Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 35

Jihova Vwẹ Ẹro Ọghanghanre Vwo Ni Idibo Rọyen re Vwomakpotọ

Jihova Vwẹ Ẹro Ọghanghanre Vwo Ni Idibo Rọyen re Vwomakpotọ

“Ọrovwohwo . . . se ohwo ro kpotọ gbe ohwo.”—UNE 138:6.

UNE 48 Nene Jihova Yan Kẹdẹ Kẹdẹ

ỌDJẸKOKO *

1. Ẹro vọ yen Jihova vwo ni ihwo re vwomakpotọ? Djekpahọn.

JIHOVA vwo ẹguọnọ rẹ ihwo re vwomakpotọ. Ihwo re ghene vwomakpotọ ọvo yen sa dia ugbeyan rọyen. Ẹkẹvuọvo, “ohwo [rọ kparoma] ogboko o de vughe.” (Une 138:6) Avwanre eje guọnọ sikẹrẹ Jihova, ji ru obo re cha nẹrhẹ oma vwerhọn. Ọtiọyena, ofori nẹ avwanre vwomakpotọ.

2. Enọ vọ yen a cha kpahenphiyọ vwevunrẹ uyono nana?

2 Vwevunrẹ uyono nana, a cha kpahenphiyọ enọ erha nana: (1) Die yen omaevwokpotọ? (2) Diesorọ o vwo fo nẹ avwanre vwo? (3) Ẹdia vọ yen sa nẹrhẹ ọ bẹn ra vwọ vwomakpotọ? Kirobo re che yono, e de vwo uruemu rẹ omaevwokpotọ, ọ cha nẹrhẹ oma vwerhen Jihova, avwanre komobọ je cha mrẹ erere.—Isẹ 27:11; Aiz. 48:17.

DIE YEN OMAEVWOKPOTỌ?

3. Die yen omaevwokpotọ?

3 Ohwo rọ vwomakpotọ no oma rọyen nẹ ọyen yovwin nọ ihwo efa-a, ọ kparoma-a. Baibol na djerephia nẹ ohwo rọ vwomakpotọ vwẹ ẹro abavo vwo ni oyerinkugbe rọyen vẹ Jihova, ọtiọyen ji te ọ rẹ ihwo efa. Ohwo rọ vwomakpotọ rhọnvwa nẹ ihwo efa yovwin nọ ọyen vwẹ idjerhe evo.—Fil. 2:3, 4.

4-5. Diesorọ a sa vwọ tanẹ ohwo ro me ruẹ nẹ ọyen vwomakpotọ, kparoma?

4 Ihwo evo me ruẹ nẹ ayen vwomakpotọ. Ayen sa họhọ ohwo rẹ omavua. Yẹrẹ ayen se dje uruemu ri dẹndẹn phia fikirẹ asan ayen nurhe vẹ obo ra yọnre ayen ghwanre wan. Ẹkẹvuọvo, vwẹ obevun ayen kparoma. O kriri o vwori-i,  oka rẹ ohwo rẹ ayen ghene hepha cha teyenphia.—Luk 6:45.

5 Vwọ fẹnẹ ọyena, e se roro nẹ ihwo ri fiudugberẹ rẹ oma jẹ vuọ kparoma. (Jọn 1:46, 47) Jẹ, ofori nẹ ihwo rẹ omavua-a, kẹnoma kẹ uruemu ra vwọ vwẹroso ẹgba romobọ rayen. Te avwanre dia ihwo rẹ omavua yẹrẹ ihwo rẹ oma jẹ vuọ, ofori nẹ avwanre davwẹngba vwọ dia ihwo re vwomakpotọ.

Ọyinkọn Pọl ohwo rọ vwomakpotọ, o ni oma rọyen gegerege-e (Ni ẹkorota 6) *

6. Vwo nene obo rehẹ 1 Kọrẹnt 15:10, die yen avwanre se yono vwo nẹ udje ri Pọl?

6 Roro kpahen udje rẹ ọyinkọn Pọl. Jihova reyerọ vwọ vwẹ ikoko buebun vwo mu vwẹ irere buebun. Ọ sa tobọ dianẹ obo ro ruru vwẹ iruo rẹ aghwoghwo na bun vrẹ e rẹ iyinkọn ri Jesu efa. Dedena, Pọl ni oma rọyen gegerege vwẹ ohri rẹ iniọvo rọye-en. Ọ da vwomakpotọ ta: “Mẹvwẹ hẹ ọyinkọn rẹ ọkuko, ro fori re se ọyinkọ-ọn, kidie mi mu kpahe ishọshi rẹ Ọghẹnẹ.” (1 Kọr. 15:9) Pọl sa ta ọtiọyen gbagba kidie ẹserọphẹ rẹ Ọghẹnẹ yen nẹrhẹ o se vwo omamọ oyerinkugbe vẹ Jihova, ọ dia ẹgba romobọ rọye-en. (Se 1 Kọrẹnt 15:10.) Pọl ghene omamọ rẹ udje rẹ ohwo rọ vwomakpotọ. Dede nẹ iniọvo rehẹ ukoko ri Kọrẹnt reyọ Pọl vwo guẹdjọ, ọ vwẹ obo ro ruru vwọ yeyan ọke ro vwo si ileta rhe aye-en!—2 Kọr. 10:10.

Karl F. Klein, ọyen oniọvo rọ vwomakpotọ rọ gare vwẹ Ẹko Rọvwẹrote na (Ni ẹkorota 7)

7. Mavọ yen iniọvo evo ra nabọ vughe vwẹ ọke avwanre na vwo dje omaevwokpotọ phia? Djudje ọvo.

7 Iniọvo buebun mrẹ ọbọngan vwo nẹ ikuegbe rẹ akpeyeren rẹ Oniọvo Karl F. Klein rọ gare vwẹ Ẹko Rọvwẹrote na. Vwẹ ikuegbe rẹ akpeyeren rọyen, Oniọvo Klein vwomakpotọ djunute erọnvwọn evo ro nene muabọ vwẹ akpeyeren rọyen. Kerẹ udje, vwẹ ukpe ri 1922, ọ bẹn vwọ kẹ ro vwo vwobọ vwẹ aghwoghwo rẹ nuwevwin kpo uwevwin  te ẹdia rọ vwọ davwọn ni obọvo nu, o rhe ruo omarẹ ẹgbukpe ivẹ ọfa-a. Ukuko na, rọ vwọ ga vwẹ Bẹtẹl, oniọvo ọvo da vwẹ ọghwọku kẹ, ivun de miovwo fikirẹ ọghwọku na vwẹ uvwre rẹ ọke evo. Vwọba, ọ je muọga ọvo rọ nẹrhẹ iroro rọyen yanghan (nervous breakdown), ukuko na o de vrẹn nẹ ọga na. Dedena, ọ riavwerhen rẹ uphẹn rẹ ẹga oghẹresan evo. Vwẹro roro uvi rẹ omaevwokpotọ ro rhe oniọvo nana ra nabọ vughe vwevunrẹ ukoko na, rọ ta echobọ rọyen phia! Iniọvo buebun nabọ karophiyọ oborẹ Oniovo Klein fuevun ta uyota vwẹ ikuegbe rẹ akpeyeren rọyen na. *

DIESORỌ AVWANRE VWỌ VWOMAKPOTỌ?

8. Idjerhe vọ yen 1 Pita 5:6 vwọ chọn avwanre uko vwọ mrẹvughe nẹ omaevwokpotọ nẹrhẹ oma vwerhen Jihova?

8 Orọnvwọn rọ ma ghanre rọ nẹrhẹ avwanre vwomakpotọ ọyehẹ, ọ nẹrhẹ oma vwerhen Jihova. Ọyinkọn Pita nabọ djephia phephẹn. (Se 1 Pita 5:6.) Vwọ kpahen eta ri Pita yena, ọbe ri Come Be My Follower da ta: “Omaẹkparọ pha kerẹ eruan. Imuoshọ ọvo yen nẹ obuko rọyen cha. Uruemu yena sa nẹrhẹ Ọghẹnẹ vwẹ ẹro ri phovwin vwo ni ohwo rọ tobọ vwẹ okẹ oghẹresan. Ẹkẹvuọvo, Ọghẹnẹ reyọ ohwo rọ vwomakpotọ vwo ruiruo ọ da tobọ dianẹ o ghwe vwo okẹ vuọvo-o. Oma cha vwerhen Jihova rọ vwọ hwosa kẹ wẹ siẹrẹ wọ da vwomakpotọ.” * Orọnvwọn ro me yovwin e se ru enẹna ọyen re vwo ru ubiudu ri Jihova ghọghọ!—Isẹ 23:15.

9. Mavọ yen omaevwokpotọ se vwo si avwanre kerẹ ihwo efa?

9 Vwọ vrẹ re vwo ru obo ri vwerhen Jihova oma, avwanre mrẹ erere buebun siẹrẹ a da vwomakpotọ. Omaevwokpotọ nẹrhẹ ihwo efa siẹkẹrẹ avwanre. Wọ vwọ riẹn oboresorọ a vwọ ta ọtiọyen, gbe phi oma wẹn phiyọ ẹdia rẹ ihwo efa. (Mat. 7:12) Ọ bẹn re vwo sikẹrẹ ohwo rọ rhọnvwa reyọ uchebro-o, rọ je siọrhan nẹ eta rọyen ọvo yen gbare. Ẹkẹvuọvo, oma vwerhen avwanre e vwo sikẹrẹ iniọvo ri “re ehrọre, guọnọ imoni na, vwo udu ọlọlọhọ [ri ji vwo] udu dẹndẹn.” (1 Pita 3:8) Avwanre de sikẹrẹ ihwo tiọyena, ayen ji che sikẹrẹ avwanre takpe nẹ a dia ihwo re vwomakpotọ.

10. Idjerhe vọ yen omaevwokpotọ vwo nẹrhẹ akpeyeren lọhọ kẹ avwanre?

 10 Omaevwokpotọ je nẹrhẹ akpeyeren lọhọ kẹ avwanre. Vwọrẹ uyota, avwanre se hirharoku erọnvwọn evo vwẹ akpeyeren re rorori nẹ i ghwe shephiyọ-ọ. Solomọn rọ dia ọgbaghwanre na, da ta: “Me mrẹ eviẹn re guan vwẹ enu rẹ iyesi, yẹ isun ra vwẹ awọ yan otọ kerẹ eviẹn.” (Aghwo. 10:7) Ọ dia ọkieje yen e vwo jiri ihwo re tẹn ona mamọ-ọ. Ọke evo dede, ihwo re ghwa tẹn ona vuọvo-o yen e me jirẹ. Dedena, Solomọn mrẹvughe nẹ ofori nẹ e yeren akpọ kirobo ra mrẹre, ukperẹ ivun vwo miovwo avwanre fikirẹ obo re phia vwẹ akpọ na. (Aghwo. 6:9) Avwanre da dia ihwo re vwomakpotọ, ọ cha lọhọ re vwo yeren akpọ kirobo ra mrẹrẹ, ukperẹ e vwo roro kpahen obo ofori nẹ ọ dia.

ẸDIA VỌ YEN SA NẸRHẸ Ọ BẸN RA VWỌ VWOMAKPOTỌ?

Mavọ yen ẹdia nana sa vwọ nẹrhẹ ọ bẹn a vwọ vwomakpotọ? (Ni ẹkoreta 11-12) *

11. Die yen e ru siẹrẹ a da vwẹ uchebro kẹ avwanre?

11 Avwanre vwo uphẹn buebun re se vwo dje omaevwokpotọ phia kẹdẹ kẹdẹ. Roro kpahen ẹdia evo. A da vwẹ uchebro kẹ avwanre. Karophiyọ nẹ tavwen ohwo ke sa gbaudu vwẹ uchebro kẹ avwanre, kọyen avwanre ghene ruchọ mamọ re. Vwẹ ọke yena, a vwọ siọn uchebro na yen emu rẹsosuọ rọ ka ro ẹwẹn avwanre. A sa vwẹ ohwo rọ vwẹ uchebro na phia vwo guẹdjọ yẹrẹ obo ro mu ota na wan. Ẹkẹvuọvo, avwanre da dia ihwo re vwomakpotọ, a cha davwẹngba vwo dje uruemu abavo phia.

12. Vwo nene obo rehẹ Isẹ 27:5, 6, diesorọ oma vwọ vwerhen avwanre siẹrẹ ohwo da vwẹ uchebro kẹ avwanre? Djudje rọyen.

12 Oma vwerhen ohwo rọ vwomakpotọ siẹrẹ a da vwẹ uchebro vwọ kẹ. Kerẹ udje: Vwẹro roro nẹ wọ he evunrẹ uyono. Wẹ vẹ iniọvo buebun vwọ ta ota nu, oniọvo ọvo de se we kpo akọkọ, ọ da vuẹ wẹ nẹ emu gbadje akon wẹn. Aphro herọ-ọ, oma cha vo wẹ. Ẹkẹvuọvo, oma cha vwerhen owẹ nẹ oniọvo na vuẹ wẹ? Vwọrẹ uyota, wo se roro nẹ mane a fobọ vuẹ wẹ kpahọn! Vwẹ idjerhe tiọyena, ofori nẹ oma vwerhen avwanre siẹrẹ oniọvo de fiudugberi vwẹ uchebro rẹ avwanre guọnọre vwọ kẹ avwanre. Avwanre ni ohwo yena kerẹ ugbeyan ukperẹ ọvweghrẹn.—Se Isẹ 27:5, 6; Gal. 4:16.

Diesorọ a vwọ guọnọ omaevwokpotọ siẹrẹ uphẹn rẹ ẹga de te ihwo efa obọ? (Ni ẹkoreta 13-14) *

13. Mavọ yen avwanre se vwo dje omaevwokpotọ phia siẹrẹ uphẹn rẹ ẹga de te ihwo efa obọ?

13 Siẹrẹ uphẹn rẹ ẹga de te ihwo efa obọ. Ọkpako ọvo re se Jason da ta: “Mi da mrẹ uphẹn ẹga rẹ ihwo efa riavwerhen rọyen, ki mi roro, diesorọ mi rhe vwo  uphẹn rẹ ẹga yena-a?” Iroro tiọyena rhe we jovwo re? Re vwo ru bunphiyọ vwẹ ẹga ri Jihova yovwirin dẹn. (1 Tim. 3:1) Ẹkẹvuọvo, ofori a vwọ jomaotọ kpahen oborẹ avwanre roro. E rhe nomaso-o, a sa vwẹ uphẹn kẹ omaẹkparọ nẹ ọ tan awọ muotọ vwẹ ubiudu rẹ avwanre. Kerẹ udje, oniọvo ọshare se roro nẹ ọyen ọvo yen muwan vwọ kẹ uphẹn rẹ ẹga ọvo vwevunrẹ ukoko na. Yẹrẹ oniọvo aye ọvo se roro, ‘Ọshare mẹ yen me muwan vwọ kẹ iruo nana vwọ vrẹ oniọvo yena!’ Ẹkẹvuọvo, avwanre da vwomakpotọ, a cha kẹnoma kẹ ẹwẹn rẹ omaẹkparọ tiọyena.

14. Die yen se yono vwo nẹ oborẹ Mosis ruru ọke rẹ uphẹn ẹga de te ihwo efa obọ?

14 Avwanre se yono vwo nẹ oborẹ Mosis ruru ọke rẹ uphẹn ẹga vwo te ihwo efa obọ. Mosis vwẹ ẹro ọghanghanre vwo ni uphẹn ro tere obọ ro vwo sun ẹgborho rẹ Izrẹl. Ẹkẹvuọvo, ọke ri Jihova vwọ vwẹ uphẹn vwọ kẹ ihwo efa nẹ ayen nene Mosis wiankugbe, die yen o ruru? Ọ rioma-a. (Ukeri 11:24-29) Ọ vwomakpotọ vwẹ uphẹn kẹ ihwo efa nẹ ayen vwẹ ukẹcha kẹ vwo ruiruo rẹ ẹdjọeguo. (Eyan. 18:13-24) Ọnana da nẹrhẹ ihwo rẹ Izrẹl vwo eshare buebun re sa ga kerẹ iguẹdjọ, ayen rha hẹrhẹ ọke grongron tavwen e ki nyo ẹdjọ raye-en. Vwẹ idjerhe tiọyena, Mosis rha vwẹ uphẹn rẹ ẹga rọyen vwọ kobaro kẹ ọdavwẹ rẹ ihwo na-a. Ọnana ghene omamọ rẹ udje dẹn! E jẹ avwanre karophiyọ nẹ Jihova sa vwọ reyọ avwanre vwo ruiruo, ofori nẹ omaevwokpotọ rẹ avwanre rho vrẹ ona avwanre. Dede nẹ “Ọrovwohwo kpenu. . . , o ji se ohwo ro kpotọ gbe ohwo.”—Une 138:6.

15. Erhọ yen ewene evo iniọvo rẹ avwanre rhiẹromrẹ re?

15 Siẹrẹ ẹdia rẹ avwanre de wene. Vwẹ ikpe evo rhire na, e wene iruo rẹ iniọvo buebun re ga vwẹ ukoko na ikpe buebun re. Kerẹ udje, vwẹ ukpe ri 2014, e de wene  iruo rẹ iniruo ubrotọ vẹ eya rayen. Ghwe vwo nẹ ukpe yena, iniruo okinriariẹ cha dobọ rẹ iruo rayen ji siẹrẹ ayen de te ẹgbukpe 70. Iniọvo eshare ri te ẹgbukpe 80 kpenu re, che siobọnu ẹdia rayen da ga kerẹ ọrọvwẹrote iruo rẹ ekpako na. Vwẹ ikpe evo re wanre na, e wene iruo rẹ iniọvo buebun re ga vwẹ Bẹtẹl vwo kpo ekobaro ọkieje. Efa dobo rẹ iruo ẹga ọkieje roghẹresan ji fikirẹ jẹ omakpokpọ evwo, oghwa orua, yẹrẹ fikirẹ ebẹnbẹn efa.

16. Idjerhe vọ yen iniọvo rẹ avwanre vwo dje omaevwokpotọ phia ọke re vwo wene iruo ẹga rayen?

16 Vwọrẹ uyota, buebun rẹ iniọvo na mrẹrẹ bẹnbẹn ayen vwo ru ewene nana. Iniọvo buebun re wene iruo rayen na ji vwo ẹguọnọ rẹ iruo nana rẹ ayen ruẹ vwẹ ikpe buebun jovwo re na. Evo “muomaphiyọ” vwẹ uvwre ọke rẹ ayen vwọ davwẹngba vwo ru ewene na. Ọke vwọ yanran na, ayen de ru ewene na. Diesorọ? Obo ri ghini vwẹ ukẹcha kẹ ayen yen ẹguọnọ rayen vwo kpahen Jihova. Ayen riẹn nẹ Ọghẹnẹ yen ayen vwomakpahotọ kẹ, ọ dia iruo, otitivwe yẹrẹ uphẹn rẹ ẹga-a. (Kọl. 3:23) Ayen vwomakpotọ ga Jihova vẹ omavwerhovwẹn vwẹ kuphẹn kuphẹn rẹ ẹga ro rhiephiyọ. Ayen “vwẹ ẹnwan [rẹ ayen] ejobi vwọ ya” Jihova, kidie ayen riẹnre nẹ o cha vwẹrote ayen.—1 Pita 5:6, 7.

17. Diesorọ oma vwọ vwerhen avwanre nẹ Ota rẹ Ọghẹnẹ bru avwanre uche nẹ a vwomakpotọ?

17 Oma rha vwerhen avwanre nẹ Ota rẹ Ọghẹnẹ bru avwanre uche nẹ a vwomakpotọ? Avwanre da vwomakpotọ, o che fierere kẹ avwanre vẹ ihwo efa. Avwanre se hirharoku ebẹnbẹn rẹ akpeyeren. Marho kparobọ, ke che sikẹrẹ Ọsẹ avwanre rọhẹ obo odjuvwu. Ọ vwerhoma ra vwọ riẹn nẹ dede nẹ Jihova yen ọ “ro kpenu Ọvuọvo na,” o vwo ẹguọnọ avwanre, ọ je vwẹ ẹro ọghanghanre vwo ni idibo rọyen re vwomakpotọ!—Aiz. 57:15.

UNE 45 Iroro rẹ Ubiudu Mẹ

^ e?ko. 5 Ọvo usun rẹ iruemu rọ ma ghanre ro fori nẹ avwanre vwo yen omaevwokpotọ. Die yen omaevwokpotọ? Diesorọ o vwo fo nẹ avwanre vwo? Die yen sa nẹrhẹ ọ bẹn ra vwọ vwomakpotọ siẹrẹ e de wene iruo rẹ ẹga avwanre? A cha kpahenphiyọ enọ eghanghanre nana vwevunrẹ uyono nana.

^ e?ko. 7 Ni uyovwinrota na, “Jehovah Has Dealt Rewardingly With Me” rọhẹ Uwevwin Orhẹrẹ rẹ October 1, 1984.

^ e?ko. 8 Ni uyovwinrota 3, ẹko. 23.

^ e?ko. 53 IDJEDJE RẸ UHOHO: Ọke rẹ ọyinkọn Pọl vwọ hẹ uwevwin rẹ oniọvo ọvo, ọ vwomakpotọ nene iniọvo efa ga ẹga kugbe, ji te imitete.

^ e?ko. 57 IDJEDJE RẸ UHOHO: Oniọvo ọvo rhiabọreyọ odjekẹ ro nẹ Baibol rhe vwo miẹ eghene ọshare ọvo.

^ e?ko. 59 IDJEDJE RẸ UHOHO: Oma vwerhen oniọvo ọshare ọvo rọ kpakore fikirẹ uphẹn ẹga ro te eghene ọshare ọvo vwevunrẹ ukoko na.