Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Iseri ri Jihova

Sane ejajẹ Urhobo

Ghwoghwo Iyẹnrẹn Esiri rẹ Ẹserọphẹ Na

Ghwoghwo Iyẹnrẹn Esiri rẹ Ẹserọphẹ Na

Se oseri kẹ iyẹnrẹ esiri rẹ ẹserọphẹ rẹ Ọghẹnẹ.—IRUO 20:24.

UNE: 101, 84

1, 2. Mavọ yen ọyinkọn Pọl vwo dje idavwaro phia vwọ kẹ ẹserọphẹ rẹ Ọghẹnẹ?

ỌYINKỌN Pọl tare nẹ, “Ẹserọphẹ rọ [Ọghẹnẹ] vwọ kẹ vwẹ na rha dia ọ ri gheghe-e.” (Se 1 Kọrẹnt 15:9, 10.) Pọl nabọ riẹn nẹ ọyen muwan rẹ arodọnvwẹ rẹ Ọghẹnẹ-ẹ, kidie ọ ka dia ohwo ro mukpahen Inenikristi jovwo.

2 Ọke rẹ ughwu rọyen vwo siẹkẹrẹ re, Pọl de si rhe Timoti nẹ, “Me kpẹvwẹ Kristi Jesu Ọrovwavwanre, rọ kẹ vwẹ ogangan nana, kidie o ni vwe fo ohwo rẹ uyota, ro vwo se vwe phihọ iruo rọye.” (1 Tim. 1:12-14) Die yen iruo yena? Pọl vuẹ ekpako rehẹ ukoko rẹ Ẹfesọs oborẹ iruo na churobọ si, rọ vwọ ta: “Mi se arhọ mẹ gbe emuọvo-o eyẹ kọ ghare kẹ oma mẹ-ẹ, ọ da dianẹ me sa yan oyan re kugbe odibo egbe re me reyọ mie Ọrovwohwo Jesu, ri mi vwo se oseri kẹ iyẹnrẹ esiri rẹ ẹserọphẹ rẹ Ọghẹnẹ.”—Iruo 20:24.

3. Iruo oghẹresan vọ yen a vwọ kẹ Pọl? (Ni uhoho rẹsosuọ na.)

 3 “Iyẹnrẹ esiri” vọ yen Pọl ghwoghwori ro dje ẹserọphẹ rẹ Jihova phia? Ọ da vuẹ Inenikristi rehẹ Ẹfesọs: “Ovwan nyo usi rẹ ẹserọphẹ rẹ Ọghẹnẹ ra vwọ kẹ vwẹ ni mi vwo gbe odibo kẹ ovwan.” (Ẹfe. 3:1, 2) Pọl vwo iruo ro vwo ghwoghwo iyẹnrẹn esiri vwọ kẹ ihwo rẹ ẹgborho na rere ayen je sa vwọ dia usun rẹ ihwo ri che nene Kristi sun vwẹ usuon rẹ Mesaya na. (Se Ẹfesọs 3:5-8.) Ofori nẹ Inenikristi vwẹrokere oruru rẹ Pọl vwẹ iruo aghwoghwo na kugbe idjerhe ro vwo djephia nẹ ẹserọphẹ rẹ Ọghẹnẹ dje kẹ, dia ọ rẹ “gheghe-e.”

ẸSERỌPHẸ RẸ ỌGHẸNẸ MU WE VWO RUIRUO?

4, 5. Diesorọ a sa vwọ tane “iyẹnrẹ esiri [rẹ Uvie, NW] na” yen jehẹ “iyẹnrẹ esiri rẹ ẹserọphẹ rẹ Ọghẹnẹ”?

4 Vwẹ ọke rẹ oba na, ihwo rẹ Jihova vwo iruo rẹ ayen vwo ghwoghwo “iyẹnrẹ esiri [rẹ Uvie, NW] na . . . kẹ ẹgborho na ejobi.” (Mat. 24:14) Ovuẹ rẹ avwanre ghwoghwo na yen jehẹ “iyẹnrẹ esiri rẹ ẹserọphẹ rẹ Ọghẹnẹ” kidie ebruphiyọ eje rẹ avwanre rhẹro rọyen vwẹ otọ rẹ Uvie na che te avwanre obọ womarẹ ẹserọphẹ rẹ Jihova ro djephia vwẹ Kristi na. (Ẹfe. 1:3) Avwanre ohwo vuọvo vwẹrokere Pọl vwo dje idavwaro kpahen ẹserọphẹ rẹ Jihova womarẹ oruru ọgangan vwẹ iruo aghwoghwo na?—Se Rom 1:14-16.

5 Vwẹ uyono rọ wanre na, avwanre yono kpahen idjerhe sansan rẹ ẹserọphẹ rẹ Jihova vwọ dia erere kẹ avwanre, re dia irumwemwu rẹ ihwo. Ọtiọyena, ọyena oghwa rẹ avwanre, a vwọ vuẹ ihwo efa kpahen oborẹ Jihova vwo dje ẹguọnọ rọyen phia vẹ erere rẹ ayen sa mrẹ norhe komobọ. Ẹbẹre sansan rẹ ẹserọphẹ rẹ Ọghẹnẹ vọ yen avwanre sa chọn ihwo efa uko vwọ mrẹvughe?

GHWOGHWO IYẸNRẸN ESIRI RẸ IZOBO RẸ ỌTANHIRHE NA

6, 7. A da vuẹ ihwo kpahen ọtanhirhe na, idjerhe vọ yen ọnana vwọ dia aghwoghwo rẹ iyẹnrẹn esiri rẹ ẹserọphẹ rẹ Ọghẹnẹ?

6 Vwẹ akpọ nana rẹ ihwo de ruẹ obo ri je ayen na, umwemwu rhe tu ohwo oma-a, te ẹdia rẹ buebun rẹ ihwo rha tobọ riẹn nẹ ayen guọnọ ọtanhirhe na-a. Dedena, ihwo buebun je mrẹvughe nẹ oka rẹ akpọ re de ru obo ri je ohwo na kẹ ohwo uvi rẹ omavwerhovwẹ-ẹn. Iseri rẹ Jihova yen chọn ihwo buebun uko vwọ riẹn oborẹ umwemwu hepha, obo ro se djobọte avwanre wan, vẹ obo re se vwo vrẹn nẹ ẹdia rẹ ọviẹn vwọ kẹ umwemwu. Oma vwerhen ihwo ri vwo ẹwẹn esiri, ọke rẹ ayen da rhe riẹn nẹ Jihova ji Ọmọ rọyen rhe tan avwanre nẹ umwemwu vẹ ughwu, fikirẹ ẹguọnọ vẹ ẹserọphẹ rọyen.—1 Jọn 4:9, 10.

7 Pọl vwọ ta ota kpahen Ọmọ rẹ Ọghẹnẹ, o de si: “Evun rọye [Jesu] avwanre wan vwo ẹtanhirhe vwẹ oma rẹ ọbara rọye, evwoghovwo rẹ urhi ẹchọ rẹ avwanre, kirobo rẹ ẹserọphẹ rọye [Jihova] bute.” (Ẹfe. 1:7) Izobo rẹ ọtanhirhe rẹ Jesu ọyehẹ idjerhe rọ ma rho rẹ Ọghẹnẹ vwo dje ẹguọnọ vẹ ẹserọphẹ rọyen vwọ kẹ avwanre. Mavọ ọ vwerhen oma te a vwọ riẹn nẹ e de vwo esegbuyota kpahen izobo rẹ Jesu, ka sa mrẹ evwoghovwo rẹ  imwemwu rẹ avwanre, ji vwo ẹwẹn obrorhiẹn rọ fonro! (Hib. 9:14) Ọnana ghini iyẹnrẹn esiri ro fori nẹ ihwo efa nyo kpahen!

CHỌN IHWO UKO VWO VWO OYERINKUGBE VẸ ỌGHẸNẸ

8. Diesorọ o vwo fo nẹ ihworakpọ vẹ Ọghẹnẹ rhuẹrẹ kugbe?

8 Avwanre vwo oghwa ra vwọ vuẹ ihwo nẹ ayen se vwo omamọ rẹ oyerinkugbe vẹ Ọmemama rayen. Tavwen ihworakpọ ki rhi vwo esegbuyota kpahen izobo rẹ Jesu, Ọghẹnẹ ni ayen kerẹ ivwighrẹn. Ọyinkọn Jọn de si: “Ọ ro se Ọmọ na gbuyota vwo arhọ ri bẹdẹ na; ọ ro rhe mu ọghọ kẹ Ọmọ na-a sa mrẹ arhọ-ọ, ẹkẹvuọvo ophu rẹ Ọghẹnẹ dia uyovwi rọye.” (Jọn 3:36) Izobo rẹ Kristi kọyensorọ avwanre vẹ Ọghẹnẹ sa vwọ rhuẹrẹ kugbe. Pọl da ta: “Ovwan rẹ erhorha kugbe ivwighrẹ rẹ iruo esiri jovwo na, ka je rhuẹrẹ ovwan kugbe. Vwẹ ugboma fiki rẹ ughwu rọye.”—Kọl. 1:21, 22.

9, 10. (a) Owian vọ yen Kristi vwọ kẹ ihwo ra jẹreyọ na? (b) Mavọ yen “igodẹ efa” na vwọ vwẹ ukẹcha kẹ ayen?

9 Jesu vwẹ owian ọvo vwọ kẹ ihwo ra jẹreyọ na, owian nana yen Pọl seri nẹ “odibo egbe rẹ erhuarhuẹrẹ.” Ro vwo djekpahọn, Pọl de si rhe e ra jẹreyọ na nẹ, “Ọnana ejobi na obọ rẹ Ọghẹnẹ i nurhe, ohwo rọ wan oma ri Kristi rhuẹrẹ avwanre kugbe oma rọye ọ da kẹ avwanre odibo egbe rẹ erhuarhuẹrẹ; Kọye hẹ, Ọghẹnẹ rọ hẹ evun ri Kristi rọ rhuẹrẹ akpọ na kẹ oma rọye, o roro urhiẹchọ rayen kẹ aye-en, o de phi ovuẹ rẹ erhuarhuẹrẹ na phihọ avwanre obọ. Ọtiọye na avwanre kẹ ihwo ri Kristi ji uwevwi, oma rẹ avwanre ọye Ọghẹnẹ wan vuẹ uwevwi na. Avwanre vwẹ odẹ ri Kristi rẹ ovwan, rere wa vẹ Ọghẹnẹ rhuẹrẹ kugbe.”—2 Kọr. 5:18-20.

10 “Igodẹ efa” na ji no kerẹ okpuphẹn rẹ ayen vwo bicha ihwo ra jẹreyọ na vwẹ iruo nana. (Jọn 10:16) Kerẹ ihwo re ji uwevwin, igodẹ efa na yen me ruiruo re vwo yono ihwo uyota na je chọn ayen uko vwọ dia ugbeyan rẹ Jihova. Ọnana ẹbẹre ọghanghanre rẹ iruo re vwo se oseri rẹ iyẹnrẹn esiri rẹ ẹserọphẹ rẹ Ọghẹnẹ.

GHWOGHWO IYẸNRẸN ESIRI NA NẸ ỌGHẸNẸ NYO ẸRHOVWO

11, 12. Diesorọ ọ vwọ dia iyẹnrẹn esiri, ihwo vwọ riẹn nẹ ayen sa nẹrhovwo kẹ Jihova?

11 Ihwo buebun de nẹrhovwo kidie ọ kẹ ayen omavwerhovwẹn ghevweghe, ayen ghwe vwo imuẹro nẹ Ọghẹnẹ nyo ẹrhovwo raye-en. Ofori nẹ ayen riẹn nẹ Jihova ọyen Ohwo “ro nyo ẹrhovwo.” Ọbuine Devid de si: “E wọwẹ ro nyo ẹrhovwo na! Wọwẹ ọye ihwo ejobi che bru rhe fiki rẹ imwemwu. Ọke rẹ ogbeku rẹ avwanre de shenyẹ avwanre, wẹ ri vwo ghovwo ayen.”—Une 65:2, 3.

12 Jesu da vuẹ idibo rọyen: “Ovwan da nọ kemu kemu vwẹ odẹ mẹ, mi se ruo.” (Jọn 14:14) “Kemu kemu” na mudiaphiyọ korọnvwọn korọnvwọn ro shephiyọ ọhọre rẹ Jihova. Jọn kẹ avwanre imuẹro nana: “Ọnana kọye ẹroẹvwọsuọ rẹ avwanre vwori vwẹ evun rọye, nẹ avwanre da nọ ekpẹn rẹ emu ro shephihọ ọhọre rọye ko nyo kẹ avwanre.” (1 Jọn 5:14) Ọyena obo ri yovwirin mamọ re vwo yono ihwo nẹ ẹrhovwo diẹ orọnvwọn rọ kẹ ohwo omavwerhovwẹn ghevweghe-e,  ukperẹ ọtiọyen, ọyen idjerhe re vwo bru Jihova ra vwẹ “ekete rẹ ẹserọphe” rọyen na! (Hib. 4:16) E de yono ayen oborẹ ayen nẹrhovwo wan, Ohwo rẹ ayen nẹrhovwo rhe, vẹ erọnvwọn rẹ ayen nẹrhovwo kpahen, ọnana cha nẹrhẹ ayen sikẹrẹ Jihova je mrẹ uchebro vwẹ ọke rẹ ebẹnbẹn.—Une 4:1; 145:18.

ẸSERỌPHẸ VWẸ AKPỌ KPOKPỌ NA

13, 14. (a) Uphẹn oghẹresan vọ yen ihwo ra jẹreyọ na che vwo ọke rọ cha obaro na? (b) Die yen e ra jẹreyọ na che ru vwọ kẹ ihworakpọ?

13 Ẹserọphẹ rẹ Jihova che vwoba vwẹ akpọ nana-a. Pọl vwọ ta ota kpahen uphẹn rẹ oghẹresan rẹ Ọghẹnẹ vwọ kẹ ihwo 144,000 ri che nene Jesu sun vwẹ Uvie na, ọ da ta: “Ẹkẹvuọvo Ọghẹnẹ, rọ vẹ arodọvwẹ buebu, vwẹ evun rẹ ẹguọnọ rode ro vwo kẹ avwanre na, vwẹ ọke rẹ avwanre vwo ghwu fiki rẹ urhi ẹchọ rẹ avwanre na, ọ da kpare avwanre vi Kristi vrẹn (ẹserọphẹ e vwo sivwi ovwan), a da kpare avwanre vẹ ọye vrẹn, a da vwẹ avwanre vẹ ọye tidia vwẹ asan ro kpenu vwi Kristi Jesu, rere vwẹ oge rọ cha na ọ vwẹ ẹserọphẹ ro je re na kugbe arodọvwẹ rọye vwọ nẹ avwanre vwẹ evun ri Kristi Jesu.”—Ẹfe. 2:4-7.

14 A cha sa vwẹ ẹro roro erọnvwọn rẹ Jihova rhuẹrẹ vwọ kẹ ihwo ra jẹreyọ na ọke rẹ ayen de che nene Jesu sun vwẹ ekete rayen vwẹ odjuvwu-u. (Luk 22:28-30; Fil. 3:20, 21; 1 Jọn 3:2) Jihova che dje “ẹserọphẹ ro je re na kugbe arodọvwẹ rọye” vwọ kẹ ayen. E che se ayen, “Jerusalẹm Ọkpokpọ na,” ọpha rẹ Kristi. (Ẹvwọ. 3:12; 17:14; 21:2, 9, 10) Ayen vẹ Jesu yen che “sivwi ẹgborho na,” ayen je cha vwẹ odjekẹ vwọ kẹ ihwo kpahen oborẹ ayen sa vwọ vrabọ rẹ umwemwu vẹ ughwu, ji ru ihwo na gbagba.—Se Ẹvwọphia 22:1, 2, 17.

15, 16. Idjerhe vọ yen Jihova che vwo dje ẹserọphẹ rọyen vwọ kẹ “igodẹ efa” na vwẹ ọke rọ cha obaro?

15 Ọbe rẹ Ẹfesọs 2:7 tare nẹ a cha mrẹ odjephia rẹ ẹserọphẹ rẹ Ọghẹnẹ vwẹ akpọ “rọ cha na.” Aphro herọ-ọ, vwẹ eyeren kpokpọ na, avwanre cha mrẹ “ẹserọphẹ ro je re na kugbe arodọvwẹ rọye.” (Luk 18:29, 30) Idjerhe ọvo ra cha vwọ mrẹ ọnana yen a cha vwọ rhọvwọn ihwo nẹ [“Ushi,” NW] vwọ rhe akpọ na. (Job 14:13-15; Jọn 5:28, 29) A cha rhọnvwọn eya vẹ eshare re fuevun ri ghwuru tavwen Jesu ki ghwu, vẹ “igodẹ efa” ri ghwuru vwẹ ọke rẹ oba nana, nẹ ushi rhe ga Jihova.

16 A je cha kpare oduduru rẹ ihwo re riẹn Ọghẹnẹ tavwen ayen ki ghwu-u, nẹ ushi. Ka cha kẹ ayen uphẹn rẹ ayen vwọ ka ẹbẹre rẹ usuon rẹ Jihova. Jọn de si: “Me da mrẹ irivwi, te emọ te ekpako, ri mudia vwẹ obaro rẹ ekete na, e de rhie ẹbe phihọ. E de ji rhie ọbe ọfa, kọye hẹ ọbe rẹ arhọ na. Obo re si phihọ ẹbe na kọye e ni guẹdjọ rẹ irivwi na, kirobo rẹ ayen ruru. Abadi da vwẹ irivwi ri ghwu phihọ kpahe otọ, Ughwu kugbe [“Ushi,” NW] da vwẹ irivwi re hẹ evun rẹ ayen kpahe otọ, e de guẹdjọ rẹ ayen kirobo rẹ ayen ruru.” (Ẹvwọ. 20:12, 13) Ihwo ra rhọnvwọn nẹ ushi na ki che yono oborẹ ayen se vwo ru eta rehẹ Baibol na. Vwọba, ayen che nene odjekẹ kpokpọ re vọnre vẹ erere ra cha mrẹ vwẹ “ẹbe na,” ri che dje oborẹ Jihova guọnọ mie avwanre vwẹ akpọ kpokpọ  na. Odjephia rẹ obo rehẹ ẹbe na jẹ idjerhe ọfa ra cha vwọ mrẹ ẹserọphẹ rẹ Jihova.

GHWOGHWO IYẸNRẸN ESIRI NA ỌKIEJE

17. Die yen avwanre phiyọ ẹwẹn siẹrẹ e de ruiruo aghwoghwo na?

17 Oba na vwo siẹkẹrẹ na, owian rẹ avwanre vwori ọyehẹ e vwo ghwoghwo iyẹnrẹn esiri rẹ Uvie na! (Mak 13:10) Aphro herọ-ọ, iyẹnrẹn esiri na dje ẹserọphẹ rẹ Jihova phia. E jẹ avwanre karophiyọ ọnana siẹrẹ e de ruiruo rẹ aghwoghwo na. Oborẹ avwanre tẹnrovi yen e vwo muọghọ kẹ Jihova. E se ru ọnana siẹrẹ a da vuẹ ihwo nẹ ive rẹ akpọ kpokpọ na eje, odjephia rẹ ẹserọphẹ rẹ Jihova.

Ga vẹ oruru kerẹ odibo “esiri rẹ Ọghẹnẹ rọ ghara ẹserọphẹ rọye.”—1 Pita 4:10 (Ni ẹkoreta 17-19)

18, 19. Idjerhe vọ yen avwanre vwo titi ẹserọphẹ rẹ Jihova?

18 Vwẹ iruo aghwoghwo na, e jẹ a nabọ dje kẹ ihwo nẹ vwẹ otọ rẹ usuon rẹ Kristi, ihworakpọ eje cha mrẹ erere rẹ izobo na vọnvọn, ka je cha dia ihwo re gbare. Baibol na da ta: “A cha rhan emama na nẹ ọviẹn vẹ egbo ko che vwo urinrin rẹ egbemọphẹ rẹ emọ rẹ Ọghẹnẹ.” (Rom 8:21) Ẹserọphẹ rẹ Jihova ọvo yen che ru ọnana kẹ avwanre.

19 Avwanre vwo uphẹn re vwo ghwoghwo kẹ kohwo kohwo ovuẹ rẹ omavwerhovwẹn rọhẹ Ẹvwọphia 21:4, 5, rọ tare nẹ, “[Ọghẹnẹ] ko ririe ameoviẹ nẹ ẹro rayen, ughwu gbe cha dia ọfa-a, eyẹ omaemuohọ eye oviẹ eyẹ odjadja ọfa-a, kidie emu rẹ awanre na wanvrẹn nure.” Jihova rọ dia ohwo ro chidia enu rẹ ekete na, da ta: “Nighe, mi ru emu na ejobi ọkpokpọ. Ọ da je ta rhe, Si ọnana, kidie eta nana omamọ ota.” Avwanre de ghwoghwo iyẹnrẹn esiri nana kẹ ihwo vẹ oruru, jẹ avwanre titi ẹserọphẹ rẹ Jihova!