Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYOVWINROTA RẸ ỌBE NA | OHWO RE VWO ẸGUỌNỌ KPAHEN DE GHWU

Ihwo ri Ghwuru na Cha Rhoma Dia!

Ihwo ri Ghwuru na Cha Rhoma Dia!

Karophiyọ nẹ Gail, re djunute vwẹ ẹsosuọ yen, ke roro nẹ ọyen che se yerin ghene ughwu rẹ ọshare rọyen re se Rob na-a. Ẹkẹvuọvo, o rhẹro rẹ ọke rọ cha vwọ mrẹ vwẹ akpọ kpokpọ rẹ Ọghẹnẹ veri na. Gail da ta: “Ẹkpo rẹ Baibol ro me je vwe yẹn, Ẹvwọphia 21:3, 4,” rọ tare nẹ, “Okpuyovwi rẹ Ọghẹnẹ ko bru ayen rhe dia; ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eye oviẹ eyẹ odjadja ọfa-a, kidie emu rẹ awanre na wanvrẹn nure.”

Gail da ta: “Ive nana yen me ghwa guọnọ. Ọ da vwẹ mamọ kẹ ihwo, rẹ ihwo rayen ghwuru jẹ ayen riẹn kpahen iphiẹrophiyọ nana-a.” Gail ru nene obo ro se gbuyota na, rọ vwọ vwomakpahotọ vwọ kẹ iruo aghwoghwo rẹ ota rẹ Ọghẹnẹ ọkieje, rọ vwọ vuẹ ihwo nẹ vwẹ ọke rọ cha na “ughwu gbe cha dia ọfa-a.”

Job vwo imuẹro nẹ ọ cha rhoma dia

Wọ sa tanẹ, ‘Ọnana cha sa phia-a!’ Ẹkẹvuọvo e jẹ a fuẹrẹn udje rẹ Job. Okpọga ọvo muro. (Job 2:7) Dede nẹ ofu dje Job te ẹdia rẹ ughwu, jẹ o ji vwo esegbuyota nẹ Ọghẹnẹ vwẹ ogangan rọ vwọ kparọ nẹ ushi. Vwọrẹ imuẹro ọ da ta: “E manẹ wo sivwe nu vwe [“Ushi,” NW] vwonẹ . . . Ko wo se, ki mi nyo we; ku wo rhẹro rẹ iruo rẹ abọ wẹn.” (Job 14:13, 15) Job riẹnre nẹ ughwu rọyen cha da Ọghẹnẹ, ọ je riẹn nẹ Ọghẹnẹ rhẹro rẹ ọke rọ cha vwọ kparọ nẹ ushi.

O rhe che kri-i, Ọghẹnẹ cha rhọvwọn Job vẹ ihwo efa buebun nẹ ushi, vwọ rhe iparadaisi vwẹ otọrakpọ na. (Luk 23:42, 43) Iruo Rẹ Iyinkọn Na 24:15, ghwa rhọnvwephiyọ ọnana, rọ vwọ ta: “Evrẹnushi herọ kẹ ihwo.” Jesu da je ta: “Wo jẹ ọnana gbe ovwan unu-u; kidie ọke na cha rẹ irivwi rẹ hẹ ẹvun rẹ ishi ejobi che vwo nyo urhuru rọye, ke cha yan phia.” (Jọn 5:28, 29) Job che rhiẹromrẹ orugba rẹ uve nana. Ọ cha mrẹ ọke rọ cha vwọ rhoma vwo “ogangan rẹ emeghele” rọyen, rẹ oma rọyen cha vwọ dia “wọnwọn kerẹ oma rẹ emeghele” bẹdẹ bẹdẹ. (Job 33:24, 25) Ọtiọyen ọ je cha dia kẹ ihwo ri dje ọdavwaro phia kpahen ọrhuẹrẹphiyotọ rẹ Ọghẹnẹ rọ vwọ rhọvwọn ihwo nẹ ushi rhe otọrakpọ na.

Ọ da dianẹ ohwo rọ kẹrẹ owẹ ghwuru jovwo re, eta re djunute vwẹ obenu na cha ghwa nẹrhẹ wọ kpairoro vrẹ uvweri na kare kare-e. Ẹkẹvuọvo, wo de roro kpahen ive rẹ Ọghẹnẹ rehẹ Baibol na, ku wọ sa mrẹ uvi rẹ iphiẹrophiyọ vẹ ogangan wo se vwo yerin ghene.—1 Tẹsalonaika 4:13.

Wọ guọnọ riẹn emu efa kpahen obo re se vwo yerin ghene uvweri? Wo vwo enọ efa kerẹ, “Diesorọ Ọghẹnẹ vwọ vwẹ uphẹn kẹ ojaẹriọ vẹ umwemwu?” Biko kpo wẹbsaiti avwanre, jw.org/urh, wọ cha mrẹ ẹkpahọnphiyọ rẹ Baibol na, re sa kẹ wẹ uchebro.