Vwẹ ẹro keri otu re wan oma rẹ esegbuyota kugbe erhiori reuku rẹ ive na.”—HIBRU 6:12.

UNE: 86, 54

1, 2. Egbabọse vọ yen Jẹfta vẹ ọmọtẹ rọyen hirharoku?

ỌMỌTẸ ọvo djẹ bru ọsẹ rọyen ra. Oma vwerhenrọ mamọ ọ vwọ mrẹ nẹ ọsẹ rọyen rhivwin nẹ ofovwin rhe gbẹrhẹnẹdẹ. Ophikparobọ rẹ ọsẹ rọyen na da nẹrhẹ ọ suine ji gbeha. Ẹkẹvuọvo, oborẹ ọsẹ rọyen ruru, rọ je ta de gbe unu mamọ. Ọ bẹrẹ iwun rọyen, ọ da viẹ: “Who, ọmọtẹ mẹ! Wọ vwo vwẹ kpotọ gangan.” Ọ da vuẹ ọmọ rọyen nẹ, ọyen vuve ro che wene akpọ rẹ ọmọ na bẹdẹ. Uve na mudiaphiyọ nẹ ọmọ na cha rọvwọn ji vwiẹ-ẹ. Ugege yena, ọmọtẹ na da vwẹ omamọ ẹkpahọnphiyọ vwọ kẹ ọsẹ na nẹ o ru obo ro ve kẹ Jihova na. Obo rọ tare na dje ẹroẹvwọsuọ rọyen phia nẹ Jihova guọnọ erhuvwu rọyen. (Iguẹdjọ 11:34-37) Esegbuyota rẹ ọmọ na nẹrhẹ oma vwerhen ọsẹ na mamọ kidie ọ riẹnre nẹ orhiẹn rẹ ọmọ na cha nẹrhẹ oma vwerhen Jihova.

 2 Jẹfta vẹ ọmọtẹ rọyen nabọ vwẹroso Jihova vẹ obo ro ruẹ erọnvwọn wan. Ayen fuevun tobọ vwẹ ọke rọ ghwa lọhọ vwọ kẹ aye-en. Otoro oborẹ ayen vwo ze-e, ayen guọnọre nẹ Jihova rhiabọreyọ ayen.

3. Diesorọ udje rẹ Jẹfta vẹ ọmọ rọyen sa vwọ chọn avwanre uko nonẹna?

3 Ọ ghwa lọhọ ra vwọ fuevun kẹ Jihova ọkieje-e. Ofori nẹ a “họnre chochọ rẹ esegbuyota” rẹ avwanre. (Jud 3) E se vwo ru ọtiọyen, e jẹ e yono oborẹ Jẹfta vẹ ọmọtẹ rọyen chirakon rẹ egbabọse rẹ akpeyeren. Die yen chọn ayen uko vwọ fuevun kẹ Jihova ọkieje?

FUEVUN ỌKIEJE DEDE NẸ AKPỌ NA PHA BRABRA

4, 5. (a) Iji vọ yen Jihova vwọ kẹ emọ rẹ Izrẹl ọke rẹ ayen vwọ ro Otọ rẹ Uve na? (b) Kirobo rẹ Une Rẹ Ejiro 106 tare, die yen phia kẹ emọ rẹ Izrẹl fikirẹ jẹmenyo rayen?

4 Kẹdẹ kẹdẹ yen Jẹfta vẹ ọmọ rọyen vwọ mrẹ obo ri nẹ obuko rẹ jẹmenyo rẹ emọ rẹ Izrẹl rhe. Omarẹ ikpe 300 a ke rhe mrẹ ọke yena, Jihova vwẹ iji kẹ emọ rẹ Izrẹl nẹ ayen hwe ihwo re ga ẹga rẹ efian vwẹ Otọ rẹ Uve na, ẹkẹvuọvo, ayen nyupho rọye-en. (Urhi Rivẹ 7:1-4) Buebun rẹ emọ rẹ Izrẹl na da rhe vwẹrokere ihwo rẹ Kenan ri gbe ọfanrhiẹn re je ga eghẹnẹ rẹ efian.—Se Une Rẹ Ejiro 106:34-39.

5 Fikirẹ jẹmenyo rayen, Jihova rha sẹro rayen vwo nẹ abọ rẹ ivwighrẹn raye-en. (Iguẹdjọ 2:1-3, 11-15; Une Rẹ Ejiro 106:40-43) Ọ cha lọhọ vwọ kẹ erua ri vwo ẹguọnọ rẹ Jihova, re vwọ fuevun ọke yena-a. Ẹkẹvuọvo, Baibol na tare nẹ o vwo ihwo re fuevun, kerẹ Jẹfta vẹ ọmọ rọyen, Elkanah, Hanah, vẹ Samuẹl. Ayen muegbe rẹ ayen vwo ru obo re vwerhen Jihova oma.—1 Samuẹl 1:20-28; 2:26.

6. Oka rẹ iruemu vọ yen a mrẹ nonẹna, kẹ die yen ofori nẹ e ru?

6 Nonẹna, ihwo vwo iruemu vẹ iroro re họhọ ọ rẹ ihwo rẹ Kenan. Ayen mu akpeyeren rayen kpahen ọfanrhiẹn, ozighi, kugbe igho. Jẹ Jihova kẹ avwanre orhọn-esio ọgangan. Ọ guọnọ sẹro rẹ avwanre vwo nẹ iruemu rẹ akpọ na kirobo rọ guọnọ ru kẹ emọ rẹ Izrẹl jovwo. Avwanre che yono vwo nẹ echobọ rayen na? (1 Kọrẹnt 10:6-11) Ofori nẹ a kẹnoma kẹ iroro rẹ akpọ na kare kare. (Rom 12:2) A cha davwẹngba vwo ru ọtiọyen?

JẸFTA FUEVUN DEDE NẸ ẸWẸN RỌYEN KUỌNRE

7. (a) Die yen iniọvo rẹ Jẹfta ruro? (b) Die yen Jẹfta ruru?

7 Vwẹ ọke rẹ Jẹfta, ihwo rẹ Filistia vẹ Ammọn shenyẹ emọ rẹ Izrẹl kidie ayen nyupho rẹ Jihova-a. (Iguẹdjọ 10:7, 8) Vwọba, Jẹfta mrẹ ebẹnbẹn efa vwo nẹ abọ rẹ iniọvo rọyen vẹ ekpako rẹ Izrẹl rhe. Fikirẹ omaẹriọ vẹ utuoma, iniọvo na da djẹ nẹ otọ rọyen. (Iguẹdjọ 11:1-3) Jẹfta vwẹ uphẹn kẹ orharhe rẹ uruemu  rayen na nẹ o djobọte-e. Mavọ yen e ru riẹn? Kidie ọke rẹ ekpako na vwọ rẹ nẹ ọ chọn ayen uko, ọ da vwẹ ukẹcha kẹ ayen. (Iguẹdjọ 11:4-11) Die yen mu Jẹfta vwo ru ọtiọyen?

8, 9. (a) Irhi vọ vwẹ Urhi rẹ Mosis na yen chọn Jẹfta uko? (b) Die yen ma ghanre vwọ kẹ Jẹfta?

8 Jẹfta, ọgbofovwin rode, ọ nabọ riẹn ikuegbe rẹ Izrẹl kugbe Urhi rẹ Mosis. Oborẹ Jihova nene ihwo Rọyen yerin nẹrhẹ ọ riẹn obo ri yovwirin vẹ obo re brare vwẹ ubiẹro rẹ Ọghẹnẹ. (Iguẹdjọ 11:12-27) Erianriẹn nana chọn rọ uko vwo bru omamọ orhiẹn vwẹ akpeyeren. Ọ riẹn ẹwẹn rẹ Jihova kpahen ophu vẹ orukeri, kugbe oborẹ Ọghẹnẹ guọnọre nẹ ihwo Rọyen vwo ẹguọnọ kpahen ohwohwo wan. Urhi na ji yono obo ro ru kẹ ihwo efa, tobọ ji te ihwo ri vwo utuoma kpahọn.—Se Eyanno 23:5; Livitikọs 19:17, 18.

9 Ọkiọvo, udje rẹ Josẹf yen chọn Jẹfta uko. Ọ sa dianẹ o yono kpahen oborẹ Josẹf dje ẹguọnọ kẹ iniọvo rọyen dede nẹ ayen vwo utuoma kpahọn. (Jẹnẹsis 37:4; 45:4, 5) Ọ da nẹrhẹ o ru obo re vwerhen Jihova oma. Oborẹ iniọvo rẹ Jẹfta ruru na ghene da. Ẹkẹvuọvo, ọ vwọ chochọ rẹ odẹ rẹ Jihova vẹ ihwo rọyen yen ma rho kẹ vrẹ ọdavwẹ romobọ rọyen. (Iguẹdjọ 11:9) O brorhiẹn rọ vwọ fuevun kẹ Jihova. Uruemu nana da hwarhiẹ ebruphiyọ rẹ Jihova vwọ kẹ vẹ ihwo rẹ Izrẹl.—Hibru 11:32, 33.

E jẹ ophu nẹrhẹ avwanre dobọ rẹ ẹga rẹ Jihova jẹ-ẹ

10. Mavọ yen odjekẹ rẹ Ọghẹnẹ sa vwọ chọn avwanre uko vwo vwo uruemu rẹ Onenikristi nonẹna?

10 Avwanre che yono nẹ udje rẹ Jẹfta na? Die yen e che ru siẹrẹ iniọvo avwanre de gbe avwanre ku yẹrẹ ru obo re nẹrhẹ ẹwẹn avwanre kuọrọn? E jẹ ophu nẹrhẹ avwanre dobọ rẹ ẹga rẹ Jihova jẹ-ẹ. Wọ kpairoro vrẹ uyono ẹra yẹrẹ ukoko na-a. E jẹ a vwẹrokere Jẹfta, ji nyupho rẹ Jihova. Ọnana cha nẹrhẹ avwanre phi ebẹnbẹn na kparobọ, a me je dia omamọ rẹ udje.—Rom 12:20, 21; Kọlose 3:13.

IZOBO RO NẸ OTỌ RẸ ẸWẸN RHE DJE ESEGBUYOTA PHIA

11, 12. Uve vọ yen Jẹfta veri, kẹ die ọnana churobọ si?

11 Jẹfta riẹnre nẹ ọ guọnọ ukẹcha rẹ Ọghẹnẹ o ki se sivwin emọ rẹ Izrẹl vwo nẹ abọ rẹ ihwo rẹ Ammọn. O ve kẹ Jihova nẹ o de phikparobọ, kọ vwẹ ohwo rẹsosuọ rọ djẹ nẹ uwevwin rọyen rhe rhi dede, vwo ze “izobo rẹ ẹtorhẹ” vwọ kẹ. (Iguẹdjọ 11:30, 31) Die ọnana mudiaphiyọ?

 12 Ọ diẹ Jẹfta cha torhẹ ohworakpọ vwo ze izobo-o, kidie Jihova vwo utuoma kpahen emu tiọyena. (Urhi Rivẹ 18:9, 10) Vwẹ Urhi rẹ Mosis, izobo rẹ ẹtorhẹ ọyen okẹ ọghanghanre rẹ ohwo vwọ kẹ Jihova kare kare. Ọtiọyena, ohwo rẹ Jẹfta cha vwọ kẹ Jihova na, cha ga vwẹ uwevwin rẹ ẹga na rhi te ẹdẹ ughwu rọyen. Jihova kerhọ kẹ Jẹfta, ọ da chọn uko vwo phikparobọ. (Iguẹdjọ 11:32, 33) Jẹ ono kọyen Jẹfta cha vwọ kẹ Jihova?

13, 14. Die yen eta rẹ Jẹfta rehẹ Iguẹdjọ 11:35 djephia kpahen esegbuyota rọyen?

13 Roro kpahen udje ra vwọ ton uyono na phiyọ. Ọke rẹ Jẹfta vwo rhivwin nẹ ofovwin na cha, ohwo ẹsosuọ ro rhi dede yen ọmọtẹ rọyen, ọmọ vuọvo ro vwiẹri! Jẹfta che ru obo ro veri na? Ọ cha vwẹ ọmọtẹ rọyen vwọ kẹ Jihova nẹ ọ ga vwẹ uwevwin rẹ ẹga na rhi te ẹdẹ ughwu rọyen?

14 Irhi rẹ Ọghẹnẹ yen je chọn Jẹfta uko vwo brorhiẹn ro shephiyọ. Karophiyọ eta rehẹ Eyanno 23:19, rọ vuẹ ihwo rẹ Ọghẹnẹ nẹ ayen vwẹ obo ri me yovwin vwọ kẹ Jihova. Urhi na je tanẹ ohwo de vuve kẹ Jihova, “e jọ pha unu-u; ko ru kirobo ri nuro unu rhe na.” (Ukeri 30:2) Kerẹ Hanah rọ fuevun, Jẹfta ru nene uve rọyen na, dede nẹ ọ riẹn obo ro mudiaphiyọ vwọ kẹ vẹ ọmọtẹ rọyen. Ọ sa dianẹ ọke vuọvo yen Hanah vẹ Jẹfta vwo yerin. Ọmọtẹ na cha rọvwọn ji vwiẹ kakaka-a, kidie ọ cha ga vwẹ uwevwin  rẹ ẹga na. Ohwo rọ cha yọnrọn uvwiẹ rẹ Jẹfta, je reuku rẹ otọ rọyen rha herọ-ọ. (Iguẹdjọ 11:34) Dedena, Jẹfta da ta: “Mi rhie unu mẹ kẹ Ọrovwohwo na nure, me gbe sa rhẹriẹ ive mẹ-ẹ.” (Iguẹdjọ 11:35) Jihova rhiabọreyọ izobo rẹ Jẹfta na, o de bruba kẹ. Ọ da dia owẹ, wọ cha fuevun kerẹ Jẹfta?

15. Die yen buebun avwanre veri, kẹ mavọ yen e se vwo ru obo re veri?

15 Ọke rẹ avwanre vwọ vwomakpahotọ kẹ Jihova, e veri nẹ e che ru ọhọre rọyen, otoro obo re phiare-e. Avwanre riẹnre nẹ ọ cha lọhọ ọkieje-e. Jẹ die yen e che ru a da vuẹ avwanre nẹ e ru oborẹ avwanre guọnọ ru-u? E de fiudugberi, ji nyupho rẹ Ọghẹnẹ, ke se ru obo re veri. Ọkiọvo izobo rẹ avwanre sa nẹrhẹ e fiabọ rẹ erọnvwọn evo, jẹ ebruba rẹ Jihova yen ma rho. (Malakae 3:10) Kẹ ọmọ rẹ Jẹfta vwo? Die yen o ruru ro vwo nyo uve rẹ ọsẹ rọyen?

Mavọ yen e se vwo dje esegbuyota phia kerẹ ọ rẹ Jẹfta vẹ ọmọtẹ rọyen? (Ni ẹkoreta 16, 17)

16. Die yen ọmọtẹ rẹ Jẹfta ru kpahen uve rẹ ọsẹ rọyen? (Ni uhoho rẹsosuọ na.)

16 Uve rẹ Jẹfta fẹnẹ ọ rẹ Hanah. Hanah veri nẹ ọmọ rọyen, Samuẹl cha ga vwẹ uwevwin rẹ ẹga na kerẹ Ojigbo. (1 Samuẹl 1:11) Ojigbo vwo uphẹn rọ vwọ rọvwọn ji vwo orua. Ẹkẹvuọvo, a vwẹ ọmọtẹ rẹ Jẹfta vwo ze “izobo rẹ ẹtorhẹ,” ọtiọyena ọ rha cha dia aye-uwevwin yẹrẹ oni-i. (Iguẹdjọ 11:37-40) Nabọ roro! Ọ rha sa rọvwọn omamọ rẹ ọshare kidie ọsẹ rọyen osun vwẹ Izrẹl. Jẹ asaọkiephana, kọ cha ga kerẹ odibo vwẹ uwevwin ẹga na. Die yen o ruru? O djephia nẹ ẹga rẹ Jihova yen emu ẹsosuọ vwẹ akpeyeren rọyen, rọ vwọ vuẹ ọsẹ rọyen: “Gbe ru vwe kirobo wọ vwẹ unu wẹn ta nure.” (Iguẹdjọ 11:36) O gbobọnyẹ urhurusivwe rọ vwọ rọvwọn ji vwiẹ, fikirẹ ẹga rẹ Jihova. Mavọ a sa vwọ vwẹrokere ẹwẹn rẹ omaevwoze rọyen na?

Ọmọtẹ rẹ Jẹfta gbobọnyẹ urhurusivwe rọ vwọ rọvwọn ji vwiẹ, fikirẹ ẹga rẹ Jihova

17. (a) Idjerhe vọ yen a sa vwọ vwẹrokere esegbuyota rẹ Jẹfta vẹ ọmọtẹ rọyen? (b) Mavọ yen eta rẹ Hibru 6:10-12 se vwo mu avwanre vwo vwo uruemu rẹ omaevwoze?

 17 Inenikristi buebun nonẹna ji brorhiẹn nẹ ayen cha rọvwọ-ọn yẹrẹ vwiẹ-ẹ. Diesorọ? Kidie ayen guọnọ tẹnrovi ẹga rẹ Jihova. Vwọba, buebun rẹ ihwo re kpakore gbobọnyẹ ọke rẹ ayen ghwọrọ vẹ emọ kugbe ivwrọmọ rayen rere ayen sa vwọ vwẹ ọke vẹ ẹgba rayen vwọ ga Jihova. Evo ruiruo rẹ ebabọn, efa kpo Isikuru rẹ Ihwo ri Ghwoghwo Uvie Na, ayen ji kpo ukoko ra da guọnọ ighwoghwota. Efa vwo ọrhuẹrẹphiyotọ ayen vwo phiba ọke rẹ ayen ghwọrọ phiyọ aghwoghwo na vwẹ ọke rẹ Ẹkarophiyọ na. Jihova cha sa kpairoro vrẹ omaevwoze rẹ ihwo rọye-en. (Se Hibru 6:10-12.) Kẹ owẹ vwo? Wọ sa vwẹ erọnvwọn evo vwo ze wọ vwọ ga Jihova vọnvọn?

DIE YEN E YONORI?

18, 19. Die yen udje rẹ Jẹfta vẹ ọmọtẹ rọyen yono avwanre, kẹ mavọ a sa vwọ vwẹrokere ayen?

18 Die yen chọn Jẹfta uko vwo phi egbabọse rọyen kparobọ? O nene odjekẹ rẹ Jihova vwẹ akpeyeren rọyen. Ọ vwẹ uphẹn kẹ uruemu rẹ ihwo re dia kẹrẹ nẹ i djobọte-e. Jẹfta fuevun dede nẹ ihwo nẹrhẹ ẹwẹn rọyen kuọrọn. Jihova bruba kẹ Jẹfta vẹ ọmọ rọyen fikirẹ omaevwoze rayen, ọ da je vwẹ ayen ihwo ivẹ na vwo titi ẹga rẹ uyota. Jẹfta vẹ ọmọtẹ rọyen fuevun kẹ Jihova dede nẹ ihwo re riariẹ ayen ruẹ erọnvwọn ebrabra.

19 Baibol na da ta: “Vwẹ ẹro keri otu re wan oma rẹ esegbuyota kugbe erhiori reuku rẹ ive na.” (Hibru 6:12) E jẹ a vwẹrokere Jẹfta vẹ ọmọ rọyen kidie a da fuevun kẹ Jihova, o che bruba kẹ avwanre.