Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

 UYOVWINROTA 22

Uvie na Che Ru Ọhọre rẹ Ọghẹnẹ Vwẹ Otọrakpọ Na

Uvie na Che Ru Ọhọre rẹ Ọghẹnẹ Vwẹ Otọrakpọ Na

ỌDAVWẸ RẸ UYOVWINROTA NA

Uvie na che ru oborẹ Ọghẹnẹ veri eje kpahen ihworakpọ vẹ akpọ na

1, 2. (a) Diesorọ ọ vwọ bẹn ọke evo re vwo vwo imuẹro ọgangan kpahen Iparadaisi na? (b) Die yen sa nẹrhẹ esegbuyota rẹ avwanre kpahen ive rẹ Ọghẹnẹ ganphiyọ?

OMA ghwọrọ oniọvo ọshare ọvo te uyono. Ohwo ro ruiruo kẹ laghọ mamọ vwobẹ iruo, o vwo oghwa ọhọhọhọ rọ vwọ vwẹrote orua rọyen, aye rọyen je muọga ọgangan. A vwọ ton une rẹsosuọ phiyọ, o de kuẹwẹn totọ, oma vwerhenrọ nẹ ọ vẹ iniọvo rọyen hẹ Ọguan Ruvie. Une na shekpahen iphiẹrophiyọ rẹ akpọ kpokpọ na, eta rẹ une na nẹrhẹ o roro kpahen iphiẹrophiyọ na, je mrẹ oma rọyen vwẹ Iparadaisi na. Une nana vwerhọn mamọ, ọ vẹ orua rọyen vwọ so une na kuẹgbe na, ọ da nẹrhẹ iphiẹrophiyọ rọyen ganphiyọ.

2 Oma ji ru we ọtiọyen jovwo re? O ru ihwo buebun re. Dedena, akpeyeren sa dia gangan vwẹ eyeren nana, ọ me nẹrhẹ ọ bẹn re vwo vwo imuẹro ọgangan kpahen Iparadaisi na. Enana “ẹdẹ ebrabra,” akpọ nana nama họhọ iparadaisi kakaka-a. (2 Tim. 3:1) Die yen sa nẹrhẹ iphiẹrophiyọ nana mu avwanre ẹro? Mavọ yen e ru riẹn nẹ Uvie rẹ Ọghẹnẹ che sun ihworakpọ eje kẹrẹkpẹ? E jẹ a fuẹrẹn aroẹmrẹ ri Jihova evo rẹ ihwo rọyen mrẹ orugba rọyen vwẹ ọke rẹ awanre. A je cha fuẹrẹn oborẹ aroẹmrẹ nana vẹ efa vwo ruẹgba asaọkiephana. Ukuotọ rọyen, ka cha tẹnrovi oborẹ aroẹmrẹ nana che rugba wan vwẹ obaro na.

Oborẹ Jihova Vwo Ru Obo ro Veri Vwẹ Ọke rẹ Awanre

3. Ive vọ yen bọn ihwo ri Ju re mu kpo ẹviẹn vwẹ Babilọn gan?

3 Roro kpahen oborẹ akpeyeren hepha vwọ kẹ ihwo ri Ju rehẹ ẹdia rẹ eviẹn vwẹ Babilọn vwẹ ẹgbukpe ujorin esan a ke rhe mrẹ ọke ri Kristi. Oboyin yen buebun rayen dia ghwanre, ọtiọyen ji te esẹ vẹ ini rayen, akpeyeren gan kẹ ayen mamọ. Ihwo ri Babilọn ke vwẹ ayen jehwẹ kidie ayen se Jihova gbuyota. (Une 137:1-3) Vwẹ uvwre rẹ ikpe nana eje, ihwo ri Ju na je yọnrọn iphiẹrophiyọ nana: Jihova veri nẹ ọ cha rhoma vwẹ ayen rhivwin kpo ẹkuotọ rayen. Jihova tare nẹ ekuakua che yovwin kẹ ayen vwẹ oboyin. Ọ tobọ  vwẹ otọ rẹ ayen cha dia ọke yena vwo dje ogba rẹ Idẹn, kọyen iparadaisi! (Se Aizaya 51:3.) Ive nana vwo imuẹro vwọ kẹ ihwo rẹ Ọghẹnẹ, o ji si iroro ivivẹ vwo nẹ ubiudu rayen. Vwẹ idjerhe vọ? E jẹ a fuẹrẹn aroẹmrẹ evo.

4. Mavọ yen Jihova vwọ vwẹ imuẹro kẹ ihwo ri Ju kpahen ofuvwegbe rọ cha dia ẹkuotọ rayen?

4 Ofuvwegbe. Ọ dia iparadaisi yen ihwo ri Ju na che rhivwin ra-a, ukperẹ ọtiọyen ayen che rhivwin kpo otọ rayen ra kpairoro vrẹ te ẹgbukpe 70 re, buebun rayen je tobọ rhiẹromrẹ otọ na-a. Vwẹ ọke yena, ikpohrokpo vọn asan eje dẹn, ọtiọyen ji te ubido, edjẹnẹkpo vẹ eranvwe efa re djoma. Ọgbuyovwin rẹ orua se roro, ‘Mavọ me sa vwọ sẹro rẹ aye mẹ vẹ emọ mẹ? Mavọ me sa vwọ sẹro rẹ igodẹ vẹ ekẹtẹkẹtẹ mẹ?’ Iroro nana ghini se rhe ohwo. Gbe ji roro kpahen oborẹ ive rẹ Ọghẹnẹ rọhẹ Aizaya 11:6-9 che vwo ru udu rayen gan. (Se.) Womarẹ eta nana, Jihova da vwẹ imuẹro kẹ ihwo ri Ju na nẹ emu vuọvo che ru ayen vẹ uchuru raye-en. Okpohrokpo kọ cha re odi kidie ayen cha re uchuru rẹ ihwo ri Ju na-a. Oshọ rẹ eranvwe re djoma rhe che mu ihwo re fuevun na-a. Jihova veri nẹ ọ cha sẹro rẹ ihwo rọyen vwẹ otọ ri Juda na, tobọ ji te aton vẹ egbo.—Izi. 34:25.

5. Aroẹmrẹ vọ yen vwẹ ukẹcha kẹ ihwo ri Ju rehẹ ẹdia rẹ eviẹn jovwo vwo vwo imuẹro nẹ Jihova cha vwẹrote edavwẹ rayen?

5 Emu buebun. Iroro efa je sa vwomaphia. ‘Me sa vwẹrote orua mẹ vwẹ evun rẹ otọ na? Tivọ yen avwanre cha dia? Iruo cha dia, o che yovwin vrẹ owian ọgangan rẹ avwanre wianre ọke rẹ avwanre vwọ hẹ eviẹn?’ Jihova kpahenphiyọ enọ nana womarẹ aroẹmrẹ sansan. Jihova veri nẹ osio cha nabọ rhọ; ekankọn rẹ ihwo rọyen “ki che yovwi buebu.” (Aiz. 30:23) Vwọ kpahen asan rẹ ayen cha dia, vẹ iruo rẹ ayen che ru, Jihova de ve kẹ ihwo rọyen: “Ayen ke bọn iwevwi kẹ ayen dia evun rayen, ayen ke kọn ogba ri vain kẹ ayen re emamọ rọye. Ayen gbe bọn rẹ ohwo ọfa da dia-a; ayen gbe kọn re ohwo da riọ-ọ.” (Aiz. 65:21, 22) Akpọ rayen che ghini yovwin vrẹ ọke rẹ ayen vwọ hẹ ẹdia rẹ eviẹn vwẹ Babilọn. Kẹ ebẹnbẹn rọ ma rho rọ nẹrhẹ e mu ayen kpo eviẹn na vwo?

6. Die yen va ihwo rẹ Ọghẹnẹ abọ, kẹ imuẹrọ vọ yen Jihova vwọ kẹ ayen?

6 Omamọ oyerinkugbe vẹ Ọghẹnẹ. Tavwen e ki mu ihwo rẹ Ọghẹnẹ kpo eviẹn, ayen vẹ Jihova vwo omamọ oyerinkugbe-e. Womarẹ ọmraro Aizaya, Jihova da vuẹ ihwo rọyen: “Uyovwi na ejobi rọ mwọga, udu na ejobi oma rọ rhọ.” (Aiz. 1:5) Ẹro rayen rhuru, erhọ rayen ji din kidie ayen rhọnvwe kerhọ rẹ uchebro ri Jihova-a, ayen ji rhurhu ẹro rayen vwọ kẹ elo rọyen. (Aiz. 6:10; Jer. 5:21; Izi. 12:2) Ihwo ri Ju ri che rhivwin na de ji vwo ebẹnbẹn nana, kẹ ofuvwegbe vọ yen ayen che vwo? Ọnana rha nẹrhẹ oyerinkugbe  rayen vẹ Jihova rhoma va ayen abọ? Jihova de ve kẹ ayen: “Vwẹ ẹdẹ yena idierhọn ki che nyo eta rẹ ọbe, vwẹ evun rẹ oma emuophihọ kugbe ebri rayen ẹro rẹ orhuẹro cha mrẹ.” (Aiz. 29:18) Jihova che ghini sivwin ihwo rọyen rọ ghwọku na, ri ji kurhẹriẹ nure na. Ayen da vwomakpotọ ọkieje, kọ cha kẹ ayen odjekẹ vẹ ọmrẹvughe rọ sa nẹrhẹ ayen vwo arhọ.

7. Mavọ yen ive rẹ Ọghẹnẹ ve kẹ ihwo rọyen re mu kpo eviẹn vwo rugba, diesorọ orugba yena vwọ bọn esegbuyota avwanre gan?

7 Jihova ru obo ro veri na? A sa mrẹ ẹkpahọnphiyọ na vwo nẹ obo re phiare. Ihwo ri Ju ri rhivwin kpo otọ rayen na rhiẹromrẹ ofuvwegbe vẹ emu buebun, ayen vẹ Jihova je rhoma vwo omamọ oyerinkugbe. Kerẹ udje, Jihova sẹro rẹ ihwo rọyen vwo nẹ abọ rẹ ihwo re riariẹ ayen phiyọ, ihwo nana gan vrẹ ayen ji bun vrẹ ayen. Eranvwe re djoma ji hwe uchuru raye-en. Ihwo ri Ju na mrẹ ẹbẹre otete rẹ orugba rẹ aroẹmrẹ rẹ iparadaisi rẹ emraro kerẹ Aizaya, Jerimaya kugbe Izikiẹl mrẹre; ẹkẹvuọvo oborẹ ayen mrẹre kẹ ayen omavwerhovwẹn, ọ je vọn ayen evun vwẹ ọke yena. E de roro kpahen oborẹ Jihova ru kẹ ihwo rọyen ọke yena, ọ cha nẹrhẹ esegbuyota rẹ avwanre ganphiyọ. Orugba rẹsosuọ na da sa vọn vẹ omavwerhovwẹn, kẹ mavọ yen orugba rode na cha dia? E jẹ e djekpahen oborẹ Jihova ruẹ kẹ avwanre nonẹna.

Oborẹ Jihova Vwọ Ton Orugba rẹ Ive Rọyen Phiyọ Vwẹ Ọke Avwanre Na

8. Oka rẹ “otọ” vọ yen ihwo rẹ Ọghẹnẹ riavwerhen rọyen nonẹna?

8 Ihwo ri Jihova eje dia asan ọvuọvo nonẹna-a. Ukperẹ ọtiọyen, ihwo ra jẹreyọ na, eyen ihwo rehẹ ẹgborho rẹ ẹwẹn, rọ dia “Izrẹl rẹ Ọghẹnẹ.” (Gal. 6:16) Irivẹ rayen re dia “igodẹ efa” na, yen kuomakugbe ayen vwọ dia “otọ na,” kọyen asan rẹ ayen da ga Jihova Ọghẹnẹ kuẹgbe. Ẹga rayen yen ayen vwọ kobaro vwẹ akpeyeren rayen. (Jọn 10:16; Aiz. 66:8) Oka rẹ “otọ” vọ yen Jihova vwọ kẹ avwanre? Iparadaisi rẹ ẹwẹn. Ọghẹnẹ veri nẹ iparadaisi nana cha họhọ ogba rẹ Idẹn, a mrẹ orugba nana re. E jẹ a fuẹrẹn idje evo.

9, 10. (a) Mavọ yen aroẹmrẹ rọhẹ Aizaya 11:6-9 vwo ruẹgba nonẹna? (b) Die yen djerephia nẹ ihwo rẹ Ọghẹnẹ ghini vwo ufuoma vwẹ uvwre rayen?

9 Ofuvwegbe. Vwẹ aroẹmrẹ rọhẹ Aizaya 11:6-9, e djere phephẹn nẹ ufuoma vẹ oyerinkugbe cha dia uvwre rẹ eranvwe re djoma vẹ ihworakpọ kugbe eranvwe re djoma-a. Aroẹmrẹ nana ji vwo orugba ọfa nonẹna? E! Vwẹ owọ 9, avwanre mrẹ oboresorọ rẹ eranvwe nana che vwo jẹ ohwo oma ẹwan: “Kidie akpọ na cha vọn vẹ erianriẹn rẹ Ọrovwohwo kirobo rẹ ame vọn urhie na.” “Erianriẹn rẹ Ọrovwohwo” se wene uruemu rẹ eranvwe? Ẹjo, ọnana shekpahen ihwo ri wene uruemu rayen womarẹ erianriẹn rẹ  Ọghẹnẹ rẹ ayen vwori, ayen ke je davwẹngba vwọ vwẹrokere iruemu rọyen. Kọyensorọ avwanre vwọ mrẹ orugba rẹ aroẹmrẹ nana nonẹna. Vwẹ otọ rẹ usuon rẹ Uvie na, idibo ri Jesu nabọ yono oborẹ ayen se vwo siobọnu ozighi vẹ uruemu ra vwọ djoma kerẹ eranvwe, kẹ ayen vẹ iniọvo rayen yerẹn vwọrẹ ufuoma vẹ oyerinkugbe.

10 Kerẹ udje, vwevunrẹ ọbe nana, avwanre ta ota kpahen oboresorọ avwanre vwo jẹ ẹbẹre ọvo rẹ akpọ na ẹka vẹ omukpahen rẹ ihwo rẹ Ọghẹnẹ rhiẹromrẹ kidie ayen hẹ ẹbẹre ọvo rẹ akpọ na-a. Ọ vwerhoma nẹ vwẹ akpọ nana rọ vọnre vẹ ozighi na, a je mrẹ ihwo ri bun te ọsoso “ẹgborho,” re rhọnvwe vwobọ vwẹ ozighi-i dede nẹ ayen hirharoku ughwu! Ọnana djerephia dẹn nẹ ihwo rehẹ otọ rẹ Ovie na ghene riavwerhen rẹ ufuoma rẹ Aizaya djisẹ rọyen! Jesu tare nẹ ẹguọnọ yen e che vwo vughe idibo rọyen. (Jọn 13:34, 35) Vwevunrẹ ukoko na, Jesu reyọ “odibo esiri na” vwo yono Inenikristi eje oborẹ ayen sa vwọ dia ihwo rẹ ufuoma, ri vwo ẹguọnọ, re je pha dẹndẹn.—Mat. 24:45-47.

11, 12. Oka rẹ owẹnvwe vọ yen hwe ihworakpọ nonẹna, kẹ idjerhe vọ yen Jihova vwọ ghẹrẹ ihwo rọyen?

11 Emu buebun. Owẹnvwe rẹ Ota rẹ Ọghẹnẹ hwe akpọ na nonẹna. Baibol na da ta: “Nighere, ẹdẹ cha, eriyin Ọrovwohwo  Ọghẹnẹ tare, re me cha vwẹ owẹvwe rhe otọ na; ọ di owẹvwe rẹ emuọre-e, yẹrẹ ọrẹ urhurame-e, ẹkẹvuọvo owẹvwe rẹ ota rẹ Ọrovwohwo.” (Emọs 8:11) Owẹnvwe nana ji hwe emotọ rẹ Uvie na? Jihova je mraro kpahen oborẹ idibo rọyen vẹ ivwighrẹn rọyen che rhiẹromrẹ: “Idibo mẹ cha re emu, ẹkẹvuọvo owẹvwe che hwe we; nighere, idibo me cha da udi, ẹkẹvuọvo urhuru che hwe we; nighe, idibo mẹ cha ghọghọ, ẹkẹvuọvo oma cha vo owẹ.” (Aiz. 65:13) Wọ mrẹ orugba rẹ eta nana re?

12 Eta rẹ Ọghẹnẹ muavwan bru avwanre cha kerẹ urhie rọ pha hẹhẹre ro ji kodo. Ẹbe ukoko na, ividio vẹ uhworo, uyono vẹ emẹvwa, kugbe erọnvwọn efa buebun rehẹ Wẹbsaiti rẹ avwanre; enana eje idjerhe rẹ Jihova vwọ kẹ avwanre uchebro, ẹkẹvuọvo uchebro nana kanre akpọ na. (Izi. 47:1-12; Joẹl 3:18) Oma vwerhen owẹ wọ vwọ mrẹ nẹ ive ri Jihova ro shekpahen emu buebun na ruẹgba vwẹ akpeyeren wẹn? Wọ riemu vwẹ imẹjẹ ri Jihova kọke kọke?

Ukoko na nẹrhẹ e vwo omamọ oyerinkugbe vẹ Jihova, ọ sẹro rẹ avwanre, ọ je nẹrhẹ avwanre sasa vwevunrẹ ẹga na

13. Wọ mrẹ orugba rẹ ive ri Jihova ro shekpahen orhuẹro rọ mrorẹ yẹrẹ odierhọ ro nyẹme re?

13 Omamọ oyerinkugbe vẹ Ọghẹnẹ. Nonẹna ẹro rẹ ihwo buebun rhuru, erhọ rayen ji din. (2 Kọr. 4:4) Dedena, Jesu sivwin ega nana nonẹna. Wọ mrẹ orhuẹro rọ mrorẹ re, yẹrẹ odierhọ ro nyẹme re? Wọ da mrẹ ihwo ri rhi vwo erianriẹn rẹ Ọghẹnẹ, ayen de ji siobọnẹ iyono efian ri rhuẹro rayen ji dierhọ rayen jovwo, kọyen wọ mrẹ orugba rẹ ive nana re: “Vwẹ ẹdẹ yena idierhọn ki che nyo eta rẹ ọbe, vwẹ evun rẹ oma emuophihọ kugbe ebri rayen ẹro rẹ orhuẹro cha mrẹ.” (Aiz. 29:18) Vwẹ akpọneje, kukpe kukpe yen ihwo ri te uriorin asakuẹ ujorin buebun vwọ mrẹ usivwin nana. Kohwo kohwo ro vrẹn nẹ Babilọn Rode, ọ da vwomaba avwanre vwẹ ẹga ri Jihova, jẹ o ru ive rẹ Ọghẹnẹ nana gba!

14. Die yen e che roro kpahen rọ cha bọn esegbuyota rẹ avwanre gan?

14 Uyovwinrota ọvuọvo rẹ ọbe nana vọnre vẹ imuẹro nẹ vwẹ ọke rẹ oba nana, Jesu sun idibo rọyen vwọ ro iparadaisi rẹ ẹwẹn re. E jẹ a vwẹ ọkieje vwo roro kpahen ebruphiyọ sansan rẹ iparadaisi yena vwọ kẹ avwanre nonẹna. E de ru ọtiọyen, esegbuyota re vwo kpahen ive ri Jihova ri shekpahen obaro na kọ cha ganphiyọ.

“Jẹn Uvie Wẹn Rhe”

15. Diesorọ avwanre vwo vwo imuẹro nẹ akpọ na cha dia iparadaisi?

15 O krire rẹ Jihova vwọ guọnọ nẹ akpọneje dia iparadaisi. O phi Adam vẹ Ivi phiyọ ogba oyoyovwin, ọ da vuẹ ayen nẹ ayen vwiẹ akpọ na vọn je vwẹrote emama re herọ eje. (Jẹn. 1:28) Ukperẹ ọtiọyen, Adam vẹ Ivi de nene Eshu vwo gbevwọso, ọ da nẹrhẹ emọ rayen eje riuku rẹ jẹgba, umwemwu, kugbe ughwu. Dedena, ọhọre rẹ Ọghẹnẹ ji rhi  wene-e. Obo rọ tare eje ruẹgba. (Se Aizaya 55:10, 11.) Ọtiọyena, avwanre se vwo imuẹro nẹ emọ rẹ Adam vẹ Ivi je cha vọn akpọ na je vwẹrote emama rẹ Ọghẹnẹ vwẹ akpọ rọ cha dia iparadaisi. Vwẹ ọke yena, akpeyeren rọ pha kerẹ iparadaisi ra mraro rọyen vwọ kẹ ihwo ri Ju re mu kpo eviẹn jovwo na, ko che rhi rugba vọnvọn! E jẹ a fuẹrẹn idje evo.

16. Mavọ yen Baibol na djisẹ rẹ ofuvwegbe rẹ avwanre cha riavwerhen rọyen vwẹ Iparadaisi?

16 Ofuvwegbe. Ukuotọ rọyen, ka cha mrẹ orugba rode rẹ obo re djisẹ rọyen vwẹ Aizaya 11:6-9. Oma ko che fun eshare, eya vẹ imitete vwẹ kasan kasan. Ohwo vuọvo yẹrẹ eranvwe vuọvo cha djẹ uguegue mu ohwo-o. Roro kpahen obo rọ cha dia rẹ akpọneje da rhe dia uwevwin wẹn, wọ sa rhẹrhẹ vwẹ irhie, ẹtẹrhe, kugbe abadi; wo se yerin igbenu ride; wọ sa yan vwẹ ẹghwa ride, oshọ che mu we-e. Ason da tobọ te, udu che bru we-e. Eta rẹ Izikiẹl 34:25 ko che rugba, ihwo rẹ Ọghẹnẹ ke cha “dia dẹndẹn vwẹ evun rẹ aton na rere ayen rhe shevwerhẹ vwẹ evun rẹ egbo na.”

17. Diesorọ avwanre vwo vwo imuẹro nẹ Ọghẹnẹ che ru ọdavwe avwanre ọke rẹ Uvie na de sun akpọ na re?

17 Emu buebun. Vwẹ ẹro roro ọke rẹ ọbẹnvwẹ che vwo no, ji te owẹnvwe, kugbe re vwo jẹ omamọ emu ẹriọ. Erọnvwọn buebun rẹ ihwo rẹ Ọghẹnẹ riavwerhen rọyen nonẹna kẹ avwanre imuẹro nẹ Ovie na cha ghẹrẹ ihwo rọyen vwẹ kẹdia kẹdia. Ọke rẹ Jesu vwọ hẹ akpọ na, o djerephia nẹ o se ru ive nana gba, rọ vwọ vwẹ imibrẹdi vẹ imiyerin vwọ ghẹrẹ ihwo uriorin buebun. (Mat. 14:17, 18; 15:34-36; Mak 8:19, 20) Uvie rẹ Ọghẹnẹ de sun akpọ na re, aroẹmrẹ nana ko che rugba dẹn: “Kọ rhọ osio phihọ emamọ ra kọn phihọ otọ na, te eka vẹ obo ra kọn phihọ otọ na ejobi, ki che yovwi buebu. Vwẹ ẹdẹ yena uchuru wẹn ke cha re odi vwẹ asan ọrhuarho.”—Aiz. 30:23.

18, 19. (a) Die yen aroẹmrẹ rohẹ Aizaya 65:20-22 mudiaphiyọ kẹ wẹn? (b) Die yen o mudiaphiyọ ẹdẹ rẹ avwanre vwọ dia kerẹ “ẹdẹ rẹ urhe”?

18 Nonẹna, ọ pha bẹnbẹn ihwo buebun vwo vwo uwevwin robọ rayen, yẹrẹ tobọ mrẹ omamọ rẹ iruo. Vwẹ akpọ nana rọ pha gangan na, ihwo buebun wian mamọ, dedena, ayen sa vwẹrote orua raye-en, jẹ edafe na vẹ ivwirhuru na bono igho na eje reyọ. Vwẹ ẹro roro obo rọ cha dia siẹrẹ aroẹmrẹ nana de rhi rugba nu: “Ayen ke bọn iwevwi kẹ ayen dia evun rayen, ayen ke kọn ogba ri vain kẹ ayen re emamọ rọye. Ayen gbe bọn rẹ ohwo ọfa da dia-a; ayen gbe kọn re ohwo da riọ-ọ; kidie kirobo rẹ ẹdẹ rẹ urhe cha dia ọtiọye ẹdẹ rẹ ihwo mẹ cha dia, ihwo mẹ re me jẹreyọ na ke cha ghọghọ krekri vwẹ iruo rẹ ayen vwẹ abọ rayen ru.”—Aiz. 65:20-22.

19 Die yen o mudiaphiyọ ẹdẹ rẹ avwanre vwọ dia kerẹ “ẹdẹ rẹ urhe”? Wo de mudia obotọ rẹ okpurhe rode, o gbewunu  siẹrẹ wo de roro kpahen ikpe rẹ urhe nana diarọ re, ọkiọvo ọ tobọ vien ọsẹ rẹ ọsẹ wẹn rode? Ẹwẹn wẹn sa vuẹ wẹ nẹ vwevunrẹ akpọ nana, wọ da tobọ ghwu nu, urhe nana ji che yerin vwẹ ọke grongron vwẹ ẹdia rẹ ufuoma. Ọ vwerhoma ra vwọ riẹn nẹ Jihova kẹ avwanre imuẹro nẹ vwẹ Iparadaisi na, ẹdẹ rẹ avwanre cha dia grongron vẹ ufuoma! (Une 37:11, 29) Ẹdẹ cha rẹ urhe re diarọ krire cha vwọ dia kerẹ odi rọ fobọ ghwẹ, kidie avwanre cha dia bẹdẹ bẹdẹ!

20. Mavọ yen ihwo rehẹ otọ rẹ usuon rẹ Uvie na che vwo vwo omakpokpọ?

20 Omakpokpọ. Nonẹna, ega vẹ ughwu te kohwo kohwo oma. A sa tanẹ avwanre eje muọga, e se orharhe ọga nana umwemwu. Izobo rẹ ọtanhirhe ri Jesu ọvo yen se sivwin ọga nana. (Rom 3:23; 6:23) Vwẹ Usuon rẹ Ẹgbukpe Uriorin na, Jesu vẹ ihwo ri che nene sun cha vwẹ ukẹcha kẹ ihwo vwọ mrẹ erere vwo nẹ izobo yena rhe, ememerha na, ayen che si umwemwu eje vwo nẹ oma rẹ ihworakpọ. Aroẹmrẹ rẹ Aizaya nana kọ cha nabọ rugba vọnvọn: “O gbi vwo ohwo rẹ orere na ọvuọvo rọ sa tanẹ, Me mwọga-a; ihwo re dia etiyin ka vwẹ orukuruku rayen ghovwo ayen.” (Aiz. 33:24) Vwẹ ọke yena, ohwo vuọvo rhe che rhuẹro, dierhọ, yẹrẹ dia ukpono-o. (Se Aizaya 35:5, 6.) O vwo ọga vuọvo rọ cha bẹn esivwo vwọ kẹ Jesu-u, owenẹ ọ dia ọga rẹ ugboma yẹrẹ ọ rẹ iroro. Ihwo rehẹ otọ rẹ usuon rẹ Uvie na che vwo omakpokpọ!

21. Die yen cha phia kẹ ughwu, diesorọ ive yena vwọ nẹrhẹ udu wẹn gan?

21 Kẹ die yen cha phia kẹ ughwu rọ dia osa rẹ umwemwu na? “Ọvweghrẹ rọ ka uko” nana, ọyen ọvweghrẹn rẹ ihworakpọ ri jẹgba se phikparobọ-ọ. (1 Kọr. 15:26) Ẹkẹvuọvo, ughwu ghini ọvweghrẹn ro vwo ẹgba vrẹ Jihova? Jokaphiyọ oborẹ Aizaya mraro rọyen: “Ko mu ughwu rọ bẹdẹ, Ọrovwohwo rẹ Ọghẹnẹ ko ririe oviẹ nẹ opharo rayen.” (Aiz. 25:8) Wọ sa vwẹ ẹwẹn roro obo rọ cha dia vwẹ ọke yena? Ughworivwin vẹ asan re shi ihwo phiyọ rha cha dia-a, ameoviẹ rẹ omaemuophiyọ ji che no! Ukperẹ ọtiọyen, ameoviẹ rẹ aghọghọ kọyen cha dia vwẹ ọke rẹ Jihova da cha rhọnvwọn ihwo ri ghwuru nushi kirobo ro veri! (Se Aizaya 26:19.) Ukuotọ rọyen, ọmiaovwẹ rẹ ughwu soro eje ki che no riẹriẹriẹ.

22. Die yen cha phia ọke rẹ Uvie na de ru ọhọre rẹ Ọghẹnẹ vwẹ akpọ na nu?

22 Vwẹ oba rẹ Ẹgbukpe Uriorin na, Uvie na de ru ọhọre rẹ Ọghẹnẹ vwẹ akpọ na nu, Jesu kọ cha vwẹ usuon na vwọ kẹ Ọsẹ rọyen. (1 Kọr. 15:25-28) Ihworakpọ eje ke cha dia gbagba, kẹ ayen ji che hirharoku ọdavwini rọ koba ọke re de siobọnu Eshu vwo nẹ ukpotọ ro jẹ oba evwo na nu. Ọyena da wan nu, Jesu kọ cha ghwọrọ ọrọdekọ umwemwu  na vẹ usun rọyen eje. (Jẹn. 3:15; Ẹvwọ. 20:3, 7-10) Ẹkẹvuọvo, ihwo eje ri vwo ẹguọnọ ri Jihova che vwo omamọ rẹ iphiẹrophiyọ. Ọkiọvo a cha sa mrẹ eta re che vwo dje ọke yena vwọ vrẹ oborẹ Baibol na veri-i. O veri nẹ idibo rẹ Ọghẹnẹ nana che “vwo urinrin rẹ egbemọphẹ rẹ emọ rẹ Ọghẹnẹ.”—Rom 8:21.

Uvie na che ru oborẹ Ọghẹnẹ veri eje kpahen ihworakpọ vẹ akpọ na

23, 24. (a) Diesorọ orugba rẹ ive ri Jihova vwo muẹro? (b) Die yen wo che ru asaọkiephana?

23 Enana dia ive ghevweghe-e, yẹrẹ evwerhẹ-ẹn. Omuẹro nẹ ive ri Jihova che rugba! Diesorọ? Karophiyọ eta ri Jesu ra ta ota kpahen vwẹ uyovwinrota rẹsosuọ rẹ ọbe nana. O yono idibo rọyen nẹ ayen nẹrhovwo rhe Jihova: “Jẹn uvie wẹn rhe, ru ẹguọnọ wẹn vwẹ akpọ na kirobo re ruẹ vwẹ obo odjuvwu.” (Mat. 6:9, 10) Uvie rẹ Ọghẹnẹ dia obo re di roro vwẹ ẹwẹ-ẹn. Ọnana obọdẹn rẹ usuon dẹn! O suẹn vwẹ odjuvwu re. Vwẹ omarẹ ẹgbukpe ujorin re na, avwanre nabọ mrẹ phephẹn nẹ o ru orugba rẹ ive ri Jihova vwevunrẹ ukoko rẹ Inenikristi. Ọtiọyena, avwanre se vwo imuẹro nẹ ive ri Jihova eje che rugba ọke rẹ usuon rẹ Uvie rẹ Ọghẹnẹ de te otọrakpọ na re!

24 Avwanre riẹnre nẹ Uvie rẹ Ọghẹnẹ cha rhe. Avwanre je riẹn nẹ ive ri Jihova eje che rugba. Diesorọ? Kidie UVIE RẸ ỌGHẸNẸ SUẸN RE! Onọ ro fori nẹ ohwo ọvuọvo nọ oma rọyen kẹ ọna, ‘Uvie na yen sun vwe?’ E jẹ a davwẹngba eje vwo yerin kerẹ emotọ rẹ Uvie na asaọkiephana, rere avwanre sa vwọ mrẹ erere vwo nẹ usuon ọgbagba rọyen bẹdẹ bẹdẹ!