Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Uruemu rẹ Onenikristi Rọ Ghanre Nọ Oro

Uruemu rẹ Onenikristi Rọ Ghanre Nọ Oro

Vwẹ ikpe buebun re, ihwo ni oro ghanghanre. Evo ghanre te idọla oduduru buebun. Kẹ ọ sa dianẹ o vwo erọnvwọn evo re ghanre vrẹ oro vwẹ ẹro rẹ Ọghẹnẹ?

 Haykanush dia Armenia, ọyen oghwoghwota ro ji bromaphiyame-e. Ẹdẹ ọvo, ọ da mrẹ emekpu kẹrẹ uwevwin rọyen. Igho buebun vẹ ikadi evo ra vwọ reyọ igho yehẹ evun rọyen. O de dje kẹ ọshare rọyen rọ je dia ohwo ro bromaphiyame-e.

Ekuakua gan kẹ ayen mamọ, ayen je riosa, dedena ayen reyọ igho na vwo rhe ohwo ro vwo emekpu ọvo na womarẹ adrẹsi rẹ ayen mrẹ vwẹ evun rọyen. Ọnana gbe ọshare ro vwo emekpu na unu mamọ, ọtiọyen ji te ihwo rẹ orua rọyen. Haykanush vẹ ọshare rọyen da vuẹ ayen nẹ iyono rẹ Baibol na yen nẹrhẹ ayen ru oborẹ ayen ruru na. Ayen niro nẹ ofori ayen vwọ dia ihwo rẹ uyota, kẹ ayen ghwa reyọ uphẹn nana vwọ vuẹ ihwo rẹ orua na kpahen Iseri rẹ Jihova, ayen da je kẹ ayen ẹbe ukoko na.

Orua na guọnọ kẹ Haykanush igho, ẹkẹvuọvo ọ senre. Ọke vwọ rhie, aye na da bru Haykanush vẹ ọshare rọyen ra, ọ da kẹ Haykanush ubiosa rẹ oro.

Uruemu rẹ Haykanush vẹ ọshare rọyen na se ji gbe ihwo unu. Kẹ o gbe Jihova unu? Ẹro vọ yen o vwo ni uruemu rayen na? Uruemu rayen na ghwa erere rhe?

IRUEMU RE GHANRE VRẸ EKUAKUA RẸ UGBOMA

Ẹkpahọnphiyọ rẹ enọ yena bẹnre-e, kidie idibo rẹ Ọghẹnẹ vwo imuẹro nẹ re vwo dje iruemu rẹ Onenikristi phia ghanre vrẹ oro vẹ erọnvwọn efa vwẹ ẹro rẹ Jihova. Ẹro rẹ Jihova vwo nẹ obo re ghanre vẹ obo ri jẹ ẹghanrọ fẹnẹ ọ rẹ ihworakpọ. (Aiz. 55:8, 9) Idibo rọyen ji no nẹ re vwo dje uruemu rẹ Jihova phia ọyehẹ obo re ma ghanre kparobọ.

A mrẹ ọnana vughe womarẹ oborẹ Baibol na ta kpahen ẹruọ vẹ aghwanre. Isẹ 3:13-15 da ta: “Aghọghọ kẹ ohwo ro vwo aghwanre kugbe ohwo ro vwo ẹruọ, kidie erere rọye rho nọ ẹrere rọ evun rẹ idọnọ efuanfon erere rọye jẹ nọ oro. Ọ ghare nọ ivie o vwo emu ọvuọvo wo se vwo dje ẹguọnọ rọye-e.” Aphro herọ, iruemu nana ghanre kẹ Jihova vwọ vrẹ ekuakua rẹ ugboma.

Kẹ, ra vwọ dia ohwo rẹ uyota vwo?

Jihova, ọyen “Ọghẹnẹ rẹ uyota,” o che se gun efia-an. (Taitọs 1:2) Womarẹ ẹwẹn ọfuanfon na, ọyinkọn Pọl de si vwo rhe Inenikristi rẹ Hibru vwẹ ẹgbukpe ujorin ẹsosuọ: “Nẹ ẹrhovwo kẹ avwanre, kidie o mu avwanre ẹro nẹ evun rẹ avwanre pha phẹphẹ, re guọnọ ruẹ emu rẹ ọghọ vwi kemu kemu ejobi.”—Hib. 13:18.

Jesu jehẹ ohwo rẹ uyota. Kerẹ udje, ọke rẹ Orherẹn Rode Kaifas vwọ vuẹ nẹ, “Vwẹ ode rẹ Ọghẹnẹ ri bẹdẹ na, ta kẹ vwẹ, wẹ ghine Kristi na, Ọmọ rẹ Ọghẹnẹ na.” Jesu de djoma kẹ nẹ ọyehẹ Mesaya na, dede nẹ uyota nana sa nẹrhẹ ihwo rehẹ aguare na tanẹ ọ ta ogbeta, ọ da je nẹrhẹ e hwe.—Mat. 26:63-67.

Kẹ avwanre vwo? Avwanre che hworo ona yẹrẹ gun emefian vwọ mrẹ erere, gbane avwanre cha dia ohwo rẹ uyota?

EGBABỌSE RA VWỌ DIA OHWO RẸ UYOTA

Vwọrẹ uyota, ọ bẹnre a vwọ dia ohwo rẹ uyota vwẹ akpọ nana kidie ihwo “guọnọ omaobọ rẹ ayen nọ,” e je “guọnọ  igho nọ.” (2 Tim. 3:2) Uweren ọgangan vẹ jẹ iruo evwo sa nẹrhẹ ohwo jẹ ohwo rẹ uyota ẹdia. Evo roro nẹ ohwo rọhẹ ẹdia tiọyen se chuji, phi iwayo yẹrẹ vwobọ vwẹ iruemu efa tiọyen. Ihwo buebun vwo iroro nana, kọyensorọ ayen vwo no nẹ a cha sa dia ohwo rẹ uyota vwẹ ota rẹ igho-o. Ọnana ji djobọte Inenikristi evo dede, fikirẹ “urhuru rẹ efe,” omamọ rẹ odẹ rẹ ayen vwori da va ayen abọ.—1 Tim. 3:8; Taitọs 1:7.

Ẹkẹvuọvo, Inenikristi buebun vwẹrokere Jesu. Ayen rhe mrẹvughe nẹ omamọ rẹ uruemu ghanre vrẹ kemu kemu. Vwẹ idjerhe vuọvo na, ighene re dia Inenikristi ji ruẹ ẹspo ayen vwọ wan ọdavwini vwẹ isikuru-u. (Isẹ 20:23) Vwọrẹ uyota, ra vwọ dia ohwo rẹ uyota sa ghwa erere cha ọkieje kirobo re phia kẹ Haykanush na-a. Jẹ ọnana omamọ uruemu vwẹ ẹro rẹ Ọghẹnẹ, ọ je cha chọn avwanre uko vwo vwo ẹwẹn obrorhiẹn rọ fonro.

Udje rẹ Gagik dje ọnana phia. Ọ da ta: “Me ke rhe dia Onenikristi, ikọpini rode ọvo yen mi de ruiruo, ohwo ro vwo ikọpini na rhọnvwa hwa osa-uyovwin rẹ ikọpini na gba-a. Mẹvwẹ yen imaneja rẹ ikọpini na, ọtiọyena ọ da vuẹ vwẹ nẹ me jẹ-udi kẹ ohwo ro phi osa-uyovwin na ọ vwọ kpairoro vrẹ igho ichekọ. Ka rhe riẹn vwẹ phiyọ ohwo rẹ efian. Ọke me vwọ mrẹ uyota na vughe nu, me da sen mi vwo vwobọ vwẹ oka rẹ uruemu tiọyena dede nẹ osa ra hwa kẹ vwẹ rhoro mamọ. Mi de rhie ikọpini romobọ mẹ. Vwo nẹ ẹdẹ ẹsosuọ yanran, me nabọ hwa osa-uyovwin mẹ.”—2 Kọr. 8:21.

Gagik da ta: “Me mrẹ bẹnbẹn me vwọ ghẹrẹ orua mẹ kidie ubro rẹ igho me mrẹ jovwo kọyen te vwe obọ asaọkiephana. Ẹkẹvuọvo, oma nabọ vwerhen ovwẹ enẹna. Mi vwo ẹwẹn obrorhiẹn rọ fonro vwẹ obaro rẹ Jihova. Me da rhe dia omamọ rẹ udje kẹ emeshare mẹ ivẹ, mi de ji rhi vwo uphẹn rẹ ẹga vwẹ ukoko na. Ihwo ri phi osa-uyovwin kugbe ihwo efa da rhe riẹn vwẹ phiyọ ohwo rẹ uyota.”

JIHOVA YEN ỌCHUKO RẸ AVWANRE

Jihova vwo ẹguọnọ rẹ ihwo ri nene ota rọyen rẹ ayen vwọ dia ihwo rẹ uyota, ri ji dje omamọ iruemu efa phia. (Taitọs 2:10) Womarẹ Ovie Devid, ọ da kẹ avwanre imuẹro nana: “Me dia omotete jovwo re, vwẹ asakiephana me rha ghwore; ẹkẹvuọvo me je mrẹ ọvwata ra senre-e eyẹ emọ rọye re yare emu re ke ria-a.”—Une 37:25.

Oborẹ Rutu rhiẹromrẹ ji dje ọnana phia. O tinka mu oni-orọnvwe rọyen, Naomi, ukperẹ ọ vwọ djẹ jovwo vwẹ ọke ọghwo rọyen. Rutu kua kpo Izrẹl, asan rọ da sa ga Ọghẹnẹ rẹ uyota na. (Rutu 1:16, 17) Ọke rọ vwọ hẹ Izrẹl, Rutu ohwo rẹ uyota kugbe ọgba-owian, ro gbugbon vwo nene ọrhuẹrẹphiyotọ rẹ Urhi na. Kirobo Devid ji rhiẹromrẹ, Jihova sen Rutu vẹ Naomi-i. (Rutu 2:2-18) Jihova ji bruba kẹ Rutu vwẹ idjerhe efa. Ọ kẹrẹ uphẹn rọ vwọ dia oni rode rẹ Ovie Devid vẹ Mesaya na!—Rutu 4:13-17; Mat. 1:5, 16.

Idibo rẹ Jihova evo se ji hirharoku uweren ọgangan. Ukperẹ ayen vwọ guọnọ igho vwẹ idjerhe ri je fo, ayen davwẹngba vwọ wiowian ọgangan. Ọnana  djerephia nẹ ayen ni omamọ iruemu rẹ Ọghẹnẹ kerẹ ra vwọ dia ohwo rẹ uyota, ghanghanre vwọ vrẹ kemu kemu.—Isẹ 12:24; Ẹfe. 4:28.

Kerẹ Rutu, Inenikristi buebun vwo esegbuyota nẹ Jihova sa chọn ayen uko. Ayen vwẹroso Ohwo ro vuve nana rọhẹ Baibol na: “Me sa phiẹn wẹ-ẹ eyẹ me sa sen wẹ-ẹ.” (Hib. 13:5) Ọke buebun yen Jihova vwo djephia nẹ ọ sa vwẹ ukẹcha kẹ ihwo ri fiabọ rẹ erọnvwọn evo kidie ayen guọnọ dia ihwo rẹ uyota, o ji che ruo. O ru nene uve rọyen rọ vwọ kẹ avwanre obo ra guọnọre vwẹ akpeyeren.—Mat. 6:33.

Ihworakpọ nẹ oro vẹ erọnvwọn efa ghanghanre. Jẹ, avwanre vwo imuẹro nẹ ra vwọ dia ihwo rẹ uyota, ji vwo iruemu efa yen ma ghanre kparobọ vwọ vrẹ kemu kemu eje vwẹ ẹro rẹ Jihova!

A da dia ohwo rẹ uyota ke se vwo ẹwẹn obrorhiẹn rọ fonro, ji vwo ọmuvwiẹ rẹ ota vwẹ iruo aghwoghwo na