Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Uwevwin Orhẹrẹ  |  March 2016

 UYOVWINROTA RẸ ỌBE NA

Diesorọ Jesu Vwọ Rioja, Ji Ghwu?

Diesorọ Jesu Vwọ Rioja, Ji Ghwu?

“Kirobo rẹ umwemwu wan oma rẹ ohwo ọvo [Adam] rhe akpọ rẹ ughwu da wan oma rẹ umwemwu rhe.”—Rom 5:12

“Wọ guọnọ dia bẹdẹ?” A da nọ wẹ onọ yena, die wọ cha ta? Ẹkpahọnphiyọ rẹ ihwo buebun sa dia e, jẹ ayen roro nẹ ọ cha sa phia-a. Ayen no nẹ ughwu, ọyen ẹbẹre ọvo rẹ akpeyeren.

E de rhe ku onọ na rhẹriẹ nẹ, “Wo muegbe wo vwo ghwu re?” Ihwo buebun cha tanẹ ẹjo. Die yen ọnana djephia? Dede nẹ ojaẹriọ vọn akpọ na, avwanre guọnọ ghwu-u. Baibol na tare nẹ Ọghẹnẹ ma ihworakpọ vẹ urhurusivwe rẹ ayen vwo yerin rhirin. Vwọrẹ uyota, ọ da ta: “O . . . phi iroro rẹ arhọ ri bẹdẹ phihọ evun rẹ ohwo.”—Aghwoghwo 3:11.

Ẹkẹvuọvo, avwanre vwo arhọ ri bẹdẹ asaọkiephana-a. Kẹ die yen phiare? Die yen Ọghẹnẹ ru kpahen ẹdia nana re? Ẹkpahọnphiyọ rẹ Baibol na cha vwerhen owẹ oma, o churobọ si oboresorọ Jesu vwọ rioja, ji ghwu.

DIE YEN PHIARE

Ọbe rẹ Jẹnẹsis uyovwin 1-3, vuẹ avwanre nẹ Ọghẹnẹ kẹ Adam vẹ Ivi iphiẹrophiyọ rẹ arhọ ri bẹdẹ, ọ da je vuẹ ayen oborẹ ayen ru, o se vwo te ayen obọ. Baibol na gbikun rẹ oborẹ ayen jẹ ẹme rẹ Ọghẹnẹ enyo, ayen de ku iphiẹrophiyọ yena kufia. Ikuegbe na pha lọlọhọ, ihwo evo tobọ no nẹ ọnana esian ghevweghe. Ẹkẹvuọvo, Jẹnẹsis djerephia nẹ ikuegbe nana uyota dẹn kirobo rẹ ẹbe rẹ Baibol na ri gbikun rẹ akpeyeren rẹ Jesu je ta. *

Die yen nẹ obuko rẹ jẹ ẹmenyo rẹ Adam na rhe? Baibol na da ta: “Kirobo rẹ umwemwu wan oma rẹ ohwo ọvo [Adam] rhe akpọ rẹ ughwu da wan oma rẹ umwemwu rhe na, ọtiọye na ughwu da hrabọ ro ihwo ejobi fikiridie ihwo ejobi ru umwemwu.” (Rom 5:12) Adam ru umwemwu kidie o nyupho rẹ Ọghẹnẹ-ẹ. O de ku arhọ ri bẹdẹ na kufia, o de ji ghwu. Avwanre riuku rẹ umwemwu kidie avwanre emọ rọyen. Ọtiọyena, avwanre muọga, ghwa, ji ghwẹ. Oboresorọ avwanre vwo ghwẹ ghwa hepha kerẹ oboresorọ emọ vwọ họhọ ọsẹ yẹrẹ oni rayen. Jẹ die yen Ọghẹnẹ ru kpahen ẹdia nana re?

 OBORẸ ỌGHẸNẸ RU RE

Vwọrẹ imuẹro, Ọghẹnẹ vwo ọrhuẹrẹphiyotọ rọ vwọ tan oborẹ Adam kufia na hirhe, rọ dia iphiẹrophiyọ rẹ arhọ ri bẹdẹ vwọ kẹ emọ rọyen. Mavọ yen Ọghẹnẹ se vwo ru ọnana?

“Osa rẹ umwemwu hẹ ughwu,” ọtiọyen Rom 6:23 tare. Ọnana mudiaphiyọ nẹ ughwu yen nẹ obuko rẹ umwemwu cha. Adam ru umwemwu kọyensorọ o vwo ghwu. Ọtiọyena, avwanre ru umwemwu, kọyensorọ avwanre vwo ghwẹ. Ẹkẹvuọvo, e vwiẹ avwanre phiyọ umwemwu na, ọ dia avwanre yen sorọ-ọ. Eriyin na, vwọrẹ ẹguọnọ, Ọghẹnẹ de ji Ọmọ rọyen, Jesu, rhi ghwu vwọ kẹ imwemwu rẹ avwanre. Mavọ yen e se vwo ru ọnana?

Jesu rhie idjerhe phiyọ vwọ kẹ akpọ rẹ omavwerhovwẹn ro jẹ oba evwo

Ọ vwọ dianẹ ọshare ọgbagba vuọvo, Adam, yen ghwa umwemwu vẹ ughwu rhe womarẹ jẹ ẹmenyo na, ẹmenyo rẹ ọshare ọgbagba ọvo kọyen a guọnọre ro vwo si avwanre nẹ oghwa nana. Baibol na djere enẹ: “Kidie obo ri ijọghọevwo rẹ ohwo ọvo ru ihwo buebu phihọ iruimwemwu na, ọtiọye na ọghọemuo rẹ ohwo ọvo rhe ru ihwo buebu phihọ ọvwata.” (Rom 5:19) Jesu yen “ohwo ọvo” yena. O nẹ odjuvwu rhe, ọ da rhe dia ohwo ọgbagba *, o de ghwu kẹ avwanre. Ukuotọ rọyen, avwanre ki se vwo omamọ rẹ oyerinkugbe vẹ Ọghẹnẹ, ji vwo iphiẹrophiyọ rẹ arhọ ri bẹdẹ.

OBORESORỌ JESU VWỌ RIOJA, JI GHWU

Diesorọ o vwo fo nẹ Jesu ghwu, ọnana ke sa phia? Ọghẹnẹ sa ghwa tanẹ emọ rẹ Adam dia bẹdẹ. O vwo ẹgba na dẹn. Ẹkẹvuọvo, ọyena cha vwọso urhi ro jiri nẹ, osa rẹ umwemwu yen ughwu. Urhi yena dia urhi otete re muẹ wene-e. O churobọ si orhiẹn-ebro ọsoso.—Une Rẹ Ejiro 37:28.

Ọghẹnẹ rha yan nene urhi rọyen nana-a, kọ cha nẹrhẹ ihwo vwo ẹwẹn ivivẹ kpahen irhi rọyen efa. Kerẹ udje, a sa vwẹroso orhiẹn-ebro rọyen kpahen ihwo ri che vwo arhọ ri bẹdẹ? E ji se vwo  imuẹro nẹ o che ru obo ro veri? Avwanre vwo imuẹro nẹ Ọghẹnẹ che ru obo ri yoma ọkieje kidie ọ yan nene orhiẹn-ebro ọsoso vwẹ ọrhuẹrẹphiyotọ rọyen re vwo vwo arhọ ri bẹdẹ na.

Womarẹ ughwu rẹ Jesu, Ọghẹnẹ rhie idjerhe phiyọ re se vwo vwo arhọ ri bẹdẹ vwẹ Iparadaisi vwẹ otọrakpọ na. Jokaphiyọ eta rẹ Jesu rehẹ Jọn 3:16: “Ọtiọye Ọghẹnẹ guọnọ akpọ na ọ da vwẹ Ọmọ ọvuọvo rọye na kẹ, rere ohwo kohwo ro sere gbuyota vwo jẹ ghwọrọ ẹkẹvuọvo ko vwo arhọ ri bẹdẹ.” Ughwu rẹ Jesu na djerephia nẹ orhiẹn-ebro ọsoso rẹ Ọghẹnẹ shefia-a, ma rho, o djephia nẹ o vwo ẹguọnọ kpahen ihworakpọ mamọ.

Diesorọ Jesu vwọ rioja, ji ghwu ughwu rẹ odjadja kirobo rẹ Baibol na djere? Ọ fuevun kẹ Ọghẹnẹ dede nẹ o hirharoku ọdavwini ọgangan, Jesu vwẹ ọnana vwọ kpahenphiyọ eta rẹ Idẹbono rọ vwọ tanẹ, ihworakpọ cha sa fuevun kẹ Ọghẹnẹ siẹrẹ ayen de hirharoku ọdavwini-i. (Job 2:4, 5) Ọke rẹ Adam rọ dia ohwo ọgbagba, vwo shero umwemwu fikirẹ ophiẹnvwe rẹ Eshu, kọ ghwa họhọ nẹ eta rẹ Eshu na uyota. Jẹ Jesu rọ je dia ohwo ọgbagba, fuevun kẹ Ọghẹnẹ dede nẹ o hirharoku ojaẹriọ ọgangan. (1 Kọrẹnt 15:45) O djerephia nẹ Adam rhe se nyupho rẹ Ọghẹnẹ ọ da dianẹ ọ guọnọ ru ọtiọyen jovwo. Womarẹ akoechiro rọyen, Jesu phi udje phiyotọ rẹ avwanre nene. (1 Pita 2:21) Ọghẹnẹ da hwosa kẹ Ọmọ rọyen na fikirẹ ẹmenyo rọyen, rọ vwọ kẹ arhọ ro jẹ eghwo vwẹ odjuvwu.

OBO WỌ SA VWỌ MRẸ ERERE

Jesu ghini ghwu. Idjerhe rẹ arhọ ri bẹdẹ de rhi rhiephiyọ. Wọ guọnọ dia bẹdẹ? Eta rẹ Jesu nana dje obo re ru: “Ọnana hẹ arhọ ro vwo oba-a na, rere ayen vwọ riẹn owẹ ọvo rẹ Ọghẹnẹ rẹ uyota na, kugbe Jesu Kristi ru wo ji rhe na.”—Jọn 17:3.

Ihwo re teyen ọbe nana durhie uwe nẹ wo yono kpobarophiyọ kpahen Jihova rọ dia Ọghẹnẹ rẹ uyota na, vẹ Ọmọ rọyen, Jesu Kristi. Oma cha vwerhen Iseri rẹ Jihova rehẹ ekogho wẹn rẹ ayen vwọ chọn wẹ uko. Wọ sa je mrẹ evuẹ efa vwẹ wẹbsaiti avwanre, www.jw.org/urh.

^ e?ko. 8 Ji se “The Historical Character of Genesis,” rọhẹ Insight on the Scriptures, Ukori 1, aruọbe 922, rẹ Iseri rẹ Jihova teyenre.

^ e?ko. 13 Ọghẹnẹ wene arhọ rẹ Ọmọ rọyen nẹ odjuvwu, o de phio phiyọ evun rẹ Meri, ẹwẹn ọfuanfon rẹ Ọghẹnẹ da je sẹro rẹ Jesu rọ vwọ vrabọ rẹ jẹgba rẹ Meri.—Luk 1:31, 35.