Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Uwevwin Orhẹrẹ  |  January 2018

Oyerinkugbe rẹ Avwanre vẹ Ẹkarophiyọ Na

Oyerinkugbe rẹ Avwanre vẹ Ẹkarophiyọ Na

“Mavọ oyovwin te rọ vwerhen te rẹ iniọvo da dia kugbe vwẹ okugbe!”​—UNE 133:1.

UNE: 18, 14

1, 2. Irueru vọ yen che me si ihwo koko vwẹ ukpe rẹ 2018, kẹ diesorọ? (Ni uhoho rẹsosuọ na.)

VWẸ March 31, 2018, ọnre de shekpotọ nu, ihwo rẹ Ọghẹnẹ vẹ erhorha buebun ri vwo omavwerhovwẹn kpahen Ota rẹ Ọghẹnẹ che kuomakugbe vwo ru Ẹkarophiyọ rẹ Ughwu rẹ Jesu re ruẹ obọ ọvo ẹgbukpe. Iduduru rẹ ihwo yen che siomakoko vwọ kẹ irueru nana. E rhi noso nẹ irueru nana yen me siẹ ihwo koko vwẹ Akpọ na!

2 O muẹro nẹ oma nabọ vwerhen Jihova vẹ Jesu Kristi ọke rẹ ayen da kparo mrẹ iduduru rẹ ihwo ri vwobọ vwẹ irueru oghẹresan nana kukpe kukpe. Baibol na tarọ phiyotọ nẹ “urogho rẹ ihwo buebun rẹ unu se keri-i, ri nẹ ẹgborho kẹgborho rhe, rẹ orua ejobi kugbe ihwo kugbe ephẹrẹ rhe” che kuvwie nẹ, “esivwo kẹ Ọghẹnẹ rẹ avwanre ro tidia phihọ enu rẹ ekete na, ji kugbe Omogodẹ na.” (Ẹvwọ. 7:9, 10) Ọ vwerhoma nẹ Ẹkarophiyọ re ruẹ kukpe kukpe na brọghọ phiyọ Jihova vẹ Jesu oma!

3. Enọ vọ yen uyono nana cha kpahenphiyọ?

3 A cha kpahenphiyọ enọ nana vwẹ uyono nana: (1) Mavọ yen  avwanre se vwo muegbe vwọ kẹ Ẹkarophiyọ na, ji mrẹ erere norhe? (2) Idjerhe vọ yen ẹkarophiyọ na vwo djobọte oyerinkugbe rẹ ihwo rẹ Ọghẹnẹ? (3) Mavọ yen avwanre se vwo toroba oyerinkugbe yena? (4) A cha mrẹ Ẹkarophiyọ rọ koba? Ọ da dia ọtiọyen, kẹ ọke vọ?

OBO RE SE VWO MUEGBE HẸRHẸ ẸKAROPHIYỌ NA, JI MRẸ ERERE NORHE

4. Diesorọ o vwo fo nẹ e kpo Ẹkarophiyọ na?

4 Roro kpahen oboresorọ o vwo fo nẹ e kpo Ẹkarophiyọ rẹ Ughwu rẹ Jesu. Karophiyọ nẹ omẹvwa, ọyen ẹbẹre ọvo rẹ ẹga rẹ avwanre. O muẹro nẹ Jihova vẹ Jesu vwo oniso rẹ ẹgba rẹ avwanre davwan, re se vwo kpo omẹvwa nana rọ ma ghanre kparobọ. Vwọrẹ uyota, avwanre guọnọre nẹ ayen mrẹvughe nẹ, avwanre che se jẹ Ẹkarophiyọ na vwo-o, jokpanẹ okpemu phia kẹ avwanre. Avwanre de djephia nẹ emẹvwa rẹ ukoko na ghanre kẹ avwanre, Jihova kọ sẹro rẹ edẹ rẹ avwanre phiyọ “ọbe rẹ ẹkarophihọ” rọyen, rọ dia “ọbe rẹ arhọ” re che si edẹ rẹ ihwo ri muwan vwọ kẹ arhọ rẹ bẹdẹ bẹdẹ phiyọ.​—Mal. 3:16; Ẹvwọ. 20:15.

5. E de siẹkẹrẹ udughwẹn rẹ Ẹkarophiyọ na re, mavọ yen a sa vwọ ‘davwen sẹ avwanre ji churu obọ mu esegbuyota’ na?

5 E de siẹkẹrẹ udughwrẹn rẹ Ẹkarophiyọ na re, avwanre sa fuẹrẹn oyerinkugbe rẹ avwanre vẹ ọ rẹ Jihova womarẹ ẹrhovwo. (Se 2 Kọrẹnt 13:5.) Ọyinkọn Pọl vwẹ uchebro kẹ Inenikristi nẹ, ayen “davwen oma [rayen] ni sẹ [ayen] churu obọ mu esegbuyota” na. Mavọ yen e se vwo ru ọtiọyen? Nọ oma wẹn: ‘O ghini mu vwe ẹro nẹ ukoko nana me hepha na yen Jihova vwo ruẹ ọhọre rọyen? Me davwẹngba mẹ eje vwo ghwoghwo iyẹnrẹn esiri rẹ Uvie na? Obo mi yeren akpọ wan djerephia nẹ mi vwo imuẹro nẹ ọke rẹ oba na yen a hepha na, kugbe tanẹ oba rẹ usuon rẹ Eshu sikẹri re? Ẹroevwọsuọ ri mi vwori ọke me wọ vwomakpahotọ kẹ Jihova Ọghẹnẹ yen ji rhe vwe te ọke na?’ (Mat. 24:14; 2 Tim. 3:1; Hib. 3:14) Ẹkpahọnphiyọ rẹ enọ nana cha chọn avwanre uko vwọ riẹn oka rẹ ohwo rẹ avwanre hepha.

6. (a) Ọrhọ yen idjerhe vuọvo re se vwo vwo arhọ rẹ bẹdẹ? (b) Mavọ yen ọkpako ọvo vwo muegbe vwọ kẹ Ẹkarophiyọ na kukpe kukpe, kẹ mavọ yen wọ sa vwọ vwẹrokere?

6 Se ẹkpo rẹ Baibol sansan ri churobọ si Ẹkarophiyọ na, rere wo roro kpahen ayen. (Se Jọn 3:16; 17:3.) Idjerhe vuọvo re se vwo vwo arhọ rẹ bẹdẹ bẹdẹ, ọyen ra vwọ “riẹn” Jihova, ji se Ọmọ rọyen Jesu Kristi “gbuyota.” E se yono kpahen erọnvwọn re cha nẹrhẹ e sikẹrẹ Jihova vẹ Jesu Kristi, ọke re de muegbe vwọ kẹ Ẹkarophiyọ na. Roro kpahen oborẹ ọkpako ọvo rọ ga krẹre ruru. Vwẹ ikpe evo rhire na yen o vwo koko iyovwinreta evo vwẹ Uwevwin Orhẹrẹ sansan ri shekpahen Ẹkarophiyọ na kugbe ẹguọnọ rẹ Jihova vẹ Jesu Kristi dje kẹ avwanre. Vwẹ udughwrẹn evo tavwen e ki ru Ẹkarophiyọ na, o mi se ayen, ji roro kpahen irueru oghẹresan re che ru na. Ọ je vwẹ ọke sansan vwọ guọnọ efa vwọba i ro kokori na. Vwọba, o ruẹ Isese rẹ Baibol rẹ Ẹkarophiyọ na ji roro kpahan obo ro se. Ọrhuẹrẹphiyotọ nana nẹrhẹ o se yono erọnvwọn kpokpọ kukpe kukpe. Jẹ, ọ rọ ma kenu eje, o niro nẹ ọ nẹrhẹ ẹguọnọ ro vwo kpahen Jihova kodophiyọ. Wo de vwo ọrhuẹrẹphiyotọ rẹ uyono romobọ tiọyen, ọdavwaro vẹ ẹguọnọ ru wo vwo kpahen Jihova vẹ Jesu Kristi che kodophiyọ, ọ je cha nẹrhẹ wọ mrẹ erere vọnvọn vwo nẹ irueru rẹ Ẹkarophiyọ na.

OBORẸ ẸKAROPHIYỌ NA DJOBỌTE OYERINKUGBE RẸ AVWANRE

7. (a) Die yen Jesu nẹrhovwo kpahen vwẹ ason rọ ton irueru rẹ Emu Ovwọnvwọn rẹ Orovwori Na phiyọ? (b) Die yen djerephia nẹ Jihova nyo ẹrhovwo rọyen?

7 Vwẹ ason rọ ton irueru rẹ Emu Ovwọnvwọn rẹ Orovwori Na phiyọ, Jesu  da nẹrhovwo nẹ e jẹ idibo rọyen sẹro rẹ oyerinkugbe rayen, rere ayen dia kirobo rọ vẹ Ọsẹ rọyen hepha. (Se Jọn 17:20, 21.) Jihova ghene kpahenphiyọ ẹrhovwo rẹ Ọmọ ọghanghanre rọyen na. Nonẹna, iduduru rẹ ihwo buebun vwo imuẹro nẹ Jihova yen ji Jesu rhe. Vwọ vrẹ emẹvwa eje rẹ avwanre ruẹ, ọke rẹ Ẹkarophiyọ na yen ihwo ma vwọ mrẹ uvi oyerinkugbe rọhẹ uvwre rẹ Iseri rẹ Jihova. Ihwo ri nẹ ẹkuotọ sansan rhe, ri vwo ohọroma sansan, yen siomakoko vwo ruẹ Ẹkarophiyọ na vwẹ akpọneje. Vwẹ ẹkuotọ evo, ọyen obo ra ghẹmrẹ rẹ ihwo ri vwo ohọroma sansan vwo siomakoko ga ẹga. Ẹkẹvuọvo, oyerinkugbe tiọyena pha ghanghanre vwẹ ẹro rẹ Jihova kugbe Jesu Kristi!

8. Ovuẹ vọ yen Jihova vwọ kẹ Izikiẹl kpahen okugbe?

8 Oyerinkugbe rẹ ihwo rẹ Ọghẹnẹ dia emu ọrhorha kẹ avwanre-e, kidie Jihova mrarọ rọyen phiyotọ jovwo. Roro kpahen ovuẹ rọ vwọ kẹ Izikiẹl ọke rọ vwọ vwẹ iji kẹ nẹ ọ tan irhe ivẹ kugbe; urhe rẹ “Juda” kugbe ọ rẹ “Josẹf.” (Se Izikiẹl 37:15-17.) Enọ rẹ Ihwo ri Se Ẹbe Avwanre Nọre” rọ vwomaphia vwẹ Uwevwin Orhẹrẹ rẹ July 2016 (ọ rẹ oyibo) da ta: “Ovuẹ rọ sa kẹ ohwo iphiẹrophiyọ yen Jihova vwọ kẹ Izikiẹl, ro vwo ve kẹ nẹ, ọyen che ku ẹgborho rẹ Izrẹl kugbe vwọ dia ọvuọvo siẹrẹ ayen da ro Otọ rẹ Uve na nu. Ovuẹ yena ji shekpahen ihwo rẹ Ọghẹnẹ re cha ga Ọghẹnẹ kugbe vwẹ ẹdẹ re koba na.”

9. Idjerhe vọ yen a vwọ mrẹ orugba rẹ aroẹmrẹ rẹ Izikiẹl na vwẹ ọke re de ruẹ Ẹkarophiyọ na kukpe kukpe?

9 Ghwe vwo nẹ ukpe rẹ 1919 rhe, yen Jihova vwọ ton ẹrhomakoko vẹ ẹrhuẹrẹphiyọ rẹ ihwo ra vwẹ ẹwẹn ọfuanfon jẹreyọ re vwo dje urhe rẹ “Juda.” Ukuko na, ihwo ri vwo iphiẹrophiyọ rẹ ayen vwọ dia otọrakpọ na bẹdẹ bẹdẹ re vwo dje urhe rẹ “Josẹf” vwo buenphiyọ na, ayen vẹ ihwo ra vwẹ ẹwẹn ọfuanfon jẹreyọ de rhi kuomakugbe vwọ dia “igodẹ ọvo.” (Jọn 10:16; Zek. 8:23) Jihova veri nẹ ọyen cha tan irhe ivẹ na kugbe vwọ dia ọvo vwẹ obọ rọyen. (Izi. 37:19) Enẹna, ẹko rẹ igodẹ ivẹ na kuomakuẹgbe vwọ ga Jihova vwẹ otọ rẹ usuon rẹ Jesu Kristi rẹ Jihova seri vwẹ aroẹmrẹ rẹ Izikiẹl nẹ, “odibo mẹ Devid.” (Izi. 37:24, 25) Vwo nene obo re djisẹ rọyen vwẹ ọbe rẹ Izikiẹl na, a nabọ mrẹ uvi oyerinkugbe rọhẹ uvwre rẹ ihwo ra jẹreyọ vẹ “igodẹ efa” na kukpe kukpe, ọke re de ruẹ Ẹkarophiyọ rẹ Ughwu rẹ Jesu! Die yen avwanre ohwo vuọvo se ru, vwọ sẹro rẹ oyerinkugbe yena, ji toroba?

OBO RE SE VWO TOROBA OYERINKUGBE RẸ IHWO RẸ ỌGHẸNẸ

10. Mavọ yen e se vwo toroba uvi oyerinkugbe rọhẹ uvwre rẹ ihwo rẹ Ọghẹnẹ?

10 Idjerhe ọvo re se vwo toroba uvi oyerinkugbe rọhẹ uvwre rẹ ihwo rẹ Ọghẹnẹ, ọyen re vwo vwo uruemu rẹ omaevwokpotọ. Jesu vwẹ uchebro kẹ idibo rọyen nẹ ayen vwo uruemu rẹ omaevwokpotọ. (Mat. 23:12) Omaevwokpotọ cha nẹrhẹ a sa kẹnoma kẹ uruemu rẹ omaẹkparọ ro rhe ihwo buebun vwẹ akpọ na. Ọ cha nẹrhẹ a sa vwomakpotọ kẹ ekpako rẹ ukoko, ọ je cha nẹrhẹ e se vwo uvi oyerinkugbe vwevunrẹ ukoko na. Ọ rọ ma kenu eje, ọ cha nẹrhẹ oma vwerhen Jihova, kidie o “muẹkpahen otu ri herẹ, [o mi rhe ru] erhuvwu kẹ ohwo ro ruẹ dẹndẹn.”​—1 Pita 5:5.

11. Mavọ yen eroro kpahọn rẹ oborẹ ibrẹdi vẹ wain na mudiaphiyọ se vwo toroba uvi oyerinkugbe rọhẹ evunrẹ ukoko na?

11 Idjerhe rivẹ re se vwo toroba uvi oyerinkugbe rọhẹ uvwre rẹ ihwo rẹ Ọghẹnẹ, ọyen re vwo roro kpahen oborẹ ibrẹdi vẹ wain re vwo ruẹ Ẹkarophiyọ na mudiaphiyọ.  Ofori nẹ e ru ọnana vwẹ uvwre ọke re vwo muegbe vwọ kẹ Ẹkarophiyọ na, ma rho kẹ ason re che vwo ruo na. (1 Kọr. 11:23-25) Ibrẹdi na mudiaphiyọ ugboma rẹ Jesu rẹ umwemwu kanre, wain na de rhe mudiaphiyọ ọbara rọyen re ku kuotọ. Ẹkẹvuọvo, vwọ vrẹ oborẹ ayen mudiaphiyọ, emu ọfa herọ ro fori nẹ e roro kpahen. Karophiyọ nẹ izobo rẹ ọtanhirhe na churobọ si ẹguọnọ rẹ ihwo ivẹ. O churobọ si ẹguọnọ rẹ Jihova djephia ro vwo siobọnu Ọmọ rọyen kẹ avwanre, kugbe ẹguọnọ rẹ Jesu djephia rọ vwọ vwẹ arhọ rọyen kpahotọ kẹ avwanre. E de roro kpahen ẹguọnọ rẹ ayen djephia, o che mu avwanre vwo dje ẹguọnọ kẹ ayen rhivwin. Ẹguọnọ rẹ avwanre vwo kpahen Jihova, toroba uvi oyerinkugbe rọhẹ evunrẹ ukoko na.

Uruemu rẹ evwoghovwo rẹ avwanre toroba uvi oyerinkugbe (Ni ẹkoreta 12, 13)

12. Mavọ yen itẹ rẹ Jesu kperi na vwo djephia nẹ Jihova guọnọre nẹ e vwo ghovwo ihwo efa?

12 Idjerhe rerha re se vwo toroba uvi oyerinkugbe rọhẹ uvwre rẹ ihwo rẹ Ọghẹnẹ, ọyen re vwo vwo uruemu rẹ evwoghovwo. Avwanre de vwo ghovwo ihwo ri gbe avwanre ku, ọyena odjephia nẹ avwanre vwo ọdavwaro kpahen izobo ọtanhirhe rẹ Jesu rọ nẹrhẹ e se vwo ghovwo imwemwu rẹ avwanre. Roro kpahen itẹ rẹ Jesu kperi vwẹ Matiu 18:23-34. Nọ oma wẹn: ‘Mi ruẹ oborẹ Jesu tare? Mi nene iniọvo rẹ ukoko na yerẹn vẹ erorokẹ kugbe edirin? Me choma me vwọ reyọ vwo ghovwo ihwo ri gbe vwe ku?’ Vwọrẹ uyota, imwemwu evo gan vrẹ evo. Fikirẹ jẹgba, o ji vwo efa ra cha sa fobọ kpairoro vrẹ-ẹ. Ẹkẹvuọvo, itẹ rẹ Jesu na yono avwanre oborẹ Jihova guọnọ nẹ e ru. (Se Matiu 18:35.) Jesu jẹ avwanre riẹn nẹ, e rhe vwo ghovwo iniọvo rẹ avwanre ri gbe avwanre ku-u, Jihova ji che se vwo ghovwo avwanre-e. Ọyena fo obo re roro kpahen! Avwanre de vwo ghovwo ihwo efa kirobo rẹ Jesu Kristi tare nẹ e ru, ka sa sẹro rẹ oyerinkugbe rẹ avwanre.

13. Mavọ yen ra vwọ dia ohwo rẹ ufuoma se vwo toroba uvi oyerinkugbe?

13 Avwanre de vwo ghovwo ihwo efa, ọyena odjephia nẹ avwanre ihwo rẹ  ufuoma. Karophiyọ nẹ ọyinkọn Pọl bru avwanre uche nẹ, e jẹ avwanre “pharhe ra vwọ yọnre okugbe rẹ [“ẹwẹn,” NW ] na vwẹ ẹguọnọ rẹ ufuoma.” (Ẹfe. 4:3) Vwẹ ọke nana re vwo muegbe vwọ kẹ Ẹkarophiyọ na, ma rho kẹ ason re che vwo ruo, ofori nẹ wọ ghwọrọ ọke vwọ nabọ roro kpahen oborẹ wo nene ihwo efa yerẹn wan. Nọ oma wẹn: ‘A riẹn vwẹ phiyọ ohwo rọ fobọ vwo ghovwo? Mẹvwẹ ohwo rẹ ufuoma?’ Ọnana yen ọke ro me fo, re vwo roro kpahen enọ nana.

14. Mavọ yen e se vwo djephia nẹ avwanre “chirako rẹ ohwohwo vwẹ evun rẹ ẹguọnọ”?

14 Idjerhe rẹne re se vwo toroba uvi oyerinkugbe rọhẹ uvwre rẹ ihwo rẹ Ọghẹnẹ, ọyen ra vwọ vwẹrokere Jihova vwo dje ẹguọnọ phia. (1 Jọn 4:8) Vwọ kpahen iniọvo rẹ ukoko na, avwanre guọnọ kẹnoma kẹ uruemu ra vwọ tanẹ, “Mi di dje ẹguọnọ kẹ ayen, jẹ oma rayen vwerhen ovwẹ-ẹ”! Iroro tiọyena vwọso uchebro rẹ Pọl vwọphia, nẹ “ohwohwo chirako rẹ ohwohwo vwẹ evun rẹ ẹguọnọ.” (Ẹfe. 4:2) Noso nẹ ọ dia Pọl ghwa tanẹ avwanre ‘chirako rẹ ohwohwo-o.’ Ukperẹ ọtiọyen, ọ tare nẹ e ru ọtiọyen “vwẹ evun rẹ ẹguọnọ.” Kọyen ofẹnẹ herọ. Koka koka rẹ ihwo yehẹ evunrẹ ukoko rẹ Jihova. (Jọn 6:44) O muẹro nẹ Jihova vwo ẹguọnọ rayen eje, kidie ọyen si ayen te oma. Ọtiọyena, kẹ diesorọ e vwo jẹ obọdẹn rẹ ẹguọnọ edje kẹ ayen? E gbe jẹ avwanre nene iji rẹ Jihova, rere e dje uvi rẹ ẹguọnọ kẹ ayen eje!​—1 Jọn 4:20, 21.

ỌKE VỌ YEN E CHE VWO RU ẸKAROPHIYỌ RỌ KOBA?

15. Mavọ yen avwanre ru riẹn nẹ e che ru Ẹkarophiyọ rọ koba?

15 Ẹdẹ ọvo ke che ru Ẹkarophiyọ rọ koba. Mavọ yen avwanre ru riẹn? Vwẹ ọbe rẹsosuọ rẹ ọyinkọn Pọl si vwo rhe Inenikristi ra vwẹ ẹwẹn ọfuanfon jẹreyọ rehẹ Kọrẹnt, ọ da tanẹ womarẹ Ẹkarophiyọ na re ruẹ kukpe kukpe, e jẹ ayen “ghwoghwo ughwu rẹ Ọrovwohwo [na] bẹsiẹ rọ vwọ rhe.” (1 Kọr. 11:26) Ubiota na “rhe” rẹ Pọl vwọba ta ota vwẹ etinẹ na, churobọ si “ẹcha” rẹ Jesu re djisẹ rọyen vwẹ aroẹmrẹ ro shekpahen ọke rẹ oba na. Vwọ kpahen ukpokpogho rode rọ cha rhe kẹrẹkpẹ, Jesu da ta: “Oka rẹ ẹcha rẹ Ọmọ rẹ ohwo ke cha phia vwẹ obo odjuvwu, uvie rẹ akpọ na ejobi ki che muomahọ, kẹ ayen cha mrẹ Ọmọ rẹ ohwo rọ cha vwẹ ikoro rẹ obo odjuvwu vẹ urinrin rode. [Jesu] ko ji emakashe rọyen vẹ owanre rode, ayen ki che se ihwo ra sanọ reyọ ejobi na, nẹ igogo ẹne rẹ akpọ na rhe, nẹ oba rẹ akpọ ọvo re te ọrivẹ.” (Mat. 24:29-31) ‘Ekoko rẹ ihwo ra sanọ reyọ na,’ churobọ si ọke ra cha vwọ reyọ uchekotọ rẹ Inenikristi ra vwẹ ẹwẹn ọfuanfon jẹreyọ na kpo obo odjuvwu. Ọnana cha phia ọke rẹ ukpokpogho rode na da tonphiyọ nu, ẹkẹvuọvo tavwen e ki phi ofovwin rẹ Amagidọn. Ọke yena ihwo 144,000 na, ki che kuomakugbe Jesu vwo phi ivie rẹ akpọ na kparobọ. (Ẹvwọ. 17:12-14) Ẹkarophiyọ rẹ ughwu rẹ Jesu re che ru kuko tavwen e ki koko ihwo ra jẹreyọ na kpo obo odjuvwu, yen cha dia ọ rọ koba. Kidie ọke yena, ji Jesu ‘rhire.’

16. Diesorọ wọ vwọ guọnọ rhe Ẹkarophiyọ re che ru vwẹ enukpe na?

16 E jẹ avwanre choma re vwo kpo Ẹkarophiyọ rẹ Ughwu rẹ Jesu re che ru vwẹ March 31, 2018. E jẹ a nẹrhovwo rhe Jihova, rere ọ chọn avwanre uko vwo toroba uvi oyerinkugbe rọhẹ evunrẹ ukoko na! (Se Une Rẹ Ejiro 133:1.) Karophiyọ nẹ e che ru Ẹkarophiyọ rọ koba ẹdẹ ọvo. Bẹsiẹ ọke yena ki te, e jẹ a davwẹngba vwọ rhe Ẹkarophiyọ rẹ enukpe na, rere a riavwerhen rẹ uvi oyerinkugbe vẹ iniọvo na.