Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 22

Ru Uyono Romobọ Wẹn Yovwinphiyọ!

Ru Uyono Romobọ Wẹn Yovwinphiyọ!

“Ovwan . . . vughe obo ri yovwiri.”—FIL. 1:10.

UNE 35 Tẹnrovi Obo re Ma Ghanre

ỌDJẸKOKO *

1. Diesorọ ọ vwọ bẹn kẹ ihwo evo ayen vwo ru yono romobọ?

NONẸNA, ọ guọnọ ẹgbaẹdavwọn ọgangan ohwo ke sa mrẹ igho vwo yeren akpọ. Iniọvo avwanre wian inọke buebun rere ayen sa vwọ vwẹrote erua rayen. Kẹdẹ kẹdẹ yen efa vwọ ghwọrọ inọke buebun vwo kpo iruo, ji rhivwẹn cha. Evo wian owian ọgangan tavwen ayen ke sa mrẹ igho. Ọtiọyena, oma bru iniọvo avwanre kuẹ vwẹ oba rẹ ẹdẹ na! Ayen rha mrẹ oma vwo ru uyono romobọ-ọ.

2. Ọke vọ yen wo vwo ru uyono romobọ wẹn?

2 Vwọrẹ uyota, ofori nẹ a guọnọ ọke vwọ nabọ yono Ota rẹ Ọghẹnẹ, ẹbe vẹ erọnvwọn efa rẹ ukoko na vwọphia. Ọnana ghanre mamọ kidie ọ sa nẹrhẹ avwanre vwo uvi rẹ oyerinkugbe vẹ Jihova kugbe arhọ rẹ bẹdẹ! (1 Tim. 4:15) Evo ru uyono rayen vwẹ irhiọke, rẹ asan eje vwọ fọ, rẹ ayen je sa vwọ nabọ roro fiotọ. Efa guọnọ ọke rọ fọre vwẹ oba rẹ ẹdẹ na vwo yono, ji roro kpahan Baibol na, ẹbe vẹ erọnvwọn efa rẹ ukoko na vwọphia.

3-4. Ewene vọ yen e ruru vwẹ evuẹ ra vwọphia, diesorọ?

3 Aphro herọ-ọ, wọ cha rhọnvwe nẹ o ghini fo a vwọ guọnọ ọke vwo ru uyono. Ẹkẹvuọvo, die yen avwanre che yono? Wọ sa tanẹ ‘erọnvwọn re che yono bun nọ. Mi che se se ayen re-e.’ Iniọvo evo se se ẹbe ukoko na ejobi, ji ni ividio na eje ra vwọphia, ẹkẹvuọvo, buebun rayen se ru ọtiọye-en. Ẹko Rọvwẹrote na riẹn ọnana. Kọyensorọ ayen vwo si evuẹ rẹ ayen vwọphia vwẹ ẹbe vẹ intanẹti kpotọ.

4 Kerẹ udje, avwanre rha teyan Yearbook of Jehovah’s Witnesses ọfa-a, kidie obo re rhiẹromrẹ ri phiuduphiyọ ohwo awọ vọn jw.org/urh kugbe JW Broadcasting® re ruẹ  kemeranvwe kemeranvwe. Enẹna, abọ erha ẹgbukpe yen a teyan Uwevwin Orhẹrẹ re phiẹ phiyọ ada vẹ Awake! na phia. Ọ dia e ru ewene nana rere avwanre vwọ mrẹ ọke vwo ru erọnvwọn efa-a. E ru ewene na rere avwanre vwọ mrẹ ọke vwo ru “obo ri yovwiri,” yẹrẹ obo re ma ghanre. (Fil. 1:10) E jẹ a ta ota kpahen obo wọ sa vwọ riẹn obo re ma ghanre vẹ obo wọ sa vwọ mrẹ erere vọnvọn vwo nẹ uyono rẹ Baibol romobọ.

RIẸN OBO RE MA GHANRE

5-6. Ẹbe vọ yen avwanre cha frẹkotọ yono?

5 Die yen avwanre yono ẹsosuọ? Ofori avwanre vwọ ghwọrọ ọke vwo yono Ota rẹ Ọghẹnẹ kẹdẹ kẹdẹ. E ji si ẹkpo rẹ Baibol rẹ uyono rẹ uvwre rẹ udughwrẹn na kpotọ rere a sa vwọ mrẹ ọke vwo roro, ji ru ehiahiẹ efa. Ọdavwẹ rẹ avwanre, dia e di vwo se ẹkpo rẹ Baibol na re-e, ẹkẹvuọvo, rere ovuẹ rẹ Baibol na se vwo te ubiudu rẹ avwanre, ji si avwanre kẹre Jihova.—Une 19:14.

6 Die ọfa yen avwanre cha frẹkotọ yono? Ofori avwanre vwo muegbe rẹ uyono rẹ Uwevwin Orhẹrẹ na, Uyono rẹ Baibol Rukoko vẹ erọnvwọn efa vwẹ uyono rẹ uvwre rẹ udughwrẹn na. Avwanre ji se yono Uwevwin Orhẹrẹ re phiẹ phiyọ ada vẹ Awake! na.

7. Ofori nẹ ofu dje avwanre kidie nẹ e se se, ji ni erọnvwọn ejobi ra vwọphia vwẹ wẹbsaiti vẹ JW Broadcasting rẹ avwanre-e?

7 ‘O shephiyọ, ẹkẹvuọvo, kẹ evuẹ vẹ ividio ra vwọphia vwẹ jw.org/urh vẹ JW Broadcasting® vwo? Ayen pha buebun! Roro kpahen udje nana: Vwẹ eki a da shẹ oka rẹ emamọ sansan, ohwo rọ guọnọ dẹ na cha ghwa sa dẹ oka rẹ emamọ eje ra shẹ na-a. Ukperẹ ọtiọyen, ọ cha sane i ri jere. Vwẹ idjerhe vuọvo na, ọ da dianẹ wo che se se yẹrẹ ni erọnvwọn eje ra vwọphia vwẹ intanẹti-i, wo jẹ ofu dje we-e. Se yẹrẹ ni oborẹ ẹgba wẹn muru. E gbe jẹ avwanre ta ota kpahen oborẹ uyono churobọ si vẹ obo ra sa vwọ mrẹ erere vọnvọn norhe.

UYONO ỌYEN OWIAN!

8. Owọẹjẹ vọ yen avwanre cha reyọ ọke re de yono Uwevwin Orhẹrẹ re yono na, mavọ yen ọyena se vwo fierere kẹ wẹ?

8 E vwo yono mudiaphiyọ wo vwo mu ẹwẹn phiyọ obo wo se na rere wo se vwo yono emu kpokpọ. Ọ vrẹ e di vwo brokpakpa se asan na, ji jokaphiyọ ẹkpahọnphiyọ na. Kerẹ udje, wo de muegbe rẹ Uwevwin Orhẹrẹ re yono na, ke se ọdjẹkoko na. Wo de ru ọyena nu, gbe roro kpahen uyovwinrota na, iyovwinreta itete vẹ enọ rẹ ẹrhomafuẹrẹn na. Gbe se ẹkoreta na ememerha. Vwo oniso rẹ urhiẹ eta rẹsosuọ vwẹ ẹkorota ọvuọvo rọ djẹ ẹkorota yena koko. Ọke buebun, urhiẹ eta yena yen ton ẹkorota na phiyọ. Urhiẹ eta yena cha vwẹ ukẹcha kẹ wẹ vwọ riẹn oborẹ ẹkorota na ta ota kpahen. Wo vwo se yanran na, roro kpahen oborẹ ẹkorota ọvuọvo churobọ si iyovwinreta itete vẹ uyovwinrota rẹ uyono na. Jokaphiyọ eta vẹ ẹkpo wo ghwe vwo ẹruọ raye-en, ru wọ je guọnọ ru ehiahiẹ kpahen.

9. (a) Diesorọ o vwo fo nẹ a nabọ jokaphiyọ ẹkpo rẹ Baibol na eje ọke re de yono ọbe Uwevwin Orhẹrẹ na, mavọ yen e che ruo wan? (b) Kirobo re djunute vwẹ Joshua 1:8, die ọfa yen avwanre ji che ru vwọba ese rẹ Baibol na?

 9 Uyono rẹ ọbe Uwevwin Orhẹrẹ na chọn avwanre uko vwo vwo ẹruọ rẹ Baibol na. Ọtiọyena, gba nabọ jokaphiyọ ẹkpo rẹ Baibol na eje, ma rho kẹ e re che se vwẹ uyono na. Nabọ jokaphiyọ oborẹ ẹkpo ra vwẹ fiki rọyen vwo se Baibol na kanrunumu ẹkpo re yono vwẹ ẹkorota yena. Vwọba, ghwọrọ ọke vwo roro kpahen ẹkpo rẹ Baibol ru wo seri, wo mi ji roro kokodo kpahen obo wọ sa vwọ reyọ vwọba akpọ yerin.—Se Joshua 1:8.

Emiọvwọn, yono emọ wẹn obo re ruẹ uyono (Ni ẹkorota 10) *

10. Vwo nene obo rehẹ Hibru 5:14, diesorọ o vwo fo nẹ emiọvwọn ghwọrọ ọke vwo yono emọ na obo re ru uyono vẹ ehiahiẹ ọke re de ru ẹga orua?

10 Emiọvwọn guọnọre nẹ emọ rayen riavwerhen rẹ Ẹga Orua rẹ kudughwrẹn kudughwrẹn na. Dede nẹ ofori nẹ emiọvwọn riẹn erọnvwọn rẹ ayen che vwo ru uyono na, jẹ ọ dia kudughwrẹn kudughwrẹn yen ayen che vwo ru ọrhuẹrẹphiyotọ rẹ oghẹrẹsan vwọ kẹ ẹga rẹ orua na-a. Dede nẹ e se ni JW Broadcasting vwẹ ọke rẹ Ẹga Orua na yẹrẹ ru erọnvwọn kerẹ a vwọ bọn okọ rẹ Noa na ọkievo, o ji fo nẹ e yono emọ na obo re ru uyono. Kerẹ udje, o fori e vwo yono ayen obo re muegbe kẹ uyono, yẹrẹ obo re ru ehiahiẹ wan kpahen eta re vwomaphia vwẹ isikuru. (Se Hibru 5:14.) Ayen da ghwọrọ ọke vwo yono iyovwinreta ri shekpahen Baibol na vwẹ uwevwin, ọ cha chọn ayen uko vwọ nabọ kerhọ vwẹ uyono, osikoko, vẹ ọghwẹkoko, ma rho ọ da dianẹ e hworo ividio-o. Vwọrẹ uyota, edje vẹ uruemu rẹ emọ na yen e che ni vwo brorhiẹn rẹ uchọke rẹ uyono na che gron te.

11. Diesorọ ọ vwọ ghanre re vwo yono ihwo rẹ avwanre vwẹ Baibol yono obo re ruẹ uyono romobọ ro fiotọ?

11 O ji fo nẹ e dje obo re ruẹ uyono wan kẹ ihwo rẹ avwanre vwẹ Baibol yono. Ayen da ghwa tonphiyọ obọ, oma vwerhen avwanre siẹrẹ ayen da jokaphiyọ ẹkpahọnphiyọ ọke rẹ ayen de muegbe vwọ kẹ uyono rayen yẹrẹ emẹvwa. Ẹkẹvuọvo, ofori nẹ e yono ayen obo re ru ehiahiẹ wan vẹ oborẹ ayen se vwo ru uyono romobọ rọ nabọ ghwotọ. Vwẹ idjerhe tiọyena, ukperẹ ayen wo brokpakpa bru iniọvo efa ra vwọ kẹ ukẹcha siẹrẹ ayen de vwo ebẹnbẹn, ayen riẹn asan rẹ ayen cha ra vwọ kẹ uvi rẹ uchebro.

VWO OBO WỌ TẸNROVI VWẸ UYONO WẸN

12. Die yen avwanre sa tẹnrovi ọke re de ru uyono?

12 Wọ rha dia ohwo ro vwo ẹguọnọ rẹ uyono-o, wo se roro nẹ ọ cha bẹn wọ vwọ riavwerhen rẹ uyono. Ẹkẹvuọvo, wọ sa riavwerhen rọyen. Wo se ruo kprẹn vwẹ ọtonphiyọ, ọke vwo yanran na, jẹ wo ruẹ ọke na gron phiyọ. Vwo obo wọ tẹnrovi  vwẹ uyono na. Vwọrẹ uyota, obo re ma kenu rẹ avwanre cha tẹnrovi, ọyen e vwo sikẹre Jihova ọkeneje. Orọnvwọn ọfa ra sa tẹnrovi kpakpata yen ẹkpahọnphiyọ rẹ onọ rẹ ohwo ọvo nọre yẹrẹ ru ehiahiẹ kpahen ebẹnbẹn ọvo rẹ avwanre hirharoku.

13. (a) Djekpahen owọẹjẹ rẹ eghene sa reyọ vwọ chochọn rẹ esegbuyota rọyen. (b) Mavọ yen wo se vwo ru nene uchebro rọhẹ Kọlose 4:6?

13 Kerẹ udje, wẹwẹ eghene rọhẹ isikuru? Emọ rẹ iklasi wẹn se se uyono rẹ ohworakpọ mamarhe gbuyota. Ọ sa dianẹ wo vwo ẹwẹn wọ vwọ chochọn rẹ esegbuyota wẹn, jẹ wo niro nẹ wo muwa-an. Ọ da dia ọtiọyen, kọyen wọ guọnọ uyono! Vwevunrẹ uyono wẹn, wo se vwo erọnvwọn ivẹ wọ tẹnrovi: (1) ru imuẹro wẹn kpahen Ọmemama na ganphiyọ (2) tẹn ona rẹ obo wọ vwọ chochọn rẹ esegbuyota wẹn. (Rom 1:20; 1 Pita 3:15) Wọ sa nọ oma wẹn, ‘Die yen ọmọ iklasi mẹ vwọ chochọn rẹ esegbuyota rọyen kpahen erọnvwọn mamarhe?’ Gba reyọ ẹbe vẹ erọnvwọn efa rẹ ukoko na vwọphia vwo ru ehiahiẹ. Ọke yena kọ cha lọhọ wọ vwọ chochọn rẹ esegbuyota wẹn. Buebun rẹ ihwo vwo imuẹro kpahen uyono rẹ erọnvwọn mamarhe kidie ohwo rẹ ayen muọghọ kẹ yen vuẹ ayen. Wọ da sa hiẹ mrẹ ẹkpo ọvo yẹrẹ ivẹ, ọke yena kẹ wọ sa kpahen kẹ ohwo rọ ghene guọnọ riẹn vwẹ idjerhe ro de te ubiudu rọyen.—Se Kọlose 4:6.

JẸ OMA RẸ UYONO VWERHEN OWẸ

14-16. (a) Mavọ yen wo se vwo vwo ẹruọ rẹ ọbe rẹ Baibol ru wọ ghwa riẹn kpahe-en? (b) Reyọ ẹkpo rẹ Baibol re djunute na vwo dje oborẹ wo se vwo vwo ẹruọ rẹ ikuegbe rọhẹ ọbe rẹ Emọs. (Ji ni ekpeti na “Nabọ Vwo Ẹruọ rẹ Baibol Na.”)

14 Vwẹ ẹwẹn roro nẹ vwẹ uyono ọvo re che ru, avwanre cha ta ota kpahen ọvo usun rẹ emraro rẹ avwanre seri nẹ emraro itete na, ọ sa dianẹ wọ ghwa riẹn kpahen ọmraro yena-a. Emu rẹsosuọ wo se ru yen, dje omavwerhovwẹn phia kpahen oborẹ ọmraro yena siri. Mavọ wo se vwo ru ọtiọyen?

15 Ẹsosuọ, nọ oma wẹn: ‘Die yen me riẹn kpahen ohwo ro si ọbe na? Ono yen ohwo na, tivọ yen ọ diare, iruo vọ yen o ruru?’ Siẹrẹ wọ da riẹn erọnvwọn nana kpahen ohwo ro si ọbe na, ku wo se vwo ẹruọ rẹ eta evo vẹ idje ro vwo ruiruo. Wo vwo se Baibol na, jokaphiyọ eta ri dje uruemu ro rhe ohwo na.

16 Wo de ru ọyena nu, wọ sa hiẹ guọnọ ọke re vwo si ọbe na. Wo sa mrẹ vwẹ “Table of the Books of the Bible” rọhẹ obuko rẹ New World Translation of the Holy Scriptures. Vwọba, wọ sa rhoma fuẹrẹn ishati ro dje edẹ rẹ emraro vẹ ivie vwẹ Appendix A6. Ọ da dia ọbe rẹ Baibol rọ ta ota kpahen aroẹmrẹ, wọ sa hiẹ guọnọ oborẹ akpeyeren hepha vwọ kẹ ihwo ri yerin vwẹ ọke yena. Orharhe rẹ uruemu vọ yen a vuẹ ọmraro na nẹ ọ ra kpọvi? Ihwo vọ yen yerin uvwre ọke rẹ ọmraro na vwọ herọ? Rere wo se vwo vwẹ ẹruọ rẹ ẹdia na fiotọ, wọ sa fuẹrẹn ẹbe rẹ Baibol efa. Kerẹ udje, rere wo vwo vwo ẹruọ rẹ obo re phiare ọke rẹ ọmraro Emọs vwo yerin, wo se se ọbe rẹ 2 Ivie vẹ 2 Ikun Rivie ra rionbọ ra vwẹ Emọs 1:1, vwẹ New World Translation of the Holy Scriptures. Vwọba, wọ je sa fuẹrẹn isiesi rẹ Hosia, rọ sa dianẹ o yerin uvwre rẹ ọke ọvuọvo vẹ Emọs. Ehiahiẹ nana eje sa chọn wẹ uko vwo vwo ẹruọ rẹ oborẹ akpeyeren hepha vwẹ ọke rẹ Emọs.—2 Ivie 14:25-28; 2 Ikun 26:1-15; Hos. 1:1-11; Emọs 1:1.

VWO ONISO RẸ EVUẸ ITETE

17-18. Reyọ idje re djunute na yẹrẹ ọ robọ wẹn vwo djephia nẹ e vwo vwo oniso rẹ evuẹ itete nẹrhẹ uyono rẹ Baibol romobọ vwerhan.

17 Ofori nẹ e vwo urhurhusivwe re vwo yono erọnvwọn efa ọke rẹ avwanre de se Baibol na. Vwẹro roro nẹ wo se uyovwin 12 rẹ aroẹmrẹ rẹ Zekaraya, rọ ta ota kpahen ughwu rẹ Mesaya na. (Zek. 12:10) Wo vwo se te owọ 12, wo de noso nẹ ọ tare nẹ, “ekru rẹ uwevwi ri Netan” che muomaphiyọ ọke rẹ Measaya na de ghwu nu. Ukperẹ wọ vwọ kpairoro vrẹn ovuẹ otete yena, wọ sa fọ, ji nọ oma wẹn: ‘Mavọ yen uwevwin rẹ Netan vwo churobọ si Mesaya na? A sa mrẹ evuẹ efa vwẹ asan ọfa?’ Wọ da davwẹngba vwo ru ehiahiẹ emerha. Asan ra rionbọ ra vwẹ Zek. 12:12 de mu we kpo 2 Samuẹl 5:13, 14, rọ tare nẹ, Netan ọyen ọvo usun rẹ emọ rẹ Ovie Devid. Asan ọfa rẹ Zek. 12:12 je rionbọ ra yen Luk 3:23, 31 ro djerephia nẹ Netan ọyen ọsẹ rode rẹ Jesu womarẹ Meri. (Ni “Joseph, son of Heli,” rọhẹ odjefiotọ rẹ Luk 3:23.) Ọnana vwerhen owẹ oma! Wọ mrẹvughe nẹ a mraro rọyen nẹ Jesu che nẹ uvwiẹ rẹ Devid rhe. (Mat. 22:42) Ẹkẹvuọvo, Devid vwo emeshare re vrẹ 20. O gbe ohwo unu nẹ Zekaraya ghwe se odẹ rẹ uwevwin rẹ Netan gbian nẹ ọyen che muomaphiyọ ọke rẹ Jesu de ghwu?

18 Roro kpahen udje ọfa. Vwẹ uyovwin rẹsosuọ rẹ ọbe rẹ Luk, avwanre seri nẹ amakashe Gabriẹl bru Meri ra, ọ da vuẹ orọnvwọn ọvo kpahen ọmọshare ro che vwiẹ na: “Ọ cha rho, ke se Ọmọ rẹ Ọro Mekpenu; Ọrovwohwo Ọghẹnẹ kọ vwẹ ekete ri Devid ọsẹ rọye vwọ kẹ, Kọ re vwẹ enu rẹ uwevwi ri Jekọp bẹdẹ.”  (Luk 1:32, 33) Avwanre sa tẹnrovi ẹbẹre rẹsosuọ rẹ ovuẹ rẹ Gabriẹl na rọ tare nẹ, e che se Jesu “Ọmọ rẹ Ọro Mekpenu” na. Ẹkẹvuọvo Gabriẹl je tanẹ, Jesu cha “re” yẹrẹ sun kerẹ Ovie. Avwanre sa nọ: Die yen eta rẹ Gabriẹl na mudiaphiyọ vwọ kẹ Meri? Meri rorori nẹ eta rẹ Gabriẹl na mudiaphiyọ nẹ Jesu cha reyọ ẹdia rẹ Ovie Hẹrọd, yẹrẹ ẹdia rẹ ọvo usun rẹ emọ rọyen re cha dia isun vwẹ Izrẹl? Siẹrẹ Jesu da dia ovie, Meri kọ cha dia oni rẹ ovie, orua rọyen kọ cha dia evunrẹ egodo rẹ ovie na. Jẹ, o vwo asan vuọvo re siro phiyọ vwẹ Baibol na nẹ Meri ta oka rẹ eta tiọye-en, yẹrẹ nẹ kọ nokpẹn rẹ ẹdia ọvo vwẹ Uvie na kirobo rẹ idibo rẹ Jesu ivẹ ruru-u. (Mat. 20:20-23) Evuẹ nana nẹrhẹ imuẹro rẹ avwanre ganphiyọ nẹ Meri ghene aye rọ vwomakpotọ!

19-20. Kirobo rẹ e djisẹ rọyen vwẹ Jems 1:22-25 vẹ 4:8, die yen avwanre cha tẹnrovi ọke re de yono?

19 E jẹ avwanre karophiyọ nẹ obo re ma kenu rẹ avwanre cha tẹnrovi ọke re de yono Ota rẹ Ọghẹnẹ, yen e vwo sikẹre Jihova ọkeneje. O ji fo nẹ e ni “oma” rẹ avwanre fiotọ yẹrẹ vughe oka rẹ ohwo rẹ avwanre hepha, ji ru ewene ri fori rere e se vwo ru obo re vwerhen Ọghẹnẹ ivun. (Se Jems 1:22-25; 4:8.) Yare ukẹcha rẹ ẹwẹn ọfuanfon rẹ Jihova vwẹ ọtonphiyọ rẹ uyono na. Nẹrhovwo rhe nẹ ọ chọn wẹ uko vwọ mrẹ erere vọnvọn vwo nẹ uyono na, ji ru ewene ri fori.

20 E jẹ avwanre dia kerẹ ọshare rẹ ọbuine na djeri nẹ “o vwo aghọghọ vwẹ evun rẹ urhi rẹ Ọrovwohwo urhi rọye na kọye o roro te ason te uvo. . . . Kemu kemu ro ruru ejobi, ko yovwi kẹ.”—Une 1:2, 3.

UNE 88 Ju Vwe Riẹn Idjerhe Wẹn

^ e?ko. 5 Jihova kẹ avwanre erọnvwọn buebun re ni, se, ji yono. Uyono nana cha vwẹ ukẹcha kẹ wẹ vwọ riẹn obo wo che yono, ọ je cha vwẹ iroroẹjẹ phia kpahen obo wọ sa vwọ mrẹ erere rẹ uyono romobọ wẹn.

^ e?ko. 61 IDJEDJE RẸ UHOHO: Emiọvwọn yono emọ rayen oborẹ ayen se vwo muegbe rẹ Uyono rẹ ọbe Uwevwin Orhẹrẹ rẹ kudughwrẹn kudughwrẹn.

^ e?ko. 63 IDJEDJE RẸ UHOHO: Oniọvo ọshare ro ruẹ ehiahiẹ kpahen Emọs, rọ dia ohwo ro si ọbe rẹ Baibol yena. Ihoho rehẹ obuko na yen ihoho rẹ oborẹ oniọvo na roro kpahan ọke ro vwo se ikuegbe rẹ Baibol evo.