Pho kpẹ obo revun rọyen

Pho kpẹ mẹnu rivẹ

Pho kpẹ ẹrhuẹrẹhọ robo rehẹ evun rọyen

Iseri ri Jihova

Urhobo

Uwevwin Orhẹrẹ  |  April 2016

Diesorọ E Vwo Kpo Uyono?

Diesorọ E Vwo Kpo Uyono?

Kọke kọke ayen vwo koko.”—IRUO RẸ IYINKỌN NA 2:42.

UNE: 20, 119

1-3. (a) Idjerhe vọ yen Inenikristi vwo djephia nẹ ayen vwo owenvwe ọgangan ayen vwo kpo uyono? (Ni uhoho rẹsosuọ na.) (b) Die yen a cha fuẹrẹn vwẹ uyono nana?

CORINNA vwọ hẹ ẹgbukpe 17, e de mu oni rọyen kpo uwodi ra da vwẹ oja ria ihwo, vwẹ asan oshesheri. Ọke vwọ yanran na, e de ji mu Corinna kpo Siberia, asan rọ vwẹ iroko uriorin buebun vwo sheri kẹ uwevwin rọyen. Vwẹ oboyin, kọ wiowian vwevunrẹ aghwa kerẹ ọviẹn. Ọkiọvo, ọ wiowian vwevunrẹ aghwa na vwẹ ọke rẹ ekpahen ọgangan, jẹ emamọ iwun herọ ro kuphiyọ-ọ. Dedena, Corinna vẹ oniọvo aye ọfa brorhiẹn nẹ ayen cha davwẹngba rayen eje vwo kpo uyono.

2 Corinna da ta: “Ovwọnvwọn yen avwanre vwo siobọnẹ owian, avwanre me yan iroko 25 (imaili 15) kpo asan rẹ itreni de mu ihwo. Itreni na kparoma vwẹ ughọjọ ivẹ rẹ ason, ọ me djẹ inọke esan, avwanre de wontọ nu, a me rha yan iroko ihwe (imaili esan) tavwen e ki te asan re de ru uyono na.” Ọnana kẹ Corinna omavwerhovwẹn mamọ. Ọ da ta: “Vwevunrẹ uyono, avwanre yono ọbe Uwevwin Orhẹrẹ je suine. Ọnana nabọ bọn esegbuyota rẹ  avwanre gan.” Ẹdẹ erha wan tavwen iniọvo ivẹ nana ki te aghwa na, jẹ ọ ro vwo aghwa na tobọ riẹn sẹ ayen yan kpo asan ọvo-o.

3 Ọkieje yen ihwo rẹ Jihova vwọ rhẹro rẹ omẹvwa rayen. Kerẹ udje, Inenikristi ẹsosuọ kuomakugbe vwọ kẹ ẹga rẹ Jihova, ayen ji yono kpahọn. (Iruo Rẹ Iyinkọn Na 2:42) Ọ sa dianẹ wọ je rhẹro rẹ ọke wo vwo kpo uyono. Ẹkẹvuọvo kerẹ iniọvo wẹn buebun, wọ sa je mrẹ bẹnbẹn wo vwo kpo uyono ọkieje. Ọ sa dianẹ iruo wẹn reyọ ọke wẹn mamọ, yẹrẹ oma ghwọrọ owẹ ọkieje. Ọtiọyena, die yen cha chọn avwanre uko vwọ davwẹngba avwanre eje e se vwo kpo uyono? [1] (Ni eta rẹ odjefiotọ.) Mavọ e se vwo phiuduphiyawọ rẹ ihwo rẹ avwanre yono vẹ ihwo efa nẹ ayen kpo uyono ọkieje? Uyono nana che djekpahen oboresorọ uyono ẹra (1) vwo yovwin kẹ avwanre, (2) vwọ chọn ihwo efa uko, kugbe (3) vwọ nẹrhẹ oma vwerhen Jihova. [2]—Ni eta rẹ odjefiotọ.

UYONO ẸRA YOVWIN KẸ AVWANRE

4. Idjerhe vọ yen uyono ẹra vwọ chọn avwanre uko vwo yono kpahen Jihova?

4 Uyono yono avwanre. Kuyono kuyono rẹ avwanre ra nẹrhẹ avwanre riẹn Jihova phiyọ. Kerẹ udje, o krinọ-ọ na, ikoko buebun ghwe yono ọbe re se Draw Close to Jehovah vwẹ Uyono rẹ Baibol Rukoko. Mavọ oma ru we e vwo yono kpahen iruemu rẹ Jihova, wo ji vwo nyo ẹkpahọnphiyọ rẹ iniọvo wẹn? Vwọrẹ imuẹro, ọnana nẹrhẹ ẹguọnọ wo vwo kpahen Jihova rhoma ganphiyọ. Vwẹ uyono, avwanre ji yono kpahen Baibol na siẹrẹ avwanre da nabọ kerhọ rẹ eta, idje, vẹ Baibol re se. (Nehemaya 8:8) Ji roro kpahen erọnvwọn iyoyovwin ra mrẹ kudughwrẹn kudughwrẹn e de muegbe vwọ kẹ isese rẹ Baibol na, e de ji nyo oborẹ iniọvo na yono norhe.

5. Idjerhe vọ yen uyono ẹra vwọ chọn wẹ uko vwọ vwẹ eta rẹ Baibol na vwo ruiruo vwẹ akpeyeren wẹn vẹ iruo aghwoghwo na?

5 Uyono nẹrhẹ a mrẹ idjerhe ra sa reyọ eta rẹ Baibol na vwọba akpọ yerin. (1 Tẹsalonaika 4:9, 10) Kerẹ udje, o vwo ọke ọvo rẹ Uyono rẹ ọbe Uwevwin Orhẹrẹ na vwọ nẹrhẹ wọ guọnọ ru ẹga wẹn vwọ kẹ Jihova kpobarophiyọ, ru ẹrhovwo wẹn yovwinphiyọ, yẹrẹ mu we vwo ghovwo oniọvo ọvo? Uyono re ruẹ vwẹ uvwre rẹ udughwrẹn na yono avwanre obo re se vwo ghwoghwo iyẹnrẹn esiri na kugbe obo ra sa vwọ chọn ihwo efa uko vwo vwo ẹruọ rẹ iyono rẹ Baibol.—Matiu 28:19, 20.

6. Idjerhe vọ yen uyono ẹra vwọ bọn avwanre gan?

6 Uyono bọn avwanre gan. Akpọ rẹ Eshu nana davwẹngba rọ vwọ guọghọ esegbuyota rẹ avwanre, ọ sa je nẹrhẹ ẹwẹn rẹ avwanre kuọrọn. Ẹkẹvuọvo,  uyono ẹra bọn avwanre gan, je kẹ avwanre ẹgba ra vwọ ga Jihova ọkieje. (Se Iruo Rẹ Iyinkọn Na 15:30-32.) Ọke buebun, avwanre yono kpahen oborẹ aroẹmrẹ rẹ Baibol na rugba wan. Ọnana nẹrhẹ avwanre nabọ vwo imuẹro nẹ ive rẹ Jihova eje ji che rugba. Iniọvo na bọn avwanre gan womarẹ eta, ẹkpahọnphiyọ rayen vẹ une rẹ ujiri ayen sua kẹ Jihova sasasa. (1 Kọrẹnt 14:26) E de ji nene ayen ta ota kuẹgbe vwẹ ọtonphiyọ rẹ uyono kugbe oba rọyen, ọ kẹ avwanre omavwerhovwẹn kidie avwanre vwo igbeyan buebun re nabọ vwo ẹguọnọ rẹ avwanre.—1 Kọrẹnt 16:17, 18.

Uyono bọn avwanre gan, je kẹ avwanre ẹgba ra vwọ ga Jihova ọkieje

7. Diesorọ ọ vwọ ghanre mamọ nẹ e kpo uyono?

7 A mrẹ ukẹcha rẹ ẹwẹn ọfuanfon rẹ Ọghẹnẹ vwevunrẹ uyono. Jesu vwẹrote ikoko na womarẹ ẹwẹn ọfuanfon na. Ọ vuẹ avwanre nẹ e “nyo obo rẹ [“ẹwẹn,” NW] na ta kẹ [“ukoko,” NW] na.” (Ẹvwọphia 2:7) Ẹwẹn ọfuanfon na sa chọn avwanre uko vwo phi edavwini kparobọ, je nẹrhẹ e ghwoghwo ota na vẹ uduefiogbere. Ọ chọn avwanre uko vwo brorhiẹn rẹ aghwanre. Kọyensorọ o vwo fo nẹ a davwẹngba avwanre eje vwo kpo uyono, ka cha mrẹ ukẹcha rẹ ẹwẹn ọfuanfon rẹ Ọghẹnẹ.

AVWANRE CHỌN IHWO EFA UKO VWEVUNRẸ UYONO

8. Iniọvo na da mrẹ avwanre vwẹ uyono, ji nyo ẹkpahọnphiyọ vẹ unẹsuọ rẹ avwanre, ukẹcha vọ yen ọnana sa vwọ kẹ ayen? (Ji ni ekpeti na “ Oma Vwerhọn O de Rhivwin Kpo.”)

8 Uyono ẹra kẹ avwanre uphẹn vwo dje ẹguọnọ kẹ iniọvo na. Iniọvo buebun vwẹ ukoko avwanre chirakon rẹ ebẹnbẹn sansan. Ọyinkọn Pọl de si: “E gbe jẹ avwanre roro” kpahen ohwohwo. (Hibru 10:24, 25) E se dje ẹguọnọ kẹ iniọvo avwanre siẹrẹ a da bọn ayen gan vwevunrẹ uyono. Uyono ẹra nẹrhẹ iniọvo na riẹn nẹ avwanre guọnọ kuomakugbe ayen, je nene ayen ta ota. Avwanre sa bọn ayen gan womarẹ ẹkpahọnphiyọ rẹ  avwanre kugbe une ra sua nẹ otọ rẹ ubiudu cha.—Kọlose 3:16.

9, 10. (a) Djekpahen oborẹ eta rẹ Jesu rehẹ Jọn 10:16, sa vwọ chọn avwanre uko vwọ mrẹ ọghanrovwẹ re vwo kuomakugbe iniọvo avwanre. (b) Mavọ yen uyono ẹra ọkieje sa vwọ nẹrhẹ avwanre vwẹ ukẹcha kẹ oniọvo rẹ ihwo orua rọyen senre?

9 Uyono ẹra siẹ ukoko na kuẹgbe. (Se Jọn 10:16.) Jesu vwẹ oma rọyen vwo dje osuigegede, ọ da rha vwẹ idibo rọyen dje ekrun rẹ igodẹ vuọvo. Gbe roro: Igodẹ ivẹ da hẹ enu rẹ ugbenu, ivẹ efa hẹ iyara, ọvo kọ rha hẹ asan ọfa, a sa tanẹ igodẹ iyorin nana, ekrun vuọvọ? Ẹjo, kidie ekrun rẹ igodẹ dia kuẹgbe, ayen ji nene osun rayen. Vwẹ idjerhe vuọvo na, e jẹ avwanre sioma nẹ iniọvo na-a, e je gbẹdẹ rẹ uyono-o. Ofori nẹ a vwoma kugbe kerẹ “ekru rẹ igodẹ ọvo,” ji nene “osuigegede ọvuọvo.”

10 Uyono si avwanre koko kerẹ orua ọvo ro vwo ẹguọnọ. (Une Rẹ Ejiro 133:1) Iniọvo evo vwẹ ukoko avwanre rhe vwo ihwo rẹ orua-a, kidie a sen ayen. Ẹkẹvuọvo, Jesu veri nẹ ọ cha kẹ ayen orua ro che vwo ẹguọnọ rayen, je vwẹrote ayen. (Mak 10:29, 30) Wo de kpo uyono ọkieje, wọ sa dia ọsẹ, oni, vẹ oniọvo vwọ kẹ ihwo tiọyena. E de roro kpahen ọyena, kọ cha nẹrhẹ a davwẹngba avwanre eje, e vwo kpo uyono ọkeneje.

OMA CHA VWERHEN JIHOVA

11. Idjerhe vọ yen uyono ẹra vwo mu avwanre vwọ kẹ Jihova obo ri fo ro?

11 Vwevunrẹ uyono, avwanre kẹ Jihova obo ri fo ro. Ọyehẹ Ọmemama  rẹ avwanre ọtiọyena, ofori nẹ a kpẹvwẹ, muọghọ kẹ, ji jiro. (Se Ẹvwọphia 7:12.) E se ru ọnana vwẹ uyono womarẹ ẹrhovwo, une, vẹ eta rẹ avwanre. Ọnana uphẹn rode ra vwọ ga Jihova kudughwrẹn kudughwrẹn!

Jihova riẹn siẹrẹ avwanre da davwẹngba vwo kpo uyono, o ji ni ẹgbaẹdavwọn rẹ avwanre ghanghanre

12. Mavọ yen oma ruẹ Jihova siẹrẹ avwanre de kpo uyono ọkieje?

12 Ofori nẹ e nyupho rẹ Jihova kidie ọyen ma avwanre. Ọ vuẹ avwanre nẹ e siomakoko ọkeneje ma rho oba na vwo siẹkẹrẹ na. Ọtiọyena, e de nene iji yena, oma kọ vwerhen Jihova. (1 Jọn 3:22) Ọ riẹn siẹrẹ avwanre da davwẹngba vwo kpo uyono, o ji ni ẹgbaẹdavwọn rẹ avwanre ghanghanre.—Hibru 6:10.

13, 14. Mavọ yen uyono ẹra vwọ nẹrhẹ avwanre siẹkẹrẹ Jihova vẹ Jesu?

13 E de kpo uyono, avwanre dje kẹ Jihova nẹ a guọnọ sikẹrẹ vẹ Ọmọ rọyen kpẹkpẹkpẹ. Vwevunrẹ uyono, Jihova reyọ Baibol na vwo yono avwanre obo re ru vẹ oborẹ avwanre yeren akpọ wan. (Aizaya 30:20, 21) Ohwo rọ tobọ ga Jihova-a da rhe uyono avwanre, ọ mrẹvughe nẹ Ọghẹnẹ yen suẹn avwanre. (1 Kọrẹnt 14:23-25) Jihova vwẹ ẹwẹn ọfuanfon rọyen vwo suẹn uyono na, obọ rọyen yen iyono na eje ji nẹ cha. Kọyensorọ e de kpo uyono, avwanre kerhọ kẹ Jihova, je mrẹ obo ro vwo ẹguọnọ rẹ avwanre te, ọnana ji siẹ avwanre kẹrẹ kpẹkpẹkpẹ.

14 Jesu rọ dia Ọgbuyovwin rẹ ukoko na, da ta: “Kidie asan rẹ amwava eyẹ amwarha de kuoma gbe vwẹ odẹ mẹ, ke me dia uherevie rayen.” (Matiu 18:20) Baibol na je tanẹ Jesu “yan vwẹ ohri” rẹ ikoko na. (Ẹvwọphia 1:20–2:1) Vwọrẹ imuẹro, Jihova vẹ Jesu vẹ avwanre herọ, ayen bọn avwanre gan womarẹ uyono. Mavọ wo rorori nẹ o djobọte Jihova wan, siẹrẹ ọ da mrẹ nẹ wọ davwẹngba wo vwo sikẹrẹ vẹ Ọmọ rọyen?

15. Mavọ yen uyono ẹra vwo djephia nẹ avwanre guọnọ nyupho rẹ Ọghẹnẹ?

15 E de kpo uyono, avwanre dje kẹ Jihova nẹ a guọnọ nyupho rọyen. Jihova gba avwanre vwo nyupho rọye-en. (Aizaya 43:23) Ọtiọyena e de nene iji rọyen re vwo kpo uyono ọkieje, ọnana odjephia nẹ e vwo ẹguọnọ rọyen, o ji mu avwanre ẹro nẹ o vwo ẹgba rọ vwọ vuẹ avwanre obo re ru. (Rom 6:17) Kerẹ udje, die yen e che ru siẹrẹ ohwo rẹ avwanre ruiruo kẹ da nẹrhẹ e gbẹdẹ rẹ uyono? Yẹrẹ ihwo ri suẹn da tanẹ ihwo ri siomakoko ga Jihova cha hwa eho, e che mu ayen phiyọ uwodi, yẹrẹ e che gboja kẹ ayen vwo? Yẹrẹ ọkiọvo avwanre guọnọ ru orọnvwọn ọfa ukperẹ e vwo  kpo uyono. Vwẹ ẹdia nana eje, avwanre yen che brorhiẹn rẹ obo re ru. (Iruo Rẹ Iyinkọn Na 5:29) Jẹ, kọke kọke avwanre de brorhiẹn re vwo nyupho rẹ Jihova, ọnana nẹrhẹ oma vwerhọn.—Isẹ 27:11.

KUOMAKUGBE INIỌVO WẸN ỌKIEJE

16, 17. (a) Mavọ yen e ru riẹn nẹ uyono ẹra pha ghanghanre vwọ kẹ Inenikristi rẹ ẹgbukpe ujorin ẹsosuọ? (b) Mavọ yen oma ruẹ Oniọvo George Gangas kpahen emẹvwa rẹ avwanre?

16 Vwọ vrẹ omẹvwa rẹ Inenikristi ruru vwẹ Pẹntikọst ukpe rẹ 33, ayen je vwoma ọkieje vwọ kẹ ẹga rẹ Jihova. “Kọke kọke ayen vwo koko vwẹ uyono rẹ iyinkọn na.” (Iruo Rẹ Iyinkọn Na 2:42) Ayen je dobọ rẹ emẹvwa tiọyena ji-i, tobọ vwẹ ọke rẹ usuon rẹ Rom vẹ ilori ẹga rẹ Ju vwo mukpahen ayen. Dede nẹ ọ lọhọre-e, ayen davwẹngba rayen eje vwọ vwoma ọkeneje.

17 Nonẹna, oma vwerhen idibo rẹ Jihova vwọ kẹ emẹvwa tiọyena. George Gangas rọ gare kerẹ ọvo usun rẹ Ẹko Rọvwẹrote na vrẹ ikpe 22, da ta: “Vwọ kẹ vwẹ, re vwo nene iniọvo vwoma kuẹgbe yen obo re ma kẹ vwẹ ọbọngan vẹ omavwerhovwẹn. Me guọnọ dia ohwo rẹsosuọ ro te Ọguan Ruvie na, je dia ọ ro no kuko. Ubiudu mẹ ghọghọ mi de nene ihwo rẹ Ọghẹnẹ ta ota. Me da hẹ uvwre rayen, kọ ghwa họhọ nẹ me vẹ orua mẹ hẹ evunrẹ iparadaisi rẹ ẹwẹn. Ọdavwẹ vẹ iroro mẹ ejobi, ọyen mi vwo kpo emẹvwa.”

18. Ẹro vọ wo vwo nẹ uyono ẹra, kẹ die yen orhiẹn-ebro wẹn asaọkiephana?

18 Ẹro yena yen wo ji vwo nẹ ẹga rẹ Jihova? Ọ da dia ọtiọyen, gba davwẹngba wẹn eje wo vwo kuomakugbe iniọvo wẹn, ọ da tobọ bẹn kẹ wẹ dede. Djephia kẹ Jihova nẹ wo ghini vwo ẹwẹn rẹ Ovie Devid, rọ tare nẹ: “Ọrovwohwo, me guọnọ asan rẹ uwevwi wẹn.”—Une Rẹ Ejiro 26:8.

^ [1] (ẹkorota 3) Iniọvo avwanre evo se kpo uyono-o fikirẹ ẹdia ọgangan rẹ ayen hepha. Kerẹ udje, ọ sa dianẹ ayen muọga mamọ. Ayen vwo imuẹro nẹ Jihova vwo ẹruọ rẹ ẹdia rayen na, o ji vwo ọdavwaro kpahen oborẹ ayen ruru eje vwẹ ẹga rọyen. Ekpako na sa chọn iniọvo nana uko vwọ kerhọ kẹ uyono na, ọ sa dia womarẹ itẹlifonu yẹrẹ ayen se hworo uyono na reyọ vwọ kẹ iniọvo nana.

^ [2] (ẹkorota 3) Ni ekpeti na “ Oboresorọ E Vwo Kpo Uyono.”