Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 13

Dje Erorokẹ Phia Vwẹ Iruo rẹ Aghwoghwo Na

Dje Erorokẹ Phia Vwẹ Iruo rẹ Aghwoghwo Na

“Arọ rẹ ayen da dọn . . . o de yono ayen emu buebu.”—MAK 6:34.

UNE 70 Guọnọ Ihwo ri Fori

ỌDJẸKOKO *

1. Ọrhọ yen uruemu oyoyovwin ọvo rẹ Jesu vwori? Djekpahọn.

URUEMU oyoyovwin ọvo rẹ Jesu vwori ọyen ẹgba ro se vwo vwo ẹruọ rẹ ebẹnbẹn rẹ ihworakpọ re gbare-e hirharokuẹ. Ọke rọ vwọ hẹ otọrakpọ na, Jesu “ghọghọ kẹ otu re ghọghọ, otu re viẹ [o] nene ayen viẹ.” (Rom 12:15) Kerẹ udje, ọke rẹ oma vwọ vwerhen idibo 70 rẹ Jesu kidie nẹ ayen phikparobọ vwẹ iruo rẹ aghwoghwo na, Jesu “da ghọghọ vwẹ evun rẹ [“ẹwẹn ọfuanfon na,” NW ].” (Luk 10:17-21) Jẹ, ọke ọfa rẹ Jesu vwọ mrẹ oborẹ ughwu rẹ Lazarọs da ihwo ri vwo ẹguọnọ rọyen te, Jesu de si “iherihe rẹ oviẹ ọ da da gangan.”—Jọn 11:33.

2. Die yen chọn Jesu uko vwo dje erorokẹ phia kẹ ihwo?

2 Die yen chọn ọshare ọgbagba nana uko vwo dje erorokẹ phia ji gbe arodọnvwe kẹ ihworakpọ ri jẹgba? Kidie o vwo ẹguọnọ rayen. Kirobo ra tare vwẹ uyono rọ wanre na, “emọ rẹ ihwo rẹ akpọ” yen ma kẹ Jesu aghọghọ. (Isẹ 8:31) Ẹguọnọ ro vwo kpahen ihworakpọ nẹrhẹ ọ nabọ riẹn oborẹ ayen roro. Ọyinkọn Jọn da ta: “Ekpuyovwi rọye riẹn obo re hẹ evun rẹ ohwo.” (Jọn 2:25) Jesu dje erorokẹ phia. Ihwo na vwọ mrẹvughe nẹ o vwo ẹguọnọ rayen, ayen da nabọ kerhọ rẹ ovuẹ rẹ Uvie na. Avwanre de ji dje erorokẹ tiọyen phia kẹ ihwo, ka sa chọn ayen uko vwẹ ọke re de ghwoghwo ota kẹ ayen.—2 Tim. 4:5.

3-4. (a) Ẹro vọ yen avwanre che vwo ni iruo rẹ aghwoghwo na siẹrẹ e de vwo erorokẹ? (b) Die yen avwanre cha fuẹrẹn vwẹ uyono nana?

3 Ọyinkọn Pọl riẹnre nẹ ọyen vwo oghwa ro vwo ghwoghwo, ọtiọyen ji te avwanre. (1 Kọr. 9:16) Ẹkẹvuọvo, avwanre de vwo erorokẹ, e rhe che ni iruo na kerẹ iji ghevweghe-e. Ukperẹ ọtiọyen, avwanre guọnọ djephia nẹ avwanre vwo ẹguọnọ rẹ ihwo na, avwanre ji vwo owenvwe  ra vwọ chọn ayen uko. Avwanre riẹnre nẹ “Ẹrhovwo herọ kẹ ọkokẹ nọ ohwo ra kẹ.” (Iruo 20:35) Siẹrẹ avwanre de ghwoghwo kidie nẹ a guọnọ chọn ihwo efa uko, ọyena cha nẹrhẹ a riavwerhen rẹ iruo na.

4 Vwevunrẹ uyono nana, a cha ta ota kpahen obo re se vwo dje erorokẹ phia vwẹ iruo rẹ aghwoghwo na. Ẹsosuọ, avwanre cha ta ota kpahen obo re se yono nẹ ọdavwẹ rẹ Jesu vwo kpahen ihwo. Vwọba, a je cha fuẹrẹn idjerhe ẹne ra sa vwọ vwẹrokere udje rọyen.—1 Pita 2:21.

JESU DJE EROROKẸ PHIA VWẸ IRUO RẸ AGHWOGHWO NA

Erorokẹ yen nẹrhẹ Jesu se ghwoghwo ovuẹ rẹ onẹrhẹvwe kẹ ihwo (Ni ẹkoreta 5-6)

5-6. (a) Amono yen Jesu dje erorokẹ phia kẹ? (b) Diesorọ Jesu vwo gbe arodọnvwe kẹ ihwo ro ghwoghwo ota kẹ, kirobo rẹ a mraro rọyen phiyotọ vwẹ Aizaya 61:1, 2?

5 Roro kpahen idjerhe rẹ Jesu wan dje erorokẹ phia. O vwo ẹdẹ ọvo rẹ oma vwọ ghwọrọ Jesu vẹ idibo rọyen mamọ vwẹ iruo rẹ aghwoghwo na. Ayen tobọ “mrẹ ọke vwọ re emu-u.” Ọtiọyena, Jesu vẹ idibo rọyen de “kpo asan ofuefu, re rovwoma emerha.” Ẹkẹvuọvo, otu buebun da djẹ yanran ra hẹrhẹ rayen. Jesu vwọ mrẹ ihwo na vwẹ oboyin, kẹ die yen o ruru? “Arọ rẹ ayen da dọn, * fikiridie ayen ke họhọ igegede ri vwo ohwo ro suẹn aye-en: o de yono ayen emu buebu.”—Mak 6:30-34.

6 Jokaphiyọ obo re nẹrhẹ Jesu gbe arodọnvwẹ kẹ ihwo na. O niroso nẹ ihwo na “họhọ igegede ri vwo ohwo ro suẹn aye-en.” Ọ sa dianẹ Jesu mrẹvughe nẹ evo usun rayen ivwiogbere, re wian mamọ rere ayen sa vwọ vwẹrote orua rayen. Ọ je sa dianẹ evo muomaphiyọ fikirẹ ohwo rẹ ayen vwo ẹguọnọ kpahen ro ghwuru. Ọ da dia ọtiọyen, kọyen Jesu sa nabọ vwo ẹruọ rẹ ẹdia rẹ ayen hepha na. Kirobo rẹ avwanre mrẹre vwẹ uyono ro wanre na, Jesu komobọ ji hirharoku ebẹnbẹn tiọyena. Jesu vwo ọdavwẹ rẹ  ihwo, ọtiọyena, o de ghwoghwo ovuẹ rẹ onẹrhẹvwe kẹ ayen.—Se Aizaya 61:1, 2.

7. Mavọ yen a sa vwọ vwẹrokere udje rẹ Jesu?

7 Die yen udje rẹ Jesu na yono avwanre? Kerẹ Jesu, ihwo rẹ riariẹ avwanre phiyọ “họhọ igegede ri vwo ohwo ro suẹn aye-en.” Ayen nene ebẹnbẹn buebun muabọ. Avwanre vwo ovuẹ rẹ Uvie na rẹ ayen guọnọre. (Ẹvwọ. 14:6) Kerẹ Onini rẹ avwanre Jesu, avwanre ghwoghwo iyẹnrẹn esiri rẹ Uvie na kidie avwanre “re ehrọrẹ rẹ ọvwiẹrẹ vẹ ọ rẹ akpọ bẹn.” (Une 72:13) Avwanre gbe arodọnvwẹ kẹ ihwo, je davwẹngba vwọ vwẹ ukẹcha kẹ ayen.

MAVỌ YEN AVWANRE SE VWO DJE EROROKẸ PHIA

Roro kpahen ọdavwẹ rẹ ohwo vuọvo (Ni ẹkoreta 8-9)

8. Ọrhọ yen idjerhe rẹsosuọ re se vwo dje erorokẹ phia kẹ ihwo vwẹ iruo rẹ aghwoghwo na? Djudje rọyen.

8 Die yen sa chọn avwanre uko vwo dje erorokẹ phia kẹ ihwo rẹ avwanre ghwoghwo ota kẹ? Ofori nẹ avwanre phioma rẹ avwanre phiyọ ẹdia rayen, ji ru kẹ ayen kirobo rẹ avwanre guọnọre nẹ e ru kẹ avwanre. * (Mat. 7:12) E jẹ a fuẹrẹn idjerhe ẹne re se vwo ru ọtiọyen. Ọrẹsosuọ, roro kpahen ọdavwẹ rẹ ohwo vuọvọ. Aghwoghwo rẹ avwanre họhọ iruo rẹ idọktọ. Omamọ rẹ idọktọ nabọ roro kpahen ọdavwẹ rẹ ohwo vuọvo ro sivwẹn. Ọ nọ enọ je nabọ kerhọ ọke rẹ ohwo na de dje oborẹ oma na ruo. Ukperẹ o vwo brokpakpa kẹ ihuvwun, idọktọ na sa nabọ ghwọrọ ọke vwọ guọnọ otọ rẹ obo ri ru ohwo na rere ọ sa vwọ vwẹ ihuvwun ri shephiyọ vwọ kẹ. Vwẹ idjerhe vuọvo na, e jẹ avwanre reyọ ona ọvo vwọ ton otaẹtakuẹgbe phiyọ vẹ kohwo kohwo rẹ avwanre guọnọ ghwoghwo ota kẹ-ẹ. Ukperẹ ọtiọyen, e jẹ avwanre davwẹngba vwọ riẹn ẹdia vẹ iroro rẹ ohwo ọvuọvo rẹ avwanre ghwoghwo ota kẹ.

9. Iroro vọ yen ofori nẹ a kẹnoma kẹ? Djekpahọn.

9 Wọ da mrẹ ohwo vwẹ aghwoghwo, wo ghwe roro nẹ wọ riẹn ẹdia rọyen, obo ro segbuyota kugbe oboresorọ o vwo vwo esegbuyota yena-a. (Isẹ 18:13) Ukperẹ ọtiọyen, vwẹ aghwanre vwọ nọ ohwo na enọ. (Isẹ 20:5) O de shephiyọ, wọ sa nọ kpahen iruo rọyen, orua rọyen, obo ro rhiẹromrẹ, kugbe ẹro rọ vwo ni erọnvwọn. Avwanre da nọ ayen enọ, kẹ ayen sa vuẹ avwanre oboresorọ ayen vwọ guọnọ iyẹnrẹn esiri na. Avwanre da mrẹ ọnana vughe, ke se ru ọdavwẹ rayen, kirobo rẹ Jesu ruru—Ni 1 Kọrẹnt 9:19-23.

Vwẹro roro oka rẹ akpọ rẹ ohwo ru wo che ghwoghwo ota kẹ na yerẹn (Ni ẹkoreta 10-11)

10-11. Vwo nene 2 Kọrẹnt 4:7, 8, die yen idjerhe rivẹ re se vwo dje erorokẹ phia? Djudje ọvo.

 10 Ọrivẹ, davwẹngba vwo roro kpahen oborẹ akpeyeren rayen hepha. Ọke evo, avwanre se vwo ẹruọ rẹ ẹdia rẹ ayen hepha na, kidie avwanre je rhiẹromrẹ evo vwẹ usun rẹ ebẹnbẹn rayen rioja rọyen. (1 Kọr. 10:13) Avwanre riẹnre nẹ akpọ na pha gangan. Dedena, Jihova chọn avwanre uko vwo chirakon. (Se 2 Kọrẹnt 4:7, 8.) Di roro kpahen ihwo re davwẹngba vwo chirakon rẹ ebẹnbẹn rẹ akpọ na, ababọ rẹ ukẹcha rẹ Jihova. Kerẹ Jesu, arodọnvwẹ che mu avwanre vwọ vuẹ ayen “ikun esiri oyoyovwi.”—Aiz. 52:7.

11 Roro kpahen udje rẹ oniọvo ọvo re se Sergey. Tavwen ọ ke mrẹ ukoko na vughe, Sergey vuoma mamọ. Ọ pha bẹnbẹn ro vwo nene ihwo efa ta ota kugbe. Ọke vwọ yanran na, o de rhiabọreyọ uyono rẹ Baibol. Sergey da ta: “Me vwo yono Baibol na, ke mi rhi mrẹvughe nẹ Inenikristi vwo oghwa rẹ ayen vwo ghwoghwo ota kẹ ihwo efa. Jẹ, o muvwẹro nẹ mi che se ruo-o.” Dedena, Sergey ko roro kpahen oborẹ akpeyeren rẹ ihwo ri ji riẹn uyota na-a bra te. Ọ da ta: “Erọnvwọn kpokpọ mi yonori na da nẹrhẹ mi vwo omavwerhovwẹn vẹ ufuoma. Me riẹnre nẹ ofori ihwo efa je vwọ riẹn uyota na.” Ọke vwọ yanran na, Sergey de rhi vwo erorokẹ ọgangan kpahen ihwo, ọyena da nẹrhẹ o se fiudugberi ghwoghwo. Sergey da ta: “O gbevwunu mamọ nẹ, iruo rẹ aghwoghwo na chọn vwẹ uko vwo vwo uduefiogbere. Ọ je bọn esegbuyota mẹ gan.” *

Eyan-obaro rẹ ihwo evo reyọ ọke (Ni ẹkoreta 12-13)

12-13. Diesorọ o vwo fo nẹ avwanre vwẹ erhiorin vwo yono ihwo vwẹ iruo rẹ aghwoghwo na? Djudje rọyen.

12 Ọrerha, vwẹ erhiorin vwo yono ihwo. Karophiyọ nẹ ayen ji rhi roro kpahen uyota rẹ Baibol evo rẹ avwanre nabọ riẹ-ẹn. Buebun rayen ji vwo ẹguọnọ ọgangan kpahen oborẹ ayen segbuyota jovwo. Ayen se roro nẹ ẹga rayen yen nẹrhẹ ayen se vwo oyerinkugbe rọ kpẹkpẹre vẹ ihwo rẹ orua rayen, ihwo rẹ ẹkuotọ rayen, yẹrẹ ihwo re dia ekogho  rayen. Mavọ yen avwanre sa vwọ chọn ayen uko?

13 Roro kpahen udje nana: Die yen cha phia siẹrẹ agbada awanre da guọghọ mamọ re? Ka bọn ọkpokpọ. Ra vwọ bọn ọkpokpọ na, jẹ ihwo reyọ ọ rẹ awanre na vwo ruiruo. A da bọn nu, ka guọghọ ọ rẹ awanre na totọ. Vwẹ idjerhe vuọvo na, tavwen avwanre ke vuẹ ihwo nẹ ayen siobọnu iyono “awanre” rẹ ayen vwo ẹguọnọ rọyen, ko fori nẹ a chọn ayen uko vwọ riẹn ji vwo ẹguọnọ rẹ uyota “kpokpọ” rẹ avwanre yono ayen na. Ọtiọyena, kẹ ayen sa choma rẹ ayen vwọ kpairoro vrẹ oborẹ ayen segbuyota jovwo. Ẹkẹvuọvo, ọ sa reyọ ọke tavwen a ke sa vwẹ ukẹcha kẹ ihwo vwo ru ewene tiọyen.—Rom 12:2.

14-15. Mavọ yen avwanre sa vwọ chọn ihwo uko vwo vwo ẹruọ rẹ iphiẹrophiyọ rẹ arhọ rẹ bẹdẹ vwẹ iparadaisi? Djudje ọvo.

14 Avwanre de vwo erhiorin, e rhe che rhẹro rọyen nẹ ihwo che rhiabọreyọ uyota na yẹrẹ vwo ẹruọ rọyen ugege rẹ avwanre vwo ghwoghwo ota kẹ aye-en. Ukperẹ ọtiọyen, erorokẹ che mu avwanre vwọ chọn ayen uko ememerha vwo roro kpahen oborẹ Baibol na tare. Kerẹ udje, roro kpahen oborẹ wọ sa vwọ chọn ohwo uko vwo vwo ẹruọ rẹ iphiẹrophiyọ rẹ arhọ rẹ bẹdẹ vwẹ iparadaisi. Ihwo buebun ghwa riẹn kpahen iyono nana-a. Ayen se vwo imuẹro nẹ ughwu yen oba rẹ akpeyeren, yẹrẹ nẹ ihwo esiri eje che kpo odjuvwu. Mavọ yen wọ sa vwọ chọn ayen uko?

15 Oniọvo ọvo gbikun rẹ ona oyoyovwin ọvo ro vwo ruiruo. Ẹsosuọ, o mi se Jẹnẹsis 1:28. O de se nu, ọ me nọ ohwo na kpahen asan rẹ Ọghẹnẹ guọnọre nẹ ihworakpọ dia, kugbe oka rẹ akpọ rọ guọnọre nẹ ayen yerin. Buebun rayen me tanẹ, “Ọghẹnẹ guọnọre nẹ ayen vwo omavwerhovwẹn vwẹ otọrakpọ na.” Vwọba, oniọvo na mi se Aizaya 55:11 je nọ ohwo na sẹ ọhọre rẹ Ọghẹnẹ wene re. Ọke buebun na, ohwo na me tanẹ ẹjo. Ukuotọ rọyen, oniọvo na mi se Une Rẹ Ejiro 37:10, 11, je nọ ohwo na kpahen oborẹ akpeyeren cha dia vwẹ obaro na. Oniọvo na vwẹ ona nana vwọ vwẹ ukẹcha kẹ ihwo buebun vwọ riẹn nẹ Ọghẹnẹ guọnọre nẹ ihwo esiri dia iparadaisi vwẹ otọrakpọ na bẹdẹ.

Uruemu esiri tutuno re djephia, kerẹ ọbe re si vwo rhe ohwo, sa ghwa erhuvwu rhe (Ni ẹkoreta 16-17)

16-17. Vwo nene obo rehẹ Isẹ 3:27, erhọ yen idjerhe evo rẹ avwanre se vwo dje erorokẹ phia? Djudje rọyen.

16 Ọrẹne, guọnọ idjerhe wo se vwo dje erorokẹ phia. Kerẹ udje, ọke ro ghwe shephiyọ-ọ yen avwanre vwo bru ohwo na ra? Avwanre se yovwunu kẹ je vuẹ nẹ e che rhivwin rhe ọke ọfa. Ọ da dianẹ ohwo na guọnọ ukẹcha vwẹ idjerhe evo vwo? Kẹ, ohwo ro se vrẹn nẹ uwevwi-in da guọnọ ohwo ro ji uwevwin vwo? Avwanre sa vwẹ ukẹcha kẹ ohwo tiọyena.—Se Isẹ 3:27.

 17 ọvo na dje erorokẹ phia ro vwo si ọbe vwo rhe orua ọvo rẹ ọmọ rayen ghwuru. Ọ vwẹ ẹkpo rẹ Baibol evo re sa kẹ ayen onẹrhẹvwe vwọba si ọbe na. Oni rẹ ọmọ na da ta: “Ẹwẹn mẹ yanghanre ọde rọ wanre na. Wọ cha sa riẹn oborẹ ọbe wẹn na ru kẹ avwanre-e. Me cha sa kpẹvwẹ ẹse nana vwo ru kẹ avwanre-e. Mi se ọbe wẹ na vrẹ abọ 20 odẹ rọ wanre na. Eta rehẹ evun rọyen te avwanre ẹwẹn mamọ. Wẹ kobiruo mamọ.” Aphro herọ-ọ, avwanre sa mrẹ erere gbidiki siẹrẹ avwanre de phi oma rẹ avwanre phiyọ ẹdia rẹ ihwo re rioja, je davwẹngba vwọ chọn ayen uko.

VWẸ ẸRO ABAVO VWO NI ẸGBAẸDAVWỌN WẸN

18. Vwo nene obo re si phiyọ 1 Kọrẹnt 3:6, 7, ẹro abavọ vọ yen ofori nẹ avwanre vwo?

18 Avwanre ejobi guọnọ vwẹ ẹro abavo vwo ni ẹgbaẹdavwọn rẹ avwanre vwẹ iruo rẹ aghwoghwo na. Avwanre ruẹ ẹkẹn ro te avwanre vwẹ iruo ra vwọ chọn ihwo uko vwọ riẹn uyota na, jẹ ọ dia avwanre yen ruẹ ẹkẹn rọ ma ghanre-e. (Se 1 Kọrẹnt 3:6, 7.) Jihova yen si ihwo na te oma. (Jọn 6:44) Ẹkẹvuọvo, ohwo vuọvo yen che brorhiẹn sẹ o che rhiabọreyọ iyẹnrẹn esiri na. (Mat. 13:4-8) Karophiyọ nẹ ihwo evo rhiabọreyọ ovuẹ rẹ Jesu-u, dede nẹ ọyen Oyono rọ ma rho kparobọ rọ dia otọrakpọ na dẹvure! Ọtiọyena, e jẹ ẹwẹn rẹ avwanre kuọrọ-ọn siẹrẹ ihwo buebun rẹ avwanre guọnọ vwẹ ukẹcha kẹ da sen ovuẹ rẹ Uvie na.

19. Erere vọ yen che te avwanre obọ siẹrẹ e de dje erorokẹ phia vwẹ iruo rẹ aghwoghwo na?

19 Avwanre cha mrẹ erere gbidiki siẹrẹ e de dje erorokẹ phia vwevunrẹ iruo rẹ aghwoghwo na. Ọ cha nẹrhẹ a nabọ riavwerhen rẹ iruo rẹ aghwoghwo na. E che rhiẹromrẹ aghọghọ rode ro te ohwo obọ siẹrẹ a da kokẹ. Ọ je cha nẹrhẹ ọ lọhọ rẹ otu “re ve arhọ ri bẹdẹ na kẹ” vwo rhiabọreyọ iyẹnrẹn esiri na. (Iruo 13:48) “E jẹn avwanre ru emu esiri kẹ ihwo ejobi” ọke nana rẹ uphẹn je vwọ herọ na. (Gal. 6:10) E de ru ọtiọyen, ka cha mrẹ aghọghọ kidie avwanre vwẹ urinrin kẹ Ọsẹ rẹ avwanre rọhẹ obo odjuvwu.—Mat. 5:16.

UNE 64 Vwobọ Vwẹ Orhọ Na

^ e?ko. 5 E che vwo aghọghọ siẹrẹ e de dje eroroke phia vwẹ iruo rẹ aghwoghwo na, ihwo ji che vwo owenvwe rẹ ayen vwọ kerhọ rẹ avwanre. Diesorọ? Vwẹ uyono nana, a cha fuẹrẹn oborẹ udje rẹ Jesu se yono avwanre, kugbe idjerhe ẹne rẹ avwanre se vwo dje erorokẹ phia kẹ ihwo rẹ avwanre ghwoghwo ota kẹ.

^ e?ko. 5 OBORẸ OTA NANA MUDIAPHIYỌ: Vwevunrẹ Baibol na, ubiota na arodọnvwẹ mudiaphiyọ re vwo roro kẹ ohwo rọ rioja yẹrẹ ohwo re shenyẹ. Erorokẹ tiọyena se mu avwanre vwọ vwẹ ukẹcha kẹ ihwo vwẹ kidjerhe kidjerhe.

^ e?ko. 8 Ni uyovwinrota na “Follow the Golden Rule in Your Ministry” rọhẹ Uwevwin Orhẹrẹ rẹ May 15, 2014, (ọ rẹ oyibo).

^ e?ko. 11 Ni aruẹbe 21-22 rẹ Uwevwin Orhẹrẹ rẹ August 1, 2011, (ọ rẹ oyibo).