Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Uwevwin Orhẹrẹ  |  March 2016

Ighene—Mavọ Ovwan Se Vwo Muegbe Vwọ Kẹ Omaebrophiyame?

Ighene—Mavọ Ovwan Se Vwo Muegbe Vwọ Kẹ Omaebrophiyame?

“Me vwo omavwerhe ru ọhọre wẹn, E Ọghẹnẹ mẹ.UNE RẸ EJIRO 40:8.

UNE: 51, 58

1, 2. (a) Dje oboresorọ omaebrophiyame vwọ dia owọẹjẹ ọghanghanre. (b) Die yen ohwo vwo imuẹro kpahen tavwen o ki bromaphiyame, kẹ diesorọ?

WẸWẸ eghene rọ guọnọ bromaphiyame? Ọ da dia ọtiọyen, ọnana uphẹn rọ ma rho ro se te we obọ. Kirobo ra mrẹre vwẹ uyovwinrota rọ wanre na, omaebrophiyame ọyen owọẹjẹ ọghanghanre. Ọyena odjephia nẹ wọ vwomakpahotọ kẹ Jihova, wo vwo ve kẹ nẹ wọ cha ga bẹdẹ bẹdẹ, wo ji vwo ve kẹ nẹ eruo rẹ ọhọre rọyen yen obo re ma ghanre vwẹ akpeyeren wẹn. Rọ vwọ dianẹ ọnana uve ọghanghanre na, kẹ ofori nẹ wo bromaphiyame ọke wọ da ghwanre tedje nu, wo de vwo owenvwe na, wọ da je riẹn obo ro mudiaphiyọ a vwọ vwomakpahotọ kẹ Ọghẹnẹ.

2 Ẹkẹvuọvo, ọ sa dianẹ wo roro nẹ wo ji muegbe wo vwo bromaphiyame-e. Yẹrẹ ọ sa dianẹ wo muegbe re, jẹ ọsẹ vẹ oni wẹn niro nẹ wọ hẹrhẹ emerha kidie wọ je ghwanre te-e. Die yen ofori nẹ wo ru? Wo jẹ ẹwẹn wẹn kuọrọ-ọn. Ukperẹ ọtiọyen, reyọ ọke nana vwọ yan phiaro rere wo se vwo muwan vwọ kẹ  omaebrophiyame. Ọtiọyena, wo se bru ẹkẹn kẹ oma wẹn vwẹ ẹdia erha nana: (1) imuẹro wẹn, yẹrẹ obo wo segbuyota (2) obo wo ruẹ, vẹ (3) ọdavwaro wẹn.

IMUẸRO WẸN

3, 4. Die yen ighene se yono nẹ udje rẹ Timoti?

3 Roro kpahen ẹkpahọnphiyọ wẹn vwọ kẹ enọ nana: Diesorọ o vwo muvwẹro nẹ Ọghẹnẹ herọ? Diesorọ o vwo muvwẹro nẹ Baibol na nẹ obọ rẹ Ọghẹnẹ rhe? Diesorọ mi vwo nene irhi rẹ Ọghẹnẹ ukperẹ me vwọ vwẹrokere uruemu rẹ akpọ na? Enọ nana sa chọn wẹ uko vwọ reyọ eta rẹ ọyinkọn Pọl vwo ruiruo: “Vughe ọhọre rẹ Ọghẹnẹ, obo ri yoma ro fo ẹreyọ kugbe obo re gbare.” (Rom 12:2) Diesorọ wo vwo ru ọtiọyen?

4 Udje rẹ Timoti sa chọn wẹ uko. Ọ nabọ riẹn Isiesi Ọfuanfon na kidie oni rọyen vẹ oni rode rọyen vwẹ Isiesi Ọfuanfon na yono. Ẹkẹvuọvo, Pọl da vuẹ Timoti: “Phi obọ phihọ obo ri wo nyori ru wọ nabọ segbuyota na.” (2 Timoti 3:14, 15) Ubiota na, “nabọ” mudiaphiyọ “imuẹro ọgangan re vwo kpahen orọnvwọn rọ dia uyota.” Ọtiọyena, ofori nẹ Timoti vwo imuẹro nẹ uyota na hẹ evunrẹ Isiesi Ọfuanfon na. O rhiabọreyọ, kidie o roro kpahen obo ro yonori o de ji vwo imuẹro kpahọn, ọ dia kidie nẹ oni rọyen vẹ oni rode rọyen vuẹrẹ nẹ o ru ọtiọye-en.—Se Hibru 5:14.

5, 6. Diesorọ ọ vwọ ghanre nẹ wọ vwẹ “ọhọ” wẹn vwo ruiruo vwẹ ọke eghene?

5 Kẹ owẹ vwo? Ọ sa dianẹ wọ hẹ ukoko na ikpe buebun re. Ọ da dia ọtiọyen, davwẹngba wo vwo roro kpahen oboresorọ wo vwo vwo imuẹro na. Ọnana cha chọn wẹ uko vwọ bọn esegbuyota wẹn gan je kẹnoma kẹ orharhe rẹ orhiẹn-ebro fikirẹ ọnyẹ rẹ otu, iroro rẹ akpọ na, yẹrẹ iroro romobọ wẹn.

6 Wọ da vwẹ “ọhọ” wẹn vwọ nabọ ruiruo vwẹ ọke eghene, kẹ wọ sa kpahenphiyọ enọ rẹ edje wẹn sa nọ kerẹ: ‘Die nẹrhẹ wo vwo imuẹro nẹ Ọghẹnẹ herọ? Ọghẹnẹ de vwo ẹguọnọ avwanre, diesorọ ọ vwọ vwẹ uphẹn kẹ erọnvwọn ebrabra nẹ e phia? Ọ  da dianẹ Ọghẹnẹ yen ma erọnvwọn eje, kẹ ono yen ma Ọghẹnẹ?’ Wọ da nabọ choma, enọ tiọyena rhe che tighi ẹwẹn wẹ-ẹn, ukperẹ ọtiọyen, e cha nẹrhẹ wọ nabọ yono Baibol na kodophiyọ.

7-9. Mavọ wo se vwo ru imuẹro wẹn gan?

7 Uvi rẹ uyono romobọ sa chọn wẹ uko vwọ kpahenphiyọ enọ sansan, vwo ru imuẹro wẹn gan, wo rhe che vwo ẹwẹn ivivẹ-ẹ. (Iruo Rẹ Iyinkọn Na 17:11) Avwanre vwo ẹbe sansan re sa chọn wẹ uko. Ihwo buebun mrẹ erere vwo nẹ ibroshọ re se The Origin of Life—Five Questions Worth Asking vẹ ọbe re se, Is There a Creator Who Cares About You?

8 Kerẹ ohwo ro yono Baibol na, ọ sa dianẹ wọ riẹn ẹkpahọnphiyọ rẹ enọ evo ri shekpahen iyono rẹ Baibol na. Jẹ, wo vwo imuẹro kpahen ẹkpahọnphiyọ wẹn na? Wọ sa vwẹ ẹbe ukoko na vwo ru ehiahiẹ vwẹ uyono romobọ, ọnana cha chọn wẹ uko vwọ bọn esegbuyota wẹn gan. Ọ je cha chọn wẹ uko vwo dje obo wo segbuyota vwọ kẹ ihwo efa.

9 Jẹ o muwẹro dẹn nẹ ọnana yen uyota na. Ọnana cha nẹrhẹ wo muegbe vwọ kẹ omaebrophiyame. Oniọvo rẹ ọmọtẹ, ro ji te ẹgbukpe uje-e, da ta: “Mi ki brorhiẹn mi vwo bromaphiyame, mi yono Baibol na me da mrẹvughe nẹ ọnana yen ẹga rẹ uyota na. Imuẹro nana ganphiyọ kẹdẹ kẹdẹ.”

OBO WO RUẸ

10. Diesorọ Onenikristi ro bromaphiyame re vwọ vwẹ esegbuyota rọyen vwo ruiruo?

10 Baibol na tare nẹ, “Esegbuyota re vwo ru iruo-o, yo ghwuru.” (Jems 2:17) Wo de vwo imuẹro ọgangan, wo che djephia womarẹ iruo wẹn. Wo che vwo oborẹ Baibol na seri nẹ “eyenre rẹ ẹfuọn kugbe uyoyovwi.”—Se 2 Pita 3:11.

11. Die yen “eyenre rẹ ẹfuọn”?

11 Die yen “eyenre rẹ ẹfuọn”? Iruo wẹn da fon, uruemu wẹn kọ je cha fon. Kerẹ udje, roro kpahen obo wo ruru vwẹ emeranvwe esan re wanre na. Ọke wo vwo hirharoku ọdavwini, wọ nabọ roro kpahen obo ri yovwirin vẹ obo re chọre? (Hibru 5:14) Wọ karophiyọ ọke evo wo vwo jẹ uphẹn ẹvwọ kẹ ọnyẹ rẹ otu yẹrẹ ọdavwini? Wẹwẹ omamọ rẹ udje vwẹ isikuru? Wọ fuevun kẹ Jihova, gbanẹ wọ vwẹrokere igbeyan wẹn vwẹ isikuru rere wọ vwọ vrabọ rẹ ehwẹjẹ rayen? (1 Pita 4:3, 4) Vwọrẹ uyota, avwanre gbare-e. Ọkiọvo, ihwo re tobọ ga Jihova ikpe buebun re sa mrẹ bẹnbẹn rẹ ayen vwo ghwoghwota kẹ ihwo fikirẹ omavovwẹ. Ẹkẹvuọvo, oma cha vo ohwo rọ vwomakpahotọ kẹ Ọghẹnẹ ro vwo dje oma phia kerẹ Oseri rẹ Jihova-a, o ji che dje ọnana phia womarẹ omamọ rẹ uruemu rọyen.

12. Erhọ yen iruo rẹ “uyoyovwi” evo, kẹ ẹro vọ wo vwo ni ayen?

12 Die yen iruo rẹ “uyoyovwi”? Ọnana churobọ si iruo wo ruẹ vwẹ ukoko na kerẹ uyono ẹra vẹ iruo aghwoghwo na. O ji churobọ si erọnvwọn rẹ ihwo efa ghwa mrẹ-ẹ kerẹ ẹrhovwo ẹnẹ vẹ uyono romobọ. Ohwo rọ vwomakpahotọ kẹ Jihova che ni erọnvwọn nana kerẹ oghwa-a. O che vwo oka rẹ ẹwẹn ro rhe Ovie Devid, rọ vwọ ta: “Me vwo omavwerhe ru ọhọre wẹn, E Ọghẹnẹ mẹ; urhi wẹn ọ hẹ evun rẹ udu mẹ.”—Une Rẹ Ejiro 40:8.

13, 14. Die yen sa chọn wẹ uko vwo ruiruo rẹ “uyoyovwi,” kẹ idjerhe vọ yen ighene evo vwọ mrẹ erere norhe?

13 Wo se vwo bru ẹkẹn kẹ oma, o vwo enọ evo wo se roro kpahen, wo mi ji si ẹkpahọnphiyọ rayen phiyotọ, enọ kerẹ:  “Die wọ nẹrhovwo kpahan, kẹ die yen i djephia kpahen ẹguọnọ wo vwo kpahen Jihova?” “Die wo vwo ruẹ uyono romobọ?” “Wo vwobọ vwẹ iruo aghwoghwo na ọ da tobọ dianẹ ọsẹ vẹ oni wẹn vwobọ vwọ-ọ?” Wo se ji si ẹkẹn wọ guọnọ bru kẹ oma wẹn phiyotọ, ri shekpahen ẹrhovwo, uyono romobọ, vẹ iruo aghwoghwo na.

14 Ighene buebun re guọnọ bromaphiyame mrẹ erere norhe ọke rẹ ayen vwo si ẹkẹn rẹ ayen bru kẹ oma rayen phiyotọ. Oniọvo rẹ ọmọtẹ ọvo rọ dia eghene re se Tilda tare nẹ o si ẹkẹn ro bru kẹ oma rọyen phiyotọ, ọnana nẹrhẹ ọ sa yan mu ayen ọvuọvo. Omarẹ ẹgbukpe ọvo vwọ wan nu, o de rhi brorhiẹn ro vwo bromaphiyame. Oniọvo rẹ ọshare ọvo rọ dia eghene re se Patrick je mrẹ erere vwẹ ẹdia nana, ọ da ta: “Me riẹn oborẹ me vwọ tua, jẹ mi vwo si ayen phiyotọ, ọ da nẹrhẹ me wian gangan me vwọ yan mu ayen.”

Wọ cha ga Jihova ọ da tobọ dianẹ ọsẹ vẹ oni wẹn dobọ rẹ ẹga rayen ji? (Ni ẹkorota 15)

15. Dje kpahen oboresorọ omaẹvwọkpahotọ vwọ dia orhiẹn-ebro romobọ.

15 Onọ ọvo wọ sa nọ oma wẹn yen, “Me cha ga Jihova ọ da tobọ dianẹ ọsẹ vẹ oni mẹ dobọ rẹ ẹga rayen ji?” Wọ da vwomakpahotọ kẹ Jihova ji bromaphiyame, wẹ vẹ ọyen ki che vwo omamọ oyerinkugbe. Ọtiọyena, wo muẹ obo wo ruẹ kẹ Jihova kpahen oborẹ ọsẹ vẹ oni wẹn yẹrẹ ohwo ọfa guọnọre-e. Akpeyeren rẹ ẹfuọn vẹ iruo rẹ uyoyovwin wẹn djerephia nẹ wo vwo imuẹro rẹ uyota na, wọ je guọnọ yan nene irhi rẹ Ọghẹnẹ. O rhe che kri-i, kẹ wo che muwan wo vwo bromaphiyame.

ỌDAVWARO WẸN

16, 17. (a) Die yen mu ohwo vwọ dia Onenikristi? (b) Mavọ e se vwo djudje rẹ ọdavwaro re vwo kpahen ọtanhirhe na?

16 Ẹdẹ ọvo, ọshare ọvo rọ nabọ riẹn Urhi rẹ Mosis da nọ Jesu: “Ọ vọ re ma rho vwẹ evun rẹ irhi na?” Jesu da kpahen kẹ: “Guọnọ Ọrovwohwo Ọghẹnẹ wẹn vwẹ udu wẹn ejobi, vwẹ ẹnwẹn wẹn ejobi, kugbe iroro wẹn ejobi.” (Matiu 22:35-37) Jesu djerephia nẹ ẹguọnọ re vwo kpahen Jihova yen mu ohwo vwo bromaphiyame je dia Onenikristi. Idjerhe ọvo ra sa vwọ bọn ẹguọnọ avwanre kpahen Jihova ganphiyọ, ọyen e vwo roro kokodo kpahen ọtanhirhe na, rọ dia okẹ rọ ma rho kparobọ rẹ Ọghẹnẹ vwọ kẹ avwanre. (Se 2 Kọrẹnt 5:14, 15; 1 Jọn 4:9, 19.) Ọnana che mu we vwo dje ọdavwaro phia vwọ kẹ okẹ ọghanghanre nana.

17 Ọdavwaro wo vwo kpahen ọtanhirhe na, họhọ udje nana: Vwẹ ẹro roro nẹ wo divwẹ vwẹ urhie, ohwo ọvo de rhi sivwin uwe. Wọ cha yan jẹ ohwo na vwo kpo uwevwin ra fọnrhọn emwa wẹn, wọ me kpairoro vrẹ oborẹ ohwo na ru kẹ wẹ na? Kakaka! Ọkieje yen wo che vwo dje ọdavwaro kẹ ohwo ro sivwin arhọ wẹn na! Ọtiọyen ọ je hepha, ofori avwanre vwọ kpẹvwẹ Jihova vẹ Jesu vwọ kẹ ọtanhirhe na. Ọ rha dia aye-en, je ghwuru! Ayen sivwin avwanre vwọ vrabọ rẹ umwemwu vẹ ughwu. Fikirẹ ẹguọnọ rayen, avwanre rhi vwo iphiẹrophiyọ re vwo yerin vwẹ Iparadaisi vwẹ otọrakpọ na bẹdẹ bẹdẹ!

18, 19. (a) Diesorọ oshọ rẹ omaẹvwọkpahotọ vẹ omaebrophiyame vwo ju we emuo? (b) Mavọ yen ẹga rẹ Jihova sa vwọ nẹrhẹ akpeyeren wẹn yovwin?

18 Wo vwo ọdavwaro kpahen oborẹ Jihova ru kẹ wẹ na? Ọ da dia ọtiọyen, ofori nẹ wọ vwomakpahotọ ji bromaphiyame. Omaẹvwọkpahotọ, ọyen uve wo ve kẹ Ọghẹnẹ nẹ wo che ru ọhọre rọyen bẹdẹ.  Ofori nẹ oshọ rẹ uve tiọyen mu we? Ẹjo! Jihova guọnọ erhuvwu wẹn, ọ je hwosa kẹ ihwo ri ru ọhọre rọyen. (Hibru 11:6) Wọ da vwomakpahotọ ji bromaphiyame, akpọ wẹn ko che yovwin! Oniọvo ọshare ọvo rọhẹ ẹgbukpe 24, ro bromaphiyame ọke ro ji te ẹgbukpe ihwerha-a, da ta: “Ọkiọvo mi rhe vwo erianriẹn okokodo kpahen uyota na, ọ da dianẹ me ghwanre emerha mi ki bromaphiyame, ẹkẹvuọvo orhiẹn mi bruru me vwọ vwomakpahotọ kẹ Jihova sẹro mẹ nẹ ẹvwọtua rẹ ekuakua rẹ akpọ na.”

19 Jihova guọnọ erhuvwu wẹn. Ẹkẹvuọvo, Eshu guọnọ erhuvwu wẹ-ẹn, ọdavwẹ romobọ rọyen ọyen ọ guọnọ. Wo de nene, ọ cha sa kẹ wẹ orọnvwọn oyoyovwin vuọvo-o. Mavọ yen ọ sa vwọ kẹ wẹ orọnvwọn ro vwori-i? O vwo iyẹnrẹn esiri-i, o vwo iphiẹrophiyọ-ọ. Ọ guọnọre nẹ wọ ghwọrọ kidie oghwọrọ yen hẹrhẹ!—Ẹvwọphia 20:10.

20. Die yen eghene se ru ọ da guọnọ yerin te ẹdia rẹ omaẹvwọkpahotọ vẹ omaebrophiyame? (Ji ni ekpeti na, “Ukẹcha Wọ Sa Vwọ Yan Phiaro.”)

20 Omaẹvwọkpahotọ wẹn vwọ kẹ Jihova, ọyen orhiẹn-ebro rọ ma rho kparobọ vwẹ akpeyeren wẹn. Wo muegbe re? Ọ da dia ọtiọyen, wo jẹ oshọ rẹ orhiẹn-ebro na mu we-e. Jẹ, wo de roro nẹ wo ji muegbe-e, reyọ iroroẹjẹ rehẹ uyono nana vwo ruiruo wọ vwọ yan obaro. Pọl vuẹ iniọvo rehẹ Filipae nẹ ayen yan phiaro ọkieje. (Filipae 3:16) Wo de nene uchebro yena, kẹ wọ cha fobọ vwomakpahotọ kẹ Jihova ji bromaphiyame.