Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Iseri ri Jihova

Sane ejajẹ Urhobo

Enọ rẹ Ihwo ri Se Ẹbe Avwanre Nọre

Enọ rẹ Ihwo ri Se Ẹbe Avwanre Nọre

Ọyinkọn Pọl siri nẹ Jihova cha “rhọvwe nẹ a davwe owẹ ni vrẹn obo rẹ udu wẹn gbare-e.” (1 Kọr. 10:13) Ọnana ko mudiaphiyọ nẹ Jihova fuẹrẹn edavwini rẹ avwanre se chirakon rayen, ọ me sane e rẹ avwanre che hirharoku?

Roro kpahen oborẹ iroro tiọyen se mudiaphiyọ. Oniọvo ọvo rẹ ọmọ rọyen churughwu da nọ: ‘Jihova fuẹrẹn ovwẹ vẹ aye mẹ, ọ da mrẹ nẹ avwanre se chirakon rẹ ughwu rẹ ọmọ avwanre na? Ọghẹnẹ riẹnre nẹ avwanre se chirakon rọyen kọyensorọ ọnana vwọ phia? O vwo obo re kẹ avwanre imuẹro na nẹ Jihova vwobọ vwẹ erọnvwọn re phia vwẹ akpeyeren avwanre?

A vwọ rhoma fuẹrẹn eta rẹ Pọl rehẹ 1 Kọrẹnt 10:13, ọ da nẹrhẹ e vwo ọmrẹvughe nana: O vwo asan vuọvo vwẹ Baibol na rọ nẹrhẹ e vwo imuẹro nẹ Jihova fuẹrẹn edavwini rẹ avwanre se chirakon rọyen, ọ me sane ọ ro che te avwanre oma-a. E jẹ a fuẹrẹn erọnvwọn ẹne rọ nẹrhẹ a ta ọtiọyen.

Ẹsosuọ, Jihova kẹ ihworakpọ egbomọphẹ. Ọ guọnọre nẹ avwanre brorhiẹn romobọ. (Urhi 30:19, 20; Jos. 24:15) Avwanre de bru omamọ orhiẹn, ka sa vwẹrosuọ nẹ o che sun avwanre. (Isẹ 16:9) Avwanre de rhe bru orharhe orhiẹn, ka cha rioja rọyen. (Gal. 6:7) Ọ da dianẹ Jihova yen sane edavwini ri te avwanre oma, ka sa ghene tanẹ avwanre vwo egbomọphẹ?

Ọrivẹ, Jihova sẹro avwanre vwo nẹ erọnvwọn re phia kpregede-e, rẹ “ọke vẹ uphẹ” sua. (Aghwo. 9:11) Emu rẹ kpregede sa phia kidie avwanre hẹ asan ro jefo vwẹ ọke ro jefo. Jesu ta ota kpahen uwevwin ro she teyen ihwo 18, ọ da tanẹ ọnana dia ọhọre rẹ Ọghẹnẹ-ẹ. (Luk 13:1-5) Ọtiọyena, o rhe fo re vwo roro nẹ Ọghẹnẹ yen brorhiẹn rẹ ihwo ri che ghwu vẹ e re cha rhọ vwẹ emu rẹ kpregede re phia-a.

Ọrerha, ohwo vuọvo yen cha sẹro rẹ ọyọnregan rọyen. Karophiyọ nẹ Eshu ta ota kpahen ọyọnregan rẹ ihwo re ga Jihova eje, rọ vwọ tanẹ a cha sa fuevun kẹ Jihova siẹrẹ e de hirharoku edavwini-i. (Job 1:9-11; 2:4; Ẹvwọ. 12:10) Jihova da sẹro avwanre vwo nẹ edavwini evo kidie o niro nẹ avwanre che  se chirakon raye-en, ota rẹ Eshu na rha dia uyota?

Ọrẹne, dede nẹ Jihova vwo ẹgba rọ vwọ riẹn obo re cha phia, jẹ ọ diẹ ọkieje ọ vwọ vwẹ ẹgba yena vwo ruiruo-o. E de vwo imuẹro nẹ Ọghẹnẹ yen sane edavwini ri te avwanre oma, o mudiaphiyọ nẹ ọ riẹn erọnvwọn eje re cha phia kẹ avwanre vwẹ obaro na. Ẹkẹvuọvo, Baibol ta ọtiọye-en. Ọghẹnẹ vwo ẹgba rọ sa vwọ riẹn obaro na. (Aiz. 46:10) Jẹ Baibol na djerephia nẹ ọ dia ọkieje ọ vwọ vwẹ ẹgba yena vwo ruiruo-o. (Jẹn. 18:20, 21; 22:12) Dede nẹ ọ sa riẹn orọnvwọn tavwen ọ ke phia, jẹ o muọghọ kẹ egbomọphẹ avwanre. Ọnana djerephia nẹ Ọghẹnẹ ni egbomọphẹ avwanre ghanghanre, ọ je vwẹ ẹgba rọyen vwo ruiruo vwẹ idjerhe abavo.Urhi 32:4; 2 Kọr. 3:17.

Kẹ die yen eta rẹ Pọl na mudiaphiyọ, rọ vwọ tanẹ, “Ọghẹnẹ . . . sa rhọvwe nẹ a davwe owẹ ni vrẹn obo rẹ udu wẹn gbare-e”? Pọl djisẹ rẹ oborẹ Jihova ruẹ ọke rẹ edavwini de te avwanre oma, ọ diẹ tavwen a ke mrẹ edavwini na-a. Eta rẹ ọyinkọn Pọl na kẹ avwanre imuẹro nẹ otoro edavwini re hirharoku-u, Jihova cha chọn avwanre uko a da vwẹrosuọ. (Une 55:22) Erọnvwọn ivẹ yen nẹrhẹ Pọl ta eta nana.

Ẹsosuọ, edavwini ri te avwanre oma ji te “ohwo ọfa oma.” Edavwini ri te avwanre oma, eyen edavwini rẹ ihwo efa ji rhiẹromrẹ. A da vwẹroso Ọghẹnẹ, e se chirakon rayen. (1 Pita 5:8, 9) Ọke rẹ Pọl vwọ ta ota kpahen edavwini rẹ ihwo rẹ Izrẹl rhiẹromrẹ vwẹ aton na, ọyen ọ vwọ ta eta rehẹ 1 Kọrẹnt 10:13 na. (1 Kọr. 10:6-11) Edavwini nana se te kohwo kohwo oma, e je gan vrẹ oborẹ ihwo rẹ Izrẹl se chirakon rọye-en. Abọ ẹne yen Pọl tare nẹ “evo rẹ ayen” churhi. Ọ da ohwo nẹ ihwo rẹ Izrẹl evo fuevun kẹ Jihova-a, kidie ayen vwẹrosuọ-ọ.

Ọrivẹ, “Ọghẹnẹ ohwo rẹ uyota.” Oborẹ Ọghẹnẹ vẹ ihwo rọyen yerin wan djerephia nẹ ọ fuevun kẹ ihwo “re guọnerọ re je yọnrọn irhi rọye.” (Urhi 7:9) O ji djephia nẹ Ọghẹnẹ ru obo ro veri eje. (Jos. 23:14) Fikirẹ ọnana, ihwo ri vwo ẹguọnọ rọyen, re je yọnrọn irhi rọyen se vwo imuẹro nẹ o che ru ive rọyen nana gba kpahen edavwini rẹ avwanre hirharokuẹ: (1) Ọ cha rhọnvwe nẹ e rhiẹromrẹ ọdavwini rọ vrẹ avwanre oma-a, kugbe (2) “ọ . . . gbẹn idjerhe wọ vwọ djẹ vabọ.”

Jihova “bru avwanre uche vwẹ evun rẹ ukpokpogho ejobi”

Mavọ yen Jihova vwọ gbẹn idjerhe kẹ ihwo re vwẹrosuọ ayen sa vwọ djẹ vabọ vwẹ ọke rẹ edavwini? Ọ da dia ọhọre rọyen, o se ghwe si ọdavwini na no. Karophiyọ eta rẹ Pọl tare nẹ, “Ọ je gbẹn idjerhe wọ vwọ djẹ vabọ, rere wo vwo se chiro.” Ọtiọyena, ọke buebun, ọ cha “gbẹn idjerhe wọ vwọ djẹ vabọ,” rọ cha vwọ kẹ wẹ obo wọ guọnọre rere wo se vwo chirakon rẹ edavwini na. E jẹ a fuẹrẹn idjerhe evo ro vwo ruẹ ọnana.

  • O “bru avwanre uche vwẹ evun rẹ ukpokpogho ejobi.” (2 Kọr. 1:3, 4) Jihova sa nẹrhẹ ẹwẹn, iroro vẹ ubiudu avwanre totọ womarẹ Ota rọyen, ẹwẹn ọfuanfon rọyen, kugbe odibo rọ fuevun na.Mat. 24:45; Jọn 14:16; Rom 15:4.

  • O sun avwanre womarẹ ẹwẹn ọfuanfon rọyen. (Jọn 14:26) Edavwini da vwomaphia, ẹwẹn ọfuanfon na sa vwẹ ukẹcha kẹ avwanre vwọ karophiyọ ikuegbe vẹ ẹkpo rẹ Baibol re sa chọn avwanre uko vwo bru omamọ orhiẹn.

  • Ọ sa vwẹ emekashe vwọ chọn avwanre uko.Hib. 1:14.

  • Ọ sa je chọn avwanre uko womarẹ eta rẹ ọbọngan vẹ ukẹcha rẹ iniọvo na, re dia “ivwiroro” kẹ avwanre.Kọl. 4:11.

Die kọyen a sa tanẹ eta rẹ Pọl rehẹ 1 Kọrẹnt 10:13 na mudiaphiyọ? Jihova sane edavwini vwọ kẹ avwanre-e. Ẹkẹvuọvo, edavwini da vwomaphia, avwanre vwo imuẹro nana: A da vwẹroso Jihova, ọ cha sa vwẹ uphẹn kẹ edavwini re vrẹ avwanre nẹ i te avwanre oma-a; ọ cha gbẹn idjerhe kẹ avwanre re se vwo chirakon rayen. Ọnana ghene ota rẹ ọbọngan dẹn!