Pho kpẹ obo revun rọyen

Pho kpẹ ẹrhuẹrẹhọ robo rehẹ evun rọyen

Obohwẹre: Orua ri Bẹtẹl rọhẹ Brooklyn ru Ikrismasi rayen rọ koba vwẹ 1926; obọrhen: Ihwo nosua nẹ Iseri ri Jihova fẹnẹre

 ẸBẸRE 3

Irhi rẹ Uvie NA—Guọnọ Ọvwata rẹ Ọghẹnẹ

Irhi rẹ Uvie NA—Guọnọ Ọvwata rẹ Ọghẹnẹ

 WO KPOGHO obọ kẹ ohwo ọvo rọ dia kẹrẹ owẹ ọke wọ vwọ wanvrẹ. Okrinọ na-a, wo niroso nẹ ọkieje yen ohwo nana vwo ni we vẹ orua wẹn. O de ji kpogho obọ kẹ wẹ, o de djuobọ kẹ wẹ nẹ wọ yanrhe. Ọ da ta: “Biko, me guọnọ nọ wẹ onọ ọvo. Diesorọ ovwan vwọ fẹnẹ?” Wọ da kpahen kẹ: “Onọ na ro vwẹ-ẹ.” Ọ da ta: “Wẹ dia Oseri ri Jihova? Ovwan fẹnẹ ihwo efa. Ẹga ovwan je fẹnẹ ẹga efa—we ru erẹ rẹ ẹga efa ruẹ na-a, ovwan vwobọ vwẹ oseghe rẹ usuon vẹ ifovwi-in. Ovwan phopho isigati-i. Mi niro nẹ orua wẹn vwo omamọ uruemu. Diesorọ ovwan vwọ fẹnẹ vwẹ idjerhe nana eje?”

Wọ riẹnre nẹ ẹkpahọnphiyọ na bẹnre-e: Kidie avwanre hẹ otọ rẹ usuon rẹ Uvie rẹ Ọghẹnẹ. Jesu rọ dia Ovie na ru avwanre fuan ọkieje. Ọ vwẹ ukẹcha kẹ avwanre vwo nene udje rọyen, kọyensorọ avwanre vwọ fẹnẹ akpọ umwemwu nana. Vwẹ ẹbẹre nana, avwanre cha mrẹ oborẹ Uvie na vwo ruẹ ẹga, uruemu vẹ ukoko rẹ ihwo rẹ Ọghẹnẹ fuan, e vwọ ghwa urinrin rhe Jihova.

E REHẸ ẸBẸRE NANA

UYOVWINROTA 10

Ovie na Ruẹ Ẹga rẹ Ihwo Rọyen Fuan

Idjerhe vọ yen Ikrismasi vẹ agbagba vwọ họhọ ohwohwo?

UYOVWINROTA 11

E Ru Uruemu rẹ Ihwo rẹ Ọghẹnẹ Fon—Odjephia rẹ Ofuanfon rẹ Ọghẹnẹ

Erhẹrotọ na vẹ anurhoro ra wan ro uwevwin ẹga na vwẹ emramrẹ rẹ Izikiẹl na vwo obo ri mudiaphiyọ vwọ kẹ idibo rẹ Ọghẹnẹ rhanvwẹ 1914 rhire na.

UYOVWINROTA 12

E Koko Avwanre A Vwọ Ga “Ọghẹnẹ rẹ Ufuoma” Na

Baibol na reyọ ozighi vwọ fẹnẹ uruemu re vwo nene ọrhuẹrẹphiyotọ-ọ, ẹkẹvuọvo ọ reyerọ vwọ fẹnẹ ufuoma. Diesorọ? Mavọ yen ẹkpahọnphiyọ na vwo djobọte Inenikristi?