Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Uwevwin Orhẹrẹ  |  June 2016

Dje Ọdavwaro Vwọ kẹ Jihova, Ọmema rẹ Avwanre

Dje Ọdavwaro Vwọ kẹ Jihova, Ọmema rẹ Avwanre

E Ọrovwohwo, . . . wẹ kẹ Ọmema rẹ avwanre; avwanre ejobi kẹ iruo rẹ obọ wẹn.”—AIZ. 64:8.

UNE: 89, 26

1. Diesorọ a sa vwọ tanẹ Jihova yen Ọmema rode na?

VWẸ November 2010, o vwo ochẹ rẹ ihwo rẹ China ruru ra guọnọ shẹ vwẹ London, obẹ England. Uchunu rọyen, idọla oduduru 70. Vwọrẹ uyota, ọmema sa vwẹ ọphiẹn rọ vọn asan eje na vwo ru orọnvwọn ro vwo erhuvwu rọ je ghanre mamọ. Dedena, o vwo ọmema vuọvo kerẹ Jihova-a. Vwẹ oba rẹ ẹdẹ resan rẹ emama na, Ọghẹnẹ “da vwẹ ekpẹn rẹ otọ [ọphiẹn] na” vwọ ma ohwo ọgbagba, ọ da je vwẹ ẹgba kẹ o se vwo vwo iruemu rẹ Ọmemama na. (Jẹn. 2:7) Ohwo ọgbagba nana, Adam, ra vwẹ ekpẹn vwọ ma na, e de se nẹ “ọmọ rẹ Ọghẹnẹ.”—Luk 3:38.

2, 3. Mavọ yen a sa vwọ vwẹrokere ihwo rẹ Izrẹl ri kurhẹriẹ?

2 Ẹkẹvuọvo, Adam gbevwọso Ọmemama rọyen, o de ku uphẹn ro rhere na kufia. Dedena, emọ rẹ Adam “buebu” herọ re ka ẹbẹre rẹ usuon rẹ Ọghẹnẹ. (Hib. 12:1) Ayen vwomakpotọ kẹ Ohwo rọ ma ayen, ro djerephia nẹ ayen guọnọre nẹ ọ dia Ọsẹ rayen ukperẹ Eshu. (Jọn 8:44) Evun-ẹfuọn  rayen vwọ kẹ Ọghẹnẹ nẹrhẹ a karophiyọ eta rẹ Aizaya ro shekpahen ihwo rẹ Izrẹl ri kurhẹriẹ: “E Ọrovwohwo, wẹ hẹ Ọsẹ rẹ avwanre; avwanre ọphiẹn, wẹ kẹ ọmema rẹ avwanre; avwanre ejobi kẹ iruo rẹ obọ wẹn.”—Aiz. 64:8.

3 Nonẹna, ihwo re ga Jihova vwọrẹ ẹwẹn vẹ uyota, je davwẹngba vwo vwo uruemu rẹ omaevwokpotọ. Ayen niro nẹ ọyen ọghọ rode rẹ ayen vwọ vwomakpotọ kẹ Jihova kerẹ Ọsẹ vẹ Ọmema rayen. Wọ pha kerẹ ọphiẹn ọlọlọhọ vwẹ abọ rẹ Ọghẹnẹ, ọ sa vwọ ma wẹ phiyọ orọnvwọn ro jere? Wọ mrẹ iniọvo wẹn kerẹ ihwo rẹ Ọghẹnẹ je ma kọke kọke? E se vwo vwo ẹruọ rẹ ẹdia nana, e jẹ e roro kpahen erọnvwọn erha rẹ Jihova ruẹ kerẹ Ọmema: Idjerhe rọ vwọ sane ihwo rọ cha ma, oboresorọ ọ vwọ ma ayen, kugbe obo rọ ma ayen wan.

JIHOVA SANE IHWO RỌ CHA MA

4. Mavọ yen Jihova vwọ sane ihwo ro siẹ te oma? Djunute idje evo.

4 Ọ diẹ ugboma rẹ ohwo yen Jihova nẹ-ẹ, ubiudu na yen o nẹ. (Se 1 Samuẹl 16:7b.) A mrẹ ọnana vughe ọke rẹ Jihova vwọ vwẹ ukoko rẹ Inenikristi vwo mu. Ihwo buebun rẹ ihworakpọ ni kuẹrofia yen Jihova sanere nẹ i bru ọyen vẹ Jesu rhe. (Jọn 6:44) Ọvo usun rẹ ihwo tiọyena yen Ohwo rẹ Farisi re se Sọl, rọ tare nẹ, “me phọpherọ mi kpokpiro me da harhọ.” (1 Tim. 1:13) Ẹkẹvuọvo, Jihova rọ “davwa udu rẹ ihwo nẹ” na, ni Sọl kuẹrofia-a. (Isẹ 17:3) Ukperẹ ọtiọyen, Ọghẹnẹ mrẹrẹ nẹ ọ sa ma phiyọ omamọ orọnvwọn, ohwo rọ “jẹreyọ,” rọ cha ghwa iyẹnrẹn esiri na “bru otu ri Keferi kugbe ivie kugbe emọ rẹ Izrẹl.” (Iruo 9:15) Ọghẹnẹ ji no nẹ o se ru ihwo re ka dia igbaudi, evwọfanrhiẹn, vẹ iji, phiyọ erọnvwọn “ra vwẹ obọ tete.” (Rom 9:21; 1 Kọr. 6:9-11) Ayen vwẹ uphẹn kẹ Jihova nẹ ọ ma ayen womarẹ erianriẹn rẹ Ota rẹ Ọghẹnẹ vẹ esegbuyota rẹ ayen vwori.

5, 6. Mavọ yen imuẹro rẹ avwanre vwo kpahen Ọmema na djobọte ẹro avwanre vwo nẹ (a) ihwo re ghwoghwo kẹ? (b) iniọvo avwanre?

5 Mavọ yen idje nana sa vwọ chọn avwanre uko? Ofori nẹ e brorhiẹn hwe ihwo rẹ avwanre brẹ ra vwẹ iruo aghwoghwo na-a yẹrẹ iniọvo rẹ ukoko na-a, kidie avwanre vwo imuẹro nẹ Jihova mrẹ ubiudu na, o ji si ihwo rọ guọnọre te oma. Roro kpahen obo re phia kẹ Michael. Ọ da ta: “Iseri rẹ Jihova de te asan me hepha, me ghwa yanjẹ ayen vwo, kerẹsiẹ a da mrẹ nẹ ohwo vuọvo etiyi-in. Mi muọghọ kẹ ayen kakaka-a! Jẹ, ọke vwọ yanran na, me da mrẹ nẹ o vwo ihwo rẹ orua ọvo re nabọ vwo omamọ uruemu. O gbevwunu me vwọ riẹn nẹ ayen Iseri rẹ Jihova! Uruemu rayen na de mu vwe vwo bru iroro kpevun. Ke me rhe riẹn nẹ jẹriẹn vẹ eta rẹ ihwo efa, yen nẹrhẹ mi vwo uruemu nana kpahen ayen.” Michael de rhiabọreyọ uyono rẹ Baibol, ọ sa vwọ nabọ vughe Iseri rẹ Jihova. Ọke vwọ yanran na, o de bromaphiyame, ọ da je ro ẹga ọkieje.

6 E de rhiabọreyọ Jihova kerẹ Ọmema rẹ avwanre, o che djobọte ẹro avwanre vwo nẹ iniọvo avwanre. Wo nẹ iniọvo wẹn kirobo rẹ Jihova nẹ ayen, ihwo rọ je ma kọke kọke? Ọ mrẹ ubiudu rẹ ohwo na vẹ oka rẹ ohwo rọ sa dia. Ọtiọyena, Jihova nẹ ẹbẹre rẹ ohwo de yovwin, ọ tẹnroviẹ jẹgba rọye-en. (Une 130:3) Avwanre sa vwẹrokere siẹrẹ a da tẹnroviẹ asan rẹ iniọvo rẹ avwanre de yovwin. Vwọrẹ uyota, avwanre vẹ Ọmema na sa wian kugbe, siẹrẹ a da  chọn iniọvo na uko ayen vwọ yan obaro vwọrẹ ẹwẹn. (1 Tẹsa. 5:14, 15) Ofori nẹ ekpako na kobaro vwẹ ẹdia nana, kidie ayen eshare re vwo “ru ẹse kẹ ihwo.”—Ẹfe. 4:8, 11-13.

DIESORỌ JIHOVA VWỌ MA AVWANRE?

7. Diesorọ wo vwo nẹ ọghwọku rẹ Jihova ghanghanre?

7 Ọkiọvo wo nyo ota nana jovwo re: ‘Mi vwiẹ emọ romobọ mẹ nu tavwen me ke rhe riẹn ọghanrovwẹ rẹ ọghwọku rẹ ọsẹ vẹ oni mẹ vwọ kẹ vwẹ.’ Ọke vwọ yanran na, avwanre ke rhe mrẹvughe nẹ ọghwọku, ọyen odjephia rẹ ẹguọnọ kirobo rẹ Jihova niro. (Se Hibru 12:5, 6, 11.) Jihova frẹkotọ ma avwanre kidie o vwo ẹguọnọ rẹ avwanre. Ọ guọnọre nẹ avwanre vwo omavwerhovwẹn vẹ aghwanre, ayen mi ji vwo ẹguọnọ kpahọn. (Isẹ 23:15) Ọ guọnọ nẹ avwanre rioja-a; ọ guọnọ nẹ avwanre ghwu phiyọ ẹdia rẹ jẹgba kerẹ “emọ rẹ ophu-u.”—Ẹfe. 2:2, 3.

8, 9. Idjerhe vọ yen Jihova vwo yono avwanre nonẹna, kẹ mavọ yen uyono nana cha hẹrabọ te vwẹ ọke rọ cha obaro na?

8 Kerẹ “emọ rẹ ophu,” avwanre vwo iruemu ebrabra jovwo, evo sa tobọ họhọ e rẹ eranvwe! Ẹkẹvuọvo, oma vwerhen avwanre nẹ Jihova ma avwanre; e de wene, avwanre ke pha kerẹ imigegede. (Aiz. 11:6-8; Kọl. 3:9, 10) Ọtiọyena, iparadaisi rẹ ẹwẹn kọyen Jihova da ma avwanre asaọkiephana. Avwanre vwo ufuoma vẹ ofuvwegbe vwẹ akpọ ọbrabra nana. Vwọba, ihwo re tobọ nẹ orua rẹ ẹguọnọ kanre rhe, ke sa riavwerhen rẹ obọdẹn rẹ ẹguọnọ. (Jọn 13:35) Avwanre ke rhe riẹn obo re dje ẹguọnọ kẹ ihwo efa. Ma rho, avwanre rhe riẹn Jihova, je rhiẹromrẹ ẹguọnọ rọyen asaọkiephana.—Jems 4:8.

9 Vwẹ akpọ kpokpọ na, avwanre cha mrẹ ebruphiyọ rẹ iparadaisi rẹ ẹwẹn na vọnvọn. Avwanre ke je cha riavwerhen rẹ iparadaisi vwẹ otọ rẹ Uvie rẹ Ọghẹnẹ. Vwẹ ọke yena, Jihova cha ma avwanre ji yono avwanre vwẹ idjerhe rẹ oghẹresan. (Aiz. 11:9) Vwo kpobarophiyọ, Ọghẹnẹ che ru ugboma vẹ iroro avwanre gbagba, e se vwo rhiabọreyọ uyono rọyen ji ru ọhọre rọyen kare kare. Ọtiọyena, e jẹ a vwomakpahotọ kẹ Jihova ọkieje ọ ma avwanre, e se vwo dje kẹ nẹ avwanre niro nẹ ọyena odjephia rẹ ẹguọnọ rọyen.—Isẹ 3:11, 12.

OBORẸ JIHOVA MA AVWANRE WAN

10. Idjerhe vọ yen Jesu vwọ vwẹrokere odirin vẹ ona rẹ Ọmema na?

10 Kerẹ ọwena, Jihova riẹn oka rẹ “ọphiẹn” rọhẹ obọ rọyen, kọ je ma avwanre nene idjerhe ọtiọyen. (Se Une Rẹ Ejiro 103:10-14.) Vwọrẹ uyota, ọ riẹnre nẹ avwanre gbare-e, ọ je riẹn asan rẹ ẹgba avwanre teri vẹ oborẹ avwanre gan te vwọrẹ ẹwẹn. Jesu dje oborẹ Ọghẹnẹ nẹ idibo rọyen ri jẹgba wan. Roro kpahen obo ro ru kpahen jẹgba rẹ idibo rọyen, ma rho ọke rẹ ayen vwọ phraphro kpahen ohwo rọ ma rho. Ọ da dianẹ wọ mrẹ idibo na re phraphro ọgangan ọke yena, wọ sa tanẹ ayen ihwo dẹndẹn, ra sa ma? Dedena, Jesu vwẹ ẹro ọbrabra vwo ni aye-en. Ọ riẹnre nẹ a sa ma iyinkọn rọyen na womarẹ erhiorin vẹ uchebro ri bọrọbọrọ, kugbe ayen da je mrẹ udje rẹ omaevwokpotọ rọyen. (Mak 9:33-37; 10:37, 41-45; Luk 22:24-27) Ukperẹ iyinkọn na vwọ tẹnrovi ẹdia rode, ayen da tẹnrovi owian ra vwọ kẹ ayen ọke ra vwọ kpare Jesu nẹ ushi, ji ku ẹwẹn ọfuanfon na ku ayen nu.—Iruo 5:42.

11. Idjerhe vọ yen Devid vwọ dia ọphiẹn rọ pha lọlọhọ, kẹ mavọ yen avwanre sa vwọ vwẹrokere?

 11 Jihova ma idibo rọyen nonẹna womarẹ Baibol na, ẹwẹn ọfuanfon na, kugbe ukoko na. Ota rẹ Ọghẹnẹ sa ma avwanre siẹrẹ avwanre de se, roro kpahọn, je nẹrhovwo kẹ ukẹcha rẹ Jihova a sa vwọ reyọ ruiruo. Devid de si: “Mi de roro uwe vwẹ enu rẹ ehwa mẹ, me da karohọ owẹ vwẹ evun rẹ ason na.” (Une 63:6) O de ji si: “Me nẹ ẹrhovwo kẹ Ọrovwohwo rọ kẹ vwẹ iroro; vwẹ evun rẹ ason udu mẹ de yono uvwe.” (Une 16:7) Devid ghene vwẹ uphẹn kẹ uchebro rẹ Ọghẹnẹ o vwo te ubiudu rọyen, ọ je vwọ ma iroro rọyen, tobọ vwẹ ọke rẹ uchebro na vwọ gan mamọ. (2 Sam. 12:1-13) Ọyena omamọ udje rẹ omaevwokpotọ yen Devid phiyotọ kẹ avwanre! Wo roro kpahen Ota rẹ Ọghẹnẹ, o se vwo te ubiudu wẹn? Wo se ru yovwinphiyọ vwẹ ẹdia nana?—Une 1:2, 3.

12, 13. Mavọ yen Jihova vwẹ ẹwẹn ọfuanfon rọyen vẹ ukoko na vwọ ma avwanre?

12 Ẹwẹn ọfuanfon na ma avwanre vwẹ idjerhe sansan. Kerẹ udje, ọ sa chọn avwanre uko vwo vwo uruemu rẹ Onenikristi, rọ dia omamọ rẹ ẹwẹn ọfuanfon na. (Gal. 5:22, 23) Ẹbẹre ọvo rẹ omamọ yena, yen ẹguọnọ. Avwanre vwo ẹguọnọ rẹ Ọghẹnẹ, avwanre je guọnọ nyupho rọyen ọ sa vwọ ma avwanre, kidie avwanre riẹnre nẹ irhi rọyen diẹ oghwa-a. Ẹwẹn ọfuanfon na je sa kẹ avwanre ẹgba vwọ sen akpọ na vẹ ẹwẹn ọbrabra rọyen i vwo jẹ avwanre ẹma. (Ẹfe. 2:2) Ọke rẹ ọyinkọn Pọl vwọ hẹ eghene, o ji vwo ẹwẹn rẹ omaẹkparọ rẹ ilori rẹ ẹga rẹ Ju. Ukuko na, o de si: “Mi se ru emu ejobi vwi Kristi rọ kẹ vwẹ ogangan.” (Fil. 4:13) Kerẹ Pọl, e jẹ avwanre yare ẹwẹn ọfuanfon na  ọkieje. Jihova cha sa kpairoro vrẹ oyare rẹ idibo rọye-en.—Une 10:17.

Jihova vwẹ ekpako ukoko vwọ ma avwanre, ẹkẹvuọvo o ji fo nẹ e ru ẹkẹn ro te avwanre (Ni ẹkoreta 12, 13)

13 Jihova je vwẹ ukoko na vẹ ekpako na vwọ ma avwanre ohwo vuọvo. Kerẹ udje, ekpako na de noso nẹ avwanre hirharoku ebẹnbẹn rẹ ẹwẹn, ayen chọn avwanre uko, ẹkẹvuọvo ayen vwẹroso aghwanre raye-en. (Gal. 6:1) Ukperẹ ọtiọyen, ayen vwomakpotọ yare ẹruọ vẹ aghwanre rẹ Ọghẹnẹ. Ayen ruẹ nene oyare na womarẹ ehiahiẹ rẹ Baibol vẹ ẹbe ukoko na ri shekpahen ẹdia rẹ avwanre hirharoku na. Ọnana nẹrhẹ ayen sa kẹ avwanre ukẹcha rẹ avwanre ghwa guọnọ. Ayen da vwẹ uchebro kẹ wẹ kpahen orọnvwọn kerẹ osẹnvwe wẹn vwọrẹ ẹguọnọ, wo che rhiabọreyọ uchebro rayen kerẹ odjephia rẹ ẹguọnọ rẹ Ọghẹnẹ vwo kpahen owẹ? Wo de ru ọtiọyen, kọyen wẹwẹ ọphiẹn rọ pha lọlọhọ rẹ Jihova sa ma, kẹ wọ mrẹ erere.

14. Dede nẹ Jihova yen Ọmema na, mavọ yen o djephia nẹ o muọghọ kẹ ọmuvwiẹ rẹ avwanre?

14 E de vwo ẹruọ rẹ oborẹ Ọghẹnẹ ma avwanre wan, ọ cha chọn avwanre uko vwo vwo omamọ oyerinkugbe vẹ iniọvo avwanre, ji vwo dje omamọ uruemu vwọ kẹ ihwo re ghwoghwo ota kẹ. Vwẹ ọke awanre, ọmema da tọn otọ mrẹ ọphiẹn nu, ọ diẹ kọ ghwa ton emama phiyọ-ọ. O si ibiukuta vẹ ikueku nẹ ẹvun rọyen. Ọtiọyen Ọghẹnẹ ji ruẹ vwẹ oma rẹ ihwo re guọnọre nẹ ọ ma ayen. Ọ gba ayen vwo ruẹ ewene-e, ukperẹ ọtiọyen, o dje irhi rọyen kẹ ayen rere ayen vwo yeren akpọ nene vẹ ẹwẹn rayen eje.

15, 16. Mavọ yen ihwo ra vwẹ Baibol yono se vwo djephia nẹ ayen guọnọ nẹ Jihova ma ayen? Ru udje rọyen.

15 Roro kpahen udje rẹ oniọvo aye ọvo re se Tessie, vwẹ Australia. Oniọvo aye ro yoniro da ta: “Ọ lọhọ vwọ kẹ Tessie ro vwo vwo erianriẹn rẹ uyota na, ẹkẹvuọvo, ọ yan obaro vwọrẹ ẹwẹ-ẹn, o tobọ kpo uyono-o! Me vwọ nẹrhovwo kpahen ẹdia na nu, mi de brorhiẹn me vwọ dobọ rẹ uyono na ji. Orọnvwọn rẹ igbevwunu ọvo da rhe phia. Me vwọ yanran re yono vwẹ obọ rọ koba, Tessie de rhie evun kẹ vwẹ. Ọ da tanẹ ọyen rha guọnọ yeren akpọ ivẹ-ẹ, kidie o phi idjogba. Asaọkiephana o brorhiẹn rọ vwọ dobọ rọyen ji.”

16 O rhe kri-i, Tessie da rhe ton uyono ẹra phiyọ, ko ji dje uruemu rẹ Onenikristi phia dede nẹ igbeyan rọyen reyọ vwọ jehwẹ. Oniọvo ro yono na da ta: “O rhe kri-i, Tessie de bromaphiyame, je ga kerẹ ọkobaro ọkieje, dede nẹ o vwo imitete vwẹ obọ.” O muẹro dẹn nẹ, ihwo ra vwẹ Baibol yono de wene akpeyeren rayen, oma kọ cha vwerhen Ọghẹnẹ, ko che sikẹrẹ ayen je ma ayen phiyọ erọnvwọn iyoyovwin.

17. (a) Die yen nẹrhẹ oma vwerhen owẹ nẹ Jihova yen Ọmema wẹn? (b) Die yen e che yono vwẹ uyovwinrota rọ vwọ kpahen ọnana?

17 Re te nonẹna, ihwo je vwẹ obọ vwọ ma erọnvwọn iyoyovwin. Ọtiọyen yen Jihova je frẹkotọ ma avwanre womarẹ uchebro rọyen, ko ji nẹ oborẹ avwanre ruẹ wan. (Se Une Rẹ Ejiro 32:8.) Wo se noso nẹ Jihova vwo ọdavwẹ wẹn? Wọ mrẹ oma wẹn vwẹ obọ rọyen rọ vwọ ma wẹ? Ọ da dia ọtiọyen, iruemu efa vọ yen cha chọn wẹ uko vwọ dia lọlọhọ vwẹ obọ rẹ Jihova? Iruemu vọ yen wọ kẹnoma kẹ wo vwo jẹ dia gangan? Mavọ yen emiọvwọn se vwo nene Jihova wian kugbe vwọ ma emọ rayen? Uyovwinrota rọ vwọ kpahen ọnana cha kpahenphiyọ enọ nana.