“Oma rọye ọye oma na ejobi, da tan kugbe a da rhuọ kugbe.—ẸFESỌS 4:16.

UNE: 53, 107

1. Nẹ ọtonphiyọ rhe, mavọ yen e ruiruo Ọghẹnẹ wan?

JIHOVA vẹ Jesu vwo omamọ oyerinkugbe nẹ ọtonphiyọ rhe. Jesu yen Jihova ka ma. Jesu de rhe nene wian ro vwo “mudia kẹrẹ, kerẹ onotu rẹ ọwena.” (Isẹ 8:30) Idibo rẹ Jihova je wian kuẹgbe vwẹ iruo rẹ ayen ruẹ. Kerẹ udje, Noa vẹ orua rọyen koko bọn okọ na. Emọ rẹ Izrẹl je wian kugbe vwọ bọn ọgarivi yẹrẹ itabanako na, ayen je ghan nẹ, ji muo nẹ asan kpo asan. Vwẹ uwevwin rẹ ẹga na, ayen hworo ekuakua rẹ uhworo je suine kuẹgbe vwo jiri Jihova. Ihwo rẹ Jihova ru erọnvwọn nana eje kidie ayen wian kuẹgbe.—Jẹnẹsis 6:14-16, 22; Ukeri 4:4-32; 1 Ikun Rivie 25:1-8.

2. (a) Die yen a jokaphiyọ kpahen Inenikristi rẹ ẹgbukpe ujorin ẹsosuọ? (b) Enọ vọ yen avwanre cha fuẹrẹn?

2 Inenikristi rẹ ẹgbukpe ujorin ẹsosuọ je wian kugbe. Ọyinkọn Pọl nabọ djefiotọ nẹ dedevwo nẹ ayen vwo ẹgba vẹ iruo sansan, ayen wian kugbe. Ayen ejobi nene Osun rayen, Jesu Kristi. Pọl reyọ ayen vwo dje ẹbẹre sansan rẹ ugboma  na re wian kuẹgbe. (Se 1 Kọrẹnt 12:4-6, 12.) Kẹ avwanre nonẹna vwo? Mavọ yen avwanre sa vwọ wian kugbe vwẹ iruo aghwoghwo na, vwẹ ukoko na, kugbe vwevunrẹ orua?

WIAN KUGBE VWEVUNRẸ IRUO AGHWOGHWO NA

3. Emramrẹ vọ yen ọyinkọn Jọn mrẹre?

3 Vwẹ ẹgbukpe ujorin ẹsosuo, ọyinkọn Jọn mrẹ emramrẹ rẹ emekashe ighwrẹn ri hworo owanre. Ọriyorin vwo hworo owanre rọyen, Jọn da mrẹ “isio ọvo ro she nẹ obo odjuvwu cha akpọ na.” “Isio” yena da vwẹ usiaphrẹ vwo rhie ẹchẹ rẹ ukpotọ okokodo ro ji mu ebri hwin. Ẹsosuọ, ivwirhi de bru nẹ evun rọyen rhe, ebaka buebun da rhan nẹ evunrẹ ivwirhi na rhe. Ukperẹ ayen vwọ re irhe yẹrẹ ekankọn, ebaka na ki kpokpo “ihwo ri jẹ oka rẹ Ọghẹnẹ na evwo vwẹ arhare rayen.” (Ẹvwọphia 9:1-4) Jọn riẹnre nẹ ebaka sa so oghwọrọ ọgangan, kirobo rẹ ayen ruru vwẹ Ijipt ọke rẹ Mosis. (Eyanno 10:12-15) Ebaka rẹ Jọn mrẹre na mudiaphiyọ Inenikristi ra jẹreyọ ri ghwoghwo ovuẹ ọgangan kpahen ẹga rẹ efian. Iduduru rẹ ihwo buebun ri vwo iphiẹrophiyọ rẹ ayen vwọ dia otọrakpọ na ji kuomaba ayen. Ẹko ivẹ nana ruiruo aghwoghwo na kuẹgbe. Iruo nana chọn ihwo buebun uko vwo vrẹn nẹ ẹga rẹ efian ayen de ji nẹ abọ rẹ Eshu.

4. Iruo vọ yen ihwo rẹ Ọghẹnẹ che ru, kẹ die yen idjerhe vuọvo rẹ ayen se vwo ruo?

4 Avwanre vwo owian re vwo ghwoghwo “iyẹnrẹ esiri” na kẹ ihwo rẹ akpọeje tavwen oba na ki te. Ọnana owian rode! (Matiu 24:14; 28:19, 20) Ofori nẹ e durhie kohwo kohwo rẹ “urhuru rẹ ame hwe” nẹ ọ rhe da “ame rẹ arhọ” na, kọyen ofori nẹ a vwẹ uyota rẹ Baibol na vwo yono kohwo kohwo rọ guọnọ nyo. (Ẹvwọphia 22:17) Jẹ e se ru ọnana siẹrẹ a da wian “kugbe” vwevunrẹ ukoko na.—Ẹfesọs 4:16.

5, 6. Idjerhe vọ yen avwanre vwọ wian kuẹgbe vwẹ iruo aghwoghwo na?

5 Re se vwo ghwoghwo ota kẹ ihwo buebun, ofori nẹ e vwo omamọ rẹ ọrhuẹrẹphiyotọ vwọ kẹ iruo aghwoghwo na. Odjekẹ rẹ ukoko na sa chọn avwanre uko vwo ru ọnana. E de ru omẹvwa rẹ ada nu, ke re ghwoghwo iyẹnrẹn esiri rẹ Uvie na vwọ kẹ ihwo. Avwanre je vwẹ ẹbe vwọ kẹ ayen. Vwọrẹ uyota, avwanre phi ẹbe ri te iduduru buebun phiyọ ada re vwẹ akpọeje. Ọkiọvo, avwanre se vwobọ vwẹ iruo aghwoghwo na vwẹ idjerhe rẹ oghẹresan. Wo de ruiruo nana, kọyen wo kuomakugbe iduduru rẹ iniọvo wẹn vwẹ akpọ na ri ji ruiruo rẹ aghwoghwo na! Wo ji nene emekashe na wian kuẹgbe, ayen vwẹ ukẹcha kẹ ihwo rẹ Ọghẹnẹ vwo ruiruo rẹ aghwoghwo na.—Ẹvwọphia 14:6.

6 Mavọ ọ vwerhoma te e de se kpahen iyẹnrẹn rẹ iruo aghwoghwo na vwẹ akpọeje vwevunrẹ Yearbook na! Ji roro kpahen obo ra wian kuẹgbe ọke re de durhie ihwo kpo ọghwẹkoko. A me je kerhọ kẹ uyono vuọvo. Eta, eha rudje, vẹ idje sansan ra vwọphia kẹ avwanre oruru ra vwọ ga Jihova vẹ ẹgba avwanre eje. E ji kuomakugbe iniọvo rẹ avwanre rehẹ akpọneje vwo ruẹ Ẹkarophiyọ rẹ ughwu rẹ Jesu kukpe kukpe. (1 Kọrẹnt 11:23-26) Ẹdẹ vuọvo yen e vwo ruo, rọ dia ovwọnvwọn rẹ Nisan 14, re vwo dje ọdavwaro kpahen oborẹ Jihova ru kẹ avwanre, kugbe e ji vwo nene iji rẹ Jesu. Udughwrẹn evo e ki ru Ẹkarophiyọ na, avwanre ejobi je wian kugbe vwo durhie  ihwo buebun nẹ i kuomakugbe avwanre vwẹ irueru ọghanghanre nana.

7. Die yen avwanre se ruẹ kidie nẹ a wian kuẹgbe?

7 Abaka vuọvo ghwe vwo ẹgba ro vwo ruiruo-o. Avwanre ohwo vuọvo ji vwo ẹgba re vwo ghwoghwo kẹ ihwo ejobi-i. Jẹ avwanre ghwoghwo ota kẹ iduduru rẹ ihwo, je chọn evo uko vwo jiri Ọghẹnẹ kidie avwanre wian kuẹgbe.

WIAN KUGBE VWEVUNRẸ UKOKO NA

8, 9. (a) Udje vọ yen Pọl vwo yono Inenikristi nẹ ayen wian kugbe? (b) Mavọ yen avwanre sa vwọ wian kugbe vwevunrẹ ukoko na?

8 Pọl nabọ djefiotọ vwọ kẹ iniọvo rehẹ Ẹfesọs kpahen ọrhuẹrẹphiyotọ rọhẹ ukoko na, ọ da je tanẹ ofori nẹ ihwo eje rehẹ ukoko na “rho . . . vwẹ idjerhe kidjerhe.” (Se Ẹfesọs 4:15, 16.) Pọl vwẹ ugboma na vwo dje nẹ Inenikristi eje se toroba oyerinkugbe rẹ ukoko na, rere ihwo eje vwọ yan nene Jesu, rọ dia Osun rẹ ukoko na. Ọ tare nẹ ẹbẹre sansan rẹ ugboma na wian kuẹgbe womarẹ “uriẹn kuriẹn ejobi ra vwọ kẹ.” Ọtiọyena, owenẹ avwanre ighene yẹrẹ emare, te e rẹ oma rayen ganre yẹrẹ e re muọga, die yen ofori nẹ e ru?

9 Jesu vwẹ ekpako vwo mu nẹ ayen vwẹrote ukoko na, ọ je guọnọ nẹ avwanre muọghọ kẹ ayen ji nene odjekẹ rayen. (Hibru 13:7, 17) Ọnana ghwa lọhọ ọkieje-e. Ẹkẹvuọvo, e jẹ a yare ukẹcha mie Jihova. Ẹwẹn ọfuanfon rọyen sa chọn avwanre uko vwọ yan nene odjekẹ eje rẹ ekpako na vwọ kẹ avwanre. Roro kpahen erere rẹ ukoko na cha mrẹ siẹrẹ avwanre da vwomakpotọ kẹ ekpako na ji nene ayen wian kugbe. Oyerinkugbe kọ cha dia evunrẹ ukoko na, ẹguọnọ rẹ avwanre vwo kpahen ohwohwo kọ je cha ganphiyọ.

10. Mavọ yen idibo rowian vwọ chọn ukoko na uko vwọ wian kuẹgbe? (Ni uhoho rẹsosuọ na.)

10 Idibo rowian ji toroba oyerinkugbe rẹ ukoko na. Ayen wian gangan vwọ chọn ekpako na uko, oma vwerhen avwanre kpahen iruo rayen na. Kerẹ udje, idibo rowian vwo imuẹro nẹ ẹbe buebun herọ vwọ kẹ iruo aghwoghwo na, ayen ji dede erhorha re rhiẹ uyono avwanre. Ayen je vwẹrote ẹrhuẹrẹ vẹ orufon rẹ Ọguan Ruvie na. E de nene iniọvo nana wian kuẹgbe, jẹ avwanre vwo omamọ oyerinkugbe, je ga Jihova vwo nene ọrhuẹrẹphiyotọ rọyen.—Ji ni Iruo Rẹ Iyinkọn Na 6:3-6.

11. Die yen ighene se ru vwọ chọn ukoko na uko?

11 Ekpako evo herọ re wiowian ukoko mamọ vwẹ ikpe buebun re. Asaọkiephana, ọ sa dianẹ ayen rha sa wian te oborẹ ayen wian jovwo-o kidie ayen ghwore. Ighene eshare sa chọn ayen uko. A da nabọ yono ayen, ayen sa vwẹrote ewian ukoko na. Idibo rowian da je nabọ vwomakpahotọ vwọ kẹ ewian sansan, ayen se yerin te ẹdia rẹ ekpako vwẹ ọke rọ cha obaro. (1 Timoti 3:1, 10) Ekpako evo re dia ighene tobọ je yan obaro vwẹ ukoko na. Asaọkiephana, ayen ga kerẹ iniruo okinriariẹ re vwẹ ukẹcha kẹ iniọvo buebun vwẹ ikoko sansan. Oma vwerhen avwanre siẹrẹ ighene da vwomakpahotọ vwọ ga iniọvo rayen.—Se Une Rẹ Ejiro 110:3; Aghwoghwo 12:1.

WIAN KUGBE VWEVUNRẸ ORUA

12, 13. Die yen sa chọn orua uko vwo vwo omamọ oyerinkugbe?

12 Mavọ yen a sa vwọ chọn ihwo rẹ orua avwanre uko vwọ wian kugbe? Ẹga orua re ruẹ kudughwrẹn kudughwrẹn sa chọn avwanre uko. Emiọvwọn vẹ emọ rayen da  ghwọrọ ọke kuẹgbe vwo yono kpahen Jihova, ẹguọnọ rayen kpahen ohwohwo kọ je cha ganphiyọ. Ayen sa vwẹ ọke nana vwo muegbe rẹ oborẹ ayen cha ta vwẹ aghwoghwo na. Ayen de ji nyo oborẹ ohwo vuọvo ta kpahen ukoko na, je mrẹ ẹguọnọ rẹ orua na vwo kpahen Jihova, ọnana si ayen kẹrẹ ohwohwo.

13 Idjerhe vọ yen aye gbe ọshare sa vwọ wian kugbe? (Matiu 19:6) Ayen de vwo ẹguọnọ rẹ Jihova, ayen da je ga kuẹgbe, kẹ ayen che vwo omavwerhovwẹn vẹ oyerinkugbe vwẹ orọnvwe rayen. Ofori nẹ ayen vwo ẹguọnọ rẹ ohwohwo kerẹ Ebraham vẹ Sera, Aizik vẹ Rebeka, kugbe Elkanah vẹ Hanah. (Jẹnẹsis 26:8; 1 Samuẹl 1:5, 8; 1 Pita 3:5, 6) Aye gbe ọshare de ru ọtiọna, oyerinkugbe rayen cha gan, ayen ki ji che sikẹrẹ Jihova kpẹkpẹkpẹ.—Se Aghwoghwo 4:12.

Ẹga orua sa vwẹ ukẹcha kẹ ighene vẹ emare vwọ nabọ sikẹrẹ ohwohwo (Ni ẹkoreta 12, 15)

14. Ọ da dianẹ ọshare yẹrẹ aye wẹn ga Jihova-a, die wo se ru vwọ sẹro rẹ orọnvwe wẹn?

14 Baibol na tare nẹ ofori nẹ avwanre rọvwọn ohwo rọ ga Jihova ọvo. (2 Kọrẹnt 6:14) Dedena, o vwo iniọvo avwanre evo rẹ ọrivẹ rayen dia Oseri rẹ Jihova-a. Evo mrẹ ukoko na vughe ọke rẹ ayen vwọ rọvwọn nu, jẹ ọrivẹ rayen rhọnvwe dia Oseri rẹ Jihova-a. Ọ sa dianẹ efa rọvwọn odibo rẹ Jihova, jẹ ukuko na ọrivẹ rayen na de vrẹn nẹ ukoko na. Vwẹ ẹdia nana, Inenikristi davwẹngba rayen eje ayen vwọ vwẹ iji rẹ Baibol na vwọ sẹro rẹ orọnvwe rayen. Ọnana ghwa lọhọ ọkieje-e. Kerẹ udje, Mary vẹ ọshare rọyen David, ga Jihova kuẹgbe. David da dobọ rẹ uyono ẹra ji kpregede. Ẹkẹvuọvo, Mary je davwẹngba rọ vwọ dia omamọ aye, o ji dje uruemu rẹ Onenikristi phia. O yono emọ rọyen esan kpahen Jihova, o ji kpo uyono vẹ emẹvwa ọkieje. Ikpe evo vwọ wan nu, emọ na de kpo ọ rẹ obọ rayen, jẹ Mary je ga Jihova dede nẹ erọnvwọn rhoma gan kẹ. Ọke ọvo vwo te, David ko se imagazini rẹ Mary vwọ kẹ. Ọ da je rhe ton uyono ẹra phiyọ. Uvwrọmọ rọyen rọhẹ ẹgbukpe esan, sẹro rẹ agbara hẹrhẹ ọkeneje. Ọ rha rhe-e, ọmọ na kọ vuẹ nẹ, “Papa, me hẹrhẹ owẹ bẹn nonẹna.” David de rhivwin bru Jihova rhe ẹgbukpe 25 vwọ wan  nu. Asaọkiephana, ọ vẹ aye rọyen ga Jihova vẹ omavwerhovwẹn.

15. Mavọ yen ihwo re rọvwọn kri re sa vwọ vwẹ ukẹcha kẹ e re rọvwọnre obọ?

15 Eshu vwọsua erua nonẹna. Ọnana orọnvwọn ọvo rọ nẹrhẹ aye gbe ọshare re ga Jihova wian kugbe ọkieje. Otoro ikpe wọ rọvwọn re-e, roro kpahen obo wọ sa ta yẹrẹ ru, wo vwo ru orọnvwe wẹn gan. Ọ da dianẹ ovwan rọvwọn kri re, ovwan sa dia omamọ udje vwọ kẹ e re rọvwọnre obọ. Wo se durhie ihwo re ghwa rọvwọn obọ vwọ rhe ẹga orua rẹ ovwan. Ayen cha mrẹ nẹ otoro oborẹ orọnvwe na kri te re-e, ayen se ji vwo ẹguọnọ kpahen ohwohwo je wian kugbe.—Taitọs 2:3-7.

“E JE KPO UGBENU RẸ ỌROVWOHWO NA”

16, 17. Die yen idibo rẹ Ọghẹnẹ rhẹro rọyen?

16 Ọke rẹ ihwo rẹ Izrẹl vwo kpo orẹ vwẹ Jerusalẹm, ayen wian kuẹgbe. Ayen muegbe rẹ erọnvwọn eje rẹ ayen guọnọre vwọ kẹ oyan na. Ayen ke je yan kuẹgbe je chọn ohwohwo uko. Vwẹ uwevwin rẹ ẹga na, ayen eje jiri Jihova je ga kuẹgbe. (Luk 2:41-44) Nonẹna, rẹ avwanre vwo muegbe hẹrhẹ akpọ kpokpọ na, ofori nẹ a davwẹngba vwo vwo omamọ oyerinkugbe je wian kugbe. Wo se roro kpahen idjerhe wo se vwo ru ọnana kpobarophiyọ?

17 Ihworakpọ na ro ohwohwo kakaka-a, ayen họnra fikirẹ erọnvwọn buebun. Jẹ oma vwerhen avwanre nẹ Jihova chọn avwanre uko vwo vwo ufuoma kugbe ẹruọ rẹ uyota na! Ihwo rọyen rehẹ akpọ na vwẹ ẹga kẹ vwẹ idjerhe rọ guọnọre. Ma rho vwẹ ọke rẹ oba nana, ihwo rẹ Jihova vwo omamọ oyerinkugbe vrẹ obo ri jovwo. Kirobo rẹ Aizaya vẹ Maika mraro rọyen, avwanre eje kpo “ugbenu rẹ Ọrovwohwo na” kuẹgbe. (Aizaya 2:2-4; se Maika 4:2-4.) Mavọ oma cha vwerhen avwanre te vwẹ ọke rọ cha obaro na rẹ ihworakpọ eje de che vwo omamọ oyerinkugbe, je wian “kugbe” vwẹ ẹga rẹ Jihova!