Wẹ, Izrẹl, odibo mẹ, Jekọp, re me jẹreyọ na, uvwiẹ rẹ Ebraham, ugbeyan mẹ.”—AIZAYA 41:8.

UNE: 91, 22

1, 2. (a) Mavọ yen avwanre vwọ riẹn nẹ ihworakpọ sa dia igbeyan rẹ Ọghẹnẹ? (b) Die yen e che yono vwẹ uyovwinrota nana?

VWO nẹ ọke re vwo vwiẹ avwanre re te ọke rẹ ughwu, avwanre guọnọ nẹ e vwo ẹguọnọ kpahen avwanre. Ihworakpọ guọnọ oyerinkugbe rọ nabọ kpẹkpẹ re mu kpahen ẹguọnọ, ọ dia ẹguọnọ rẹ eya gbẹ eshare ọvo-o. Ẹkẹvuọvo, ẹguọnọ rẹ Jihova yen avwanre ma guọnọ kparobọ. Ihwo buebun roro nẹ e che se vwo omamọ rẹ oyerinkugbe vẹ Ọghẹnẹ-ẹ, kidie ọyen ohwo rẹ ẹwẹn ọyen ji me vwẹgba. Jẹ avwanre riẹn uyota na!

2 Baibol na vuẹ avwanre kpahen ihwo re dia igbeyan rẹ Ọghẹnẹ. Ofori nẹ a vwẹrokere udje rayen. Diesorọ? Kidie oyerinkugbe rẹ avwanre vẹ Ọghẹnẹ yen obo re ma ghanre vwẹ akpeyeren. Ọtiọyena, e jẹ e yono kpahen udje rẹ Ebraham. (Se Jems 2:23.) Mavọ yen ọ vwọ dia ugbeyan rẹ Ọghẹnẹ? E mu oyerinkugbe rẹ Ebraham  vẹ Ọghẹnẹ vwori kpahen esegbuyota, kọyensorọ e vwo se nẹ, “ọsẹ rẹ ayen ejobi ri segbuyota.” (Rom 4:11) Wo che vwo yono kpahen udje rọyen na, nọ oma wẹn, ‘Mavọ me sa vwọ vwẹrokere esegbuyota rẹ Ebraham rere me vwọ bọn oyerinkugbe mẹ vẹ Jihova gan?’

MAVỌ YEN EBRAHAM RU DIA UGBEYAN RẸ JIHOVA?

3, 4. ((a) Die wo rorori nẹ ọ sa dia ọdavwini rọ ma rho rẹ Ebraham rhiẹromrẹ? (b) Diesorọ Ebraham vwo vwo owenvwe rọ vwọ vwẹ Aizik vwo ze izobo?

3 Vwẹ ẹro roro ọke rẹ Ebraham rọhẹ omarẹ ẹgbukpe 125 vwo yerẹn ugbenu ọvo ememerha. [1] (Ni eta rẹ odjefiotọ.) Ọmọ rọyen, Aizik, rọhẹ omarẹ ẹgbukpe 25 yan nene. Aizik mu irhe, Ebraham da rha yọnrọn aphia vẹ utuerhanre. Oyan nana yen ma bẹn vwẹ akpeyeren rẹ Ebraham. Ọ diẹ fikirẹ ọghwo-o, kidie oma rọyen je gan. Ukperẹ ọtiọyen, oyan na bẹnrẹ mamọ kidie Jihova vuẹrẹ nẹ ọ vwẹ ọmọ rọyen vwo ze izobo!—Jẹnẹsis 22:1-8.

4 Ọ sa dianẹ ọnana yen ọdavwini rọ ma rho kparobọ rẹ Ebraham rhiẹromrẹ. Ihwo evo ke tanẹ ọyen umwemwu rẹ Ọghẹnẹ vwọ vuẹ Ebraham nẹ ọ reyọ ọmọ rọyen vwo ze izobo. Efa ke rha tanẹ Ebraham vwo ẹguọnọ kpahen ọmọ rọyen na-a, kọyensorọ, ọ vwọ rhọnvwe nẹ ọ cha reyọ vwo ze izobo. Ihwo ta oka rẹ eta tiọyen kidie ayen vwo esegbuyota-a, ayen je riẹn oborẹ uvi rẹ esegbuyota mudiaphiyọ yẹrẹ obo ro se mu ohwo vwo ru-u. (1 Kọrẹnt 2:14-16) Ẹkẹvuọvo, Ebraham nyupho rẹ Ọghẹnẹ kidie o vwo uvi rẹ esegbuyota. Ọ riẹnre nẹ Jihova cha sa vuẹ nẹ o ru orọnvwọn rọ sa so ọmiaovwẹ ri bẹdẹ vwọ kẹ-ẹ. Ebraham riẹnre nẹ o de nyupho rẹ Jihova, o che bruba kẹ vẹ ọmọ rọyen. Die yen Ebraham guọnọre o se vwo vwo esegbuyota ọgangan? Ọ guọnọ erianriẹn vẹ aghwanre re yono nẹ oborerhiẹromrẹ.

5. Idjerhe vọ yen ọ sa vwọ dianẹ Ebraham vwo yono kpahen Jihova? Mavọ yen erianriẹn nana djobọte wan?

 5 Erianriẹn. Orere rẹ Ur yen Ebraham dia ghwanre. Ihwo rehẹ asan na ga edjọ, ọtiọyen ji te ọsẹ rọyen. (Joshua 24:2) Kẹ mavọ yen Ebraham vwọ riẹn kpahen Jihova? Baibol na djere nẹ Shem rọ dia ọmọ rẹ Noa, ọyen omoni rẹ Ebraham. Ọ diarọ duvwun ọke rẹ Ebraham vwo te ẹgbukpe 150. Shem ọyen ohwo ro vwo esegbuyota ọgangan, ọtiọyena ọ sa dianẹ ọ vuẹ imoni rọyen kpahen Jihova. Ọ sa dianẹ idjerhe nana yen Ebraham vwọ riẹn kpahen Jihova. Oborẹ Ebraham yonori nẹrhẹ o vwo ẹguọnọ kpahen Jihova, erianriẹn nana chọn rọ uko vwọ bọn esegbuyota rọyen gan.

6, 7. Mavọ yen oborẹ Ebraham rhiẹromrẹ bọn esegbuyota rọyen gan?

6 Obo ro rhiẹromrẹ. Mavọ yen Ebraham vwo vwo aghwanre rọ bọn esegbuyota rọyen gan? Ihwo evo ke tanẹ iroro djobọte ohwo, o mi rhe mu ohwo na vwo ru orọnvwọn. Oborẹ Ebraham yonori djobọte ubiudu rọyen, ọ da nẹrhẹ o muọghọ okokodo kẹ “Ọrovwohwo Ọghẹnẹ ro Me Kpenu nure, ọ rọ ma odjuvwu vẹ akpọ.” (Jẹnẹsis 14:22) Baibol na se ohwo ro muọghọ okokodo tiọna, ohwo rọ “djẹ oshọ” rẹ Ọghẹnẹ. (Hibru 5:7) Re se vwo nene Ọghẹnẹ vwo omamọ oyerinkugbe, ofori nẹ e vwo oshọẹdjẹ rọyen. (Une Rẹ Ejiro 25:14) Uruemu nana yen mu Ebraham vwo nyupho rẹ Jihova.

7 Ọghẹnẹ vuẹ Ebraham vẹ Sera nẹ ayen vrẹn nẹ uwevwin rayen vwẹ orere rẹ Ur vwo kpo ẹkuotọ ọrhorha. Ayen kpakore, ayen ke je cha dia utughe vwẹ akpeyeren rayen ejobi. O brorhiẹn ro vwo nyupho rẹ Jihova dedevwo nẹ ọ riẹnre nẹ imuoshọ cha dia. Ọghẹnẹ bruba kẹ, je chochọ rọyen kidie o nyupho rọyen. Kerẹ udje, ọ vrẹ obọvo rẹ Jihova sẹro rẹ Ebraham vẹ Sera ọke re vwo mu aye rọyen ro vwo erhuvwu mie, arhọ rọyen je vwọ hẹ ẹdia rẹ imuoshọ. (Jẹnẹsis 12:10-20; 20:2-7, 10-12, 17, 18) Obo ro rhiẹromrẹ na nẹrhẹ esegbuyota rọyen gan.

8. Mavọ yen e se vwo vwo erianriẹn vẹ aghwanre rọ cha bọn oyerinkugbe avwanre vẹ Jihova gan?

8 Avwanre sa dia igbeyan rẹ Jihova? E, aphro herọ-ọ! Kerẹ Ebraham, ofori nẹ e yono kpahen Jihova.  Avwanre se ji vwo erianriẹn vẹ aghwanre ra guọnọre. Nonẹna, evuẹ rẹ avwanre vwori bun vrẹ ọ rẹ Ebraham. (Daniẹl 12:4; Rom 11:33) Baibol na vọnre vẹ erianriẹn rẹ Ohwo “rọ ma odjuvwu vẹ akpọ.” Erianriẹn nana mu avwanre vwo vwo ẹguọnọ rẹ Jihova, ọ je chọn avwanre uko vwo muọghọ okokodo vwọ kẹ. Ẹguọnọ vẹ ọghọ kọyen mu avwanre vwo nyupho rọyen. Ọtiọyena, kẹ avwanre mrẹ ochọnvwe vẹ ebruphiyọ rọyen, ọnana kẹ avwanre aghwanre rọ bọn esegbuyota avwanre gan. A da ga Jihova vọnvọn, ka cha mrẹ evunvọnvwẹ, ufuoma kugbe aghọghọ. (Une Rẹ Ejiro 34:8; Isẹ 10:22) Erianriẹn vẹ aghwanre rẹ avwanre vwo buẹnphiyọ yen, oyerinkugbe rẹ avwanre vẹ ọyen kọ cha ganphiyọ.

OBORẸ EBRAHAM SA VWỌ SẸRO RẸ OYERINKUGBE RỌYEN VẸ JIHOVA

9, 10. (a) Die yen a guọnọre e ki se vwo omamọ rẹ oyerinkugbe? (b) Die yen djerephia nẹ Ebraham ni oyerinkugbe rọyen vẹ Ọghẹnẹ ghanghanre, o de ji ruo gan?

9 Omamọ rẹ oyerinkugbe pha kerẹ orọnvwọn rọ pha ghanghanre. (Se Isẹ 17:17.) Ọ fẹnẹ orọnvwọn ọghanghanre ra vwọ rhuẹrẹ uwevwin, ọ pha kerẹ ododo ro vwo erhuvwu rọ guọnọ ame vẹ ẹroevwote ọ sa vwọ rho. Ebraham vwẹ ẹro ọghanghanre vwo ni oyerinkugbe rọyen vẹ Ọghẹnẹ, ọtiọyena, kọ sẹro rọyen. Mavọ yen o se vwo ruo?

10 Ebraham djoshọ rẹ Ọghẹnẹ, o ji nyupho rọyen ọkieje. Kerẹ udje, rẹ ọ vẹ orua kugbe idibo rọyen vwo kpo Kenan, ọkieje yen o vwo nene odjekẹ rẹ Jihova vwẹ orhiẹn-ebro rọyen eje. Ẹgbukpe ọvo tavwen e ki vwiẹ Aizik, ọke rẹ Ebraham vwọ hẹ ẹgbukpe 99, Jihova da vuẹ nẹ ọ yanvwe eshare rehẹ uwevwin rọyen eje. O vwo ẹwẹn ivivẹ kpahen oborẹ Jihova vuẹrẹ na, gbanẹ o hworo ona rọ vwọ sen iji rẹ Ọghẹnẹ vwọ kẹ na? Ẹjo, ọ vwẹroso Jihova, o de ru ọtiọyen “ẹdẹ yena ọvuọvo na.”—Jẹnẹsis 17:10-14, 23.

11. Diesorọ ẹwẹn rẹ Ebraham vwo kpokpo kpahen Sodọm vẹ Gomora, kẹ mavọ yen Jihova chọn rọ uko?

11 Oyerinkugbe rẹ Ebraham vẹ Ọghẹnẹ da rhe gan kidie o nyupho rẹ Jihova ọkieje tobọ vwẹ erọnvwọn itete. O niro nẹ ọ sa vuẹ kemu kemu, ọ tobọ nọ Jihova enọ ri kpokpo ẹwẹn rọyen. Kerẹ udje, ọke rẹ Jihova vwọ tanẹ ọ cha ghwọrọ orere rẹ Sodọm vẹ Gomora, ọnana de kpokpo ẹwẹn rẹ Ebraham. Diesorọ? Oshọ muo nẹ a cha ghwọrọ omamọ rẹ ihwo vẹ erharhe kugbe. Ọ sa dianẹ o roro kpahen ọmọ-oniọvo rọyen re se Lọt vẹ orua rọyen re dia Sodọm. Ebraham vwẹroso Jihova, “Obrorhiẹ rẹ akpọ na,” ọtiọyena, kọ vuẹrẹ kpahen obo ri kpokpo ẹwẹn rọyen. Jihova vwo odirin rẹ ugbeyan  rọyen, o de dje kẹ nẹ ọyen Ohwo vẹ arodọnvwẹ. Jihova djere phephẹn nẹ o che sivwin omamọ rẹ ihwo vwẹ ọke rẹ oghwọrọ na.—Jẹnẹsis 18:22-33.

12, 13. (a) Idjerhe vọ yen erianriẹn vẹ oborẹ Ebraham rhiẹromrẹ chọn rọ uko? (b) Die yen djerephia nẹ Ebraham vwẹroso Jihova?

12 Vwọrẹ uyota, erianriẹn vẹ oborẹ Ebraham rhiẹromrẹ, chọn rọ uko vwo ru oyerinkugbe rọyen vẹ Jihova gan. Kọyensorọ, ọke rẹ Jihova vwọ vuẹ nẹ ọ reyọ ọmọ rọyen vwo ze izobo, ọ riẹnre nẹ ọ sa vwẹroso Jihova kidie ọyen ohwo vẹ odirin, arodọnvwẹ, rọ je sẹro rẹ ihwo rọyen. Ọ nabọ vwo imuẹro nẹ Jihova cha sa dia orumwemwu kpregede-e! Diesorọ a vwọ ta ọtiọyen?

13 Tavwen Ebraham ke yanjẹ idibo rọyen vwo, ọ da vuẹ ayen: “We mudia etinẹ kẹrẹ ẹkẹtẹkẹtẹ na; mẹvwẹ vẹ ọmọ na ke yanran kpo oboyi kpo ẹga rere avwanre ki rhivwi bru ovwan rhe.” (Jẹnẹsis 22:5) Die yen ota nana mudiaphiyọ? Rọ vwọ riẹn nẹ ọ ra vwẹ Aizik vwo ze izobo na, kẹ o gun efian kẹ idibo rọyen nẹ Aizik che rhivwin rhe? Ẹjo. Baibol na tare nẹ Ebraham riẹnre nẹ Jihova sa kpare Aizik nẹ ughwu. (Se Hibru 11:19.) Ebraham riẹnre nẹ Jihova yen vwẹ ẹgba vwọ kẹ vẹ Sera rẹ ayen se vwo vwiẹ ọmọ na dede nẹ ayen ghwore. (Hibru 11:11, 12, 18) Ọtiọyena, ọ riẹnre nẹ o vwo orọnvwọn rọ bẹn Jihova eruo-o. Ebraham riẹn obo re cha phia ẹdẹ yena-a. Jẹ o vwo esegbuyota nẹ Jihova sa kpare ọmọ rọyen nẹ ughwu rere ive rọyen eje se vwo rugba. Kọyensorọ e vwo se Ebraham “ọsẹ rẹ ayen ejobi ri segbuyota.”

14. Egbabọse vọ yen wo hirharokuẹ vwẹ ẹga rẹ Jihova, kẹ mavọ yen udje rẹ Ebraham sa vwọ chọn wẹ uko?

14 Nonẹna, Jihova guọnọre nẹ a vwẹ emọ avwanre vwo ze izobo-o, ẹkẹvuọvo ọ guọnọre nẹ e nyupho rọyen. Ọkiọvo, ọ sa dianẹ avwanre ghwe vwo ẹruọ rẹ oboresorọ a vwọ yan nene iji rọye-en, yẹrẹ e se no nẹ e gan nọ. Ọ dia ọtiọyen kẹ wẹ jovwo re? Iruo aghwoghwo na pha gangan vwọ kẹ ihwo evo. Ọ sa dianẹ oma vo ayen, kẹ ayen mrẹ bẹnbẹn rẹ ayen vwọ ta ota kẹ erhorha. Oshọ mu efa nẹ a cha vwẹ ayen jehwẹ vwẹ isukuru yẹrẹ iruo. (Eyanno 23:2; 1 Tẹsalonaika 2:2) A da vuẹ wẹ nẹ wo ru orọnvwọn rọ pha bẹnbẹn, roro kpahen esegbuyota vẹ uduefiogbere rẹ Ebraham. Avwanre de roro kpahen eya vẹ eshare re fuevun vwẹ Baibol na, o che mu avwanre vwọ vwẹrokere ayen ji sikẹrẹ Jihova, rọ dia Ugbeyan avwanre.—Hibru 12:1, 2.

OYERINKUGBE RỌ GHWẸ EBRUPHIYỌ CHA

15. Diesorọ a sa vwọ tanẹ Ebraham viẹ diekpọvwẹ-ẹ kidie nẹ o nyupho rẹ Jihova?

15 Ebraham viẹ diekpọvwẹ kidie nẹ o nyupho rẹ Jihova? Baibol na tare nẹ,  “o de ghwu ọ ghworo hẹrẹn hẹrẹn, ọmanre rọ mrẹ ikpe buebu.” (Jẹnẹsis 25:8) Ọke rọ vwọ hẹ ẹgbukpe 175, oma vwerhen Ebraham kpahen akpeyeren rọyen. Diesorọ? Kidie oyerinkugbe rọyen vẹ Jihova yen ma ghanre vwọ kẹ. Ẹkẹvuọvo, Baibol vwọ tanẹ Ebraham ọyen “ọmanre rọ mrẹ ikpe buebu” na, ọ diẹ a vwerọ tanẹ o rhe vwo owenvwe rọ vwọ dia vwẹ akpọ rọ cha na-a.

16. Die yen cha kẹ Ebraham omavwerhovwẹn vwẹ Iparadaisi na?

16 Baibol na tare nẹ Ebraham “rhẹro rẹ orere ro jẹ uchivwo evwo, ohwo rọ bọnrọ kugbe ọ rọ fanrọ kẹ Ọghẹnẹ.” (Hibru 11:10) O vwo imuẹro nẹ ọ cha mrẹ orere na ẹdẹ ọvo, rọ dia Uvie rẹ Ọghẹnẹ, ro che sun akpọ na. Ọ cha ghene mrẹ! Vwẹ ẹro roro oborẹ oma cha vwerhen Ebraham te rọ cha vwọ dia iparadaisi, ji ru oyerinkugbe rọyen vẹ Jihova gan. Oma cha vwerhọn rọ cha vwọ riẹn nẹ esegbuyota rọyen vwẹ ukẹcha kẹ idibo rẹ Ọghẹnẹ vwẹ ikpe buebun! Ọke yena kọ cha riẹn nẹ izobo rọ guọnọ ze vwẹ Ugbenu rẹ Moriah na mudiaphiyọ orọnvwọn rọ pha rhuarho. (Hibru 11:19) Kọ cha riẹn nẹ ọmiaovwẹ ro rhiẹromrẹ ọke rọ cha vwọ vwẹ Aizik ze izobo chọn ihwo buebun uko vwọ riẹn ọmiaovwẹ rẹ Jihova ji rhiẹromrẹ ọke rọ vwọ vwẹ Ọmọ rọyen, Jesu Kristi vwo ru izobo rẹ ọtanhirhe. (Jọn 3:16) Udje rẹ Ebraham na chọn avwanre uko vwo vwo ọdavwaro kpahen izobo rẹ ọtanhirhe na, rọ dia odjephia rẹ ẹguọnọ rọ ma rho kparobọ!

17. Die yen orhiẹn-ebro wẹn asaọkiephana, kẹ die yen e che yono vwẹ uyovwinrota rọ vwọ kpahen ọnana?

17 E jẹ avwanre eje brorhiẹn ra vwọ vwẹrokere esegbuyota rẹ Ebraham. Avwanre je guọnọ erianriẹn vẹ aghwanre. A cha mrẹ ebruphiyọ vẹ ochọnvwe rẹ Jihova siẹrẹ e de yono kpahọn ji nyupho rọyen ọkieje. (Se Hibru 6:10-12.) E jẹ Jihova dia Ugbeyan rẹ avwanre bẹdẹ bẹdẹ! Vwẹ uyovwinrota rọ vwọ kpahen ọnana, e che yono kpahen igbeyan rẹ Ọghẹnẹ erha re je fuevun.

^ [1] (ẹkorota 3) Ebram vẹ Serai, ọyen odẹ re vwo se Ebraham vẹ Sera ọke ẹsosuọ. Ẹkẹvuọvo, vwevunrẹ uyovwinrota nana, avwanre cha vwẹ odẹ rẹ Jihova vwo se ayen ukuko na vwo ruiruo.