Baibol na yerin ghene ebẹnbẹn nana eje. Kọyensorọ wo se vwo Baibol na ji se nonẹna. Wo de vwo Baibol rẹ efanfan rọyen nabọ gba, wo se vwo imuẹro nẹ obo wo se na ghene obo rehẹ Baibol rẹsosuọ na. * Kẹ diesorọ Baibol na sa vwọ vrabọ rẹ ẹghwọrọ kuẹfia, se vwo yerin ghene ẹvwọsuọ vẹ ẹgbaẹdavwọn re vwo wene eta ovuẹ rọyen? Diesorọ ọ vwọ dia ọbe rẹ oghẹresan?

“O muvwẹro re nẹ Baibol mi vwori na, okẹ ro nẹ obọ rẹ Ọghẹnẹ rhe”

Ihwo buebun ri se Baibol na rhe rhọnvwephiyọ ọta rẹ ọyinkọn Pọl, rọ vwọ ta: “Ọbe ọfuanfon na ejobi . . . Ọghẹnẹ mu ihwo” vwo sio. (2 Timoti 3:16, NW) Ayen riẹnre nẹ Baibol na herọ nonẹna kidie Ota rẹ Ọghẹnẹ o ruẹ, Ọghẹnẹ yen je sẹro rọyen rhi te nonẹna. Faizal, re djunute vwẹ uyovwinrota rẹsosuọ rẹ ọbe nana de brorhiẹn ọ vwọ hiẹ Baibol na komobọ, ro ji vwo yono. Obo rọ mrẹre gberunu mamọ. Ọ rhe mrẹvughe nẹ iyono buebun re yono vwẹ ishọshi hẹ Baibol na-a. Ọhọre rẹ Ọghẹnẹ vwọ kẹ otọrakpọ na rọ mrẹre vwẹ Baibol ji te ẹwẹn mamọ.

Ọ da ta: “O muvwẹro re nẹ Baibol mi vwori na, okẹ ro nẹ obọ rẹ Ọghẹnẹ rhe. Kidie Ọghẹnẹ da sa ma odjuvwu vẹ akpọ na, o rhe se vwo ẹgba rọ vwọ kẹ avwanre ọbe, je sẹro rọyen kẹ avwanre? Me da phro ota yena kọyen me vwẹ ẹro otete vwo nẹ ẹgba rẹ Ọghẹnẹ, Ọromevwẹgba na! Kẹ ono yen omẹvwẹ mi vwo ru ọtiọyen?”—Aizaya 40:8.

^ e?ko. 3 Wo se se uyovwinrota na “How Can You Choose a Good Bible Translation?” rọhẹ Uwevwin Orhẹrẹ rẹ May 1, 2008, ọ rẹ oyibo.