Gbe jẹ odiri wẹ ru iruo rọ gbare, rere wọ vwọ sa gbare tototo, wo jẹ emu ọvuọvo kare owẹ-ẹ.”—JEMS 1:4.

UNE: 135, 139

1, 2. (a) Die yen e se yono vwo nẹ odirin rẹ Gidiọn vẹ isodje 300 rọyen na? (Ni uhoho rẹsosuọ na.) (b) Vwo nene eta rehẹ Luk 21:19, diesorọ odirin vwọ ghanre?

VWẸ ẹro roro ofovwin ọgangan rọhẹ uvwre rẹ isodje rẹ Izrẹl, rẹ Oguẹdjọ Gidiọn suẹn, vẹ ivwighrẹn rayen. Gidiọn vẹ ihwo rọyen vwọ tua ihwo rẹ Midia na, ason hrọke, vwẹ omarẹ iroko 32! Baibol na da vuẹ avwanre obo re rhe phia: “Gidiọn da rhe obi Jọdan ọ da wanvrẹn ọ vẹ eshare ujori erha re vẹ ọye gba herọ, rẹ ayen vwọ tua ihwo na dede na yẹ oma rhọ aye-en.” Ẹkẹvuọvo, ayen ji rhi phikparobọ-ọ, ayen ji vwo isodje 15,000 rẹ ayen che nene họnre. Ikpe buebun yen ivwighrẹn nana shenyẹ ihwo rẹ Izrẹl na re, kọyensorọ oma cha rhọ ihwo rẹ Izrẹl na-a. Ọtiọyena, Gidiọn vẹ isodje rọyen da vwọ tua ivwighrẹn na, ji phi ayen kparobọ!—Iguẹdjọ 7:22; 8:4, 10, 28.

2 Avwanre ji phiẹ ofovwin ọgangan nonẹna. Eshu, akpọ nana, vẹ jẹgba romobọ yen ivwighrẹn na. Iniọvo  evo nene ivwighrẹn nana muabọ ikpe buebun re. Womarẹ ukẹcha rẹ Jihova, avwanre phi ifovwin buebun kparobọ re. Ẹkẹvuọvo, avwanre ji rhi phikparobọ kare kare-e. Ọkiọvo, oma sa ghwọrọ avwanre vwevunrẹ ohọnre nana. Yẹrẹ avwanre se no nẹ oba rẹ akpọ umwemwu nana krinọ. Jesu vuẹ avwanre jovwo nẹ a cha mrẹ edavwini vẹ omukpahen ọgangan vwẹ ẹdẹ roba na. Jẹ, ọ je tanẹ e de chirakon, ke se phikparobọ. (Se Luk 21:19.) Die yen odirin? Die yen cha chọn avwanre uko vwo vwo odirin? Die yen e se yono nẹ ihwo ri vwo odirin? Mavọ kọyen odirin se vwo “ru iruo” rọyen gba?—Jems 1:4.

DIE YEN ODIRIN?

3. Die yen odirin?

3 Vwevunrẹ Baibol na, odirin vrẹ e di vwo yerin ghene ẹdia ọgangan ọvo. O churobọ si obo rehẹ ẹwẹn rẹ avwanre kpahen edavwini na. Odirin chọn avwanre uko vwo fiudugbere, vwọ fuevun, ji chirakon. Ọbe ọvo tare nẹ odirin ọyen uruemu rọ nẹrhẹ avwanre vwo iphiẹrophiyọ ọgangan, ọ je nẹrhẹ e se chirakon rẹ edavwini. Vwẹ ọke edavwini egangan, ọ chọn avwanre uko vwo vwo ọyọnregan. Ọ rhẹriẹ edavwini na kpo ophikparobọ, kọ tẹnroviẹ obaro na ukperẹ ọmiaovwẹ rẹ edavwini na.

4. Diesorọ a sa vwọ tanẹ ẹguọnọ yen mu ohwo vwo vwo odirin?

4 Ẹguọnọ mu avwanre vwo vwo odirin. (Se 1 Kọrẹnt 13:4, 7.) Vwẹ ẹdia vọ? Ẹguọnọ kpahen Jihova mu avwanre vwo vwo odirin rẹ kemu kemu rọ vwẹ uphẹn kẹ. (Luk 22:41, 42) Ẹguọnọ re iniọvo na chọn avwanre uko vwo vwo odirin rẹ jẹgba rayen. (1 Pita 4:8) Ẹguọnọ re vwo kpahen ọrivẹ rẹ orọnvwe nẹrhẹ orọnvwe avwanre ganphiyọ, ọ je chọn avwanre uko vwo vwo odirin rẹ “ukpokpogho” rọhẹ orọnvwe rẹ omavwerhovwẹn je hepha dede.—1 Kọrẹnt 7:28.

DIE YEN CHA CHỌN WẸ UKO VWO VWO ODIRIN?

5. Diesorọ Jihova vwọ dia ohwo ro me fo, rọ sa chọn avwanre uko vwo vwo odirin?

5 Rẹ Jihova vwọ kẹ ẹgba. Jihova, ọyen “Ọghẹnẹ rẹ erhiori kugbe uchebro.” (Rom 15:5) Ọyen ọvo yen nabọ riẹn ẹdia rẹ avwanre vẹ oborẹ avwanre hepha. Ọtiọyena, ọ riẹn oborẹ avwanre guọnọre e se vwo vwo odirin. Baibol na tare nẹ: “O ruẹ ẹguọnọ rẹ otu re djẹ oshọ rọye gba, ọye ọvo ri nyo oviẹ rayen, o mi sivwi ayen.” (Une Rẹ Ejiro 145:19) Kẹ mavọ yen Ọghẹnẹ cha vwọ kpahenphiyọ ẹrhovwo rẹ avwanre?

Jihova, rọ nabọ riẹn avwanre na, riẹn oborẹ avwanre guọnọre e se vwo vwo odirin

6. Kirobo rẹ Baibol na tare, mavọ yen Jihova vwọ “gbẹn idjerhe” kẹ avwanre?

6 A da yare ukẹcha rẹ Jihova, o veri nẹ ọ cha “gbẹn idjerhe” vwọ kẹ avwanre.  (Se 1 Kọrẹnt 10:13.) Mavọ o ruo wan? Ọkiọvo, o si ebẹnbẹn na no kare kare. Jẹ ọke buebun, ọ kẹ avwanre ẹgba re se vwo vwo “erhiori” je “ghọghọ vwẹ evun rẹ oja.” (Kọlose 1:11) Jihova cha sa vwẹ uphẹn kẹ ebẹnbẹn rọ gan vrẹ avwanre nẹ o te avwanre oma-a, kidie ọ riẹn asan rẹ ẹgba rẹ avwanre teri.

7. Djudje rẹ oboresorọ a vwọ guọnọ emu rẹ ẹwẹn e se vwo vwo odirin.

7 Jẹ emu rẹ ẹwẹn bọn esegbuyota wẹn gan. Diesorọ a vwọ guọnọ emu rẹ ẹwẹn? Kerẹ udje: Ohwo ki se yerin ugbenu ro kpenu mamọ, kọ riemu rẹ ofori nẹ ọ re ẹdẹ erha yẹrẹ ẹne. Ọyena vrẹ oborẹ ohworakpọ ria ghevweghe. Ohwo ki se yerin te enu rẹ ugbenu tiọyena, ofori nẹ ọ riemu buebun. Vwẹ idjerhe vuọvo na, avwanre guọnọ emu rẹ ẹwẹn buebun e se vwo vwo odirin vwo te asan rẹ avwanre ra. E jẹ a ghwọrọ ọke vwo ru uyono romobọ, ji kpo emẹvwa. Enana cha kẹ avwanre obo ra guọnọre a sa vwọ bọn esegbuyota rẹ avwanre gan.—Jọn 6:27.

8, 9. (a) Kirobo rẹ Job 2:4, 5 tare, die yen edavwini rẹ avwanre churobọ si? (b) Wo de hirharoku ọdavwini, die yen wọ sa vwẹ ẹwẹn roro?

8 Karophiyọ evun-ẹfuọn wẹn kẹ Ọghẹnẹ. Edavwini ghwa ojaẹriọ cha. Jẹ ọ dia ojaẹriọ ọvo-o. Ọyọnregan rẹ avwanre jehẹ ẹdia rẹ imuoshọ. Oborẹ avwanre ruẹ siẹrẹ e de hirharoku edavwini, djephia sẹ avwanre reyọ Jihova kerẹ Osun rẹ akpọ vẹ odjuvwu. Vwẹ idjerhe vọ? Eshu rọ dia ọvweghrẹn rẹ Ọghẹnẹ, vwọso usuon rọyen, o ji yinvwaro kpahen Jihova rọ vwọ tanẹ ihworakpọ ga Jihova fikirẹ ojevwe romobọ rayen ọvo. Eshu da ta: “Obo rẹ ohwo vwori ejobi ọ vwọ hwa osa rẹ urhuarho rọye.” Ọ da je ta kpahen Job nẹ, “Ẹkẹvuọvo gba riẹn obọ wẹn phia nana nana, vwo te ibeku vẹ ivwo rọye, kọ cha harhe owẹ phia.” (Job 2:4, 5) Eshu wene re? Kakaka! Ikpe buebun wanre, a je djẹ nẹ odjuvwu re, dedena o ji kpokpo ihwo rẹ Ọghẹnẹ nonẹna. (Ẹvwọphia 12:10) Asaọkiephana, Eshu je tanẹ ihworakpọ ga Ọghẹnẹ fikirẹ ojevwe romobọ rayen. Ọ davwẹngba avwanre vwọ sen usuon rẹ Ọghẹnẹ, je dobọ rẹ ẹga rọyen ji.

9 Wo de hirharoku ọdavwini, vwẹ ẹwẹn roro ẹdia nana. Eshu vẹ emekashe rọyen hẹ ẹbẹre ọvo. Ayen nẹ, sẹ wo che siobọnu ọyọnregan wẹn. Vwẹ ẹbẹre ochekọ, wo vwo Jihova, Ovie avwanre Jesu Kristi, e ra jẹreyọ na ra rhọvwọn nẹ ushi re, vẹ emekashe uriorin buebun. Ayen mrẹ ẹgbaẹdavwọn wẹn, ayen ji phiuduphiyawọ wẹn! Oma vwerhen ayen rẹ ayen vwọ mrẹ nẹ wo vwo odirin, wọ je fuevun kẹ Jihova ọkieje. Ọtiọyena, wo de nyo Jihova rọ vuẹ wẹ nẹ: “Ghwanre, ọmọ mẹ, rere udu mẹ vwọ ghọghọ, rere me mrẹ ota kpahe kẹ ohwo rọ vwo ovwẹ jehwẹ.”—Isẹ 27:11.

Jesu tẹnrovi osa rẹ akoechiro rọyen

10. Mavọ wọ sa vwọ vwẹrokere Jesu vwọ tẹnrovi osa rẹ akoechiro?

 10 Tẹnrovi osa na. Vwẹ ẹro roro nẹ wọ djẹ imoto kpo asan vwẹ ason, siẹvuọvo na ijini rẹ imoto na de fun vwẹ asan rẹ iwevwin hepha-a, ẹghwa ọvo yehẹ asan na. Imẹkaniki herọ-ọ. Jẹ wọ da rhe karophiyọ nẹ wo vughe imẹkaniki ọvo rọ dia ọko rọhẹ obaro na, wo de se bi imoto na te asan rọyen, ọ cha rhuẹrẹ kẹ wẹ. Akpeyeren pha kerẹ oyan tiọyena. Ọkiọvo, erọnvwọn sa gan kẹ wẹ mamọ, te ẹdia rẹ akpọ de nuwọhọ. Jesu rhe se vwo ẹwẹn yena jovwo. Ọke ra vwọ kanrọ mu urhe roja, o rhiẹromrẹ ojaẹriọ ọgangan vẹ ophọphọvwe. Ọnana yen ọke rọ ma gan kparobọ vwẹ akpeyeren rọyen! Die chọn rọ uko? Baibol na tare nẹ ọ tẹnrovi “aghọghọ rọ hẹ obaro kẹ.” (Hibru 12:2, 3) Jesu tẹnrovi osa rẹ akoechiro rọyen, ma rho ọ vwọ riẹn nẹ o che toroba orufon rẹ odẹ rẹ Ọghẹnẹ, ji bicha usuon rọyen. Ọ riẹnre nẹ ọdavwini na ọ rẹ ọmọke krẹn, jẹ osa rọyen vwẹ odjuvwu ọ rẹ bẹdẹ bẹdẹ. Nonẹna, edavwini re che rhiẹromrẹ sa gan mamọ, e me je vọn vẹ ojaẹriọ, ẹkẹvuọvo karophiyọ nẹ, e herọ vwẹ ọmọke krẹn.

“IHWO RI CHIRAKO RHI TE OBA”

11. Diesorọ e vwo roro kpahen oborẹ “ihwo ri chirako rhi te oba” rhiẹromrẹ?

11 Ọ diẹ avwanre ọvo yen chirako-on. Rọ vwọ dia ọbọngan vwọ kẹ Inenikristi ri chirakon rẹ edavwini buebun, ọyinkọn Pita de si: “Hirhe aro kuo, mudia gan vwẹ esegbuyota wẹn, ovwan riẹn imoni rẹ ovwan re hẹ akpọ na duvwu na je reoja buebu ọtiọye.” (1 Pita 5:9) Oborẹ “ihwo ri chirako rhi te oba” rhiẹromrẹ, yono avwanre obo ra sa vwọ fuevun, ọ kẹ avwanre imuẹro nẹ e se phikparobọ, ọ je karophiyọ avwanre nẹ osaẹhwa hẹrhẹ avwanre. (Jems 5:11) E jẹ e roro kpahen udje evo. [1]—Ni eta rẹ odjefiotọ.

12. Die yen udje rẹ chẹrobim na yono avwanre?

12 Chẹrobim, eyen emekashe rehẹ ẹdia ro kpenu. Ọke rẹ Adam vẹ Ivi vwo ru umwemwu nu, Jihova da vwẹ owian kpokpọ kẹ evo usun rẹ emekashe nana vwẹ otọrakpọ na. Owian nana fẹnẹ ọ rẹ ayen ruẹ jovwo vwẹ odjuvwu. Udje rayen yono avwanre obo re se vwo vwo odirin vwẹ owian rọ pha bẹnbẹn. Baibol na vuẹ avwanre kpahen Jihova nẹ, “vwẹ obọrhe rẹ udju rẹ Idẹn na, o de phi chẹrobim, ọ  vẹ ọnọkọ rẹ erhanre rọ rhẹriẹ kpenẹ kpenẹ, rọ rhẹrẹ urhe rẹ arhọ na.” [2] (Ni eta rẹ odjefiotọ.) (Jẹnẹsis 3:24) Baibol na tare nẹ chẹrobim na brenu yẹrẹ niro nẹ ayen rho nọ vwọ kẹ owian nana-a. Ofu rẹ owian na dje ayen, ayen de gbobọnyẹ-ẹ. Ukperẹ ọtiọyen, ayen ruiruo na te oba, ọkiọvo rhi te Oghwe rẹ Noa, jẹ ikpe 1,600 wanre!

13. Die yen chọn Job uko vwo chirakon rẹ edavwini rọyen?

13 Job, ohwo rọ fuevun. Ọkiọvo, wo se muomaphiyọ fikirẹ ota rẹ ugbeyan yẹrẹ ohwo rẹ orua wẹn vuẹ wẹ. Yẹrẹ ọ sa dianẹ wo shero ọga rode ọvo yẹrẹ ohwo rọ kẹrowẹ ghwuru. Udje rẹ Job sa chọn wẹ uko, otoro ẹdia wọ hepha-a. (Job 1:18, 19; 2:7, 9; 19:1-3) Job riẹn oboresorọ ọ vwọ rioja-a, dedena ọ yọnregan. Die yen chọn rọ uko? Ẹsosuọ, o vwo ẹguọnọ rẹ Jihova, ọ je guọnọ ru obo re cha nẹrhẹ ivun miovwo-o. (Job 1:1) Job guọnọ ru obo re vwerhen Ọghẹnẹ oma, te ọ ganre te ọ lọhọre. Vwọba, Jihova chọn Job uko vwọ mrẹ ẹgba rọyen vughe, rọ vwọ vuẹ kpahen erọnvwọn evo rọ mare. Ọnana da kẹ Job imuẹro ọgangan nẹ Jihova che phi oba phiyọ ojaẹriọ rọyen na, ọke na de te. (Job 42:1, 2) Ọtiọyen yen ghene phia. “Ọrovwohwo da rhoma reyọ ughwẹ ri Job vwọ kẹ. . . . Ọrovwohwo da rhoma vwọ kẹ Job ọhwọhwọ ivẹ nọ uche ro vwori jovwo. Job de ghwu, ọ mare, rọ ghworo hẹrẹhẹrẹ.”—Job 42:10, 17.

14. Kirobo rẹ 2 Kọrẹnt 1:6 tare, idjerhe vọ yen akoechiro rẹ Pọl vwọ chọn ihwo efa uko?

14 Ọyinkọn Pọl. Wọ rioja rẹ omukpahen ọgangan? Wẹwẹ ọkpako yẹrẹ oniruo okinriariẹ rẹ eghwa ukoko na bẹn? Udje rẹ Pọl sa chọn wẹ uko. Pọl rioja rẹ omukpahen ọgangan, ọ je ro ẹnwan kpahen iniọvo rehẹ ikoko na  ọkieje. (2 Kọrẹnt 11:23-29) Dedena, Pọl dobọ rẹ ẹga rọyen ji-i, udje rọyen na je bọn ihwo efa gan. (Se 2 Kọrẹnt 1:6.) Akoechiro wẹn sa je nẹrhẹ iniọvo efa chirakon.

ODIRIN CHE “RU IRUO” RỌYEN GBA VWẸ OMA WẸN?

15, 16. (a) “Iruo” vọ yen odirin che rugba? (b) Djudje rẹ oborẹ akoechiro se vwo “ru iruo” rọyen gba vwẹ oma rẹ avwanre.

15 Ẹwẹn ọfuanfon na de mu odibo Jems vwo si: “Gbe jẹ odiri wẹ ru iruo rọ gbare, rere wọ vwọ sa gbare tototo, wo jẹ emu ọvuọvo kare owẹ-ẹ.” (James 1:4) Idjerhe vọ yen odirin vwo ru “iruo” rọyen gba vwẹ oma avwanre? Edavwini sa nẹrhẹ a riẹn nẹ avwanre je guọnọ odirin, ẹwẹn rẹ ọdavwaro, yẹrẹ ẹguọnọ. Akoechiro cha chọn avwanre uko vwo dje iruemu nana phia, ka cha dia omamọ rẹ Onenikristi.

E de chirakon rẹ edavwini, ọ cha nẹrhẹ a dia omamọ rẹ Onenikristi (Ni ẹkoreta 15, 16)

16 Kidie nẹ odirin se ru avwanre phiyọ omamọ rẹ Onenikristi, avwanre rha cha churhi rẹ Jihova fikirẹ ọdavwini-i. Kerẹ udje, wo de nene iroro rẹ ọfanrhiẹn muabọ, wo shero ọdavwini-i! Yare ukẹcha rẹ Jihova wọ sa vwọ sen orharhe rẹ iroro. Ohwo ọvo vwẹ orua wẹn vwọso owẹ? Wo jẹ ẹwẹn bẹn wẹ-ẹ! Brorhiẹn wọ vwọ ga Jihova ọkieje. Ọnana cha nẹrhẹ ẹroẹvwọsuọ wẹn kpahen Jihova ganphiyọ. Karophiyọ: A guọnọ odirin Ọghẹnẹ ki se rhiabọreyọ avwanre.—Rom 5:3-5; Jems 1:12.

17, 18. (a) Djudje rẹ ọghanrovwẹ re vwo chirakon te oba. (b) Oba na vwo siẹkẹrẹ na, imuẹro vọ yen avwanre vwori?

17 Ofori nẹ avwanre chirakon te oba, ọ dia ọmọke krẹ-ẹn. Vwẹ ẹro roro okọ ro shuẹ. Ihwo rehẹ evun rọyen ki se sivwinrhọ, ayen ke rhẹrhẹ te ugbenu. Ohwo rẹ oma rhọre ọke rọ ghwa vwọ ton ẹrhẹrhẹ phiyọ, che divwin ghwu. Ohwo rẹ oma je rhọ ọke rọ vwọ joma rhẹrhẹ te ugbenu nu, ji che divwin ghwu. Ọtiọyena, a da guọnọ dia akpọ kpokpọ na, kẹ ofori nẹ e vwo odirin ọkieje. E jẹ e vwo oka rẹ ẹwẹn rẹ ọyinkọn Pọl vwori, rọ vwọ ta: “Avwanre gbe ro ẹnwa-an.”—2 Kọrẹnt 4:1, 16.

18 Kerẹ Pọl, avwanre vwo imuẹro kokoroko nẹ Jihova cha chọn avwanre uko vwo chirakon te oba. Pọl de si: “Avwanre rhonọ ihwo re kpare obo fiki rẹ ohwo rọ guọnọ avwanre. Kidie o mu uvwe ẹro nẹ eyẹ ughwu, eyẹ arhọ, eyẹ emakashe, eyẹ ivie, eyẹ emu rẹ ọke nana, eyẹ ọke rọ cha, eyẹ ogangan, eyẹ enuẹra, eyẹ ukokodo, eyẹrẹ emu ọfa vwẹ evun rẹ emama na ejobi, sa hẹriẹ avwanre nẹ ẹguọnọ rẹ Ọghẹnẹ vwi Kristi Jesu Ọrovwavwanre-e.” (Rom 8:37-39) Oma cha ghene rhọ avwanre ọkiọvo. Ẹkẹvuọvo, e jẹ a vwẹrokere Gidiọn vẹ isodje rọyen. Oma ghwọrọ ayen jẹ ayen dobọji-i. “Ayen vwọ tua ihwo na”!—Iguẹdjọ 8:4.

^ [1] (ẹkorota 11) Wọ je cha mrẹ ọbọngan vwo nẹ odirin rẹ ihwo rẹ Ọghẹnẹ rẹ ọke rẹ avwanre nana. Kerẹ udje, Yearbook rẹ 1992, 1999, vẹ 2008 gbe omamọ ikuegbe kpahen iniọvo rẹ avwanre rehẹ Ethiopia, Malawi, vẹ Russia.

^ [2] (ẹkorota 12) Baibol na vuẹ avwanre uchunu rẹ chẹrobim re wiowian nana-a.