Me vuẹ ọvo usun rẹ isodje na nẹ e mu vwe phiyọ uwodi jovwo re kidie me rhọnvwe vwomaba isodje-e. Me da nọ, “Wọ cha rhoma mu vwe phiyọ uwodi?” Ọnana yen obọ rivẹ ra vuẹ vwẹ nẹ mi kuomaba isodje rẹ United States.

E VWIẸ vwẹ vwẹ Crooksville, Ohio, rọhẹ United States ukpe rẹ 1926. Ọsẹ vẹ oni mẹ kpo ẹga vuọvo-o, jẹ ayen vuẹ avwanre, emọ erenren, nẹ i kpo ishọshi. Mi kpo ishọshi rẹ Methodist. Me vwọ hẹ ẹgbukpe 14, olori ẹga na de ruẹse kẹ vwẹ kidie uvwre rẹ ẹgbukpe ọvo, o vwo Sunday vuọvo mi jẹ ishọshi ẹra-a.

Margaret Walker (ohwo rivẹ nẹ obohwẹre rhe) yen chọn vwẹ uko vwo mrẹ uyota na vughe

Vwẹ ọke yena, Oseri ri Jihova ọvo re se Margaret Walker rọ dia kẹrẹ avwanre, kọn bru oni mẹ cha, ko nene yono Baibol na. Ẹdẹ ọvo, mi de kuomaba ayen. Ẹkẹvuọvo, oni mẹ da djẹ vwẹ ro otafe kidie o roro nẹ me cha yanghan uyono na. Dedena, me je kerhọ kẹ uyono na. Ọke evo vwọ wan nu, Margaret da nọ vwẹ nẹ, “Wọ riẹn odẹ rẹ Ọghẹnẹ?” Me da kpahen kẹ nẹ, “Kohwo kohwo riẹn rẹ; odẹ rọyen, Ọghẹnẹ.” Ọ da vuẹ vwẹ nẹ, “Reyọ Baibol wẹn wo rhie kpo Une Rẹ Ejiro 83:18.” Mi vwo se, me da mrẹ nẹ odẹ rẹ Ọghẹnẹ, Jihova. Ọke yena, me da djẹ ra vuẹ igbeyan mẹ nẹ, “Ovwan de te uwevwin ovwọnvwọn na, ovwan se ọbe rẹ Une Rẹ Ejiro 83:18, ovwan cha mrẹ odẹ rẹ Ọghẹnẹ.” Wọ sa tanẹ, iruo aghwoghwo na yen me ghwa tonphiyọ na.

Mi yono Baibol na, mi de bromaphiyame vwẹ 1941. Ọmọke vwọ wan nu, a da vuẹ vwẹ nẹ me vwẹrote uyono rẹ ubruwevwin. Mi durhie oni mẹ vẹ iniọvo mẹ nẹ ayen kuomaba uyono rẹ ubruwevwin rẹ me vwẹrote na, ayen da ghene rhe. Dedena, ọsẹ mẹ rhọnvwe kuomaba avwanre-e.

ẸVWỌSUỌ VWẸ UWEVWIN

A kẹ vwẹ uphẹn rẹ ẹga sansan vwẹ ukoko na, me je reyọ ẹbe rẹ ukoko na buebun. Ẹdẹ ọvo vwo te, ọsẹ mẹ vwọ rionbọ phiyọ ẹbe mẹ na, ọ da ta: “Wọ mrẹ ẹbe yena eje na? Me guọnọre nẹ wo mu ayen nẹ uwevwin mẹ, wọ vẹ ayen se ji vrẹn nẹ uwevwin mẹ.” Mi de vrẹn nẹ uwevwin na kpo orere ọvo rọ kẹrẹ avwanre re se Zanesville vwẹ Ohio, jẹ ọke sansan me je kọn bru oni mẹ vẹ iniọvo mẹ ra mi vwo phiuduphiyọ ayen awọ.

 Ọsẹ mẹ davwẹngba rọ vwọ dobọ rẹ oni mẹ ji, ro vwo jẹ uyono ẹra. Ọkiọvo, ọ vwọ tua, o mi kpono rhivwin rhe uwevwin. Ẹkẹvuọvo, oni mẹ me wan ẹchẹ rẹ obuko djẹ kpo uyono. Me da vuẹ oni mẹ ne, “Wo jẹ udu bru we-e. Oma cha ghwọrọ kọ cha kpairoro vrẹ wẹ.” Oma da ghene ghwọrọ ọsẹ mẹ, ọ da vwẹ uphẹn kẹ oni mẹ ro vwo kpo uyono odedede.

Ọke rẹ Isikuru rẹ Iruo Ruvie Na vwọ tonphiyọ vwẹ 1943, a da je ghare eta te vwe vwẹ ukoko mẹ. Odjekẹ ra vwọ kẹ vwẹ vwẹ isikuru na chọn vwẹ uko vwọ dia ọwena rẹ ota.

MI VWOBỌ VWẸ OFOVWI-IN

Vwẹ 1944, a da vuẹ vwẹ nẹ mi kuomaba isodje ọke re vwo phi Ofovwin Akpọeje II. Mi kpo Fort Hayes vwẹ Columbus, Ohio, a da fuẹrẹn oma mẹ, mi de ji si evuẹ ra guọnọ mie vwe phiyotọ. Me da je vuẹ ayen nẹ me cha vwomaba isodje-e. Ayen de siobọnu uvwe. Ẹdẹ evo vwọ wan nu, ọlọkpa ọvo da rhe uwevwin mẹ, ọ da vuẹ vwẹ nẹ, “Corwin Robison, e juvwe rhi mu uwe.”

Udughwrẹn ivẹ vwọ wan nu, e de mu uwe kpo aguare, obrorhiẹn na da ta: “A da fọ kẹ vwẹ, mi cha kanre owẹ bẹdẹ bẹdẹ. Die wo vwori wọ cha ta?” Me da kpahen kẹ: “Ọrovwovwe, mẹvwẹ jẹ oghwoghwota rẹ Ọghẹnẹ. Mi ghwoghwo iyẹnrẹn esiri rẹ Uvie na kẹ ihwo vwẹ uwevwin rayen.” Obrorhiẹn na da vuẹ ihwo re vwo mu nẹ e kerhọ kẹ ẹdjọ na: “Ọ diẹ ovwan rhi brorhiẹn sẹ ohwo nana oghwoghwota yẹrẹ ọ diẹ oghwoghwota-a. Ovwan rhi brorhiẹn sẹ ọ rhọnvwe vwomaba isodje na yẹrẹ ọ rhọvwere-e.” Bẹsiẹ ibrẹro ọgban vwo te, ayen de brorhiẹn hwe vwe. Obrorhiẹn na da tanẹ mi che kpo ekanrọ ẹgbukpe iyorin vwẹ uwodi rọhẹ Ashland, Kentucky.

JIHOVA SẸRO MẸ VWẸ UWODI

Me ka dia uwodi vwẹ Columbus, Ohio, vwẹ udughwrẹn ivẹ. Ẹdẹ ẹsosuọ, me da nẹrhovwo kẹ Jihova nẹ, “Me cha sa dia uwodi ẹgbukpe iyorin soso rẹ. Mi riẹn obo mi che ru-u.”

Ọke vwo rhie, ọlọkpa na da vwẹ uphẹn kẹ vwẹ nẹ me ro otafe. Me da yan bru ọshare ọvo ra rọ pha gbogborogbo rọ je hẹ uwodi na, ọke rọ vwọ wan ovakpo nẹ otafe. Ọ da nọ vwẹ nẹ, “Die mu we rhe etinẹ?” Me da vuẹ nẹ, “Mẹvwẹ Oseri ri Jihova.” Ọ da ta: “Eyẹẹ, kẹ die wo ruẹ vwẹ etinẹ?” Me da vuẹ nẹ, “Kidie Iseri ri Jihova kpo ofovwin re hwe ihwo-o.” Ọ da ta nẹ, “E mu we phiyọ uwodi kidie wọ rhọnvwe hwe ihwo-o. Jẹ e mu ihwo efa phiyọ etinẹ kidie ayen hwe ihwo. Ọhọ tobọ herọ?” Me da ta: “Kakaka.”

Ọ da vuẹ vwẹ nẹ, “Me ghwọrọ ẹgbukpe 15 vwẹ uwodi ọvo, etiyin mi de se ẹbe ovwan evo.” Mi vwo nyo ota yena, me da nẹrhovwo, “Jihova, biko chọn vwẹ uko vwọ dia ugbeyan rẹ ọshare nana.”  Ugege yena, ọshare nana re se Paul na, da ta: “Ihwo nana rehẹ uwodi na de djobọte we, wo mi kperi se vwe. Me cha chọn vwe uko.” Ọtiọyena, vwẹ ọke me ghwọrọ vwẹ uwodi na, mi vwo ebẹnbẹn vuọvo vẹ ihwo 50 rehẹ uwodi na-a.

Mẹvwẹ ọvo usun rẹ iniọvo re mu phiyọ uwodi vwẹ Ashland, Kentucky kidie avwanre rhọnvwe phi ofovwi-in

Ọke re vwo mu vwe kpo uwodi rọhẹ Ashland, me da mrẹ iniọvo efa vwẹ oboyin. Ayen vwẹ ukẹcha kẹ vwẹ vẹ ihwo efa vwo sikẹrẹ Jihova. Iniọvo na ghare isese rẹ Baibol rẹ udughwrẹn na kẹ avwanre, avwanre ji muegbe rẹ enọ vẹ ẹkpahọnphiyọ vwọ kẹ emẹvwa na. A rhuẹrẹ ehwa nene ubruwevwin avwanre hepha na. O vwo oniọvo ro ru ọrhuẹrẹphiyotọ rẹ asan re che ghwoghwo. Ọ me vuẹ vwẹ nẹ, “Robison, wẹ yen che ghwoghwo kẹ ehwa yena vẹ ọyena. Ohwo ro vwo ehwa yena ọyen wo che ghwoghwo kẹ. Vwo imuẹro nẹ wo ghwoghwo kẹ o ki nẹ etiyin.” Ọnana yen ọrhuẹrẹphiyotọ rẹ avwanre vwori vwọ kẹ iruo aghwoghwo na.

MI VWO NẸ UWODI NU

Ofovwin Akpọeje II dobọji vwẹ 1945, jẹ me je dia uwodi na te ọmọke ọvo. Me ro ẹnwan kpahen orua mẹ kidie ọsẹ me vuẹ vwẹ nẹ, “Mi de se si we no, ihwo ichekọ na cha dia obẹnbẹ-ẹn.” Mi vwo nẹ uwodi nu, orọnvwọn ọvo de gbevwunu. Ihwo ighwrẹn vwẹ orua mẹ kpo uyono re, oniọvo mẹ ọvo rọ dia ọmọtẹ ji bromaphiyame re, dede nẹ ọsẹ mẹ mu kpahen ayen.

Me hẹ iruo aghwoghwo na vẹ Demetrius Papageorge, oniọvo ra jẹreyọ, rọ ton ẹga rẹ Jihova phiyọ vwẹ 1913

Ọke rẹ Ofovwin rẹ Korea vwọ tonphiyọ vwẹ 1950, a da rhoma vuẹ vwẹ nẹ mi kuomaba isodje na. A da je rhoma mu uvwe kpo Fort Hayes. Ọke ra vwọ davwen ovwẹ ni nu, ọlọkpa ọvo da vuẹ vwẹ nẹ, “Wọ wanre mamọ.” Me da ta: “Oyoma, jẹ mi che kuomaba isodje-e.” Me da ta eta re si phiyọ 2 Timoti 2:3, me da vuẹ nẹ, “Mẹvwẹ isodje rẹ Kristi.” Ro vwo fotovwin kreki nu, ọ da tanẹ, “Wọ sa yanran.”

O rhe kri-i, mi de kpo omẹvwa rẹ ihwo re guọnọ kpo Bẹtẹl vwẹ ọghwẹkoko vwẹ Cincinnati, Ohio. Oniọvo Milton Henschel da vuẹ avwanre nẹ a guọnọ iniọvo eshare vwẹ Bẹtẹl. Mi de si yanran, e de se vwe. Vwẹ August 1954, me da ton iruo phiyọ vwẹ Bẹtẹl rọhẹ Brooklyn, etiyin me hepha rhi te nonẹna.

Mi ruiruo buebun vwẹ Bẹtẹl. Vwẹ ikpe buebun, me wian vwẹ ijini re de chere ame rọhẹ asan ra da teyen ẹbe vẹ ofisi sansan, me wian vwẹ asan re de ruẹ ẹbẹre sansan rẹ ijini, me je rhuẹrẹ isiaphrẹ. Me je wian vwẹ Eguan rẹ Omẹvwa rehẹ New York City.

Me vwẹrote ijini re de chere ame rọhẹ ofisi sansan vwẹ Bẹtẹl rọhẹ Brooklyn

Ọrhuẹrẹphiyotọ sansan re ruẹ vwẹ Bẹtẹl kẹ vwẹ omavwerhovwẹn. Kerẹ isese rẹ ọbe rẹ kẹdẹ kẹdẹ, uyono rẹ ọbe rẹ Uwevwin Orhẹrẹ, kugbe iruo rẹ  aghwoghwo na. Wo de roro, enana erọnvwọn ro fori nẹ orua sansan rẹ Iseri ri Jihova ru ọkieje. Orua de se se ọbe rẹ kẹdẹ kẹdẹ, ru Ẹga Orua, kpo uyono ji vwobọ vwẹ iruo aghwoghwo na kuẹgbe, ọnana cha chọn ayen uko vwo sikẹrẹ Jihova.

Mi vwo igbeyan buebun vwẹ Bẹtẹl kugbe ukoko na. Evo iniọvo ra jẹreyọ, ayen ji kpo odjuvwu re. Efa diẹ e ra jẹreyọ-ọ. Idibo rẹ Jihova eje gbare-e, ji te ihwo re ga vwẹ Bẹtẹl. Me vẹ oniọvo de vwo ẹghwọ, me davwẹngba vwọ rhuẹrẹ ota na. Mi roro kpahen oborẹ ọbe rẹ Matiu 5:23, 24 tare nẹ e ru siẹrẹ ẹghwọ da herọ. Ọ ghwa lọhọ ra vwọ tanẹ, “Wọ ghwọ-ọ,” jẹ ota nana yen rhuẹrẹ ẹghwọ buebun.

ERERE RI NẸ ẸGA MẸ RHE

Asaọkiephana, ọ pha bẹnbẹn mi vwo ruiruo aghwoghwo rẹ nẹ uwevwin kpo uwevwin fikirẹ ọghwo, ẹkẹvuọvo, me je dobọji-i. Mi yono emerha rẹ Mandarin Chinese, ọ je kẹ vwẹ omavwerhovwẹn me vwọ ta ota kẹ ihwo rẹ China. Urhiọke evo, mi phi imagazini ri te 30 yẹrẹ 40 phiyọ ada.

Mi ghwoghwo ota kẹ ihwo rẹ China vwẹ Brooklyn, New York

Mi vwo orhivwinbrura ọvo vwẹ China! Ẹdẹ ọvo, ọmọtẹ ọvo rọ shẹ emamọ da hwẹ kẹ vwẹ. Me da je hwẹ kẹ, me da vwẹ ọbe rẹ Uwevwin Orhẹrẹ vẹ Awake! rẹ Chinese vwọ kẹ. Ọ reyọ ayen, ọ da vuẹ vwẹ nẹ odẹ rọyen Katie. Nẹ ọke yena yanran, Katie da mrẹ vwẹ, kọ nabọ nene uvwe ta ota. Mi yoniro edẹ rẹ oyibo rẹ emamọ vẹ ifọn rọ shẹ na. Mi ji dje ẹkpo sansan rẹ Baibol na vwọ kẹ, ọ da je reyọ ọbe re se Bible Teach na. Udughwrẹn evo vwọ wan nu, me rha mrẹ ọmọtẹ na ọfa-a.

Emeranvwe evo vwọ wan nu, me da vwẹ imagazini vwọ kẹ ọmọtẹ ọfa rọ je shẹ erọnvwọn, ọ da reyọ ayen. Udughwrẹn rọ vwọ kpahọn, ọ da kẹ vwẹ ifonu rọyen nẹ, “Ohwo ọvo vwẹ China guọnọ ta ota kẹ wẹ.” Me da ta: “Mi riẹn ohwo vuọvo vwẹ China rẹ.” Jẹ ọ kẹ vwẹ ifonu na ghene, ọke me vwọ reyọ me da tanẹ, “Hẹlo, ọnana Robison.” Ohwo na da tanẹ, “Robby, ọnana Katie. Mi rhivwin kpo China re.” Me da ta: “China?” Katie da kpahen nẹ, “E. Robby, wo vughe ọmọtẹ rọ kẹ wẹ ifonu na? Ọyen oniọvo mẹ. Wo yono uvwe erọnvwọn buebun. Biko ji yono oniọvo mẹ na.” Me da ta: “Katie, me cha davwẹngba mẹ. Wẹ kobiruo wọ vwọ vuẹ vwẹ asan wọ hepha.” Me da ta ota kẹ oniọvo rẹ Katie na, o rhe kri-i, o de ji vrẹn nẹ orere na. E jẹ emetẹ nana yono kpobarophiyọ kpahen Jihova kasan kasan rẹ ayen hepha asaọkiephana.

Ẹgbukpe 73 yen me ga Jihova re, oma vwerhen ovwẹ nẹ mi vwobọ vwẹ ofovwi-in, me je sẹro rẹ ọyọnregan mẹ vwẹ uwodi. Oniọvo mẹ je vuẹ vwẹ nẹ ọyọnregan mẹ ọke rẹ ọsẹ avwanre vwo mu kpahen ovwẹ kẹ ayen uduefiogbere. Ukuotọ rọyen, oni mẹ vẹ iniọvo mẹ esan de bromaphiyame. Uruemu rẹ ọsẹ mẹ de ji wene, o ji kpo uyono evo o ki ghwu.

Ọ da dia ọhọre rẹ Ọghẹnẹ, me cha rhoma mrẹ ihwo rẹ orua vẹ igbeyan mẹ ri ghwuru vwẹ akpọ kpokpọ na. Vwẹ ẹro roro omavwerhovwẹn rọ cha dia ọke rẹ avwanre vẹ ihwo re vwo ẹguọnọ kpahen da cha ga Jihova bẹdẹ bẹdẹ! *— Ni eta rehẹ obotọ na.

^ e?ko. 32 Ọke re vwo muegbe rẹ ọbe nana, Corwin Robison de ghwu, ọ fuevun te oba.