwo ẹguọnọ wẹn, ọ je cha kẹ wẹ uduefiogbere.

11. Ẹkarophiyọ rẹ Baibol vọ yen sa chọn avwanre uko?

11 Roro kpahen ẹkarophiyọ evo rẹ Baibol na vwọ kẹ avwanre. Baibol na tare nẹ avwanre eje ruẹ chọ womarẹ oborẹ avwanre ta vẹ obo ra ta ayen wan. (Jems 3:2) Jihova vẹ iniọvo rẹ avwanre rhẹro rẹ ogbagba mie avwanre-e. (Une 103:12-14) Avwanre eje orua ọvuọvo, ayen vwo ẹguọnọ rẹ avwanre. (Mak 10:29, 30; Jọn 13:35) Ayen riẹnre nẹ ọ dia oborẹ avwanre vwori vwẹ ẹwẹn yen avwanre ta phia ọke evo-o.

12-13. Die yen ikuegbe rẹ Nehemaya kugbe Jona yono avwanre?

12 Roro kpahen ikuegbe rẹ Baibol evo re sa chọn wẹ uko vwo yerin ghene oshọ wẹn. Karophiyọ Nehemaya rọ gare vwẹ ọguan rẹ ovie ọvo ro vwo ẹgba mamọ. Ẹdẹ ọvo, Nehemaya de muomaphiyọ mamọ kidie o nyori nẹ igbẹhẹ vẹ ẹchẹ rẹ Jerusalẹm guọghọ totọ re. (Neh. 1:1-4) Vwẹro roro oborẹ udu bruro te ọke rẹ ovie na vwọ nọ kpahen oboresorọ o vwo muomaphiyọ! Kpakpata Nehemaya da nẹrhovwo je vwẹ ẹkpahọnphiyọ kẹ. Ọtiọyena, ovie na da nabọ vwẹ ukẹcha kẹ ihwo rẹ Ọghẹnẹ. (Neh. 2:1-8) Ji roro kpahen ikuegbe rẹ Jona. Ọke rẹ Jihova vwọ vuẹ nẹ o re ghwoghwo kẹ ihwo rẹ Ninive, Jona da djẹ kpo asan ọfa fikirẹ oshọ. (Jona 1:1-3) Ẹkẹvuọvo, womarẹ ukẹcha rẹ Jihova, Jona de ruiruo ra vwọ kẹ. Aghwoghwo rọyen na da ghwa usivwin rhe ihwo rehẹ orere rẹ Ninive. (Jona 3:5-10) Ikuegbe rẹ Nehemaya na yono avwanre obo rọ ghanre te ra vwọ nẹrhovwo a ke kpahen. Ọ rẹ Jona de rhe yono avwanre nẹ Jihova sa chọn avwanre uko vwọ vwẹ ẹga kẹ ọ da tobọ dianẹ oshọ muẹ avwanre. A ghene sa mrẹ ukoko rọ djoma te ihwo rẹ Ninive?

13 Owọẹjẹ vọ yen sa chọn wẹ uko vwọ kpahenphiyọ enọ vwẹ emẹvwa? E jẹ a fuẹrẹn evo.

14. Diesorọ o vwo fo nẹ e muegbe rẹ uyono, kẹ ọke vọ yen e se vwo ru ọtiọyen?

14 Muegbe rẹ uyono. Wọ da nabọ muegbe phiyotọ, ku wo se fiudugberi kpahenphiyọ enọ. (Isẹ 21:5) Vwọrẹ uyota, ọke rẹ avwanre ohwo vuọvo vwo muegbe rẹ uyono fẹnẹre. Eloise rọ dia ayeuku rọ vrẹ ẹgbukpe 80 re, ton egbemuo rẹ ọbe Uwevwin Orhẹrẹ rọyen phiyọ vwẹ ọtonphiyọ rẹ udughwrẹn na. Ọ da ta: “Me riavwerhen rẹ uyono na siẹrẹ me da nabọ muegbe rọyen phiyotọ.” Joy ro ruiruo nẹ ọtonphiyọ re duvwun oba rẹ udughwrẹn na, vwẹ Saturday vwo muegbe rẹ ọbe Uwevwin Orhẹrẹ rọyen. Ọ da ta: “Ọyena nẹrhẹ  me sa karophiyọ oborẹ mi yonori ọke mi de kpo uyono.” Ike rọ dia ọkobaro kugbe ọkpako ro ruiruo buebun vwevunrẹ ukoko na da ta: “Mi niro nẹ o yovwirin me vwọ ghare uyono na phiyọ ọke sansan vwẹ udughwrẹn na ukperẹ mi vwo yono ofuọvo.”

15. Mavọ yen wọ sa vwọ nabọ muegbe rẹ uyono?

15 Die yen egbemuo rẹ uyono churobọ si? Nẹrhovwo vwọ kẹ ẹwẹn ọfuanfon na tavwen wọ ke tonphiyọ. (Luk 11:13; 1 Jọn 5:14) Reyọ ọmọke vwo dju ẹro ni uyono na. Fuẹrẹn uyovwinrota na, iyovwinreta itete, ihoho na kugbe ekpeti rẹ enọ rẹ ẹrhomafuẹrẹn na. Wo vwo yono ẹkorota vuọvo na, davwẹngba vwo se ẹkpo rẹ Baibol sansan ra rionbọ ra. Roro kpahen oborẹ wo yono na, rere wọ nabọ tẹnrovi ẹkpo ru wọ guọnọ ta ota kpahen. Wọ da nabọ muegbe, ku wọ sa mrẹ erere nẹ uyono na rhe, kọ je cha lọhọ kẹ wẹ wọ vwọ kpahenphiyọ enọ.—2 Kọr. 9:6.

16. Erọnvwọn vọ yen a vwọ kẹ avwanre, kẹ mavọ yen wọ sa vwọ reyọ ayen vwo ruiruo?

16 Wọ sa reyọ aplikeshọni re herọ vwẹ ephẹrẹ wẹn vwo ruiruo. Ukoko rẹ Jihova kẹ avwanre aplikeshọni sansan re sa chọn avwanre uko ọke re de muegbe rẹ uyono. A da vwẹ aplikeshọni rẹ JW Library® wọ danlodu rẹ ẹbe sansan rẹ avwanre yono, ke se se ayen vwẹ itablẹti vẹ ifonu, yẹrẹ kerhọ rẹ uhworo rayen vwẹ kasan kasan rẹ avwanre hepha. Ihwo evo vwẹ JW Library® vwo ru uyono vwẹ ọke rẹ omaerovwon vwobẹ isikuru yẹrẹ iruo, yẹrẹ tobọ vwẹ ọke rẹ ayen dahẹ imoto kpo asan oshesheri. Aplikeshọni rẹ Watchtower Library vẹ Watchtower ONLINE LIBRARYsa nẹrhẹ ọ lọhọ ra vwọ hiẹ ẹkpo evo rẹ avwanre guọnọ riẹn kodophiyọ.

Ọke vọ yen wo vwo muegbe rẹ uyono? (Ni ẹkoreta 14-16) *

17. (a) Diesorọ o vwo fo nẹ e muegbe rẹ ẹkpahọnphiyọ buebun? (b) Die yen wo yono nẹ ividio rẹ Die Ugbeyan rẹ JihovaMuegbe rẹ Ẹkpahọnphiyọ Wẹn?

17 Wo se muegbe rẹ ẹkpahọnphiyọ buebun. Diesorọ? Kidie ọ dia ọkieje wọ ghwa vwọ rionbọ yen e che vwo se we-e. Rọ vwọ dianẹ ihwo efa je rionbọ na, ọrọvwẹrote uyono na se se ohwo ọfa. Fikirẹ ọke, o che se se ihwo eje re rionbọ vwẹ ẹbẹre evo rẹ uyono na-a. Ọtiọyena, wo muophu siẹrẹ e rhe se we vwẹ ọtonphiyọ rẹ uyono na-a. Wo de muegbe rẹ ẹkpahọnphiyọ buebun, ku wo se vwo uphẹn wọ vwọ kpahenphiyọ enọ abọ ibro. Wo se muegbe rẹ ẹkpo rẹ Baibol ọvo re che se. Yẹrẹ muegbe rẹ oborẹ wọ sa vwọ vwẹ eta romobọ wẹn vwọ kpahenphiyọ onọ. *

18. Diesorọ o vwo fo nẹ ẹkpahọnphiyọ wẹn dia kprẹn?

18 Jẹ ẹkpahọnphiyọ wẹn dia kprẹn. Ọke buebun na, ẹkpahọnphiyọ rọ pha  kprẹn rọ je lọhọ yen ma bọn ihwo gan. Ọtiọyena, gba davwen rere ẹkpahọnphiyọ wẹn sa vwọ dia kprẹn. O de gron mamọ, jẹ ọ dia omarẹ ẹroẹbrẹ 30. (Isẹ 10:19; 15:23) Wọ da dia ohwo rọhẹ ukoko na krire, wọ me davwẹngba rere wọ dia omamọ rẹ udje vwẹ ẹdia nana. Ẹkpahọnphiyọ wẹn da dia grongron je reyọ ibrẹro ibro, ọ cha nẹrhẹ oshọ mu ihwo evo nẹ ẹkpahọnphiyọ rayen che se yovwin te ọwẹ-ẹn. Vwọba, ẹkpahọnphiyọ wẹn da dia kprẹn, ihwo buebun ki se vwobọ vwẹ uyono na, yẹrẹ mrẹ ẹkpo rẹ ayen sa vwọphia. Wọ da dia ohwo rẹsosuọ re seri, jẹ ẹkpahọnphiyọ wẹn dia phiọngun, ọ me je lọhọ. Wo ghwe djunute ẹkpo na eje rehẹ ẹkorota na-a. A da tobọ vwẹ ẹkpo na eje rehẹ ẹkorota na phia nu, wo ji se djunute ẹkpo efa ri churobọ si obo re yono na.—Ni ekpeti na “Oka rẹ Ẹkpahọnphiyọ vọ Yen me sa Vwọphia?”

19. Mavọ yen ọrọvwẹrote uyono na sa vwọ chọn wẹ uko, kẹ die yen ofori nẹ wo ru?

19 Jẹ ọrọvwẹrote uyono na riẹn nẹ wọ guọnọ kpahenphiyọ onọ rẹ ẹkorota ọvo. Wọ da guọnọ ru ọtiọyen, gba fobọ vuẹ oniọvo rọ vwẹrote uyono na tavwen omẹvwa na ke tonphiyọ. Wọ me fobọ rionbọ siẹrẹ a da ghwa nọ onọ rẹ ẹkorota ru wo muegbe rọyen na, je nabọ rionbọ na kpenu rere ọrọvwẹrote uyono na sa vwọ mrẹ.

20. Idjerhe vọ yen emẹvwa rẹ avwanre vwọ họhọ emu ra vẹ igbeyan re kugbe?

20 A sa vwẹ omẹvwa rẹ avwanre vwo dje udemu ra vẹ igbeyan re kugbe. Vwẹro roro nẹ iniọvo evo vwẹ ukoko wẹn durhiuwe vwọ kẹ udemu, ayen da je vuẹ wẹ nẹ wo chere ememu nene oma rhe. Die yen wo che ru? Dede nẹ udu se bru we emerha, wọ je cha davwẹngba vwo chere oborẹ kohwo kohwo sa riavwerhen rọyen. Gbe noso nẹ Jihova yen Ohwo ro durhie avwanre nẹ a rhe riavwerhen rẹ emu esiri buebun vwẹ emẹvwa rẹ avwanre. (Une 23:5; Mat. 24:45) Oma cha vwerhọn siẹrẹ avwanre da ghwa omo okẹ rẹ obo ri me yovwin rẹ avwanre se siobọnu nene oma rhe. Ọtiọyena, gba nabọ muegbe rere wọ sa vwọ kpahenphiyọ onọ kọke kọke rẹ uphẹn na de rhiephiyọ. Ọke yena ku wọ sa re evun vọn vwẹ imẹjẹ rẹ Jihova, je mrẹ omo okẹ ru wo che siobọnu kẹ iniọvo rehẹ ukoko wẹn.

UNE 2 Jihova Yen Odẹ Wẹn

^ e?ko. 5 Kerẹ ọbuine Devid, avwanre eje vwo ẹguọnọ rẹ Jihova, oma je vwerhen avwanre siẹrẹ avwanre da vwẹ ujiri kẹ. Avwanre vwo uphẹn oghẹresan re vwo dje ẹguọnọ yena phia womarẹ ẹkpahọnphiyọ rẹ avwanre. Jẹ, ihwo evo sa mrẹ bẹnbẹn rẹ ayen vwọ kpahenphiyọ enọ vwẹ omẹvwa. Ọ da dia ọtiọyen kẹ wẹ, kọyen uyovwinrota nana cha chọn wẹ uko vwọ riẹn oboresorọ oshọ vwo mu we, kugbe oborẹ wo se vwo phi oshọ na kparobọ.

^ e?ko. 17 Kpo jw.org/urh rere wo ni ividio rẹ Die Ugbeyan rẹ JihovaMuegbe rẹ Ẹkpahọnphiyọ Wẹn. Kpo IYONO RẸ BAIBOL > EMỌ.

^ e?ko. 63 IDJEDJE RẸ UHOHO: Iniọvo re riavwerhen rẹ uyono rẹ Uwevwin Orhẹrẹ vwevunrẹ ukoko rayen.

^ e?ko. 65 IDJEDJE RẸ UHOHO: Iniọvo ra mrẹre siẹvure re riavwerhen rẹ uyono rẹ Uwevwin Orhẹrẹ na. Dede nẹ ẹdia rayen fẹnẹre, ayen eje rhuẹrẹ ọke phiyọ rẹ ayen vwo muegbe vwọ kẹ uyono na.