Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYONO 12

Dje Erorokẹ Phia kẹ Ihwo Efa

Dje Erorokẹ Phia kẹ Ihwo Efa

“Ovwan ejobi . . . re ehrọre.”—1 PITA 3:8.

UNE 90 Phiuduphiyọ Ohwohwo Awọ

ỌDJẸKOKO *

1. Vwo nene obo rehẹ 1 Pita 3:8, diesorọ oma vwọ vwerhen avwanre siẹrẹ a dahẹ ohri rẹ ihwo ri vwo erorokẹ?

OMA vwerhen avwanre siẹrẹ a dahẹ ohri rẹ ihwo ri vwo erorokẹ. Ihwo tiọyena phi oma rayen phiyọ ẹdia rẹ avwanre rere ayen sa vwọ riẹn iroro vẹ ọdavwẹ rẹ avwanre. Tavwen avwanre ke tobọ ta ẹwẹn rẹ avwanre phia, jẹ ayen ọvo vwẹro dje ọdavwẹ rẹ avwanre nure, ayen mi ruo kẹ avwanre. Avwanre vwo ọdavwaro kpahen ihwo tiọyena ri “re ehrọre” * rẹ avwanre.​—Se 1 Pita 3:8.

2. Diesorọ ọ vwọ guọnọ ẹgbaẹdavwọn e ki se dje erorokẹ phia?

2 Kerẹ Inenikristi, avwanre eje guọnọ dje erorokẹ phia yẹrẹ vwo ọdavwẹ rẹ ihwo efa. Ẹkẹvuọvo, ọ guọnọ ẹgbaẹdavwọn e ki se ru ọtiọyen. Diesorọ? Kidie avwanre gbare-e. (Rom 3:23) Ọtiọyena, avwanre cha họnre vwọso ojevwe romobọ. Vwọba, fikirẹ ẹdia rẹ avwanre yẹrẹ obo re yono avwanre nẹ ọkiemọ rhe, evo usun rẹ avwanre sa mrẹ bẹnbẹn re vwo vwo ọdavwẹ rẹ ihwo efa. Ọ rọ koba, uruemu rẹ ihwo re riariẹ avwanre phiyọ ji se djobọte avwanre. Vwẹ ẹdẹ re koba ra hepha na, ihwo buebun vwo ọdavwẹ rẹ ihwo efa-a. Ukperẹ ọtiọyen, ayen “guọnọ omaobọ rẹ ayen nọ.” (2 Tim. 3:1, 2) Die yen sa chọn avwanre uko vwo phi egbabọse nana eje kparobọ rere avwanre se vwo vwo ọdavwẹ rẹ ihwo efa?

3. (a) Mavọ yen avwanre se vwo dje erorokẹ phia vwọ vrẹ obo ri jovwo? (b) Die yen a cha fuẹrẹn vwẹ uyono nana?

3 Avwanre se dje erorokẹ phia kẹ ihwo efa vwọ vrẹ obo  ri jovwo siẹrẹ a da vwẹrokere Jihova vẹ Ọmọ rọyen Jesu. Jihova rọ dia Ọghẹnẹ rẹ ẹguọnọ yen djudje ro me yovwin kparobọ rẹ obo re se vwo vwo ọdavwẹ rẹ ihwo efa. (1 Jọn 4:8) Jesu nabọ vwẹrokere uruemu rẹ Ọsẹ rọyen gbagba. (Jọn 14:9) Ọke rọ vwọ hẹ otọrakpọ na, Jesu djudje rẹ oborẹ ohworakpọ se vwo dje erorokẹ phia. Vwẹ uyono nana, a cha fuẹrẹn oborẹ Jihova vẹ Jesu vwo dje erorokẹ phia. E de ru ọtiọyen nu, ka cha ta ota kpahen oborẹ avwanre sa vwọ vwẹrokere udje rayen.

JIHOVA DJE EROROKẸ PHIA

4. Idjerhe vọ yen Aizaya 63:7-9 vwo djephia nẹ Jihova vwo ọdavwẹ rẹ idibo rọyen?

4 Baibol na tare nẹ Jihova vwo ọdavwẹ rẹ idibo rọyen. Kerẹ udje, roro kpahen obo rọ da Jihova te ọke rẹ ihwo rẹ Izrẹl vwọ rioja. Baibol na da ta: “Vwẹ evun rẹ ukpokpogho rayen ejobi ọye e kpokpori.” (Se Aizaya 63:7-9.) Ọke vwọ yan obaro, womarẹ ọmraro Zekaraya, Jihova da tanẹ ọke re vwo shenyẹ ihwo rọyen, kọ ghwa họhọ nẹ ọyen e shenyẹ. Jihova da ta kẹ idibo rọyen: “Ohwo rọ vwẹ obọ te ovwan, yẹ ọ vwẹ obọ te ọmẹro [mẹ].” (Zek. 2:8) Ọyena uvi rẹ udje rẹ ọdavwẹ rẹ Jihova vwo kpahen ihwo rọyen!

Jihova dje erorokẹ phia ro vwo sivwin ihwo rẹ Izrẹl nẹ eviẹn vwẹ Ijipt (Ni ẹkorota 5)

5. Djudje rẹ oborẹ Jihova vwọ chọn ihwo rọyen uko ọke rẹ ayen vwọ rioja.

5 JỌ ghwa dia erorokẹ ọvo yen Jihova dje kẹ idibo rọyen re rioja-a. Ọ jowọ rọ vwọ chọn ayen uko. Kerẹ udje, ọke rẹ ihwo rẹ Izrẹl vwọ rioja kerẹ eviẹn vwẹ Ijipt, Jihova riẹn ọmiaovwẹ rayen, ọyena de muo vwọ chọn ayen uko. Jihova da ta kẹ Mosis: “Me mrẹ oma ẹlaghọ rẹ ihwo mẹ . . . mi nyo oviẹ rayen, . . . me riẹn oja rayen, ke me rhere ri si ayen nẹ obọ rẹ ihwo rẹ Ijipt.” (Eyan. 3:7, 8) Fikirẹ arodọnvwẹ rẹ Jihova vwo kpahen ihwo rọyen, o de si ayen nẹ eviẹn. Ẹgbukpe ujorin evo vwọ wan nu, ọke rẹ ihwo rẹ Izrẹl vwọ hẹ Otọ rẹ Ive na, ivwighrẹn da kpare ofovwin bru ayen rhe. Die kọyen Jihova ruru? O de “nẹ arodọvwẹ rayen fiki rẹ enuebro rẹ oja vẹ oshenyẹ rẹ ihwo ri mu kpahe ayen.” Erorokẹ ji mu Jihova vwọ chọn ihwo rọyen uko vwẹ ẹdia nana.  O de ji iguẹdjọ re sivwin ayen nẹ obọ rẹ ivwighrẹn rayen.—Iguẹ. 2:16, 18.

6. Djudje rẹ oborẹ Jihova dje erorokẹ phia kẹ ohwo ọvo rẹ iroro rọyen chọre.

6 Jihova dje erorokẹ phia kpahen ọdavwẹ rẹ ihwo rọyen, dede nẹ ọ dia ọkieje yen iroro rayen vwọ gba-a. Roro kpahen udje rẹ Jona. Ọghẹnẹ ji ọmraro nana re ghwoghwo ovuẹ rẹ ẹdjọeguo rọyen kẹ ihwo rẹ Ninive. Ayen vwo kurhẹriẹ, Jihova de brorhiẹn nẹ ọyen rha cha ghwọrọ ayen ọfa-a. Jẹ, orhiẹn nana vwerhen Jona oma-a. “Ophu de mu Jona gangan,” kidie aroẹmrẹ rẹ oghwọrọ ro ghwoghwori na rugba-a. Ẹkẹvuọvo, Jihova vwo odirin, ọ da kpọ iroro rẹ Jona vi. (Jona 3:10–4:11) Ukuko na, Jona da rhe mrẹ ẹkpo rẹ ota na vughe, Jihova da tobọ reyọ vwo si ikuegbe nana phiyotọ vwọ kẹ erere rẹ avwanre.​—Rom 15:4. *

7. Imuẹro vọ yen avwanre vwori firikrẹ oborẹ Jihova nene idibo rọyen yerin wan ọke awanre?

7 Oborẹ Jihova nene ihwo rọyen yerin wan, nẹrhẹ avwanre vwo imuẹro nẹ o vwo ọdavwẹ rayen. Ọ riẹn oborẹ avwanre ohwo vuọvo rioja rọyen. Jihova “riẹn udu rẹ emọ rẹ ihwo.” (2 Ikun Rivie 6:30) Ọ riẹn ọdavwẹ rẹ avwanre eje, kugbe ẹdia rẹ avwanre de shekpotọ. “Ọ sa rhọvwe nẹ a davwe [avwanre] ni vrẹn obo rẹ udu [rẹ avwanre] gbare-e.” (1 Kọr. 10:13) Eta yena bọn avwanre gan dẹn!

JESU DJE EROROKẸ PHIA

8-10. Erọnvwọn vọ yen toroba ọdavwẹ rẹ Jesu vwo kpahen ihwo efa?

8 Ọke rọ vwọ hẹ otọrakpọ na, Jesu djerephia nẹ ọyen vwo ọdavwẹ rẹ ihwo. Ọ da havwen mamọ, erọnvwọn erha yen toroba ọdavwẹ yena. Ọrẹsosuọ, kirobo ra tare jovwo, Jesu nabọ vwẹrokere uruemu rẹ Ọsẹ rọyen gbagba. Kerẹ Ọsẹ rọyen, Jesu vwo ẹguọnọ rẹ ihwo. Dede nẹ oma vwerherọ fikirẹ erọnvwọn ejobi rọ chọn Ọsẹ rọyen uko vwọ ma, jẹ “emọ rẹ ihwo rẹ akpọ” yen ma kẹ aghọghọ. (Isẹ 8:31) Ẹguọnọ yen mu Jesu vwo vwo ọdavwẹ rẹ ihwo efa.

9 Ọrivẹ, kerẹ Jihova, Jesu sa riẹn obo rehẹ ubiudu rẹ ohwo. Ọ sa riẹn iroro vẹ ọdavwẹ rẹ ihwo. (Mat. 9:4; Jọn 13:10, 11) Kọyensorọ o se vwo vwo oniso rẹ ihwo ri muomaphiyọ, ọ da vwẹ uchebro kẹ ayen.—Aiz. 61:1, 2; Luk 4:17-21.

10 Ọrerha, Jesu komobọ ji rhiẹromrẹ egbabọse rẹ ihworakpọ hirharokuẹ. Kerẹ udje, ọsẹ vẹ oni ri vwiẹrẹ ivwiogbere. O yono obo ra wian owian ọgangan mie ọsẹ aruakpọ rọyen Josẹf. (Mat. 13:55; Mak 6:3) Ọ họhọre nẹ Josẹf ghwuru tavwen Jesu ki ruiruo rẹ aghwoghwo rọyen te oba. Kọyen Jesu chirakon rẹ ọmiaovwẹ rẹ ughwu rẹ ohwo re vwo ẹguọnọ kpahen. Jesu riẹn obo rọ hepha ra vwọ dia evunrẹ orua rẹ ihwo de kpo ẹga sansan. (Jọn 7:⁠5) O muẹro nẹ eyena vẹ erọnvwọn efa chọn Jesu uko vwo vwo ẹruọ rẹ egbabọse vẹ ọdavwẹ rẹ ihworakpọ.

Jesu dje erorokẹ phia rọ vwọ, reyọ ọshare ọvo nẹ ohri rẹ ihwo re sivwin vwẹ asan rọ djahenre (Ni ẹkorota 11)

11. Ọke vọ yen ọdavwẹ rẹ Jesu vwo kpahen ihwo ma vwọ teyenphia? Djekpahọn. (Ni uhoho rọhẹ opharo ọbe na.)

11 Ọdavwẹ rẹ Jesu vwo kpahen ihwo nabọ teyephia womarẹ igbevwunu sansan ro ruru. Ọ dianẹ Jesu di ru igbevwunu kidie nẹ ọyen obo ra guọnọ mie-e. Ọke rọ vwọ mrẹ ihwo re rioja, “ẹro da dọn gangan.” (Mat. 20:29-34; Mak 1:40-42) Kerẹ udje, roro kpahen ẹwẹn ro rhe Jesu ọke rọ vwọ reyọ odierhọ ọvo nẹ ohri rẹ ihwo, re sivwin vwẹ asan rọ djahenre,  kugbe ọke rọ vwọ rhọvwọn ọmọ ọvuọvo rẹ ayeuku ọvo vwiẹre nẹ ghwu rhe. (Mak 7:32-35; Luk 7:​12-15) Jesu dje erorokẹ phia kẹ ihwo efa, ọ je davwẹngba vwọ chọn ayen uko.

12. Mavọ yen Jọn 11:32-35 dje erorokẹ rẹ Jesu djephia kẹ Mata vẹ Meri?

12 Jesu dje erorokẹ phia kẹ Mata vẹ Meri. Rọ vwọ mrẹ nẹ ayen viẹ fikirẹ ughwu rẹ oniọvo rayen Lazarọs, “Jesu da viẹ.” (Se Jọn 11:32-35.) Ọ dia fikirẹ obo rọ vẹ ugbeyan rọyen ro ghwuru na kpẹkpẹ te yen nẹrhẹ Jesu viẹ-ẹ, kidie ọ riẹnre nẹ ọyen sa rhọvwọn nushi rhe. Ukperẹ ọtiọyen, Jesu viẹre kidie ọ riẹn oborẹ ughwu rẹ Lazarọs na da igbeyan rọyen te.

13. Diesorọ oma vwọ vwerhen avwanre nẹ Jesu dje erorokẹ phia kẹ ihwo?

13 Avwanre cha nabọ mrẹ erere siẹrẹ a da fuẹrẹn oborẹ Jesu dje erorokẹ phia kẹ ihwo sansan. Vwọ fẹnẹ Jesu, avwanre gbare-e. Dedena, avwanre vwo ẹguọnọ rẹ Jesu fikirẹ obo ro nene ihwo efa yerin wan. (1 Pita 1:8) Ọ vwerhoma ra vwọ riẹn nẹ o suẹn kerẹ Ovie asaọkiephana vwẹ Uvie rẹ Ọghẹnẹ. O che phioba phiyọ ojaẹriọ ejobi kẹrẹkpẹ. Ọyen ohwo ro se si avwanre nẹ ọmiaovwẹ vẹ ojaẹriọ rẹ usuon rẹ Eshu hwarhiẹ vwo rhe ihworakpọ, kidie ọ ka dia otọrakpọ na jovwo. Ọ vwerhoma nẹ avwanre vwo Ovie rọ riẹn “ọdavwẹ rẹ avwanre.”—Hib. 2:17, 18; 4:​15, 16.

VWẸROKERE UDJE RẸ JIHOVA VẸ JESU

14. Die yen Ẹfesọs 5:1, 2, che mu avwanre vwo ru?

14 Avwanre da fuẹrẹn udje rẹ Jihova vẹ Jesu, ọ cha nẹrhẹ a davwẹngba vwo dje erorokẹ phia kẹ ihwo efa. (Se Ẹfesọs 5:1, 2.) Avwanre cha sa riẹn obo rehẹ ubiudu rẹ ihwo-o. Dedena, avwanre sa davwẹngba vwọ riẹn iroro vẹ ọdavwẹ rayen. (2 Kọr. 11:29) Vwọ fẹnẹ ihwo re riariẹ avwanre phiyọ ri nenesi rẹ ojevwe romobọ, avwanre “guọnọ erhuvwu rẹ oma [rẹ avwanre] ọvo-o, ẹkẹvuọvo [avwanre] je guọnọ erhuvwu rẹ ihwo efa.”—Fil. 2:4.

(Ni ẹkorota 15-19) *

15. Amono yen a ma guọnọ nẹ i dje erorokẹ phia?

15 Ekpako ukoko yen a ma guọnọ nẹ i dje erorokẹ phia. Ayen riẹnre nẹ ayen cha niyẹnrẹn rẹ oborẹ ayen vwẹrote igodẹ ra vwọ kẹ ayen yọnre na. (Hib. 13:17) Ofori nẹ ekpako davwẹngba vwo dje erorokẹ phia rere ayen sa vwọ chọn iniọvo na uko. Ẹkẹvuọvo, mavọ yen ayen se vwo ru ọtiọyen?

16. Die yen ọkpako ro vwo erorokẹ davwẹngba vwo ruẹ, kẹ diesorọ ọyena vwọ ghanre?

16 Ọkpako ro vwo erorokẹ nabọ nene iniọvo na ghwọrọ ọke kuẹgbe. Ọ nọ ayen enọ, ọ me nabọ kerhọ rẹ oborẹ ayen cha ta. Uruemu tiọyena yovwirin dẹn, ma rho siẹrẹ ọvo usun rẹ igegede na da davwẹngba rọ vwọ ta ọdavwẹ rọyen, jẹ eta na gba dje udu. (Isẹ 20:5) Ọkpako da nabọ ghwọrọ ọke vẹ iniọvo na, ọyena che toroba ẹroẹvwọsuọ, ẹguọnọ kugbe uvi rẹ oyerinkugbe rọ vẹ iniọvo na vwori.—Iruo 20:37.

17. Die yen iniọvo buebun ta kpahen obo ro me je ayen vwẹ oma rẹ ekpako? Djudje ọvo.

17 Iniọvo buebun tare nẹ uruemu ro me je ayen vwẹ oma rẹ ekpako, ọyen ọdavwẹ vẹ erorokẹ rẹ ayen djephia kẹ ihwo efa. Diesorọ? Oniọvo aye ọvo re se Adelaide da ta: “Ọ nẹrhẹ ọ lọhọ ra vwọ ta ota kẹ ayen, kidie ayen cha kerhọ rẹ avwanre.” Vwọba, ọ da ta: “Oborẹ ayen kpahen ota kẹ wẹ wan yen wọ cha vwọ riẹn sẹ ayen vwo ọdavwẹ wẹn.” Vwọ kpahen erorokẹ rẹ ọkpako ọvo dje kẹ, oniọvo ọshare ọvo da ta: “Me mrẹ ame oviẹ rọ djẹ koko vwẹ  ẹro rọyen, ọke ro vwo roro kpahen ẹdia mẹ. Ọyena cha sa chọrọ ovwẹ ẹro-o.”—Rom 12:15.

18. Mavọ yen avwanre se vwo dje erorokẹ phia?

18 Vwọrẹ uyota, ọ dia ekpako ọvo yen se dje erorokẹ phia-a. Avwanre eje se ru ọtiọyen. Vwẹ idjerhe vọ? Davwen vwo vwo ẹruọ rẹ oborẹ iniọvo na vẹ ihwo rẹ orua wẹn chirakon rọyen. Djephia nẹ wo vwo ọdavwẹ rẹ ighene rehẹ evunrẹ ukoko na, eriyin ji te iniọvo ri muọga, e re kpakore, kugbe otu rẹ ihwo rẹ ayen vwo ẹguọnọ kpahen ghwuru. Nokpẹn rẹ oborẹ oma rayen hepha. Nabọ kerhọ ọke rẹ ayen da ta ẹwẹn rayen kẹ wẹ. Chọn ayen uko vwọ mrẹvughe nẹ wọ nabọ vwo ẹruọ rẹ ẹdia rayen. Ru oborẹ wo se ru eje vwọ vwẹ ukẹcha phia. Avwanre de ru enana eje, ke se dje uvi rẹ ẹguọnọ phia.​—1 Jọn 3:18.

19. Diesorọ o vwo fo nẹ avwanre nuẹ vwo nene ẹdia rẹ ohwo vuọvo rẹ avwanre guọnọ vwẹ ukẹcha kẹ?

19 Ofori nẹ avwanre nuẹ vwo nene ẹdia rẹ ohwo vuọvo rẹ avwanre guọnọ vwẹ ukẹcha kẹ. Diesorọ? Kidie dohwo dobo ro ruẹ wan ọke ro de hirharoku ebẹnbẹn. Evo ta ẹwẹn rayen phia, efa mi dion phiyọ oma. Ọtiọyena, ofori nẹ avwanre kẹnoma kẹ enọ re sa nẹrhẹ oma vo ayen. (1 Tẹsa. 4:11) Ọ ghwa dia ọkieje yen avwanre cha vwọ rhọnvwephiyọ iroro rayen siẹrẹ ayen da ta ẹwẹn rayen kẹ avwanre-e. Jẹ, ofori nẹ avwanre noso nẹ ọyena ghwa ọdavwẹ rayen. Ọtiọyena, e jẹ avwanre fobọ nyo, ẹkẹvuọvo a fobọ kpahen ota-a.—⁠Mat. 7:1; Jems 1:19.

20. Die yen a cha ta ota kpahen vwẹ uyono rọ vwọ kpahen ọnana?

20 Vwọ vrẹ evunrẹ ukoko na, o ji fo nẹ avwanre dje erorokẹ phia vwẹ aghwoghwo na. Mavọ yen avwanre se vwo ru ọtiọyen? A cha ta ota kpahọn vwẹ uyono rọ vwọ kpahen ọnana.

UNE 130 Vwo Ghovwo

^ e?ko. 5 Jihova vẹ Jesu vwo ọdavwẹ rẹ ihwo efa. Uyono nana cha chọn avwanre uko vwọ riẹn obo re se yono vwo nẹ udje rayen rhe. A je cha ta ota kpahen oboresorọ o vwo fo nẹ avwanre dje erorokẹ phia kẹ ihwo efa, kugbe obo re se vwo ru ọtiọyen.

^ e?ko. 1 OBORẸ ETA NANA MUDIAPHIYỌ: Ra vwọ “re ehrọre” mudiaphiyọ ra vwọ davwẹngba vwo vwo ẹruọ rẹ ọdavwẹ rẹ ihwo efa, ji phi oma rẹ avwanre phiyọ ẹdia rayen. (Rom 12:15) Vwẹ uyono nana, re vwo dje “erorokẹ phia” kugbe ra vwọ “re ehrọre” mudiaphiyọ orọnvwọn ọvuọvo.

^ e?ko. 6 Jihova ji dje erorokẹ phia kẹ idibo rọyen efa rẹ oshọ muru, yẹrẹ ri muomaphiyọ. Roro kpahen ikuegbe rẹ Hanah (1 Sam. 1:10-20), Ilaija (1 Ivie 19:1-18), kugbe “Ebẹdmẹlẹk” (Jer. 38:7-13; 39:15-18).

^ e?ko. 65 IDJEDJE RẸ IHOHO: Omẹvwa re ruẹ vwẹ Ọguan Ruvie nẹrhẹ a mrẹ uphẹn vwo dje erorokẹ phia vwẹ idjerhe sansan. Avwanre sa mrẹ (1) ọkpako rọ ta ota kẹ oniọvo aye ọvo vẹ ọmọ rọyen rọ dia oghwoghwota, (2) ọsẹ vẹ ọmọtẹ rọyen ri suẹn oniọvo aye ọvo rọ kpakore vwo kpo asan rọ da cha ro imoto, kugbe, kugbe (3) ekpako ivẹ re nabọ kerhọ rẹ oniọvo aye ọvo rọ guọnọ ukẹcha.