Diesorọ iyẹnrẹn rẹ Matiu vẹ Luk kpahen ọtonphiyọ rẹ akpeyeren rẹ Jesu vwẹ otọrakpọ na vwọ fẹnẹ ohwohwo?

Iyẹnrẹn rẹ Matiu nẹ kpahen evwiẹ rẹ Jesu kugbe ọkiemọ rọyen fẹnẹ ọ rẹ Luk kidie Matiu tẹnrovi Josẹf, Luk da rha tẹnrovi Meri.

Ikuegbe ro churobọ si Josẹf yen Matiu tẹnrovi. Ọ ta ota kpahen uruemu rẹ Josẹf djephia ọke rọ vwọ riẹn nẹ Meri mrevun, oborẹ amakashe vuẹrẹ kpahen ẹdia na vwẹ evwerhẹn, kugbe oborẹ Josẹf vwọ rhọnvwe phiyọ oborẹ amakashe na vuẹrẹ. (Mat. 1:19-25) Matiu gbikun rẹ evwerhẹn rẹ Josẹf vwerhẹnre, rẹ amakashe vwọ vuẹ nẹ ọ djẹ kpo Ijipt, obo rọ vẹ orua rọyen djẹ wan, oborẹ amakashe je vwọ vuẹ vwẹ evwerhẹn nẹ o rhivwin rhe Izrẹl, vẹ obo rọ vẹ orua rọyen rhe vwọ dia Nazarẹt. (Mat. 2:13, 14, 19-23) Odẹ rẹ Josẹf vwomaphia abọ ighwrẹn vwẹ uyovwinrota rẹsosuọ vẹ ọrivẹ rẹ ọbe rẹ Matiu, Meri da rha vwomaphia abọ esan.

Vwọ fẹnẹ ọyena, iyẹnrẹn rẹ Luk tẹnrovi Meri mamọ. Luk niyẹnrẹn rẹ ọke rẹ amakashe Gabrẹl vwo bru Meri ra, ọke rẹ Meri vwọ kọn bru omoni rọyen Ẹlizabẹt ra, kugbe oborẹ Meri jiri Jihova wan. (Luk 1:26-56) Luk ji niyẹnrẹn rẹ oborẹ Simiọn vuẹ Meri kpahen oja rẹ Jesu cha re vwẹ ọke rẹ obaro. Rọ vwọ tobọ gbikun rẹ ọke rẹ orua na vwo kpo uwevwin rẹ ẹga na ọke rẹ Jesu vwọ hẹ ẹgbukpe 12, oborẹ Meri tare yen Luk vwọba si, ọ dia ọ rẹ Josẹf tare-e. Luk da tanẹ enana eje re phiare na, djobọte Meri mamọ. (Luk 2:19, 34, 35, 48, 51) Odẹ rẹ Meri vwomaphia abọ 13 vwẹ uyovwinrota rẹsosuọ vẹ ọrivẹ rẹ ọbe rẹ Luk, Josẹf da rha vwomaphia abọ 3. Ọtiọyena, Matiu tẹnrovi irueru vẹ ọdavwẹ rẹ Josẹf, Luk da rha tẹnrovi iruo ra vwọ kẹ Meri, kugbe obo ro rhiẹromrẹ.

Oborẹ ayen ihwo ivẹ na djisẹ rẹ uvwiẹ rẹ Josẹf vẹ Meri je fẹnẹ ohwohwo. Matiu wan uvwiẹ rẹ Josẹf vwo djephia nẹ Jesu rọ dia ọmọ aruakpọ rẹ Josẹf, yen vwo uturhi ro vwo sun vwẹ ekete rẹ Devid. Diesorọ? Kidie uvwiẹ rẹ Solomọn rọ dia ọmọ rẹ Ovie Devid yen Josẹf nurhe. (Mat. 1:6, 16) Ẹkẹvuọvo, Luk da rha wan uvwiẹ rẹ Meri vwo djephia nẹ Jesu yen ọriuku rẹ uvie rẹ Devid, “vwẹ ọ rẹ ugboma.” (Rom 1:3) Diesorọ? Kiridie uvwiẹ rẹ Natan rọ dia ọmọ rẹ Ovie Devid yen Meri nurhe. (Luk 3:31) Ẹkẹvuọvo, kẹ diesorọ Luk rha tanẹ Meri ọyen ọmọtẹ rẹ Hẹli ọke ro vwo se edẹ rẹ ihwo re nẹ uvwiẹ yena rhe-e? Kiridie vwo nene urhi, eshare yen djunute siẹrẹ e de kere ihwo re nẹ uvwiẹ sansan rhe. Kọyensorọ, ọke rẹ Luk vwo dje Josẹf phiyọ ọmọ rẹ Hẹli, a ghwa riẹn nẹ ọgọ yen Josẹf hepha ke Hẹli.​—Luk 3:23.

Iyẹnrẹn rẹ Matiu vẹ Luk nẹ kpahen uvwiẹ rẹ Jesu, ghwe djephia gbonozẹ nẹ Jesu yen Mesaya ra mraro kpahen. Vwọrẹ uyota, ihwo rẹ Farisi vẹ Saduisi dede cha sa phrọ uvwiẹ rẹ Jesu wan rhe akpọ-ọ. Nonẹna, iyẹnrẹn rẹ Matiu vẹ Luk vwọphia kpahen uvwiẹ rẹ Jesu, eyen ẹbẹre ọvo kiriguo rẹ uchivwo re mu esegbuyota avwanre kpahen, kugbe obo ri toroba imuẹro ọgangan rẹ avwanre vwo kpahen orugba rẹ ive rẹ Ọghẹnẹ.