Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Uwevwin Orhẹrẹ  |  April 2016

Iruo Aghwoghwo Wẹn Pha Kerẹ Irho?

Iruo Aghwoghwo Wẹn Pha Kerẹ Irho?

IRUO aghwoghwo na pha ghanghanre mamọ. Jẹ ọ diẹ ihwo eje re ghwoghwo kẹ yen riẹn ọnana-a. Ihwo da tobọ guọnọ riẹn kpahen oborẹ Baibol na tare, ayen no nẹ ọ diẹ ọkieje yen ayen vwo yono Baibol na-a.

Kerẹ udje, Gavin kpo uyono vwẹ Ọguan Ruvie, jẹ ọ guọnọre nẹ a vwẹ Baibol yono ọye-en. Gavin tare nẹ ọ ghwa riẹn Baibol na-a, jẹ ọ guọnọre nẹ ihwo efa mrẹ ọnana vughe-e. Oshọ muo nẹ a cha vuẹ nẹ o kuomaba ẹga ọvo, jẹ ọ guọnọ ophiẹnvwe-e. Die wo rorori? A sa ghene chọn Gavin uko? Roro kpahen erhuvwu rẹ ohwo sa mrẹ nẹ iyono rẹ Baibol cha. Jihova da vuẹ ihwo rẹ Izrẹl: “Ota mẹ bru ighworighwo kerẹ evwru, kerẹ eghwẹghwẹ rẹ osio ro tue kuẹ odi ọboba.” (Urhi Rivẹ 31:19, 30; 32:2) E jẹ e yono erọnvwọn evo kpahen irho, a reyọ vwọ vwanvwen iruo aghwoghwo na rere a sa vwọ nabọ vwẹ ukẹcha kẹ “ihwo na ejobi.”—1 Timoti 2:3, 4.

 IDJERHE VỌ IRUO AGHWOGHWO AVWANRE VWỌ HỌHỌ IRHO?

Irho pha dẹndẹn. Odju rọ kpọrhọre yen hirhe phiyọ ame, kọyen irho. Idjerhe vọ yen eta rẹ Jihova vwọ họhọ “evwru” yẹrẹ irho? Ọ ta ota kẹ ihwo rọyen dẹndẹn, bọrọbọrọ, vẹ erorokẹ. A vwẹrokere siẹrẹ e de muọghọ kẹ esegbuyota rẹ ihwo efa. E jẹ ayen roro ji brorhiẹn komobọ rayen. E de dje ọdavwẹ phia, ihwo na ki che rhiabọreyọ ovuẹ na, iruo aghwoghwo rẹ avwanre kọ je cha vọn vẹ erere.

Irho djiroma. Iruo aghwoghwo rẹ avwanre cha kẹ ihwo urovwoma siẹrẹ a da guọnọ idjerhe sansan ra vwọ chọn ayen uko vwo yono kpahen uyota na. Oniọvo ọshare re se Chris, yen ohwo ẹsosuọ rọ guọnọ vwẹ uyono rẹ Baibol vwo mu kẹ Gavin, jẹ ọ gbarọ-ọ. Ukperẹ ọtiọyen, ọ davwen ena sansan rọ vwọ nẹrhẹ Gavin vwo ẹwẹn vwọ ta ota kpahen Baibol na. Chris da vuẹ Gavin nẹ o vwo ovuẹ ọghanghanre ọvo ra ta ota kpahen vwẹ Baibol na, siẹrẹ o de yono kpahen ovuẹ nana ọ cha chọn uko vwọ nabọ vwo ẹruọ rẹ emẹvwa rọ cha na. da vuẹ nẹ aroẹmrẹ rẹ Baibol yen kẹrẹ imuẹro nẹ Baibol na ọbe rẹ uyota. Ọke sansan, ayen da ta ota kpahen oborẹ aroẹmrẹ rẹ Baibol buebun rugba wan re. Eta nana da kẹ Gavin urovwoma, ukuotọ rọyen o de rhiabọreyọ uyono rẹ Baibol.

A guọnọ irho vwẹ akpeyeren. Vwẹ Izrẹl, ọkiọvo osio se jẹrhọ vwẹ emeranvwe buebun vwẹ ọke uvo. Irho rha herọ-ọ, ekankọn ke cha ya, ayen mi ghwu. Jihova mraro nẹ vwẹ ọke avwanre na, ọ cha họhọ nẹ asan eje yamu, urhuru rẹ ame “rẹ ota rẹ Orovwohwo” che hwe ihwo. (Emọs 8:11) O veri nẹ ihwo ra jẹreyọ na cha họhọ “evwru ro tue nẹ obọ rẹ Ọrovwohwo cha” rẹ ayen vwo ghwoghwo iyẹnrẹn esiri rẹ Uvie na, ọtiọyen ji te “igodẹ efa” na. (Maika 5:7; Jọn 10:16) Ovuẹ re ghwoghwo na, ọyen orọnvwọn ọvo rẹ Jihova cha vwọ vwẹ arhọ kẹ ihwo rẹ urhuru rẹ uyota na siẹ. Avwanre ni ovuẹ nana ghanghanre?

Irho, ọyen ebruphiyọ ro nẹ obọ rẹ Jihova cha. (Urhi Rivẹ 33:13) Iruo aghwoghwo na sa dia ebruphiyọ yẹrẹ okẹ vwọ kẹ ihwo re kerhọ kẹ. Uyono rẹ Baibol, ọyen ebruphiyọ vwọ kẹ Gavin kidie ọ nẹrhẹ ọ mrẹ ẹkpahọnphiyọ rẹ enọ rọyen eje. Ọ yan obaro, o de bromaphiyame, ọ vẹ aye rọyen, Joyce nabọ ruiruo aghwoghwo rẹ Uvie na sasasa.

Iseri rẹ Jihova ghwoghwo iyẹnrẹn esiri rẹ Uvie na vwẹ akpọneje

NI IRUO AGHWOGHWO NA GHANGHANRE

Ra vwọ vwẹ iruo aghwoghwo na vwọ vwanvwen irho sa chọn avwanre uko vwo ni ẹgbaẹdavwọn avwanre ghanghanre. Vwẹ idjerhe vọ? A ghwa mrẹ owian rẹ irho vuọvo-o, jẹ i de te iduduru buebun, e sa kpọrhọ otọ na. Ọtiọyen ọ je hepha, oborẹ avwanre ohwo ọvuọvo ruẹ vwẹ iruo aghwoghwo na sa hanvwe mamọ. Ẹkẹvuọvo, e de ku ẹgbaẹdavwọn rẹ iduduru rẹ idibo rẹ Jihova kugbe, ọnana sa dia oseri “kẹ ẹgborho na ejobi.” (Matiu 24:14) Iruo aghwoghwo avwanre sa dia ebruphiyọ rẹ Jihova vwọ kẹ ihwo efa? E, ovuẹ avwanre kọ cha dia kerẹ irho rọ pha dẹndẹn, ro djiroma, ra je guọnọ vwẹ akpeyeren!