“Ovwan che vughe ofẹnẹ rọ hẹ ohri rẹ ọvwata vẹ oruimwemwu.”​—MAL. 3:18.

UNE: 127, 101

1, 2. Egbabọse vọ yen idibo rẹ Ọghẹnẹ hirharoku nonẹna? (Ni ihoho rẹsosuọ na.)

IDỌKTỌ buebun sivwin ihwo ri vwo ọga ri se pho muẹ ohwo. Ayen ruẹ ọnana kidie ayen guọnọ chọn ihwo uko. Jẹ, ofori nẹ ayen sẹro rẹ oma rayen, rere ega rẹ ayen sivwẹn na vwo jẹ ayen emuo. Ọtiọyen ọ je hepha kẹ avwanre. Buebun rẹ avwanre wian ji yerẹn vwẹ ohri rẹ ihwo ri vwo erharhe uruemu, ri se miovwo uruemu Onenikristi ro rhe avwanre. Ọnana imuoshọ rode kẹ avwanre.

2 Vwẹ ẹdẹ re koba ra hepha na, ihwo buebun vwo ẹguọnọ rẹ umiovwo. Vwẹ ọbe rivẹ ro si vwo rhe Timoti, ọyinkọn Pọl djisẹ rẹ iruemu ebrabra ra cha mrẹ vwẹ oma rẹ ihwo ri vwo ẹguọnọ rẹ Ọghẹnẹ-ẹ. (Se 2 Timoti 3:1-5, 13.) Iruemu nana tuẹn avwanre oma. Jẹ, e rhe nomaso-o, ihwo sa riẹriẹ avwanre vwo vwobọ vwẹ ayen. (Isẹ 13:20) Vwẹ uyono nana, a cha vwẹ erharhe iruemu rẹ ihwo rẹ akpọ nana djephia, vwọ vwanvwe e rẹ idibo rẹ Ọghẹnẹ. A je cha ta ota kpahen oborẹ avwanre sa vwọ kẹnoma kẹ erharhe iruemu rẹ akpọ nana, ọke re de yono ayen kpahen Jihova.

3. Oka rẹ ihwo vọ yen e djunute vwẹ 2 Timoti 3:2-5?

 3 Ọyinkọn Pọl siri nẹ “ẹdẹ ebrabra cha rhe” vwẹ “oba rẹ ẹdẹ na.” O de kere erharhe iruemu 19 rẹ ihwo buebun che vwo. Iruemu ro djunute vwẹ etiyin na ghwa họhọ e ro ji djunute vwẹ Rom 1:29-31. Ẹkẹvuọvo, evo rẹ Pọl vwọba si vwo rhe Timoti na, hẹ asan efa vwẹ Ẹbẹre ra vwẹ Grik si vwẹ Baibol na-a. Pọl ton ikekeri nana phiyọ, rọ vwọ ta: “Kidie ihwo cha . . . ” Ẹkẹvuọvo, ọ dia ihwo eje yen che vwo oka rẹ uruemu tiọna-a. Inenikristi vwo uruemu rọ fẹnẹre.​—Se Malakae 3:18.

ẸRO RE VWO NI OMA RẸ OHWO

4. Djisẹ rẹ ohwo ro vwo uruemu rẹ omaẹkparọ.

4 Ọyinkọn Pọl vwọ tanẹ ihwo che vwo ẹguọnọ rẹ igho ji vwo ẹguọnọ rẹ oma rayen nu, o de ji si nẹ ihwo che phuoma, ji ni oma rhuarho nọ. Ihwo ri roro nẹ ayen yovwin nọ ihwo efa fikirẹ erhuvwu rẹ ugboma, ona, efe, yẹrẹ ẹdia rẹ ayen hepha, yen vwo oka rẹ uruemu tiọyen. Ihwo tiọyena guọnọre nẹ e jiri ayen, ji muọghọ kẹ ayen. Vwọ kpahen ohwo rọ kparoma, ọshare ọvo ro yono ẹbe kodo de si: “Ohwo tiọyena vwẹ agbada vwo mu vwevunrẹ ubiudu rọyen, ro de nuyovwin kpotọ kẹ oma rọyen.” Ihwo evo tare nẹ omaephuo brare mamọ. Ihwo re tobọ kparoma dede, vwo utuoma kpahọn.

5. Idjerhe vọ yen idibo rẹ Jihova evo vwo she ufi rẹ omaẹkparọ?

5 Jihova vwo ẹguọnọ rẹ uruemu rẹ omaẹkparọ-ọ. O vwo utuoma kpahen “ẹro rọ jefia.” (Isẹ 6:16, 17) Omaẹkparọ cha nẹrhẹ e sherabọ kẹ Ọghẹnẹ. (Une 10:4) Obọ rẹ Idẹbono yen omaẹkparọ nurhe. (1 Tim. 3:6) Ọ da ohwo mamọ nẹ idibo rẹ Jihova evo shephiyọ ufi nana. Ovie rẹ Juda re se Uzaya, fuevun ga Jihova vwẹ uvwre rẹ ikpe buebun. Baibol na da ta: “Ẹkẹvuọvo ọke rọ rhe [vwọ] gan re ko rhi phuoma, kọyen rhe ghwọrọ. Kidie ọ gbe rha dia omamọ rẹ ohwo kẹ Ọrovwohwo Ọghẹnẹ rọye-e, ọ da ro evun rẹ uwevwi rẹ Ọrovwohwo ra torhẹ insẹns vwẹ agbada rẹ ugboduma na.” Ovie Hẹzikaya jẹ ohwo ọfa ro ji she ufi rẹ omaẹkparọ, jẹ ukuko na, o de kurhẹriẹ.​—2 Ikun 26:16; 32:25, 26.

6. Die yen sa nẹrhẹ Devid phuoma jovwo, kẹ die yen chọn rọ uko vwọ kẹnoma kẹ omaephuo?

6 Ihwo evo phuoma fikirẹ otitivwe, ona rẹ une ẹsuọ, ogangan vẹ erhuvwu rẹ ugboma, yẹrẹ fikirẹ ẹdia rẹ ayen hepha. Devid vwo enana eje. Dedena, o vwo ọke vuọvo ro vwo dje uruemu rẹ omaẹkparọ phia-a. Ro vwo hwe Golayat nu, Ovie Sọl da tanẹ ọyen cha vwẹ ọmọtẹ rọyen kẹ. Devid da ta: “Kono omẹvwẹ, amono ekrun mẹ, uvwiẹ rẹ ọsẹ mẹ vwẹ Izrẹl, re me vwọ dia ọgọ rẹ ovie?” (1 Sam. 18:18) Die yen chọn rọ uko vwọ sẹro rẹ omaevwokpotọ rọyen? Devid vwo iruemu, ona, kugbe uphẹn nana eje, kidie Ọghẹnẹ ‘rhuẹn kpotọ,’ ọ da vwomakpotọ kerhọ kẹ. (Une 113:5-8) Devid riẹnre nẹ obo ro vwori ejobi, Jihova yen vwẹ ayen kẹ.​—Ni 1 Kọrẹnt 4:7.

7. Die yen sa chọn avwanre uko vwo dje uruemu rẹ omaevwokpotọ phia?

7 Kerẹ Devid, idibo rẹ Jihova nonẹna je davwẹngba vwo djẹ uruemu rẹ omaevwokpotọ phia. Ọ vwerhoma ra vwọ riẹn nẹ Jihova rọ dia ohwo rọ ma rho vwẹ akpọ na ejobi, dje uruemu nana phia. (Une 18:35) Avwanre guọnọ vwẹ uchebro nana vwo ruiruo: “Ovwan gba vwẹ uruemu esiri rhuo  oma riariẹ, . . . vẹ udu ọlọlọhọ rọ vọnre vẹ aruẹdọn, oma evwo kpotọ, ufuefu kugbe odiri.” (Kọl. 3:12) Avwanre je riẹn nẹ ẹguọnọ “rioma-a eyẹ ọ yan eya-an.” (1 Kọr. 13:4) Omaevwokpotọ rẹ avwanre sa nẹrhẹ ihwo vwo ẹwẹn rẹ ayen vwo sikẹrẹ Jihova. Kirobo rẹ uvi rẹ uruemu rẹ aye se kuẹ ọshare rọyen rhẹriẹ, ọtiọyen omaevwokpotọ rẹ avwanre se si ihwo kẹrẹ Jihova.​—1 Pita 3:1.

OYERINKUGBE RẸ AVWANRE VẸ IHWO EFA

8. (a) Ẹro vọ yen ihwo evo vwo ni uruemu ri jẹ ọghọemu rẹ emọ buebun djephia nonena? (b) Uchebro vọ yen Baibol na vwọ kẹ emọ?

8 Pọl djisẹ rẹ oka rẹ oyerinkugbe ra cha mrẹ vwẹ ohri rẹ ihwo vwẹ ẹdẹ re koba na. Ọ tare nẹ, emọ rhe che muọghọ kẹ esẹ vẹ ini-i. Ẹbe re se, vẹ ifimu re nẹ nonẹna, nẹrhẹ ihwo roro nẹ uruemu nana chọre-e. Ẹkẹvuọvo, kohwo kohwo riẹnre nẹ orua buebun hra totọ nonẹna, fikirẹ uruemu rẹ ji ọghọemuo rẹ emọ buebun djephia. Ọnana rha dia emu ọrhorha-a. Kerẹ udje, ọke awanre vwẹ ẹkuotọ rẹ Gris, ọmọ rọ ghwiẹ ọsẹ yẹrẹ oni rọyen, e se mie uturhi ro vwori kerẹ ọmotọ. Kidie ẹro rẹ urhi rẹ Rom vwo ni ozighẹ, yen o ji vwo nẹ oka rẹ ọmọ tiọyen. Baibol na vwẹ uchebro kẹ emọ nẹ ayen muọghọ kẹ esẹ vẹ ini rayen.​—Eyan. 20:12; Ẹfe. 6:1-3.

9. Die yen sa nẹrhẹ ọ lọhọ kẹ emọ, rẹ ayen vwo muọghọ kẹ esẹ vẹ ini rayen?

9 Emọ sa kẹnoma kẹ uruemu rẹ jẹ ọghọemuo siẹrẹ ayen de roro kpahen erọnvwọn ejobi rẹ esẹ vẹ ini rayen ruẹ kẹ ayen. E jẹ ayen mrẹvughe nẹ Ọsẹ rẹ avwanre rọhẹ obo odjuvwu guọnọre nẹ ayen muọghọ kẹ ese vẹ ini rayen. Emọ da ta omamọ rẹ eta kpahen esẹ vẹ ini rayen ọkieje, ọyena che djobọte ẹro rẹ igbeyan rayen che vwo ni esẹ vẹ ini rayen. Vwọba, emiọvwọn rhe vwo omaeririo kpahen emọ raye-en, ọ cha bẹn rẹ emọ na vwo muọghọ kẹ ayen nẹ otọ rẹ ẹwẹn rhe. Ofori nẹ esẹ vẹ ini vwo uvi rẹ ẹguọnọ kpahen emọ rayen, kidie ọyena cha nẹrhẹ emọ na se muọghọ kẹ ayen vwẹ kẹdia kẹdia. Austin da ta: “Me guọnọ ru obo ri je vwe, ẹkẹvuọvo, ọsẹ vẹ oni mẹ jurhi sansan kẹ vwẹ, ayen je nabọ vuẹ vwẹ erhuvwu ro che norhe siẹrẹ mi de nene ayen. Ọ lọhọre mi vwo muọghọ kẹ ayen, kidie ayen nabọ rhievun ta ota kẹ vwẹ. Ọyena chọn vwẹ uko vwọ riẹn nẹ ayen vwo ẹguọnọ mẹ. Ọtiọyena, me guọnọ ru obo re cha nẹrhẹ oma vwerhen ayen.”

10, 11. (a) Iruemu ebrabra vọ yen nẹrhẹ a riẹn nẹ ihwo vwo ẹguọnọ rẹ irivẹ raye-en? (b) Mavọ yen Inenikristi rẹ uyota vwo ẹguọnọ rẹ irivẹ rayen te?

10 Pọl ji kere iruemu ebrabra efa rẹ ihwo buebun djephia kidie ayen vwo ẹguọnọ rẹ ohwohwo-o. Pọl vwọ tanẹ emọ gbi che “mu ọghọ kẹ esẹ vẹ ini-i” nu, ọ da je tanẹ ihwo gbe cha riẹn ẹse-e. Ọyena gbare, kidie nonẹna ihwo buebun se dje ọdavwaro phia siẹrẹ e de ruẹse kẹ aye-en. Ihwo je cha guọnọ ẹfuọ-ọn. Ayen ji che se fue ọhọre raye-en. Kọyen ayen che vwo uruemu re vwo muophu krekri, ukperẹ ayen vwọ guọnọ ufuoma. Ihwo je cha harhe ekan, je shẹ ihwo. Nonẹna, a ghene mrẹ ihwo re ta eta ebrabra kpahen irivẹ rayen kugbe Ọghẹnẹ. A je cha mrẹ ihwo ri che miovwo odẹ rẹ ihwo efa. *

11 Vwọ fẹnẹ ihwo ri jẹ ẹguọnọ evwo nonẹna, idibo rẹ Jihova nabọ vwo  ẹguọnọ rẹ irivẹ rayen. Ọ dia nonẹ ọ tonphiyọ-ọ. Jesu tare nẹ ẹguọnọ re vwo kpahen ọrivẹ avwanre rọ họhọ ọ rẹ gaʹpe, ọyen urhi rivẹ rọ ma ghanre vwẹ usun rẹ irhi na eje rẹ Ọghẹnẹ vwọ kẹ Mosis. (Mat. 22:38, 39) Ọ je tanẹ ẹguọnọ re vwo kpahen ohwohwo yen che vwo vughe Inenikristi rẹ uyota. (Se Jọn 13:34, 35.) Inenikristi rẹ uyota che tobọ dje ẹguọnọ kẹ ivwighrẹn rayen.​—Mat. 5:43, 44.

12. Idjerhe vọ yen Jesu vwo dje ẹguọnọ kẹ ihwo efa?

12 Jesu ghini dje uvi rẹ ẹguọnọ kẹ ihwo. Ọ yan nẹ orere kpo orere, ro vwo ghwoghwo iyẹnrẹn esiri rẹ Uvie rẹ Ọghẹnẹ kẹ ihwo. O sivwin irhuẹro, ikpono, kugbe idierhọn. Ọ je kpare ihwo ri ghwuru vrẹn. (Luk 7:22) Ọ tobọ ji vwẹ arhọ rọyen vwọ kpahotọ kẹ ihworakpọ, dede nẹ ihwo buebun vwo utuoma kpahọn. Jesu nabọ vwẹrokere Ọsẹ rọyen vwo dje ẹguọnọ phia. Iseri rẹ Jihova rehẹ akpọneje dje ẹguọnọ kẹ irivẹ rayen.

13. Mavọ yen ẹguọnọ rẹ avwanre dje kẹ ihwo efa sa vwọ nẹrhẹ ayen sikẹrẹ Jihova?

13 Ẹguọnọ rẹ avwanre dje kẹ ihwo efa nẹrhẹ ayen siẹkẹrẹ Jihova. Kerẹ udje, ẹguọnọ rẹ iniọvo na dje kẹ ohwohwo vwẹ ọghwẹkoko rẹ ubrotọ re ruru vwẹ Thailand te ọshare ọvo ẹwẹn mamọ. O vwo te uwevwin, ọ da tanẹ a vwẹ uyono rẹ Baibol mu kẹ ọyen. Ke yono abọ ivẹ kudughwrẹn kudughwrẹn; ko ghwoghwo ota vwọ kẹ ihwo rẹ orua rọyen. Emeranvwe esan vwọ wan nu, o de ru isese rẹ Baibol rẹsosuọ rọyen vwẹ Ọguan Ruvie. Wọ da guọnọ riẹn sẹ wọ nabọ dje ẹguọnọ kẹ ihwo efa, gba nọ oma wẹn: ‘Me davwẹngba vwọ chọn ihwo uko vwevunrẹ orua mẹ, ukoko na, kugbe iruo rẹ aghwoghwo na? Ẹro rẹ Jihova vwo nẹ ihwo yen mi ji vwo ni ayen?’

OKPOHROKPO VẸ OMOGODẸ

14, 15. Erharhe iruemu vọ yen ihwo buebun djephia, kẹ ewene vọ yen evo ruru?

14 O ji vwo iruemu ebrabra efa rẹ  ihwo djephia vwẹ ẹdẹ re koba nana, rọ nẹrhẹ Inenikristi kẹnoma kẹ ayen. Kerẹ udje, ihwo buebun tuoma rẹ emu esiri, yẹrẹ kirobo ra fanrọ vwẹ Baibol evo, ayen “vwo utuoma kpahen erhuvwu.” Ọtiọyena, kẹ ayen vẹn ro umwemwu, ke djoma. Evo tobọ ruẹ zighi zighi.

15 Ihwo buebun ri vwo oka rẹ uruemu tiọna jovwo, kurhẹriẹ re. Aroẹmrẹ ọvo djisẹ rẹ ewene rẹ ayen che ru. (Se Aizaya 11:6, 7.) Aroẹmrẹ na tare nẹ eranvwe ride kerẹ okpohrokpo vẹ ubido che nene omogodẹ vẹ ọmọ rẹ erhuẹn yerin kugbe vwọrẹ ufuoma. Noso nẹ oyerinkugbe rẹ ufuoma nana cha dia, “kidie akpọ na cha vọn vẹ erianriẹn rẹ Ọrovwohwo.” (Aiz. 11:9) Aroẹmrẹ nana shekpahen ihworakpọ, kidie eranvwe che se yono kpahen Jihova-a.

Baibol na wene akpeyeren rẹ ohwo! (Ni ẹkorota 16)

16. Mavọ yen Baibol na vwọ chọn ihwo evo uko vwo wene uruemu rayen?

16 Ihwo evo re djoma kerẹ okpohrokpo dẹvure, nabọ nene ihwo efa yerẹn kuẹgbe vwọrẹ ufuoma enẹna. Wọ sa mrẹ ikuegbe rẹ ihwo tiọyena evo se vwẹ uyovwinrota na “Baibol na Wene Ohwo,” rọhẹ jw.org. Ihwo ri kurhẹriẹ rhe ukoko na, fẹnẹ ihwo ri muẹ ofian rẹ ẹga baroma ẹkẹvuọvo yẹ ayen sian ogangan rọ herọ. Kọyen, dede nẹ ayen tare nẹ ayen ga Ọghẹnẹ, jẹ uruemu rayen fẹnẹre. Ihwo re djoma jovwo, ri kurhẹriẹ rhe ukoko na, “ku ohwo ọkpokpọ na phihọ oma, ra mare vwẹ uhoho rẹ Ọghẹnẹ vwẹ omamọ rẹ ọvwata kugbe ẹfuọn.” (Ẹfe. 4:23, 24) Uyono rẹ Baibol na nẹrhẹ ihwo riẹn obo ro yovwin te, rẹ ayen vwo ru ewene. Ọnana ko muẹ ayen vwo siobọnẹ iruemu vẹ esegbuyota rẹ ayen vwori jovwo. Dede nẹ ọ lọhọre re vwo ru ewene-e, jẹ ẹwẹn ọfuanfon rẹ Jihova sa chọn avwanre uko siẹrẹ e de ghini vwo owenvwe re vwo ruo.

“KẸNOMA KẸ IHWO ỌTIỌYE NA”

17. Mavọ yen a sa vwọ kẹnoma kẹ ihwo ri vwo erharhe uruemu ra mrẹ vwẹ akpọ na?

17 Ọ lọhọre mamọ enẹna, ra vwọ riẹn ofẹnẹ rọhẹ uvwre rẹ ihwo re ga Ọghẹnẹ vẹ ihwo re jẹ Ọghẹnẹ ẹga. Ofori nẹ avwanre nomaso, rere erharhe uruemu rẹ ihwo buebun vwori na vwo jẹ avwanre oma emuo. Aghwanre herọ siẹrẹ a da kẹnoma kẹ ihwo re djunute vwẹ 2 Timoti 3:2-5. Vwọrẹ uyota, a cha sa kẹnoma kẹ ayen riẹriẹriẹ-ẹ, kidie evo rayen hẹ asan rẹ avwanre de ruiruo, efa hẹ isikuru rẹ avwanre, yẹrẹ e dia kẹrẹ avwanre. Ẹkẹvuọvo, a sa kẹnoma kẹ iruemu vẹ iroro rayen siẹrẹ avwanre da nabọ muomaphiyọ uyono rẹ Baibol, ji sikẹrẹ ihwo ri vwo ẹguọnọ rẹ Jihova.

18. Mavọ yen ota vẹ uruemu rẹ avwanre se vwo fi erere kẹ ihwo efa?

18 O ji fo nẹ avwanre chọn ihwo uko vwọ riẹn Jihova. Guọnọ uphẹn wo se vwo soseri kẹ ihwo. Nẹrhovwo rhe Jihova nẹ ọ chọn wẹ uko vwọ riẹn ota kpahen kẹ kohwo kohwo. E de jẹ ihwo riẹn nẹ avwanre Iseri rẹ Jihova, ihwo ki se jiri Jihova fikirẹ uruemu rẹ avwanre, ukperẹ ayen vwo jiri avwanre. E yono avwanre kpahen obo re se vwo “siobọ nẹ egagọ rẹ ofian kugbe ẹguọnọ rẹ akpọ ofefe na, rere avwanre yeren akpọ rẹ avwanre dẹndẹn yoyovwin vwẹ evun rẹ akpọ na.” (Taitọs 2:11-14) Avwanre de ru nene obo re yono avwanre, ihwo che ni avwanre so. Evo sa tobọ ta: “Jẹn avwanre nene uwe, kidie me nyori nẹ Ọghẹnẹ vẹ ovwan herọ.”​—Zek. 8:23.

^ e?ko. 10 Ubiota rẹ Grik rọ dia di·aʹbo·los yen a fan kpo “miovwi odẹ rẹ ihwo.” Vwevunrẹ Baibol na, a vwẹ ubiota yena vwọ fan odẹ re mu kẹ Eshu, rọ dia ohwo rẹsosuọ rọ ta eta ebrabra kpahen Ọghẹnẹ.