Timoti, ọyen eghene ro vwẹ omavwerhovwẹn rọvwọ chọn ihwo uko. O kpẹ asan buebun ra chọn ihwo uko. Ọnana da nẹrhẹ oma vwerhọn. Wọ guọnọ riẹn obo re sorọ?—

Oni ri Timoti vẹ oni rode rọyen yoniro kpahen Jihova

Orere ri Listra ọyen Timoti dia ghwanre. Vwo nẹ ọkiemọ rhe, ọyen oni rode rọyen Lọis vẹ oni rọyen Yunaisi vwo yono kpahen Jihova. Timoti vwọ ghwanra cha, o de ji vwo ọdavwẹ ro vwo yono ihwoefa kpahen Jihova.

Ọke rẹ Timoti ji vwọ hẹ eghene, ọyen Pọl vwọ nọ sẹ o se nene ọyen kpẹ ota-eghwoghwo vwẹ asan efa. Timoti da ta: ‘E!’ Ọ choma rovwo nene ra chọn ihwoefa uko.

 Timoti nene Pọl kpẹ orere ri Masidonia ọvo re se Tẹsalonaika. Ayen vwẹ owọ yan ugbo oshesheri, je ro okọ tavwen ayen ki se te orere na. Ọke rẹ ayen vwo te oboyin, ayen da chọn ihwo buebun uko vwọ riẹn Jihova. Ẹkẹvuọvo ophu mwu ihwoevo, ayen da jiroro rẹ ayen vwo ru ayen djadja. Fikirẹ ọtiọyen na, Pọl vẹ Timoti de vrẹn nẹ etiyin kpẹ asan efa re ghwoghwo.

Timoti yeren akpọ rẹ omavwerhovwẹn

Emeranvwe evo vwọ wan nu, Pọl da vuẹ Timoti nẹ o rhivwin kpẹ Tẹsalonaika ra nokpẹ rẹ iniọvo na. Ọ guọnọ uduefiogbere o ki se rhivwin kpẹ orere yena ro mwoshọ na! Dede na, Timoti kpẹ oboyin keridie o vwo ọdavwẹ rẹ iniọvo na. Omamọ iyẹnrẹn ọyen ọ nẹ kẹ Pọl ro vwo rhivwin rhe. Iniọvo rehẹ Tẹsalonaika herọ ga sasasa!

Timoti vẹ Pọl wian kugbe ikpe buebun. Pọl tobọ si nẹ, Timoti yen ohwo ro me mwuwan, rẹ ọyen se ji ra vwẹ ukẹcha kẹ ikoko na. Timoti vwo ẹguọnọ ri Jihova, o ji vwo ẹguọnọ kpahen ihwo.

Wo vwo ẹguọnọ kpahen ihwo, wọ je guọnọ chọn ayen uko vwọ riẹn Jihova?— Wo de ru ọtiọyen, ku wo yeren akpọ rẹ omavwerhovwẹn kerẹ Timoti!

SE ẸKPO NANA VWẸ BAIBOL WẸN

  • 2 Timoti 1:5; 3:​15

  • Iruo 16:​1-5; 17:​1-​10

  • 1 Tẹsalonaika 3:​2-7

  • Filipae 2:​19-​22