Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 43

Jihova Ọvo Wọ Ga

Jihova Ọvo Wọ Ga

“E siro nẹ, Ọrovwohwo Ọghẹnẹ ọye wo shiguẹ kẹ, ọye ọvo wọ je ga.”—MAT. 4:10.

UNE 51 Avwanre Vwomakpahotọ kẹ Ọghẹnẹ!

ỌDJẸKOKO *

1. Diesorọ rọ vwọ dianẹ Jihova ọvo yen fo ohwo ra ga?

JIHOVA ọvo yen ofori nẹ a ga kidie ọyehẹ Ọmemama kugbe Ohwo rọ kẹ avwanre arhọ. (Ẹvwọ. 4:11) Ẹkẹvuọvo, imuoshọ ọvo herọ. Dede nẹ avwanre vwo ẹguọnọ ri Jihova ji muọghọ kẹ, erọnvwọn evo se gbowọphiyọ ẹga ọsoso rẹ avwanre vwọ kẹ. Ofori nẹ a riẹn oborẹ ọnana sa vwọ phia. Ẹsosuọ, e ja fuẹrẹn obo ro mudiaphiyọ ra vwọ vwẹ ẹga ọsoso kẹ Jihova.

2. Vwo nene obo rehẹ Matiu 4:10, die yen e che ru siẹrẹ avwanre da guọnọ vwẹ ẹga ọsoso kẹ Jihova?

2 Vwẹ Baibol na, a vwọ vwẹ ẹga ọsoso kẹ Jihova mudiaphiyọ ẹguọnọ okokodo re vwo kpahọn. Avwanre da ga Jihova ọvo, kọyen a vwẹ ẹga ọsoso vwọ kẹ. Avwanre je cha rhọnvwe nẹ ohwo yẹrẹ orọnvwọn vuọvo gbowọphiyọ ẹga ra vwọ kẹ Jihova-a.—Se Matiu 4:10.

3. Diesorọ a vwọ ga Jihova ọvo?

3 O vwo oboresorọ avwanre vwọ ga Jihova ọvo. Diesorọ a vwọ ta ọtiọyen? Kidie obo re yono kpahen Jihova yen muẹ avwanre vwọ ga. Avwanre vwo ẹguọnọ kpahen iruemu iyoyovwin rọyen. Avwanre je riẹn obo ri je kugbe obo ri tuoma. Avwanre vwo ẹruọ rẹ ọhọre ri Jihova ji biẹcha. Oma vwerhen avwanre kidie ọ kẹ avwanre uphẹn ra vwọ dia ugbeyan rọyen. (Une 25:14) Kemu kemu avwanre yono kpahen Ọmemama na siẹ avwanre kẹrẹphiyọ.—Jems 4:8.

4. (a) Die yen Eshu vwo ruiruo rere ẹguọnọ re vwo kpahen Jihova vwọ ghare? (b) Die yen a cha fuẹrẹn vwẹ uyono nana?

 4 Eshu yen suẹn akpọ na, ọtiọyena ko ruo rere ihworakpọ vwo no nẹ ekuakua rẹ akpeyeren yen ma ghanre. Ọ je nẹrhẹ ayen nenesi rẹ ojevwe rẹ ugboma. (Ẹfe. 2:1-3; 1 Jọn 5:19) Eshu ru ọnana rere ẹguọnọ rẹ avwanre vwo kpahen Jihova vwọ dia ọ rọ ghare. E ja fuẹrẹn idjerhe ivẹ rẹ Eshu vwo ruẹ ọnana. Ẹsosuọ, Eshu guọnọre nẹ avwanre vwọtua efe, ọrivẹ, Eshu guọnọre nẹ avwanre ni ighe ri shephiyọ-ọ.

KẸNOMA KẸ ẸGUỌNỌ RẸ IGHO

5. Diesorọ re vwo nomaso kpahen ẹguọnọ rẹ igho?

5 Avwanre eje guọnọ re omamọ emu, ku omamọ iwun phiyọ je dia omamọ uwevwin. Jẹ ofori nẹ e nomaso rere a kẹnoma kẹ ẹguọnọ rẹ igho. Ihwo buebun nonẹna “guọnọ igho nọ,” ọtiọyen ji te ekuakua rẹ akpeyeren. (2 Tim. 3:2) Jesu riẹnre nẹ idibo rọyen se ji vwo ẹwẹn tiọyena. Kọyensorọ rọ vwọ ta: “Ohwo sa ga inini ivẹ-ẹ, ọ da dia ọtiọye kọ dia avwebọ kẹ ọvo, ọ me rha dia avwiorọvwe kẹ ọrivẹ; eyẹ ko si kẹre ọvo ko sheri kẹ ọrivẹ: Wọ sa ga Ọghẹnẹ vẹ [Efe] kugbe-e.” (Mat. 6:24) Odibo ri Jihova rọ ghwọrọ ọke buebun vẹ ẹgba rọyen phiyọ onẹdjẹ rẹ efe, ga inini ivẹ. Eriyina, a cha sa tanẹ Jihova ọvo yen oniọvo tiọyena ga-a.

Ẹro rẹ Iniọvo Evo Vwẹ Laodisha Vwo ni Oma Rayen . . . Kugbe Ẹro ri Jihova vẹ Jesu Vwo ni Ayen (Ni ẹkorota 6)

6. Die yen avwanre se yono vwo nẹ ọghwọku ri Jesu vwọ kẹ ukoko ri Laodisha?

6 Omarẹ oba rẹ ẹgbukpe ujorin ẹsosuọ, iniọvo rehẹ ukoko ri Laodisha ke yoma: “Mi feri, o yovwi kẹ vwẹ, emuọvo kare ovwẹ-ẹ.” Ẹkẹvuọvo, vwẹ ẹro ri Jihova vẹ Jesu, dakẹ ayen ọvuọvo “orharhe rẹ ohwo fafanrhiẹ diodi, ovwiogbere, rẹ ehrọre rọye re ohwo, orhuẹro, rọ ban phihọ.” Ọ dia Jesu vwẹ ọghwọku  yena kẹ ayen kidie nẹ ayen feri-i, jẹ kidie nẹ ẹguọnọ rẹ ayen vwo kpahen igho gbowọphiyọ oyerinkugbe rayen vẹ ọ ri Jihova. (Ẹvwọ. 3:14-17) Avwanre de ghwe noso nẹ ẹguọnọ rẹ igho shọrọ ro ubiudu avwanre, ofori nẹ a jowọ re vwo siono kpakpata. (1 Tim. 6:7, 8) Avwanre rhe ru ọtiọye-en, udu rẹ avwanre kọ cha ghare, Jihova rhe che rhiabọreyọ ẹga rẹ avwanre-e. Jihova ọyen “Ọghẹnẹ rọ rioma,” ọtiọyena ọ guọnọ ẹga ọsoso. (Urhi 4:24) Mavọ yen ẹguọnọ rẹ igho sa vwọ shọrọ ro ubiudu rẹ avwanre ememerha?

7-9. Die yen wo yono vwo nẹ udje rẹ ọkpakọ ọvo re se David?

7 Roro kpahen udje rẹ ọkpako ọvo re se David, ọgbowian rọ dia United States. Ọ tare nẹ ọyen muomaphiyọ iruo rọyen na gangan. Kidie nẹ ọ tona rẹ iruo na mamọ, nọke ra ruọke kọyen e vwo phiẹba osa rọyen. O titiri mamọ vwẹ ikọpini na kugbe asan efa vwẹ ẹkuotọ na. David da ta: “Ọkievo, ki mi roro nẹ efe mẹ na, ọyen odjephia rẹ ebruphiyọ ri Jihova.” Ọyena ghini uyota?

8 Ememerha na, David de rhi noso nẹ owian rọyen na gbowọphiyọ oyerinkugbe rọyen vẹ Jihova. Ọ da ta: “Ọkiọvo, me sa dia evunrẹ uyono vẹ iruo aghwoghwo na ji mi roro kpahen ebẹnbẹn rẹ iruo mẹ. Okposa yen a hwa kẹ vwẹ, dedena jẹ ofu ji dje vwe, omavwerhonvwẹn jehẹ orua mẹ-ẹ.”

9 David de rhi noso nẹ ofori rere ọyen brorhiẹn rẹ obo re ma ghanre vwẹ akpeyeren rọyen. Ọ da ta: “Mi de brorhiẹn re me vwọ rhuẹrẹ ebẹnbẹn na phiyọ.” David guọnọ rhuẹrẹ ọke iruo rọyen na phiyọ, ọtiọyena ọ da vwẹ iroro rọyen vwọ nẹ ọga rọyen. Die kọyen rhe phia?  Ọga na da djẹ vwo nẹ iruo. Kẹ, die yen o ruru? Ọ da ta: “Ẹdẹ rọ vwọ kpahọn, me da reyọ ọkobaro ubrọke ri rhinrin.” Iruo rẹ orufon vwẹ uwevwin rode ọvo kọyen David vẹ aye rọyen ruẹ vwọ vwẹrote oma rayen. Ọkievo vwọ wan nu, David da rhe ton iruo rẹ ọkobaro ọkieje phiyọ, ọke vwọ yanran, aye rọyen da je rhe vwomaba. Aye gbẹ ọshare nana brorhiẹn rẹ ayen vwo ruiruo rẹ ihwo niri kueku, ẹkẹvuọvo, ọ dia iruo na yen ma ghanre kẹ aye-en. Dede nẹ osa ra hwa kẹ ayen enẹna vwẹ ẹkẹn ihwe vwọ hanvwe nọ ọ ri jovwo, jẹ o ji tẹ ayen vwọ vwẹrote oma rayen kemeranvwe kemeranvwe. Ayen guọnọ phi Jihova phiyọ ẹdia ẹsosuọ vwẹ akpeyeren rayen, ọnana da rhe nẹrhẹ ayen mrẹvughe nẹ Jihova ghene vwẹrote ihwo re vwẹ Uvie na kobaro.—Mat. 6:31-33.

10. Mavọ yen avwanre sa vwọ sẹro rẹ ubiudu avwanre?

10 Owenẹ e feri yẹrẹ e feri-i, ofori nẹ a sẹro rẹ ubiudu rẹ avwanre. Vwẹ idjerhe vọ? Wo vwo ẹguọnọ rẹ efe-e. Wọ je vwẹ iruo wẹn vwọ kobaro kẹ ẹga ri Jihova-a. Mavọ wọ sa vwọ riẹn sẹ ọnana phia kẹ wẹ re? Nọ oma wẹn: ‘Ọkieje mi vwo roro iroro rẹ iruo ọke me da hẹ uyono yẹrẹ iruo aghwoghwo? Me ro ẹnwan kpahen oborẹ mi se vwo fe vwẹ obaro na? Igho vẹ ekuakua rẹ akpeyeren so ẹghwọ vwẹ uvwre mẹ vẹ aye mẹ? Mi se ruiruo rẹ ihwo niri kueku rere me sa vwọ mrẹ ọke buebun ghwọrọ vwẹ ẹga ri Jihova?’ (1 Tim. 6:9-12) Ọke re de roro kpahen enọ nana, e jẹ avwanre karophiyọ nẹ Jihova vwo ẹguọnọ rẹ avwanre, o ji ve ive nana kẹ ihwo re fuevun ga: “Me sa phiẹn wẹ-ẹ eyẹ me sa sen wẹ-ẹ.” Ọnana yen sorọ ọyinkọn Pọl vwo si nẹ, “Si oma wẹn nẹ urhuru si vwe rẹ igho.”—Hib. 13:5, 6.

VWẸ AGHWANRE VWỌ SANE IGHE RU WO NẸ

11. Die yen cha phia kẹ avwanre siẹrẹ e de ni erharhe ighe rẹ akpọ nana?

11 Jihova guọnọre nẹ avwanre riakpọ kuoma. Ughe eno ọyen idjerhe ọvo re vwo ru ọtiọyen. Vwọrẹ uyota, Ota rẹ Ọghẹnẹ tare nẹ, “Emu ọfa rha herọ ro yovwi ko ohwo-o jokpa nẹ ọ gba re rere ọ da, rere ọ mrẹ avwerhe rẹ owian rọye.” (Aghwo. 2:24) Ẹkẹvuọvo, buebun rẹ ighe rẹ akpọ nana se miovwo avwanre. E nẹrhẹ ihwo vwẹ ẹro phovwin vwo ni iwan rẹ omamọ uruemu, je tobọ nẹrhẹ  ayen rhiabọreyọ erọnvwọn ri Baibol na senre.

Ono yen ru ighe ru wo nẹ? (Ni ẹkoreta 11-14 11-14) *

12. Vwo nene obo rehẹ 1 Kọrẹnt 10:21, 22, diesorọ a vwọ vwẹ aghwanre sane ighe rẹ avwanre nẹ?

12 Jihova ọvo yen avwanre guọnọ vwẹ ẹga kẹ, ọtiọyena avwanre cha “sa da [vwẹ] uko rẹ Ọrovwohwo vẹ uko rẹ Idẹbono kugbe-e.” (Se 1 Kọrẹnt 10:21, 22.) A vẹ ohwo vwọ riemu kugbe ọyen oka rẹ ugbeyan. Avwanre da sane ighe ri titi ozighi, uruemu rẹ orhan, ọfanrhiẹn, yẹrẹ ojevwe rẹ ugboma vẹ efa, kọyen avwanre riemu vwẹ emejẹ rẹ ivwighrẹn rẹ Ọghẹnẹ. E de ru ọtiọyen, ọ dia oma avwanre ọvo yen a cha so omaẹwan kẹ-ẹ, e ji che miovwin oyerinkugbe rẹ avwanre vẹ ọ ri Jihova.

13-14. Kirobo ri Jems 1:14, 15 tare, diesorọ a vwọ jomaotọ kpahen oka rẹ ighe rẹ avwanre nẹ? Djudje ọvo.

13 Roro kpahen idjerhe evo kiriguo rẹ ighe eno vwọ họhọ emuọre. Avwanre da cha riemu, e se sun obo re che phi phiyọ unu. Ẹkẹvuọvo, siẹrẹ e de rhivworọ nu, e rhe che se sun obo ro che ru vwẹ ugboma na ọfa-a. Omamọ emu nẹrhẹ e vwo omakpokpọ, orharhe emu nẹrhẹ ohwo muọga. Jẹ, a cha ghwa sa mrẹ owian rẹ emu na vwẹ oma avwanre ason hrọke-e.

14 Ọtiọyen ọ je hepha nẹ, avwanre se sun oka ighe rẹ avwanre nẹ. E de rhi ni ayen nu, ememerha na, oborẹ avwanre niri na ki che sun iroro vẹ iruemu rẹ avwanre. Omamọ ighe sa nẹrhẹ udu avwanre sasa; ẹkẹvuọvo, erharhe ighe sa so omaẹwan kẹ avwanre. (Se Jems 1:14, 15.) Avwanre che ghwe se vwo oniso rẹ umiovwo rẹ erharhe ighe tiọyena ghwa cha enẹna-a, ẹkẹvuọvo ọke vwọ yanran na, e cha vwomaphia. Ọyensorọ Baibol na vwọ ta: “Wo ja phiẹn wẹ-ẹ, a vwẹ Ọghẹnẹ jehwẹ-ẹ, kidie ọkankọn kẹ okankọn re ohwo kọnre, ọye o ji che vun rhe. Kidie, ohwo rọ kọn kẹ ugboma rọye ọ je cha dia evun rẹ ugboma de vun ughwu.” (Gal. 6:7, 8) Ọtiọyena, ọ ghanre mamọ ra vwọ sen ighe ri titi erọnvwọn ri Jihova vwo utuoma kpahen!—Une 97:10.

15. Okẹ vọ yen Jihova vwọ kẹ avwanre?

15 Idibo ri Jihova buebun riavwerhen rẹ eno rẹ emamọ ighe vwẹ JW Broadcasting® rọ dia tẹlivishọni rọhẹ wẹbsaiti avwanre. Oniọvo aye ọvo re se Marilyn da ta: “Ighe re mi nẹ vwẹ JW Broadcasting nẹrhẹ oma vwerhen ovwẹ kidie ighe na eje pha yoyovwin. Ọke rẹ ofu de dje vwe, ke mẹ guọnọ ughe rẹ Ẹga Urhiọke ọvo nẹ, rọ cha bọn vwẹ gan. Ọnana si vwe kẹrẹ Jihova vẹ ukoko rọyen. Ọrhuẹrẹphiyotọ nana wene akpeyeren mẹ mamọ.” Wọ mrẹ erere vwo nẹ ọrhuẹrẹphiyotọ nana ro nẹ obọ ri Jihova rhe na? Vwọba Broadcasting kpokpọ ri kemeranvwe kemeranvwe na, uhworo vẹ ividio sansan, kugbe ine evwevwerhen re bọn ohwo gan je herọ ru wo se ni kọke kọke.

16-17. Diesorọ o vwo fo nẹ e sun uchọke ra ghwọrọ phiyọ ughe eno, kẹ mavọ e se vwo ru ọtiọyen?

16 Ofori nẹ avwanre jomaotọ kpahen oka rẹ ighe re nẹ kugbe uchọke ra ghwọrọ vwo ni ayen. E rhe ru ọtiọye-en, a cha ghwọrọ ọke ofori nẹ a vwọ ga Jihova phiyọ ighe eno. Ihwo buebun mrẹ bẹnbẹn rẹ ayen vwo sun uchọke rẹ ayen ghwọrọ phiyọ ighe eno. Oniọvo aye rọ dia eghene rọhẹ ẹgbukpe 18 re se Abigail da ta: “Ughe eno ri TV yen me vwọ diotọ ovwọnvwọn rẹ mi de kuobọ  rẹ owian ẹdẹ na phiyotọ nu. Jẹ, mi rhe nomaso-o, me sa ghwọrọ inọke buebun phiyọ ughe eno na.” Oniọvo eghene ọfa rọhẹ ẹgbukpe 21 re se Samuel da ta: “Me rhe mrẹvughe nẹ ividio krẹn krẹn ri mi nẹ vwẹ intanẹti rhe vwoba-a. Me sa vwẹ otete ọvo vwọ tuọnphiyọ, jẹ bẹsiẹ mi vwo ni, me ghwọrọ inọke erha fiẹ iyorin phiyọ re.”

17 Mavọ yen e se vwo sun uchọke ra ghwọrọ phiyọ ughe eno? Ẹsosuọ, ka riẹn uchọke ru wọ ghwọrọ vwo ni ayen. Davwen owọẹjẹ nana vwẹ udughwrẹn ọvo. Si inọke ru wọ ghwọrọ vwo ni TV, hiẹ itanẹti yẹrẹ te ividio gemu vwẹ ifonu wẹn phiyọ ikalẹnda. Wo de no nẹ ọke ru wọ ghwọrọ ghini bunọ, gba davwen re wo si oborẹ wọ cha ghwọro ọke wẹn wan phiyotọ. Rhuẹrẹ ọke kẹ erọnvwọn re ma ghanre tavwen, wọ kẹ rhuẹrẹ ọke ru wo che vwo ni ughe. Wo de ru ọyena nu, gba yare ukẹcha ri Jihova rere wọ sa vwọ yan nene ọrhuẹrẹphiyotọ wẹn na. Ọnana cha nẹrhẹ wọ mrẹ ọke vwo ru uyono ri Baibol romobọ, ẹga orua, kpo uyono ji vwobọ vwẹ iruo aghwoghwo na. Ọke yena, udu rhe che bru we siẹrẹ wo de ni ighe-e kidie wọ ghwọrọ ọke ro me bun phiyọ ẹga ri Jihova re.

BRORHIẸN WỌ VWỌ GA JIHOVA ỌVO

18-19. Mavọ yen e se vwo djephia nẹ Jihova ọvo yen avwanre cha ga?

18 Ọke rẹ ọyinkọn Pita vwo si kpahen oghwọrọ rẹ akpọ rẹ Eshu kugbe ẹcha rẹ akpọ kpokpọ na nu, ọ da ta: “Imoni, rẹ ovwan vwọ hẹrhẹ ọnana na, gbe jẹ oruru yena dia ovwan oma rere upe eyẹ ekan vwo jẹ ovwan oma ẹdia, re ovwan dia vwẹ ufuoma.” (2 Pita 3:14) Siẹrẹ avwanre de nene uchebro yena je davwẹngba vwo yeren akpọ ji ga Jihova vwẹ idjerhe rọ rhọnvwephiyọ, kọyen avwanre djephia nẹ Jihova ọvo yen avwanre ga.

19 Eshu vẹ akpọ rọ suẹn na cha davwẹngba vwọ nẹrhe avwanre phi erọnvwọn efa phiyọ ẹdia rẹsosuọ ukperẹ Jihova. (Luk 4:13) Otoro ebẹnbẹn rẹ avwanre hirharoku-u, avwanre cha rhọnvwe nẹ orọnvwọn vuọvo reyọ ẹdia ri Jihova vwẹ akpeyeren avwanre-e. Avwanre brorhiẹn ra vwọ ga Jihova ọvo, kidie ọyen ọvo kpoi yen muwan rẹ ẹga avwanre!

UNE 30 Ọsẹ Mẹ, Ọghẹnẹ Mẹ Kugbe Ugbeyan Mẹ

^ e?ko. 5 Oma ra vwọ ga Jihova vwerhen avwanre. Ẹkẹvuọvo, Jihova ọvo yen avwanre ghene vwẹ ẹga kẹ? A sa mrẹ ẹkpahọnphiyọ rẹ onọ ọnana womarẹ orhiẹn-ebro rẹ avwanre. E je roro kpahen ẹdia ivẹ kiriguo vwẹ akpeyeren rẹ avwanre rọ sa chọn avwanre uko vwọ riẹn sẹ Jihova ọvo yen avwanre ghene ga.

^ e?ko. 53 IDJEDJE RẸ IHOHO: Avwanre cha rhọnvwe riemu re chereri vwẹ ukoni rọ pha gbegbe-e. Ọtiọyena diesorọ re avwanre vwo ni ighe ri titi ozighi, uruemu rẹ orhan yẹrẹ ọfanrhiẹn?