Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Uwevwin Orhẹrẹ  |  October 2016

Sẹro rẹ Omakpokpọ rẹ Ẹwẹn, Wọ da Ga Vwẹ Ẹkuotọ Ọfa

Sẹro rẹ Omakpokpọ rẹ Ẹwẹn, Wọ da Ga Vwẹ Ẹkuotọ Ọfa

“Mi phi ota wẹn phihọ udu mẹ.”—UNE 119:11.

UNE: 142, 92

1-3. (a) Vwẹ kẹdia kẹdia eje, die yen avwanre phi phiyọ ẹdia rẹsosuọ? (b) Egbabọse vọ yen ihwo ri yono ejajẹ kpokpọ hirharokuẹ, kẹ enọ vọ yen ọnana ghwa rhe? (Ni uhoho rẹsosuọ na.)

ISERI RẸ JIHOVA buebun nonẹna vwobọ vwẹ orugba rẹ aroẹmrẹ re vwo ghwoghwo iyẹnrẹn esiri na kẹ “kẹgborho kẹgborho kugbe orua korua kugbe ephẹrẹ kephẹrẹ kugbe ohwo kohwo.” (Ẹvwọ. 14:6) Wẹ ọvo usun rẹ ihwo ri yono ejajẹ ọfa? Wọ ga kerẹ imishọnare yẹrẹ vwẹ asan ra da ma guọnọ ukẹcha vwẹ ẹkuotọ ọfa, yẹrẹ wo kuomakugbe ukoko rọ jẹ ejajẹ rẹ ẹkuotọ ọfa vwẹ ekogho wẹn?

2 Kerẹ idibo rẹ Ọghẹnẹ, ofori nẹ avwanre eje phi omakpokpọ rẹ ẹwẹn avwanre vẹ ọ rẹ orua avwanre phiyọ ẹdia ẹsosuọ. (Mat. 5:3) Dedena, fikirẹ ewian buebun, ọ sa bẹn ọkiọvo re vwo ru uvi rẹ uyono romobọ. Ẹkẹvuọvo, ihwo re ga vwẹ ẹkuotọ ọfa rhiẹromrẹ egbabọse efa.

3 Vwọba eyono rẹ ejajẹ ọkpokpọ, o ji fo nẹ ayen vwẹ obọdẹn rẹ emu rẹ ẹwẹn vwọ ghẹrẹ oma rayen ọkieje. (1 Kọr. 2:10) Kẹ mavọ ayen se vwo ru ọnana ọ da dianẹ ayen vwo ẹruọ rẹ ephẹrẹ ra jẹ vwẹ ukoko kpokpọ na-a?  Diesorọ emiọvwọn re dia Inenikristi vwo vwo imuẹro nẹ Ota rẹ Ọghẹnẹ te ubiudu rẹ emọ rayen?

IMUOSHỌ VWỌ KẸ OYERINKUGBE AVWANRE VẸ JIHOVA

4. Die yen sa dia imuoshọ kẹ oyerinkugbe avwanre vẹ Jihova? Djudje rọyen.

4 E rhe vwo ẹruọ rẹ Ota rẹ Ọghẹnẹ vwẹ ejajẹ kpokpọ na-a, ọnana sa dia imuoshọ kẹ oyerinkugbe avwanre vẹ Jihova. Vwẹ ẹgbukpe ujorin riyorin a ke rhe mrẹ ọke avwanre nana, Nehemaya niroso nẹ emọ rẹ ihwo rẹ Ju evo ri rhivwin nẹ Babilọn rhe, rha sa jẹ ejajẹ rẹ Hibru na-a. (Se Nehemaya 13:23, 24.) Obo ra vwọ riẹn ayen kerẹ idibo rẹ Ọghẹnẹ kọyen ghwrẹ vayabọ na kidie ayen rha sa nabọ vwo ẹruọ rẹ Ota rẹ Ọghẹnẹ-ẹ.—Neh. 8:2, 8.

5, 6. Die yen esẹ vẹ ini evo re ga vwẹ ẹkuotọ ọfa rhe mrẹvughe, kẹ diesorọ?

5 Esẹ vẹ ini evo re ga vwẹ ẹkuotọ ọfa rhe mrẹvughe nẹ oruru rẹ emọ rayen kpahen uyota na djiro re. Kidie nẹ ayen nabọ vwo ẹruọ rẹ obo re yono vwẹ uyono-o, emu rẹ ẹwẹn na rhe te ubiudu raye-en. Pedro [1] vẹ orua rọyen kua nẹ South America kpo Australia, ọshare na da tanẹ, “A da ta ota kpahen erọnvwọn rẹ ẹwẹn, ofori nẹ e phi ubiudu vẹ iroro phiyọ.”—Luk 24:32.

6 E de se ota vwẹ ephẹrẹ ọfa, ọ nabọ te ẹwẹn avwanre kirobo rọ dia vwẹ ephẹrẹ romobọ-ọ. Vwọba, ọ da dianẹ avwanre riẹn ejajẹ ọfa jẹ-ẹ, ọ sa nẹrhẹ ofu dje ohwo, o ji se djobọte ẹga avwanre. Ọtiọyena, ra vwọ sẹro rẹ oruru ra vwọ ga Jihova vwẹ ẹkuotọ ọfa na, o ji fo nẹ a sẹro rẹ oyerinkugbe avwanre vẹ Jihova.—Mat. 4:4.

AYEN SẸRO RẸ OYERINKUGBE RAYEN VẸ JIHOVA

7. Die yen ihwo rẹ Babilọn na ruru rere Daniẹl sa vwọ vwẹrokere ẹkuruemu vẹ ẹga rayen?

7 Ọke re vwo mu Daniẹl vẹ igbeyan rọyen kpo eviẹn, ihwo rẹ Babilọn ki yono ayen “ephẹrẹ rẹ ihwo ri Kaldia na,” rere ayen vwọ vwẹrokere ẹkuruemu rayen. Kọyensorọ olori ro yono ayen vwo mu edẹ rẹ Babilọn vwọ kẹ ayen. (Dan. 1:3-7) Odẹ re mu kẹ Daniẹl churobọ si Bẹl, rọ dia ọghẹnẹ rode rẹ ihwo rẹ Babilọn. Ọ sa dianẹ Ovie Nebukadreza vuẹ Daniẹl nẹ ọghẹnẹ rẹ Babilọn rho vrẹ Ọghẹnẹ rọyen, Jihova.—Dan. 4:8.

8. Die yen vwẹ ukẹcha kẹ Daniẹl vwọ sẹro rẹ oyerinkugbe rọyen vẹ Jihova vwẹ ẹkuotọ ọfa?

8 Dede nẹ a vwẹ emu rẹ ovie vwọ kẹ Daniẹl, o “de roro” vwẹ ubiudu rọyen nẹ ọyen che “gbe oma rọye ẹgua-a.” (Dan. 1:8) Ọ sẹro rẹ oyerinkugbe rọyen vẹ Jihova ọke rọ vwọ hẹ ẹkuotọ ọfa kidie o se “ẹbe” ọfuanfon na vwẹ ejajẹ re de vwiẹ ọkieje. (Dan. 9:2) Kọyensorọ, omarẹ ẹgbukpe 70 vwọ wan nu a je riẹn vẹ odẹ rẹ Hibru rọyen.—Dan. 5:13.

9. Kirobo ra mrẹre vwẹ Une Rẹ Ejiro 119, ukẹcha vọ yen Ota rẹ Ọghẹnẹ vwọ kẹ ohwo ro si une na?

9 Ohwo ro si Une Rẹ Ejiro 119, mrẹ ẹgba nẹ Ota rẹ Ọghẹnẹ rhe rọ nẹrhẹ ọ sa kẹnoma kẹ iruemu rẹ ọke rọyen. O chirakon rẹ ehwẹjẹ rẹ isun evo. (Une 119:23, 61) Dedena, ọ vwẹ uphẹn kẹ eta rẹ Ọghẹnẹ nẹ e nabọ te ubiudu rọyen.—Se Une Rẹ Ejiro 119:11, 46.

SẸRO RẸ OYERINKUGBE WẸN VẸ JIHOVA

10, 11. (a) E de yono Ota rẹ Ọghẹnẹ, die yen dia ọdavwẹ avwanre? (b) Mavọ e se vwo ru ọdavwẹ nana? Djudje rọyen.

10 Dede nẹ iruo romobọ vẹ ewian rẹ  ukoko na sa ghene reyọ ọke avwanre, ofori nẹ avwanre eje rhuẹrẹ ọke phiyọ vwọ kẹ uyono romobọ vẹ ẹga orua. (Ẹfe. 5:15, 16) Ọdavwẹ avwanre diẹ e di vwo se ẹbe na re yẹrẹ muegbe rẹ ẹkpahọnphiyọ vwẹ uyono-o. E jẹ e vwo imuẹro nẹ Ota rẹ Ọghẹnẹ nabọ te avwanre ubiudu rere ọ bọn esegbuyota avwanre gan.

11 E se vwo ru ọnana, ofori nẹ e roro kpahen ọdavwẹ rẹ ihwo efa vẹ e rẹ avwanre komobọ siẹrẹ e de ruẹ uyono romobọ. (Fil. 1:9, 10) Ọke buebun na e de muegbe kẹ iruo aghwoghwo, uyono, yẹrẹ ota, avwanre ghwa tẹnroviẹ obo ro djobọte avwanre wa-an. Kerẹ udje: Dede nẹ ohwo ro chere emu davwọn tavwen ọ ke jẹ kẹ ihwo, ọ rọ davwenre na cha sa vọn evu-un. Ọ da guọnọ omakpokpọ, ko fori nẹ ọ nabọ muegbe rẹ omamọ emuọre kẹ oma rọyen. Vwẹ idjerhe vuọvo na, e jẹ avwanre davwẹngba vwọ ghẹrẹ ubiudu avwanre vẹ emu rẹ ẹwẹn ro fo ọdavwẹ rẹ avwanre komobọ.

12, 13. Diesorọ iniọvo buebun re ga vwẹ ẹkuotọ efa vwọ mrẹ erere siẹrẹ ayen de ru uyono rayen vwẹ ejajẹ romobọ rayen?

12 Iniọvo buebun re ga vwẹ ẹkuotọ ọfa mrẹ erere siẹrẹ ayen de yono Baibol na komobọ vwẹ ‘ejajẹ re de vwiẹ ayen.’ (Iruo 2:8) Ihwo re tobọ dia imishọnare mrẹvughe nẹ ayen sa vwọ sẹro rẹ ọyọnregan rayen, oborẹ ayen yono vwẹ ejajẹ ọrhorha na teri-i.

13 Alain, ro yono ephẹrẹ rẹ Persia omarẹ ẹgbukpe ẹrenren re tare nẹ, “Mi de muegbe rẹ uyono vwẹ Persia, me tẹnroviẹ ephẹrẹ na. Ọ vwọ dianẹ obo mi se vwo yono ejajẹ na yen me tẹnroviẹ na, o rhe jẹ obo mi yono na  nabọ te ubiudu mẹ-ẹ. Kọyensorọ me vwọ rhuẹrẹ ọke phiyọ kọke kọke mi vwo yono Baibol na vẹ ẹbe ukoko na vwẹ ejajẹ romobọ mẹ.”

DJOBỌTE UBIUDU RẸ EMỌ WẸN

14. Die yen ofori nẹ emiọvwọn davwẹngba vwo ru, kẹ diesorọ?

14 E jẹ emiọvwọn re dia Inenikristi davwẹngba rere Ota rẹ Ọghẹnẹ se vwo te ubiudu vẹ ẹwẹn rẹ emọ rayen. Serge vẹ aye rọyen, Muriel vwọ ga vwẹ ẹkuotọ ọfa ẹgbukpe erha nu, ayen de noso nẹ ọmọshare rayen rọhẹ ẹgbukpe 17 rhe vwo omavwerhovwẹn kpahen iruo rẹ ẹga na-a. Oni na da ta: “Ọke ri jovwo, oma vwerhọn ọ da vwẹ French, rọ dia ejajẹ robọ rọyen, vwo ghwoghwo ota, ẹkẹvuọvo enẹna ivun miovwon ro vwo ghwoghwo ota vwẹ ejajẹ ọfa.” Ọsẹ na de djefiotọ nẹ, “Avwanre vwo noso nẹ ẹdia nana cha nẹrhẹ ọmọ avwanre jẹ ẹyan obaro vwọrẹ ẹwẹn, avwanre de brorhiẹn ra vwọ kua rhivwin kpo ukoko rẹ avwanre nurhe.”

Vwo imuẹro nẹ uyota na te ubiudu rẹ emọ wẹn (Ni ẹkoreta 14, 15)

15. (a) Die yen se mu emiọvwọn vwo rhivwin kpo ukoko rọ jẹ ejajẹ rẹ emọ rayen nabọ vwo ẹruọ rọyen? (b) Odjekẹ vọ yen Urhi Rivẹ 6:5-7 vwọ kẹ emiọvwọn?

15 Die yen se mu emiọvwọn vwo rhivwin kpo ukoko rọ jẹ ejajẹ rẹ emọ rayen nabọ vwo ẹruọ rọyen? Ẹsosuọ, ayen brorhiẹn sẹ ayen ghini vwo ọke vẹ ekuakua re vwo yono emọ na ẹguọnọ rẹ Jihova, ji yono ejajẹ kpokpọ na. Ọrivẹ, ayen de noso nẹ emọ na rhe vwo oruru kpahen erọnvwọn rẹ ẹwẹ-ẹn yẹrẹ asan rẹ ayen da ga na-a. Vwẹ ẹdia tiọyena, emiọvwọn na se vwo ẹwẹn ayen vwo rhivwin kpo ukoko rọ jẹ ejajẹ rẹ emọ na nabọ vwo ẹruọ rọyen rere ayen se vwo mudia gan vwẹ uyota na.—Se Urhi Rivẹ 6:5-7.

16, 17. Ena vọ yen emiọvwọn evo vwo yono emọ rayen dede nẹ ayen hẹ ẹkuotọ ọfa?

16 Ẹkẹvuọvo, emiọvwọn evo je vwẹ idjerhe efa vwo yono emọ rayen vwẹ ejajẹ rayen dede nẹ ayen hẹ ukoko yẹrẹ ẹko rọ jẹ ejajẹ rẹ ẹkuotọ ọfa. Charles, ro vwo emetẹ erha rehẹ ẹgbukpe 9, 12, vẹ 13, kpo uyono ra da jẹ ejajẹ rẹ Lingala. Ọ da ta: “Avwanre brorhiẹn ra vwọ vwẹ ejajẹ avwanre vwo yono emọ na, ji vwo ru ẹga orua. Avwanre ji ru udje yẹrẹ heha evo vwẹ ejajẹ rẹ Lingala rere emọ na se vwo yono vwẹ ọke yena.”

Davwẹngba wo vwo yono ejajẹ kpokpọ na rere wo ji vwobọ vwẹ uyono na (Ni ẹkoreta 16, 17)

17 Kevin ro vwo emetẹ ivẹ rehẹ ẹgbukpe iyorin vẹ ẹrenren, vwo ọrhuẹrẹphiyotọ ọfa kidie ayen vwo ẹruọ rẹ uyono re ruẹ vwẹ ejajẹ ọfa na-a. Ọ da ta: “Me vẹ aye mẹ vwẹ French rọ dia ejajẹ avwanre vwo yono emọ avwanre. Avwanre ji vwo ọrhuẹrẹphiyotọ re vwo kpo uyono rẹ French obọvo emeranvwe. Avwanre je reyọ ọke omaerovwo vwo kpo eghwẹkoko rẹ French.”

18. (a) Odjekẹ vọ vwẹ Rom 15:1, 2 yen sa chọn wẹ uko vwọ riẹn obo ri che shephiyọ vwọ kẹ emọ wẹn? (b) Iroroẹjẹ vọ yen emiọvwọn efa vwọphia? (Ni eta rẹ odjefiotọ.)

18 Dedena, orua ọvuọvo yen che brorhiẹn rẹ obo ri che yovwin kẹ emọ rayen. [2] (Gal. 6:5) Muriel, re djunute nanayen tare nẹ ọ vẹ ọshare rọyen gbobọnyẹ ojevwe rayen fikirẹ ẹdia rẹ ẹwẹn rẹ ọmọ rayen. (Se Rom 15:1, 2.) Serge rhe mrẹvughe nẹ ayen brorhiẹn rọ gbare. Ọ da ta: “Vwo nẹ ọke avwanre vwo rhivwin kpo ukoko rẹ French na, ọmọshare avwanre da rhe yanphiaro vwọrẹ ẹwẹn, o de rhi bromaphiyame. Asaọkiephana, ọ ga  kerẹ ọkobaro ọkieje. Ọ je tobọ vwo ẹwẹn rọ vwọ rhoma ga vwẹ ẹko ra da jẹ ejajẹ rẹ ẹkuotọ ọfa!”

JẸ OTA RẸ ỌGHẸNẸ TE UBIUDU WẸN

19, 20. Mavọ yen avwanre se vwo djephia nẹ e vwo ẹguọnọ rẹ Ota rẹ Ọghẹnẹ?

19 Fikirẹ ẹguọnọ rọyen, Jihova de ruo rere Ota rọyen, Baibol na vwọ dia vwẹ ejajẹ ujorin buebun rere ‘ihwo ejobi vwo vwo erianriẹn ọgbagba rẹ uyota na.’ (1 Tim. 2:4) Ọ riẹnre nẹ ihworakpọ sa vwẹrote ẹdia rẹ ẹwẹn rayen siẹrẹ ayen de se eta rọyen vwẹ ejajẹ ro te ubiudu rayen.

20 Otoro ẹdia avwanre hepha-a, e jẹ avwanre brorhiẹn a vwọ ghẹrẹ ubiudu avwanre vẹ uvi rẹ emu rẹ ẹwẹn. E de yono Baibol na ọkieje vwẹ ejajẹ avwanre, avwanre cha sẹro rẹ omakpokpọ rẹ ẹwẹn rẹ avwanre vẹ ọ rẹ orua avwanre, o ji che djephia nẹ avwanre phi ota rẹ Ọghẹnẹ phiyọ udu avwanre.—Une 119:11.

^ [1] (ẹkorota 5) E wene edẹ evo.

^ [2] (ẹkorota 18) Wọ da guọnọ odjekẹ efa vwẹ Baibol na re sa chọn orua wẹn uko, se uyovwinrota na “Raising Children in a Foreign Land—The Challenges and the Rewards” rọhẹ Uwevwin Orhẹrẹ rẹ October 15, 2002, ọ rẹ oyibo.