Ọghẹnẹ kpahan phiyọ ẹrhovwo eje?

WỌ CHA TANẸ Ọ KPAHAN PHIYỌ ẸRHOVWO RẸ . . .

  • Ihwo eje

  • Ihwo evo

  • Ohwo vuọvo-o

OBORẸ BAIBOL NA TARE

“Ọrovwohwo si kẹrẹ otu . . . ejobi ri sere vwẹ uyota.”—Une Rẹ Ejiro 145:18.

DIE ỌFA YEN BAIBOL NA SE YONO AVWANRE?

  • Ọghẹnẹ kerhọ rẹ ẹrhovwo rẹ ihwo ri gbevwọsuọ-ọ. (Aizaya 1:15) Ẹkẹvuọvo ọ vẹ ayen sa “jẹn iroro kugbe” yẹrẹ rhuẹrẹ kugbe siẹrẹ ayen de kurhẹriẹ.—Aizaya 1:18.

  • Ọghẹnẹ ke sa kpahenphiyọ ẹrhovwo, ofori nẹ a nẹrhovwo na vwo nene ọhọre rọyen rọhẹ Baibol na.—1 Jọn 5:14.

O vwo obo ra rhuẹrẹ oma phiyọ wan a da nẹrhovwo?

IHWO EVO RORO nẹ ofori ne shiguẹ, nuẹ uyovwin kpotọ, yẹrẹ tan abọ ivẹ kugbe siẹrẹ a da nẹrhovwo. Die wo rorori?

OBORẸ BAIBOL NA TARE

Ọghẹnẹ nyo ẹrhovwo rẹ ihwo ri “tidia” yẹrẹ i ri “vrẹn” mudia, e re “vwẹ oma ghwiotọ” yẹrẹ i ri “diguẹ” totọ. (1 Ikun Rivie 17:16; 2 Ikun Rivie 30:27; Ẹzra 10:1; Iruo Rẹ Iyinkọn Na 9:40) Ọ guọnọ omaẹrhuẹrẹ rẹ oghẹresan ọvo mie avwanre a da nẹrhovwo-o.

DIE ỌFA YEN BAIBOL NA SE YONO AVWANRE?

  • Ọghẹnẹ kerhọ rẹ ihwo re vwomakpotọ. —Une Rẹ Ejiro 138:6.

  • Wọ sa vwẹ kejajẹ kejajẹ vwọ nẹrhovwo, je tobọ nẹrhovwo vwẹ ubiudu wẹn.—2 Ikun Rivie 6:32, 33; Nehemaya 2:1-6.