Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Uwevwin Orhẹrẹ  |  June 2016

Jihova “Vwẹ Ẹro te We”

Jihova “Vwẹ Ẹro te We”

DIESORỌ wo se vwo vwo imuẹro nẹ Jihova ghene vwẹrote we? Oboresorọ kẹ ọna, Baibol na yen tarọ. Vwọ kpahen ẹdia nana, 1 Pita 5:7 da ta: “Vwẹ ẹnwan wẹn ejobi vwọ ya, kidie ọye re vwẹ ẹro te we.” Imuẹro vọ wo vwori ro djerephia nẹ Jihova vwẹrote we?

ỌGHẸNẸ VWẸ OBORẸ IHWO GUỌNỌRE VWỌ KẸ AYEN

Kerẹ oniru, Jihova vwo uruemu esiri, o ji ruẹse

Ọghẹnẹ vwo iruemu rẹ wọ guọnọre nẹ igbeyan wẹn vwo. Omamọ rẹ igbeyan dje uruemu esiri kẹ ohwohwo, ayen ji ruẹse kẹ ohwohwo. Kirobo rọ hepha, Jihova vwo uruemu esiri, o ji ruẹse kẹ ihwo kẹdẹ kẹdẹ. Kerẹ udje, “Uvo rọye muẹ ọbo vẹ ogbori, osio rọye hwe ọvwata vẹ oruimwemwu.” (Mat. 5:45) Die yen osio vẹ uvo ruẹ? Womarẹ ayen ọyen Ọghẹnẹ vwọ kẹ avwanre “emuọre vẹ aghọghọ.” (Iruo 14:17) Vwọrẹ uyota, Jihova ghene kẹ avwanre emuọre, erọnvwọn re kẹ avwanre aghọghọ kerẹ omamọ rẹ emu bunru-un.

Kẹ diesorọ owẹnvwe vwo hwe ihwo buebun? Kidie ihwo ri suẹn nonẹna tẹnrovi ọdavwẹ romobọ rayen ọvo, vẹ oborẹ ayen se vwo vwo ẹgba rẹ usuon ukperẹ ayen vwo roro kpahen ihwo rẹ ayen suẹn na. O rhe che kri-i, Jihova che si ivwurhuru ejobi no, kọ cha vwẹ Uvie rọyen vwo wene usuon rẹ akpọ na, Ọmọ rọyen kọyen cha dia Ovie. Ọke yena, owẹnvwe rhe che hwe ohwo vuọvo-o. Jẹ, tavwen ọke yena ki te, Ọghẹnẹ sẹro rẹ idibo rọyen. (Une  37:25) Ọyena dia odjephia rẹ ẹroevwote rọyen?

JIHOVA KERHỌ KẸ AVWANRE ỌKIEJE

Kerẹ oniru, Jihova, kerhọ kẹ ihwo

Omamọ rẹ ugbeyan nene uwe ghwọrọ ọke kuẹgbe. Ọ sa ghwọrọ inọke buebun vwọ ta ota kpahen ọdavwẹ rẹ ovwan. Ọ je nabọ kerhọ siẹrẹ wọ da vuẹ kpahen ebẹnbẹn wẹn. Jihova je kerhọ ọtiọyen? E. Ọ kerhọ kẹ ẹrhovwo rẹ avwanre. Kọyensorọ, Baibol na vwọ vuẹ avwanre nẹ e “gbe ẹdẹ rẹ ẹrhovwo-o,” a “nẹ ẹrhovwo kẹdẹ kẹdẹ.”—Rom 12:12; 1 Tẹsa. 5:17.

Bro ọke Jihova cha ghwọrọ vwọ kerhọ kẹ ẹrhovwo wẹn? Udje ọvo rọhẹ Baibol na kpahenphiyọ onọ yena. Tavwen Jesu ke sane idibo rọyen, “vwẹ evun rẹ ason na ejobi ọ da nẹ ẹrhovwo kẹ Ọghẹnẹ.” (Luk 6:12) Vwẹ ẹrhovwo yena, ọ sa dianẹ Jesu se edẹ rẹ idibo na buebun, ọ da fuẹrẹn iruemu rayen vẹ ovwiẹrẹ rayen, ọ da vuẹ Ọsẹ rọyen nẹ ọ chọn ọyen uko vwọ sane ayen. Vwẹ urhiọke, Jesu da rhe riẹn nẹ ọ nabọ sane ihwo ri muwan re vwọ dia iyinkọn rọyen. Kerẹ Ohwo “ro nyo ẹrhovwo na,” oma vwerhen Jihova siẹrẹ o de nyo ẹrhovwo rẹ avwanre. (Une 65:2) Ohwo da tobọ ghwọrọ inọke buebun vwọ ta ọdavwẹ rọyen rhe Jihova, o che kere ọke kẹ-ẹ.

ỌGHẸNẸ MUEGBE RO VWO GHOVWO

Kerẹ oniru, Jihova, muegbe ro vwo ghovwo

Ọkiọvo, evwoghovwo tobọ bẹn vwọ kẹ omamọ rẹ igbeyan. Ihwo ivẹ re dia igbeyan ọke grongron re sa tobọ fan ugbeyan siẹrẹ ayen rhe vwo ghovwo ohwohwo-o. Ọ dia ọtiọyen Jihova hepha-a. Baibol na durhie ihwo ri vwo ẹwẹn rẹ uyota nẹ ayen yare evwoghovwo rẹ Jihova, “kidie evwoghovwo rhere buebu.” (Aiz. 55:6, 7) Die yen mu Ọghẹnẹ vwo ghovwo ihwo kare kare?

Kidie o vwo ẹguọnọ ra mrẹ vwo dje-e. O vwo ẹguọnọ rẹ akpọ na mamọ ọ da vwẹ Ọmọ rọyen, Jesu, vwọ kpahotọ, o vwo sivwin ihworakpọ nẹ umwemwu vẹ  oja. (Jọn 3:16) Vwọrẹ uyota, ọtanhirhe na ji ru erọnvwọn efa. Womarẹ ọtanhirhe na, Ọghẹnẹ kọ vwẹ imwemwu rẹ ihwo ro vwo ẹguọnọ kpahen vwo ghovwo ayen. Ọyinkọn Jọn de si: “Avwanre da fan imwemwu rẹ avwanre, ọye hẹ ohwo rẹ uyota vẹ ọsoso, rọ sa vwẹ umwemwu ghovwo ohwo.” (1 Jọn 1:9) Fikirẹ evwoghovwo rẹ Jihova, ihwo ke sa dia ugbeyan rọyen, ọnana te avwanre ẹwẹn mamọ.

Ọ CHỌN WẸ UKO VWẸ ỌKE WỌ DA GUỌNỌ

Kerẹ oniru, Jihova, biẹcha avwanre siẹrẹ a da guọnọ ukẹcha

Omamọ rẹ igbeyan chọn ohwohwo uko siẹrẹ ayen da guọnọ ukẹcha. Ọtiọyen Jihova ji ruẹ? Baibol na da ta: “[Odibo rẹ Ọghẹnẹ ọvo] de she dede, o phre ikule-e, kidie Ọrovwohwo vwẹ obọ rọye yọnrọn.” (Une 37:24) Jihova ‘yọnrọn idibo rọyen’ vwẹ idjerhe sansan. Jokaphiyọ obo re phiare vwẹ Caribbean island of St. Croix.

Eghene rẹ ọmọtẹ ọvo rhọnvwe yeren aphiala na-a, kidie ọyen Oseri rẹ Jihova, ọtiọyena emọ rehẹ iklasi rọyen ki kpokpo. Rọ vwọ nẹrhovwo kẹ Jihova nu, o de brorhiẹn rẹ obo ro che ru. Ọ da vwẹ iyẹnrẹn phia kẹ iklasi na kpahen eyeren rẹ aphiala. Ọ da vwẹ My Book of Bible Stories vwo dje oborẹ ikuegbe rẹ Shadrak, Meshak, vẹ Abẹdnigo churobọ si orhiẹn-ebro rọyen na. Ọ da ta: “Jihova sẹro rẹ emeshare rẹ Hibru erha na kidie ayen rhọnvwe ga oma-a.” Ọ da vwẹ ọbe na kẹ ihwo rehẹ iklasi na. Emọ uhwọvo yen reyọ ọbe na. Oma vwerhen ọmọtẹ na mamọ kidie ọ riẹnre nẹ Jihova yen kọyen ẹgba vẹ aghwanre ro vwo soseri kpahen uyovwinrota yena.

Wo de vwo ẹwẹn ivivẹ sẹ Jihova ghene vwẹrote we, gbe roro kpahen ẹkpo rẹ Baibol kerẹ Une Rẹ Ejiro 34:17-19; 55:22; vẹ 145:18, 19. Nọ iniọvo rehẹ ukoko na krire kpahen oborẹ Jihova vwẹrote ayen wan. Wọ da guọnọ ukẹcha rẹ Ọghẹnẹ, gba nẹrhovwo rhe. Wọ cha mrẹ nẹ Jihova “vwẹ ẹro te we.”