Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 11

Kerhọ rẹ Urhuru rẹ Jihova

Kerhọ rẹ Urhuru rẹ Jihova

“Ọnana hẹ ọmọ mẹ . . . we nyo ota rọye.”—MAT. 17:5.

UNE 89 Kerhọ, Nyẹme, Wọ Mrẹ Ebruphiyọ

ỌDJẸKOKO *

1-2. (a) Erhọ yen idjerhe evo rẹ Jihova wan ta ota kẹ ihworakpọ vwẹ ọke awanre? (b) Die yen a cha ta ota kpahen vwẹ uyono nana?

JIHOVA vwo omavwerhovwẹn rọ vwọ ta ota kẹ avwanre. Ọ vwẹ emraro, emekashe, kugbe Jesu Kristi, vwo dje iroro rọyen kẹ ihworakpọ vwẹ ọke awanre. (Emọs 3:7; Gal. 3:19; Ẹvwọ. 1:1) Ẹkẹvuọvo, Baibol na yen ọ vwọ ta ota kẹ avwanre nonẹna. Baibol na chọn avwanre uko vwọ riẹn iroro vẹ idjerhe rẹ Jihova.

2 Jihova ta ota nẹ odjuvwu rhe abọ erha, ọke rẹ Jesu vwọ hẹ otọrakpọ na. E jẹ avwanre fuẹrẹn obo rọ tare, obo re se yono nẹ eta rọyen rhe, kugbe oborẹ eta rọyen na se vwo fierere kẹ avwanre nonẹna.

“WỌWẸ HẸ ỌMỌ MẸ RO JEVWE”

3. Kirobo rẹ avwanre seri vwẹ Mak 1:9-11, die yen Jihova tare ọke re vwo bru Jesu phiyame, kẹ uyota vọ yen teyenphia vwevunrẹ ota rọyen?

3 Mak 1:9-11 niyẹnrẹn rẹ obo re phiare ọke rẹsosuọ rẹ Jihova vwọ ta ota nẹ odjuvwu rhe. (Se.) Ọ da ta: “Wọwẹ hẹ Ọmọ Mẹ ro jevwe rẹ ivun rọye vwerhe ovwẹ.” O muẹro nẹ oma nabọ vwerhen Jesu ọke rẹ Ọsẹ rọyen vwọ ta obo ro vwo ẹguọnọ rọyen te. Uyota erha kiriguo teyenphia vwevunrẹ ota rẹ Jihova na. Ẹsosuọ, Jesu ọyen Ọmọ rọyen. Ọrivẹ, Jihova vwo ẹguọnọ rẹ Ọmọ rọyen na. Ọrerha, ivun rọyen vwerhọn. E gbe jẹ a nabọ fuẹrẹn ayen ọvuọvo.

4. Oyerinkugbe oghẹresan vọ yen Jihova vẹ Jesu rhi vwo ọke ro vwo bromaphiyame nu?

4 “Wọwẹ hẹ Ọmọ mẹ.” Eta yena djerephia nẹ Jesu rhi vwo oyerinkugbe oghẹresan vẹ Jihova re. Jesu ọyen  Ọmọ rẹ Ọghẹnẹ tavwen ọ ke rhe otọrakpọ na. Ẹkẹvuọvo, ọke ro vwo bromaphiyame, Ọghẹnẹ da vwẹ ẹwẹn ọfuanfon rọyen vwọ jẹreyọ. Ọke yena, Ọghẹnẹ de djephia nẹ Jesu ọyen Ọmọ rọyen rọ jẹreyọ. O de rhi vwo iphiẹrophiyọ ro vwo rhivwin kpo obo odjuvwu, ra dia Ovie kugbe Orheren Rode. (Luk 1:31-33; Hib. 1:8, 9; 2:17) Kọyensorọ Ọsẹ rọyen vwọ vuẹ eta nana ọke ro vwo bromaphiyame nu: “Wẹ ọmọ mẹ.”—Luk 3:22.

Oma vwerhen avwanre siẹrẹ e de jiri ji bọn avwanre gan (Ni ẹkorota 5) *

5. Mavọ yen avwanre sa vwọ vwẹrokere Jihova vwo jiri ihwo, ji dje ẹguọnọ kẹ ayen?

5 “Wọwẹ . . . ro jevwe.” Eta esiri rẹ Jihova vwo dje ẹguọnọ kẹ ọmọ rọyen, nẹrhẹ avwanre karophiyọ nẹ ofori a vwọ vwẹ kuphẹn kuphẹn ro rhiephiyọ vwọ bọn ihwo efa gan. (Jọn 5:20) Oma vwerhen avwanre siẹrẹ ugbeyan yẹrẹ ohwo rẹ orua de dje ẹguọnọ kẹ avwanre, ji jiri avwanre fikirẹ emu esiri ọvo rẹ avwanre ruru. Ọtiọyena, ko fori nẹ e dje ẹguọnọ kẹ ihwo rẹ orua rẹ avwanre kugbe iniọvo rẹ ukoko na, a me je vwẹ eta esiri vwọ bọn ayen gan. Ujiri rẹ avwanre cha vwọ kẹ ihwo efa na cha bọn esegbuyota rayen gan je chọn ayen uko vwọ fuevun kẹ Jihova. Ofori nẹ emiọvwọn bọn emọ rayen gan. Emọ che ru yovwinphiyọ siẹrẹ emiọvwọn da nabọ davwẹngba vwo jiri ayen, ji dje ẹguọnọ kẹ ayen.

6. Diesorọ avwanre vwọ vwẹroso Jesu?

6 “Ivun [wẹn] vwerhe ovwẹ.” Eta yena djerephia nẹ Jihova vwẹroso Jesu nẹ o che ru orugba rẹ ọhọre rẹ Ọsẹ rọyen. Rọ vwọ dianẹ Jihova vwẹroso Ọmọ rọyen na, avwanre je sa vwẹrosuọ nẹ o che ru ive rẹ Jihova eje gba. (2 Kọr. 1:20) Avwanre da nabọ fuẹrẹn udje rẹ Jesu, ọyena cha nẹrhẹ avwanre  sa yọnrọn orhiẹn rẹ avwanre bruru kokoroko nẹ avwanre cha vwẹrokere. Kirobo rẹ Jihova vwẹroso Jesu, ọtiọyen ọ je vwẹroso idibo rọyen eje kerẹ ẹko, nẹ ayen che nene udje rẹ Ọmọ rọyen ọkieje.—1 Pita 2:21.

“WE NYO OTA RỌYE”

7. Vwo nene obo ra niyẹnrẹn rọyen vwẹ Matiu 17:1-5, ọke vọ yen Jihova vwọ ta ota nẹ odjuvwu rhe, kẹ die yen ọ tare?

7 Se Matiu 17:1-5. Jihova ta ota nẹ odjuvwu rhe obọ rivẹ ọke rẹ Jesu vwo “wene oma.” Jesu reyọ Pita, Jems, kugbe Jọn nene oma kpo enu rẹ ugbenu ọvo. Ọke rẹ ayen vwọ hẹ etiyin, a da vwẹ emramrẹ igbevwunu ọvo vwọ nẹ ayen. Opharo rẹ Jesu ko lo wrowro kere ọnre, iwun rọyen ke fuan popo. Ihwo ivẹ re họhọ Mosis vẹ Ilaija ke nene Jesu ta ota kpahen ughwu vẹ evrẹnushi rọyen. Dede nẹ “ovwerhẹ” sun iyinkọn erha na, jẹ ayen gege ẹro vi re, ọke rẹ ayen vwọ mrẹ emramrẹ na. (Luk 9:29-32) Siẹvuọvo na, egho rode de rhuru ayen, ayen de ji nyo urhuru rẹ Ọghẹnẹ! Kirobo rẹ Jihova dje oborẹ ivun rẹ Ọmọ rọyen vwerhenrọ te ọke re vwo bro phiyame nu, eriyin o ji ru udje nana, rọ vwọ ta: “Ọnana hẹ ọmọ mẹ [ro] je vwe na, rẹ ivun rọye vwerha ovwẹ.” Vwọba, ọ da je ta: “We nyo ota rọye.”

8. Mavọ yen emramrẹ na djobọte Jesu vẹ idibo rọyen wan?

8 Emramrẹ yena ghwe dje oka rẹ urinrin vẹ ẹgba rẹ Jesu che vwo ọke ro che vwo sun kerẹ Ovie rẹ Uvie rẹ Ọghẹnẹ. O muẹro nẹ eta yena nẹrhẹ Jesu se vwo ẹgba ro vwo chirakon rẹ ojaẹriọ vẹ ughwu ro rhi rhiẹromrẹ ukuotọ rọyen. Emramrẹ yena bọn esegbuyota rẹ idibo rọyen gan. Ọ chọn ayen uko vwo muegbe hẹrhẹ edavwini vẹ iruo ọgangan rẹ ayen che ru vwẹ obaro. Omarẹ ẹgbukpe 30 vwọ wan nu, ọyinkọn Pita da rionbọ kpo emramrẹ rẹ oma ewene na, ro djerephia nẹ ọ je nabọ karophiyọ.—2 Pita 1:16-18.

9. Uchebro ọghanghanre vọ yen Jesu vwọ kẹ idibo rọyen?

9 “We nyo ota rọye.” Jihova tarọ phephẹn nẹ a kerhọ je nyo urhuru rẹ Ọmọ rọyen. Die yen Jesu tare ọke rọ vwọ hẹ otọrakpọ na? Ọ ta eta buebun ro fori nẹ a kerhọ rọyen! Kerẹ udje, o yono idibo rọyen oborẹ ayen che ghwoghwo iyẹnrẹn esiri na wan, ọ je karophiyọ ayen abọ ibro nẹ ayen rhẹrẹ. (Mat. 24:42; 28:19, 20) Ọ vuẹ ayen nẹ ayen pharhe, o de ji bru ayen uche nẹ e jẹ oma rhọ aye-en. (Luk 13:24) Jesu kanrunumu oboresorọ idibo rọyen vwo vwo ẹguọnọ rẹ ohwohwo, kuomakugbe, ji nene iji rọyen. (Jọn 15:10, 12, 13) Uchebro rẹ Jesu vwọ kẹ idibo rọyen na pha ghanghanre! Ọ je ghanre kẹ avwanre nonẹna kirobo rọ hepha vwẹ ọke rẹ Jesu.

10-11. Mavọ yen e se vwo djephia nẹ avwanre nyo urhuru rẹ Jesu?

10 Jesu da ta: “Kohwo kohwo rọ dia ọ rẹ uyota na ko nyo urhuru mẹ.” (Jọn 18:37) Avwanre se djephia nẹ a kerhọ rẹ urhuru rẹ Jesu siẹrẹ “ohwohwo [de] chirako kẹ ohwohwo, [je] fobọ si ophu nẹ evun.” (Kọl. 3:13; Luk 17:3, 4) Avwanre ji se djephia nẹ avwanre kerhọ rẹ urhuru rọyen siẹrẹ e de muomaphiyọ iruo rẹ aghwoghwo rẹ iyẹnrẹn esiri na vwẹ “evwru eyẹ ọke epherẹ.”—2 Tim. 4:2.

11 Jesu da ta: “Igodẹ mẹ nyo urhuru mẹ.” (Jọn 10:27) Idibo rẹ Jesu djerephia nẹ ayen nyo urhuru rẹ Jesu, ayen  vwọ kerhọ ji ruẹ nene ota rọyen. Ayen vwẹ uphẹn kẹ “ẹnwan rẹ akpọ nana” nẹ o mu ayen reyọ-ọ. (Luk 21:34) Ukperẹ ọtiọyen, ayen niro nẹ ọ pha ghanghanre rẹ ayen vwo nene iji rẹ Jesu, tobọ vwẹ ọke rọ vwọ bẹn kẹ ayen dede. Iniọvo rẹ avwanre buebun chirakon rẹ edavwini egangan, ẹvwọsuọ, ọbẹnvwẹ, kugbe oghwọrọ ri kpregede. Dedena, ayen je sẹro rẹ evun-ẹfuọn rayen, o toro oja rẹ ayen rere-e. Jesu kẹ ayen imuẹro nana: “Ohwo rọ yọnrọn irhi mẹ rọ da sẹro rẹ ayen, oyẹ hẹ ohwo rọ guọnọ ovwẹ; ohwo rọ guọnọ ovwẹ Ọsẹ mẹ kọ guọnọ, ke me guọnọ ke me vwẹ oma mẹ phia kẹ.”—Jọn 14:21.

Iruo rẹ aghwoghwo na nẹrhẹ a tẹnroviẹ obo re ma ghanre (Ni ẹkorota 12) *

12. Ọrhọ yen idjerhe ọfa re se vwo djephia nẹ avwanre nyo urhuru rẹ Jesu?

12 Idjerhe ọfa re se vwo djephia nẹ avwanre nyo urhuru rẹ Jesu, ọyen ra vwọ vwomakpotọ kẹ ihwo re vwo mu vwevunrẹ ukoko na. (Hib. 13:7, 17) O krinọ-ọ na, ukoko na de ru ewene sansan ri churobọ si ena vẹ ekuakua rẹ avwanre vwo ruiruo rẹ aghwoghwo na, ona re vwo ruẹ uyono rẹ uvwre rẹ udughwrẹn, kugbe ona ra vwọ bọn, rhuẹrẹ, je vwẹrote Eguan Ruvie. Oma vwerhen avwanre fikirẹ uvi rẹ odjekẹ nana eje ra vwọ kẹ avwanre! O muẹro nẹ Jihova che bruba kẹ ẹgbaẹdavwọn rẹ avwanre vwo nene odjekẹ rẹ ukoko na.

13. Erere vọ yen avwanre cha mrẹ siẹrẹ a da kerhọ rẹ Jesu?

13 Avwanre mrẹ erere siẹrẹ a da kerhọ rẹ iyono rẹ Jesu. Jesu vwẹ imuẹro kẹ idibo rọyen nẹ iyono rọyen cha nẹrhẹ ayen vwo ufuoma. Ọtiọyena, ọ da ta: “Wọ mrẹ ufuoma vwọ kẹ erhi wẹn. Kidie urhekpe mẹ pha frae, oghwa mẹ ọ phapharhe.” (Mat. 11:28-30) Baibol na, ra niyẹnrẹn rẹ ikuegbe rẹ akpeyeren rẹ Jesu phiyọ na sa kẹ avwanre ufuoma vẹ aghwanre. (Une 19:7; 23:3) Jesu da ta: “Ebruba kẹ ihwo ri nyo eta rẹ Ọghẹnẹ re da yọnrọn.”—Luk 11:28.

‘ME CHA VWẸ URINRIN KẸ ODẸ MẸ’

14-15. (a) Kirobo rẹ Jọn 12:27, 28 tare, ọke vọ yen Jihova vwọ ta ota nẹ odjuvwu rhe vwẹ obọ rerha? (b) Diesorọ eta rẹ Jihova na sa vwọ bọn Jesu gan?

14 Se Jọn 12:27, 28. Iyẹnrẹn rẹ Jọn djunute obọ rerha rẹ Jihova vwọ ta ota nẹ odjuvwu rhe. Ẹdẹ ibro tavwen Jesu ki ghwu, o de kpo Jerusalẹm ra  re orẹ Ọwanvrẹ rọ koba rọyen. Ọ da ta: “Ẹwẹn mẹ ko kpogho.” Ọtiọyena, ọ da nẹrhovwo: “Ọsẹ, vwẹ urinrin kẹ odẹ wẹn.” Ọsẹ rọyen da kpahen kẹ nẹ odjuvwu rhe: “Me vwẹ urinrin kẹ nure, me je rhoma vwẹ urinrin kẹ.”

15 Ẹwẹn kpokpo Jesu mamọ fikirẹ oghwa rode rọ vwọ fuevun kẹ Jihova te oba. Jesu riẹnre nẹ ọyen cha rioja rẹ ehwe ọgangan ji ghwu ughwu rẹ oja. (Mat. 26:38) Obo re ma ghanre kẹ Jesu, ọyen rọ vwọ vwẹ urinrin kẹ odẹ rẹ Jihova. E gun efian nyẹ nẹ ọ ta eta rẹ ẹgua. Ọ je ro ẹnwan kpahen oborẹ ughwu rọyen sa hwarhiẹ ekan vwo rhe Ọghẹnẹ. Jẹ, o muẹro nẹ eta rẹ Jihova na bọn rọ gan! Ọtiọyena, o de rhi vwo imuẹro nẹ Jihova cha vwẹ urinrin kẹ odẹ rọyen. Eta rẹ Jihova nabọ bọn Jesu gan, ọ da nẹrhẹ o se chirakon rẹ oja ro hirharoku. Dede nẹ Jesu ọvo yen vwo ẹruọ rẹ oborẹ Ọsẹ rọyen tare na, Jihova ruro re vwo si eta rọyen na phiyotọ kẹ avwanre.—Jọn 12:29, 30.

Jihova cha vwẹ urinrin kẹ odẹ rọyen ji sivwin ihwo rọyen (Ni ẹkorota 16) *

16. Diesorọ ẹwẹn vwo kpokpo avwanre ọke evo fikirẹ ekan ra hwarhiẹ vwo rhe odẹ rẹ Ọghẹnẹ?

16 Avwanre je sa ro ẹnwan kpahen ekan ra hwarhiẹ vwo rhe odẹ rẹ Ọghẹnẹ. Kerẹ Jesu, ọ sa dianẹ e shenyẹ avwanre. Ọ je sa dianẹ ẹwẹn kpokpo avwanre fikirẹ efian rẹ ivwighrẹn hra nene asan eje. Ọkiọvo, e se roro kpahen ekan rẹ ikuegbe  rẹ efian tiọyena hwarhiẹ vwo rhe odẹ rẹ Jihova vẹ ukoko rọyen. Ota rẹ Ọghẹnẹ sa bọn avwanre gan vwẹ ọke tiọyena. Ofori nẹ avwanre ro ẹnwan okamuka kpahen ekan ra hwarhiẹ vwo rhe odẹ rẹ Ọghẹnẹ vẹ ukoko rọye-en. Kidie imuẹro herọ nẹ “ufuoma rẹ Ọghẹnẹ rọ nọ ẹruọ ejobi, kọ yọnrọn udu vẹ iroro rẹ [avwanre] vwi Kristi Jesu.” (Fil. 4: 6, 7) O vwo obo rọ wanre-e, Jihova cha vwẹ urinrin kẹ odẹ rọyen. Uvie rọyen che phioba phiyọ ojaẹriọ ejobi rẹ Eshu vẹ akpọ rọyen so kẹ idibo rẹ Ọghẹnẹ ri fuevun.—Une 94:22, 23; Aiz. 65: 17.

OBORẸ URHURU RẸ JIHOVA VWO FIERERE KẸ AVWANRE NONẸNA

17. Vwo nene obo rọhẹ Aizaya 30:21, idjerhe vọ yen Jihova wan ta ota kẹ avwanre nonẹna?

17 Jihova je ta ota kẹ avwanre nonẹna. (Se Aizaya 30:21.) Vwọrẹ uyota, avwanre che se nyo urhuru rẹ Ọghẹnẹ vwo nẹ odjuvwu rhe-e. Ọ kẹ avwanre odjekẹ womarẹ Baibol na. Vwọba, ẹwẹn ọfuanfon na je vwẹ ukẹcha kẹ “odibo rẹ esiri” rọ ghẹrẹ idibo rẹ Jihova. (Luk 12:42) Avwanre vwo iyovwinreta sansan vwẹ wẹbsaiti rẹ avwanre, eriyin ji te ividio kugbe uhworo rẹ ẹbe sansan re sa chọn avwanre uko vwọ sẹro rẹ ọyọnregan rẹ avwanre!

18. Idjerhe vọ yen eta rẹ Jihova vwọ bọn esegbuyota wẹn gan je kẹ wẹ uduefiogbere?

18 E jẹ avwanre vwẹ ọkieje vwọ karophiyọ eta rẹ Jihova vuẹ Ọmọ rọyen ọke rọ vwọ hẹ otọrakpọ na! E jẹ eta yena chọn avwanre uko vwọ mrẹvughe nẹ erọnvwọn eje hẹ obọ rẹ Jihova, o che phioba phiyọ ebẹnbẹn eje rẹ akpọ rẹ Eshu so kẹ avwanre. E jẹ avwanre brorhiẹn ra vwọ nabọ kerhọ rẹ urhuru rẹ Jihova. E de ru ọtiọyen, ke se chirakon rẹ ebẹnbẹn rẹ avwanre rhiẹromrẹ enẹna kugbe e re cha vwẹ obaro. Baibol na da ta: “O fori re we chirako, rere we vwo se ru ọhọre rẹ Ọghẹnẹ re we vwo obo ro veri na.”—Hib. 10:36.

UNE 4 ‘Jihova Yen Osun Mẹ’

^ e?ko. 5 Jihova ta ota nẹ obo odjuvwu rhe abọ erha, ọke rẹ Jesu vwọ hẹ akpọ. Vwẹ ọvo usun rẹ eta tiọyen rọ tare, Jihova da vuẹ idibo rẹ Jesu nẹ ayen kerhọ rẹ Ọmọ rọyen. Nonẹna, Jihova ta ota kẹ avwanre womarẹ Ota rọyen ro churobọ si iyono rẹ Jesu, ọtiọyen je te ukoko rọyen. Vwevunrẹ uyono nana, a cha ta ota kpahen erere ra cha mrẹ siẹrẹ a da kerhọ rẹ Jihova vẹ Jesu.

^ e?ko. 52 IDJEDJE RẸ IHOHO: Ọkpako ọvo vwo oniso rẹ odibo rowian ro vwobọ vwẹ orufon rẹ Ọguan Ruvie je wian vwẹ asan re dje ẹbe phiyọ. Ọ da nabọ jiro.

^ e?ko. 54 IDJEDJE RẸ IHOHO: Aye gbe ọshare ọvo vwẹ Sierra Leone reyọ ọbe re vwo durhie ohwo kpo omẹvwa vwọ kẹ ohwiyerin ọvo.

^ e?ko. 56 IDJEDJE RẸ IHOHO: Iniọvo rehẹ ẹkuotọ ra da dobọ rẹ iruo rẹ avwanre ji, vwoma vwẹ uwevwin ọvo. Ayen ku ewun diodi phiyọ rere ihwo vwo jẹ ayen e no sua.